MOSIS KƐŊ IZIRAL TƖŊŊAA LƖƖ 36

1Bɛzalɛl arɩ Oholiab arɩ nɩalɩŋ kala La TƖƖNA sɩ joŋ tɩntɩŋ-dosunuŋ kala tɩmɩŋ jɩma pa dɩ ba wuo tɩŋ ʋ dɩ-zɔŋ-la tɩntɩŋŋaa, maga dɩ ba tɩŋ arɩ La TƖƖNA sɩ dagɛ ŋɩɩ nɛ.”

2Ŋɩɩ nɛ Mosis yɩrɛ Bɛzalɛl arɩ Oholiab arɩ nɩalɩŋ kala La TƖƖNA sɩ joŋ tɩntɩŋŋaa jɩma pa arɩ nɩalɩŋ kala sɩ cho dɩ ba tɩŋ tɩntɩmɩɩ-la, ba kɔ dɩ ba tɩŋ. 3Ba kɔ a laa kɩalɩŋ kala Iziral tɩŋŋaa sɩ kaa kʋ pɩ Mosis dɩ ba kaa tɩŋ Wɩa dɩ-zɔŋ-la tɩntɩŋŋaa. Ka ba ha kɛŋ ba tʋɔtɔrɛ Wɩɩsʋlʋŋ kɩaa kʋkɔ chʋchʋɔ na-kala. 4Ŋɩɩ nɛ nɩalɩŋ kala sɩ kɛŋ jɩma aa tɩŋ Wɩa dɩ-zɔŋ-la tɩntɩŋŋaa leŋ ba tɩntɩŋŋaa, 5aŋ bʋla pɩ Mosis, “Kɩalɩŋ nɩalɩŋ sɩ kaa kɔ dɩ la kaa tɩŋ tɩntɩmɩɩ-la La TƖƖNA sɩ dagɛla, ba yʋga kieli nɛ.”

6Ŋɩɩ nɛ Mosis leŋ ba heeli ba dɩhɔnʋŋ arɩ nʋʋkala bɩra sɩ́ kʋŋ kaa kʋ pɩ La TƖƖNA a mʋʋ tɩgɛ Wɩa dɩ-zɔŋ-la tɩntɩŋŋaa lɛ. Ŋɩɩ nɛ ba pɔ dɩ nɩalɩŋ bɩra sɩ́ kɩalɩŋ kaa kɔ, 7bɛɛ wɩaa kɩalɩŋ ba sɩ kaa kɔ paala yʋga kɩɩ tɩntɩmɩɩ-la nɛ.

Wɩa dɩ-zɔŋ-la

8Nɩalɩŋ tʋɔŋ, gɔgɔɔ kɛŋ ŋmɛŋ-tʋlaa, ŋmɛŋ-diibelimbine, ŋmɛŋ-vachalɩŋ arɩ ŋmɛŋ-fɩaŋ a yuo gɛrɩpɛɛŋ a yɛrɛ patɩɩsamba fii a sʋa kɩaa hɛ ba lɛ ba nagɛ Wɩa tɩndaaraa a kɛŋ kɩŋkɛnsɩŋ. Ba kɛŋ patɩɩsamba-la ŋaa Wɩa dɩ-zɔŋ-la. 9Ba yɛrɛ patɩɩsamba-la ba kala magɛ dɔŋɔ nɛ, kʋŋkala duomuŋ ŋaa yaadɩ fii arɩ banɛsɛ, jalɩŋ ma ŋaa yaadɩ balɩa. 10Ba yɛrɛ patɩɩsamba-la banɔŋ a mɛrɛ dɔŋɔ lɛ, a yɛrɛ banɔŋ ma mɛrɛ dɔŋɔ lɛ. 11Ba kɛŋ ŋmɛŋ-diibelimbine a yɛrɛ jolluŋ a hɛ patɩɩsamba-la banɔŋ ba sɩ yɛrɛ mɛrɛ dɔŋɔ niipinee. Ba ŋaa ŋɩɩ tɩtɩa banɔŋ-la ma ba sɩ yɛrɛ mɛrɛ dɔŋɔ lɛ. 12Ba yɛrɛ ŋmɛŋ jolluŋ mahɩŋ balɩa arɩ fii a hɛ patɩɩsamba-la banɔŋ ba sɩ yɛrɛ mɛrɛ dɔŋɔ niipinee lɛ, a yɛrɛ mahɩŋ balɩa arɩ fii ma a hɛ banɔŋ-la ma ba sɩ yɛrɛ mɛrɛ dɔŋɔ niipinee lɛ. Ŋmɛŋ jollu-la chaasɛ dɔŋɔ. 13Ŋɩɩ nɛ ba kɛŋ sɛlɩmɛ ŋaa kʋkaachɛbɛ kɛnɛɛ mahɩŋ balɩa arɩ fii a kɛŋ patɩɩsamba-la a vɔɔ mɛrɛ dɔŋɔ lɛ dɩ ba ŋaa kʋbala.

