MOSIS KƐŊ IZIRAL TƖŊŊAA LƖƖ 31
31
Bɛzalɛl arɩ Oholiab
1Ŋɩɩ nɛ La TƖƖNA bʋla pɩ Mosis, 2“Bee na, mɩ lɩɩsɛ Uri nanʋala Bɛzalɛl nɛ, Huu sɩ ŋaa Juda doho nʋʋ nihiŋ. 3Mɩ joŋ mɩ Dɩma hɛ ʋ lɛ nɛ, dɩ ʋ kɛŋ jɩma, doluŋ, wʋjɩmɩŋ a jɩŋ nɩsɩŋ tɩntɩmɩɩ kala, 4dɩ ʋ wuo kɛŋ jɩma-la a kɛŋ sɛlɩmɛ, hɔpʋla arɩ kɔlɩɩŋ a kaa libi kɩaa, 5dɩ ʋ jɩŋ tabɩaa yɛrɩŋ arɩ ba kaa tɩmɩŋ, a jɩŋ daasɩŋ tɩntɩŋŋaa a wuo tɩŋ gɔgɩ tɩntɩmɩɩ kala. 6Mɩ bɩra lɩɩsɛ Ahɩsama nanʋala Oholiab sɩ lɩɩ Daŋ doho nɩaa tʋɔŋ ma nɛ, dɩ ʋ pɛ Bɛzalɛl lɛ. Mɩ joŋ wʋjɩmɩŋ a pɩ gɔgɩa-la nɛ, dɩ ba wuo ŋaa kɩalɩŋ kala mɩ sɩ dagɩŋ dɩ ŋ ŋaa. 7Ba jaŋ ŋaa lɛbɩ-la lɛ mɩ sɩ yie kɔ Iziral tɩŋŋaa teeŋ arɩ ʋ kpɩɛraa kala, mɩ niiriŋ daga-la arɩ ʋ nii-tɔlɔ, 8teebʋl-la arɩ ʋ nyuŋ tɩntɩnnɩ kɩaa, a kɛŋ sɛlɩmɛ sɩ chaasa zɔŋ a ŋaa chaaŋ daaŋ arɩ ʋ nyuŋ kpɩɛraa, a ŋaa koru-la lɛ ba sɩ jaŋ nyɩnyɩgɛ kʋsʋɔrʋsʋŋ, 9a ŋaa koru-la lɛ ba sɩ jaŋ nyɩnyɩgɛ kʋnyɩgaa Wɩɩsʋlʋŋ arɩ ʋ nyuŋ tɩntɩnnɩ kɩaa, a pɛ taasɩ-gbaŋ-bal-la arɩ kʋ-la nyuŋ ʋ sɩ jaŋ chɩŋ. 10Ba jaŋ yɛrɛ Wɩa tɩntɩnnɩ gɛnnɩ-la sɩ kɛŋ yɩrɩŋ, kɩalɩŋ Arɔŋ arɩ ʋ hambolibiisiŋ sɩ jaŋ laalɛ a ŋaa Wɩɩsʋllɩ sɩpaalaaraa, 11a ŋaa Wɩɩsʋllɩ nʋʋŋ arɩ kʋsʋɔrʋsʋ-la sʋɔra sɩ sɩma ba sɩ jaŋ nyɩnyɩgɛ Wɩa dɩ-zɔŋ-la tʋɔŋ Wɩa dɩ-zɔmʋŋ. Ʋ maga dɩ ba ŋaaba ŋɩɩ arɩ mɩ sɩ dagɩŋ.”
Chɛ-wiesii-la
12Ŋɩɩ nɛ La TƖƖNA bʋla pɩ Mosis, 13“Bʋla pɩ Iziral tɩŋŋaa dɩ ba to chɛ-wiesii-la woruŋ. Ʋ nɛ jaŋ ŋaa wɩɩ sɩ chɩŋ mɩ dɩ ma arɩ ma doho nɩaa kala pɛgɛ, dɩ ma jɩŋ arɩ mɩ nɛ ŋaa ma TƖƖNA, Nɩɩ-la sɩ leŋe ma ŋaa tʋɔpʋl tɩmma.
14Má to chɛ-wiesii-la woruŋ, bɛɛ wɩaa ʋ ŋaa tapʋl-zɔŋ nɛ a pɩma. Nɩɩ-la kala sɩ bɩ ʋ to maga dɩ ma kpʋʋ nɛ. Koo dɩ nɩɩ-la kala nɛ tɩŋ tɩntɩmɩɩ tapʋlɩɩ-la, ʋ maga dɩ ma lɩɩsʋ ta nɛ ʋ nɩaa tʋɔŋ. 15Ʋ maga dɩ ma joŋ tapʋlaa balɩdʋ a tɩŋ ma tɩntɩŋŋaa, ama tapʋl-pɛɩ nɛ ŋaa chɛ-wiesii-la. Ʋ ŋaa chɛ-zɔŋ nɛ a pɩ mɩ-na ma TƖƖNA. Dɩ nʋʋ nɛ tɩŋ tɩntɩŋŋaa chɛɛ-la, ʋ maga dɩ má kpʋʋ nɛ. 16Ŋɩɩ wɩaa, Iziral tɩŋŋaa doho kala maga dɩ ba tuto chɛ-wiesii-la nɛ, a gbieli a liliisi ʋ wɩaa, dɩ ʋ ŋaa nii sɩ hɛ mɩ dɩ ba pɛgɛ a kaa mʋ wuu. 17Ʋ jaŋ ŋaa wɩɩ a pɩŋ mɩ dɩ Iziral tɩŋŋaa pɛgɛ a kaa mʋ wuu, bɛɛ wɩaa tapʋlaa balɩdʋ nɛ mɩ-na Wɩa joŋo ŋaa wɩa-nyuŋ arɩ tinteeŋ. Tapʋl-pɛɩ mɩ bɩ tɩma, mɩ wiese nɛ.”
18La TƖƖNA sɩ bʋl wɩaa pɩ Mosis Sɩnaɩ peel-la nyuŋ a dɛrɛ, ʋ joŋ tabɩɩ-taalɩa-la balɩa lɛ ʋ sɩ ŋmʋnsɛ ʋ niiŋ wɩaa hɛ a pɩ Mosis.
Currently Selected:
MOSIS KƐŊ IZIRAL TƖŊŊAA LƖƖ 31: SIS
Highlight
Copy
Compare
Share
Want to have your highlights saved across all your devices? Sign up or sign in
©Ghana Institute of Linguistics Literacy and Bible Translation 1984, 2014
