MOSIS KƐŊ IZIRAL TƖŊŊAA LƖƖ 30

Koru-la nyuŋ ba sɩ jaŋ nyɩnyɩgɛ kʋsʋɔrʋsʋŋ

1Kɛŋ sɔjaamɩŋ daaŋ a ŋaa Wɩɩsʋllɩ koruŋ dɩ ba nyɩnyɩgɛ kʋsʋɔrʋsʋŋ nɩmɛ. 2Leŋ dɩ ʋ kɛŋ gʋnaa banɛsɛ dɩ ba kala magɛ dɔŋɔ. Ʋ duomuŋ jaŋ ŋaa naakieliŋ kpaa magɛ dɔŋɔ, dɩ ʋ jalɩŋ ma ŋaa naakieliŋ kpaa magɛ dɔŋɔ, ka ʋ leŋiŋ ŋaa naakieli-bala, dɩ nyilliŋ hɛ gʋna-la lɛ. 3Kɛŋ sɛlɩmɛ sɩ chaasa zɔŋ taara tɔ ʋ nyuŋ arɩ ʋ sɛsɩŋ kala arɩ nyilli-la, aŋ kɛŋ sɛlɩmɛ-la mɛ giriŋ golli koru-la kala. 4Libi sɛlɩmɛ nenii-pɩraa banɛsɛ hɛ giri-la bʋbʋɔŋ dɩ sɛmɛ na-kala kɛŋ balɩa, dɩ ba nɛ chagɛ daaterigeba-la ba sɩ jaŋ kaa jujoŋ koru-la a kɩɩ. 5Kɛŋ sɔjaamɩŋ daaŋ a ŋaa daaterigeba-la ba sɩ jaŋ kaa jujoŋ koru-la a kɛŋ sɛlɩmɛ taara tɔ ba kala. 6Joŋ koru-la bil Wɩa dɩ-zɔŋ-la tʋɔŋ, patɩɩsaŋ-la sɩ kɛŋ Wɩa dɩ-zɔmʋŋ arɩ lee-la zɔmʋŋ sɩ bɩ magɩa kɛnɛ kaa kpaa, joŋo bil ʋ sɩpaaŋ. Patɩɩsaŋ-la harɩŋ nɛ Wɩa niiriŋ daga-la arɩ ʋ nii-tɔlɔ hɛ, nɩmɛ nɛ mɩ jaŋ kʋ chemiŋ.

7Chʋchʋɔ na-kala dɩ Arɔŋ nɛ mʋa dɩ ʋ dɩsɛ chaanaa, ʋ maga dɩ ʋ nyɩgɛ kʋsʋɔrʋsʋŋ sʋɔra sɩ sɩma nɛ koru-la nyuŋ. 8Dɩ ʋ nɛ bɩra mʋa dɩ ʋ nyɩgɛ chaana-la wɩɩ-mul-jʋʋlʋŋ, ʋ maga dɩ ʋ bɩra nyɩgɛ kʋsʋɔrʋsʋŋ nɛ, dɩ ba didii bʋa na-kala La TƖƖNA sɩpaaŋ a kaa mʋmʋ wuu ba doho kala lɛ. 9Pɔ dɩ ŋ sɩ́ kʋsʋɔrʋ wogo nyɩgɛ koru-la nyuŋ, a sɩ́ kʋnyɩgaa Wɩɩsʋlʋŋ kɩaa koo mɩaa Wɩɩsʋlʋŋ kɩaa ma nyɩgʋ koru-la nyuŋ. Pɔ ŋ sɩ́ kʋnyʋalaa Wɩɩsʋlʋŋ kɩaa bɩsa wurisi koru-la. 10Jɩna na-kala tʋɔŋ Arɔŋ maga dɩ ʋ kɛŋ wʋbɔŋŋɔɔ joŋo chɛnɩŋ Wɩɩsʋlʋŋ pʋna chalɩŋ nɛ a taa koruŋ nyilliŋ a pɩɩsɛ ʋ disiniŋ ta a pɩ ʋ doho nɩaa kala sɩ jaŋ to harɩŋ kɔ, bɛɛ wɩaa koru-la ŋaa mɩ-na ma TƖƖNA kʋŋ sɩ chaasa bɩ disiniŋ kɛnɛ nɛ.”