14Ŋɩɩ nɛ ba kɛŋ bʋ-pʋnaa gɛrɩpɛɛŋ ŋaa patɩɩsamba fii arɩ kʋbala a kaa tɔ Wɩa dɩ-zɔŋ-la nyuŋ. 15Patɩɩsamba-la fii arɩ kʋbala kala magɛ dɔŋɔ nɛ, ba duomuŋ ŋaa yaadɩ fii arɩ banɔŋ, ba jalɩŋ ma ŋaa yaadɩ balɩa. 16Ba yɛrɛ patɩɩsamba-la banɔŋ mɛrɛ dɔŋɔ lɛ a bɩra joŋ balɩdʋ ma a yɛrɛ mɛrɛ dɔŋɔ lɛ. 17Ba ŋaa ŋmɛŋ-jolluŋ mahɩŋ balɩa arɩ fii a hɛ patɩɩsamba-la banɔŋ ba sɩ joŋo mɛrɛ dɔŋɔ niipinee lɛ, a ŋaa mahɩŋ balɩa arɩ fii ma a hɛ balɩdʋ-la ma sɩ mɛrɛ dɔŋɔ niipinee lɛ. 18Ba kɛŋ kɔlɩɩŋ ŋaa kʋkaachɛbɛ kɛnɛɛ mahɩŋ balɩa arɩ fii a hɛ patɩɩsamba-la lɛ a kaa kpere kɛŋ ʋ ŋaa kʋbala. 19Ŋɩɩ nɛ ba kɛŋ pie-bel tenniŋ ba sɩ hɛ biriŋ ba fɩɛsɛ arɩ lɩɩ-nɛsɩŋ tenniŋ a ŋaa Wɩa dɩ-zɔŋ-la nyuŋ tɔlɔ.

20Sɔjaamɩŋ daasɩŋ sɩ tʋʋla nɛ ba kaa ŋaa Wɩa dɩ-zɔŋ-la daapɛsɩŋ. 21Daa-pɛsɩ-la kʋŋkala duomuŋ ŋaa naakieliŋ bʋnɔŋ nɛ, jalɩŋ ma ŋaa naakieli-bala arɩ mʋa. 22Daa-pɛsɩ-la kala ba sɩ kaa ŋaa Wɩa dɩ-zɔŋ-la kʋŋkala bʋbʋɔŋ kɛŋ kerikee balɩa nɛ a challɛ dɔŋɔ. 23Wɩa dɩ-zɔŋ-la wɩɩpɔsʋŋ nadiiŋ, ba ŋaa daapɛsɩŋ mara nɛ a hɛ. 24Ba kɛŋ hɔpʋla nɛ libi hɔ-taalɩsɩŋ sɩ kɛŋ bʋɔsʋŋ mahɩŋ balɩa, dɩ daasɩ-la wuo tʋʋ ba lɛ. Daapɛhɛ na-kala bʋbʋɔŋ kɛŋ balɩa, 25Wɩa dɩ-zɔŋ-la wɩɩpɔsʋŋ nagʋa ma ba ŋaa daapɛsɩŋ mara nɛ a hɛ, 26aŋ kɛŋ hɔpʋla libi hɔ-taalɩsɩŋ sɩ kɛŋ bʋɔsʋŋ kɩaa mahɩŋ balɩa, dɩ daapɛsɩ-la wuo tʋʋ ba lɛ. Daa-kala bʋbʋɔŋ kɛŋ hɔ-taalɩsɩ-la balɩa. 27Wɩa dɩ-zɔŋ-la wɩɩjʋʋlʋŋ dɩɩrɩŋ ba ŋaa daapɛsɩŋ balɩdʋ nɛ a hɛ. 28Wɩa dɩ-zɔŋ-la sɩpaaŋ gʋnaa lɛ daapɛsɩ-la ŋaa balɩa nɛ a mɛrɛ dɔŋɔ. 29Sɩpaaŋ gʋnaa deemba lɛ, ba ŋaa daapɛsɩ-la mɛrɛ dɔŋɔ nɛ a chɩŋ bʋbʋɔŋ a kaa jɩlaa yi nyuŋ a kala tʋʋ nenii-pɩrɩ-bala lɛ. 30Daa-pɛsɩ-la kala ŋaa chori nɛ, hɔpʋla ba sɩ kaa ŋaa hɔ-taalɩsɩ-la sɩ kɛŋ bʋɔsʋŋ daasɩ-la sɩ jaŋ tʋʋ ma ŋaa fii arɩ balɩdʋ, balɩa hɛ daa-kala bʋbʋɔŋ.

31Ŋɩɩ nɛ ba kɛŋ sɔjaamɩŋ daaŋ ŋaa daa-doloo banɔŋ a hɛ Wɩa dɩ-zɔŋ-la sɛmɛ dɔŋɔ, 32a ŋaa banɔŋ ma hɛ sɛmɛ dɔŋɔ, ka banɔŋ hɛ wɩɩjʋʋlʋŋ dɩɩrɩŋ daapɛsɩ-la nyuŋ Wɩa dɩ-zɔŋ-la sɩpaaŋ. 33Ŋɩɩ nɛ ba ŋaa tʋtʋɔbaanɩŋ daa-gɛsɩŋ, ʋ gɛsɛ daapɛsɩ-la nyuŋ a lɩɩ sɛmɛ dɔŋɔ a mʋ yi sɛmɛ dɔŋɔ. 34Ba kɛŋ sɛlɩmɛ nɛ taarɛ daapɛsɩ-la arɩ daa-dolo-la, aŋ libi nenii-pɩraa arɩ sɛlɩmɛ a chɛbɛ kɛŋ daa-dolo-la.

35Ba kɛŋ ŋmɛŋ-diibelimbine, ŋmɛŋ-vachalɩŋ, ŋmɛŋ-fɩaŋ arɩ gɛrɩpɛ fʋfʋlʋŋ nɛ a yɛrɛ patɩɩsaŋ, gɔgɔ sʋa kɩaa hɛ ba nagɛ Wɩa tɩndaaraa a kɛŋ kɩŋkɛnsɩŋ. 36Sɔjaamɩŋ daasɩŋ nɛ ba kaa ŋaa Wɩa dɩ-zɔŋ-la daaterigeba banɛsɛ a kɛŋ sɛlɩmɛ taarɛ, a kɛŋ sɛlɩmɛ ŋaa ba kʋkaachɛbɛ kɛnɛɛ, a kɛŋ hɔpʋla ŋaa hɔ-taalɩsɩ-la sɩ kɛŋ bʋɔsʋŋ daapɛsɩ-la sɩ jaŋ tʋʋ. 37Wɩa dɩ-zɔŋ-la boiŋ niiŋ ba kɛŋ ŋmɛŋ-diibelimbine, ŋmɛŋ-vachalɩŋ, ŋmɛŋ-fɩaŋ arɩ gɛrɩpɛ fʋfʋlʋŋ nɛ yɛrɛ patɩɩsaŋ a kɛrɛ. Nɩɩ-la sɩ jɩŋ gɛnnɩŋ sʋɔnʋŋ nɛ sʋa. 38Ba ŋaa daaterigeba ma banɔŋ arɩ ba kʋkaachɛbɛ kɛnɛɛ a kɛŋ sɛlɩmɛ taarɛ daasɩ-la nyuŋ arɩ bʋbʋɔŋ, aŋ kɛŋ kɔlɩɩŋ ŋaa hɔ-taalɩsɩ-la sɩ kɛŋ bʋɔsʋŋ, dɩ daasɩ-la tʋʋ ba lɛ.

Currently Selected:

MOSIS KƐŊ IZIRAL TƖŊŊAA LƖƖ 36: SIS

Highlight

Copy

Compare