Moribie-la Iziral tɩŋŋaa sɩ jaŋ tiŋ a laa ba mɩɩsɩŋ

11Ŋɩɩ nɛ La TƖƖNA bʋla pɩ Mosis, 12“Dɩ ŋ nɩɩ dɩɩsɛ Iziral tɩŋŋaa, ʋ maga dɩ ŋ leŋ dɩ ba kʋŋkala kɛŋ kʋŋ nɛ kaa kʋ time pɩ La TƖƖNA a laa ʋ mɩɩsɩŋ bʋa-la lɛ ba sɩɩ dɩɩsʋ, dɩ wʋbɔŋ kala sɩ́ kʋ jʋʋba, bʋa-la lɛ ba sɩɩ dɩɩsɛba. 13Nʋʋkala ba sɩ jaŋ dɩɩsɛ maga dɩ ʋ tiŋ warɩpʋla magɛ ŋɩɩ ba sɩɩ tiŋ Wɩa dɩa lɛ kpaa magɛ dɔŋɔ. Nʋʋkala maga dɩ ʋ tiŋ moribii-la a pɩmɛ nɛ. 14Nʋʋ na-kala sɩ yi jɩsɩŋ mara koo a kieli jɩsɩŋ mara ba dɩɩsʋ maga dɩ ʋ tiŋ moribiiŋ deeŋ nɛ a pɩmɛ. 15Summoo arɩ kɩaa tɩŋŋaa kala maga dɩ ba time magɛ dɔŋɔ nɛ a pɩ mɩ-na ma TƖƖNA a laa ba mɩɩsɩŋ. 16Laa moribie-la Iziral tɩŋŋaa sɩ kaa kɔ dɩ ba time laa ba mɩɩsɩŋ a kaa wʋwasɛ lɛbɩ-la lɛ mɩ-na ma TƖƖNA sɩ yie kɔ Iziral tɩŋŋaa teeŋ. Ʋ jaŋ ŋaa wɩɩ dɩ Iziral tɩŋŋaa vɛnɛ ŋaa pɩpɩmɛ.”

Taasɩ-gbaŋ-bal-la lɛ ba sɩ jaŋ sʋsɔŋ ba tɩtɩa

17Ŋɩɩ nɛ La TƖƖNA bʋla pɩ Mosis, 18“Kɛŋ kɔlɩɩŋ ŋaa taasɩ-gbaŋ-balɩŋ arɩ kʋ-la nyuŋ ʋ sɩ jaŋ chɩchɩŋ, dɩ ba kaa sʋsɔŋ nɩsaa. Joŋ taasɩ-gbaŋa-la arɩ kʋ-la nyuŋ ʋ sɩ jaŋ chɩŋ a bil lɛbɩ-la lɛ mɩ sɩ yie kɔ Iziral tɩŋŋaa teeŋ arɩ koru-la pɛgɛ a ŋaa lɩɩŋ hɛ. 19Arɔŋ arɩ ʋ hambolibiisiŋ jaŋ sʋsɔŋ ba nɩsaa arɩ ba naasɩŋ ʋ lɛ. 20Bʋa na-kala dɩ ba nɩɩ jʋʋ lɛbɩ-la lɛ mɩ sɩ yie kɔ Iziral tɩŋŋaa teeŋ, koo dɩ ba nɩɩ mʋ koru-la teeŋ, dɩ ba nyɩgɛ Wɩɩsʋlʋŋ kɩaa pɩmɛ, ba jaŋ sɔŋ ba tɩtɩa arɩ lɩɩŋ dɩ ŋɩɩ leŋ ba sɩ́ sʋʋ. 21Ʋ maga dɩ ba sɔŋ ba nɩsaa arɩ ba naasɩŋ nɛ, dɩ ŋɩɩ leŋ dɩ ba sɩ́ sʋʋ, wɩɩŋ deeŋ maga dɩ ʋ ŋaa wɩɩ nɛ Arɔŋ arɩ ʋ doho nɩaa sɩ jaŋ vɛnɛ ŋɩŋaa a kaa mʋ wuu.”

Wɩa nʋʋ tɩsɩŋ

22Ŋɩɩ nɛ La TƖƖNA bʋla pɩ Mosis, 23“Joŋ tegisiŋ deemba: tɩɩ-kel-zɔŋ-la ba sɩɩ yɩrɛ ‘Mɛɛ’ lɩɩŋ yuŋuŋ sɩ ŋaa kilo balɩdʋ arɩ tʋlaalɩɩ-la ba sɩɩ yɩrɛ ‘Sɩnamɔŋ’ yuŋuŋ sɩ ŋaa kilo batori, arɩ suori daaŋ ma yuŋuŋ sɩ ŋaa kilo batori, 24arɩ tɩa-la ba sɩɩ yɩrɛ Kaasɩa lɩɩŋ yuŋuŋ sɩ ŋaa kilo balɩdʋ, a pɛ olif nʋʋŋ galaŋ kʋbala lɛ. 25Joŋ kɩaa deemba guoli dɔŋɔ a ŋaa Wɩɩsʋllɩ nʋʋŋ dɩ ʋ sʋɔra sɩŋ. Leŋ dɩ nɩalɩŋ sɩ jɩŋ nʋʋŋ ŋaanɩŋ ŋaa. Ʋ jaŋ ŋaa Wɩɩsʋllɩ nʋʋ-zɔŋ mɩ teeŋ. 26Nʋʋŋ deeŋ nɛ ŋ jaŋ kaa ta lɛbɩ-la lɛ mɩ sɩ yie kɔ Iziral tɩŋŋaa teeŋ, arɩ mɩ niiriŋ daga-la lɛ, 27a pɛ teebʋl-la arɩ ʋ nyuŋ kpɩɛraa lɛ, a pɛ kʋ-la nyuŋ ba sɩ joŋ chaanaa dɩdaŋ arɩ ʋ nyuŋ kpɩɛraa arɩ koru-la lɛ ba sɩ nyɩgɛ kʋsʋɔrʋsʋŋ a pɩpɩmɛ, 28arɩ kʋnyɩgaa Wɩɩsʋlʋŋ koruŋ arɩ ʋ nyuŋ kpɩɛraa kala, a pɛ taasɩ-gbaŋ-bal-la arɩ kʋ-la nyuŋ ʋ sɩ chɩna. 29Dɩ ŋ nɛ ŋaa ŋɩɩ, ba jaŋ chaasa ŋaa kɩaa sɩ bɩ disiniŋ kɛnɛ mɩ teeŋ. Dɩ kʋŋkala nɛ digi kɩaa deemba, ʋ ma jaŋ ŋaa kʋŋ sɩ bɩ disiniŋ kɛnɛ.

30Kɛŋ nʋʋ-la tɩsɛ Arɔŋ arɩ ʋ hambolibiisiŋ a wasɛba dɩ ba ŋaa mɩ Wɩɩsʋllɩ sɩpaalaaraa. 31Bʋla pɩ Iziral tɩŋŋaa, ‘Nʋʋŋ deeŋ nɛ jaŋ ŋaa Wɩɩsʋllɩ nʋʋ-la sɩ bɩ disiniŋ kɛnɛ mɩ teeŋ, ma doho kala lɛ. 32Sɩ́ nʋʋŋ deeŋ joŋo tɩsɛ nɩwogo sɩ bɩ mɩ tɩntɩnnʋ ŋaa, a pʋpɔ ŋ sɩ́ ŋɩɩ ŋ sɩ to ŋaa nʋʋŋ deeŋ ma to a ŋaa ʋ dɔŋɔ. Nʋʋ-la bɩ disiniŋ kɛnɛ, ʋ maga dɩ ma joŋu arɩ ʋ bɩ disiniŋ kɛnɛ. 33Nɩɩ-la kala sɩ jaŋ chɛbɛ ŋaa nʋʋŋ deeŋ doho, koo nɩɩ-la kala sɩ jaŋ joŋ nʋʋŋ deeŋ a tɩsɛ nʋʋ sɩ bɩ mɩ Wɩɩsʋllɩ sɩpaalaara ŋaa, ʋ maga ba keru ta ʋ nɩaa tʋɔŋ.’ ”

Kʋsʋɔrʋsʋŋ

34Ŋɩɩ nɛ La TƖƖNA bɩra bʋla pɩ Mosis, “Joŋ kʋsʋɔrɩ-sɩŋŋaa deemba: tɩɩkel zɔŋŋɔɔ ba sɩɩ yɩrɛ gam-rɩsɩŋ, onika, galɩbanʋm arɩ tɩɩkel zɔŋ ba sɩɩ yɩrɛ fɩraŋkɩsɛŋ dɩ ba kala magɛ dɔŋɔ. 35Joŋ kɩaa deemba kala guoli dɔŋɔ lɛ a ŋaa tɩɩkel sʋɔrɩ-sɩŋŋaa. Leŋ dɩ nɩalɩŋ sɩ jɩŋ tʋlaalɩɩ ŋaanɩŋ ŋaa. Sɩ́ leŋe dɩ ʋ kɛŋ disiniŋ, hɛ yɩsɩŋ dɩ ʋ ŋaa kʋzɔŋ mɩ sɩaa lɛ. 36Nɔŋ kɩalɩŋ dɔnsʋŋ dɩ ba bɩɩ nʋgʋgʋ, dɩ ŋ joŋo bil mɩ niiriŋ daga-la sɩ hɛ lɛbɩ-la lɛ mɩ sɩ yie kɔ Iziral tɩŋŋaa teeŋ sɩpaaŋ. Nɩmɛ nɛ mɩ jaŋ kʋ chemiŋ. Ʋ maga dɩ kɩalɩŋ chaasa ŋaa kɩaa sɩ bɩ disiniŋ kɛnɛ ma teeŋ. 37Má pɔ ma sɩ́ ŋɩɩ ma sɩ to a ŋaa tʋlaalɩɩ deeŋ to a ŋaa tʋlaalɩɩ dɔŋ kala a pɩ ma tɩtɩa. Má joŋu dɩ ʋ ŋaa kʋŋ sɩ bɩ disiniŋ kɛnɛ a pɩ La TƖƖNA. 38Nɩɩ-la kala sɩ jaŋ chɛbɛ ŋaa tʋlaalɩɩ deeŋ doho a pɩ ʋ tɩtɩa, ʋ maga dɩ ma lɩɩsʋ ta ʋ nɩaa tʋɔŋ.”

Currently Selected:

MOSIS KƐŊ IZIRAL TƖŊŊAA LƖƖ 30: SIS

Highlight

Copy

Compare