MOSIS KƐŊ IZIRAL TƖŊŊAA LƖƖ 32
32
Ba kɛŋ sɛlɩmɛ libi nɛ-bie
1Nɩalɩŋ sɩ na dɩ Mosis ka dienu peel-la nyuŋ ʋ bɩ kʋʋ tuu, ba sii mʋ golli Arɔŋ chu a bʋla pʋ, “Mɛ vesiŋ pɩla dɩ ba laa la sɩpaaŋ a kɛnla vɩvɛŋ. Mosis, nɩɩ-la sɩ kɛnla kaa kʋ lɩɩ Ijipiti tinteeŋ lɛ, la bɩ jɩŋ wɩɩ-la kala sɩ ŋaa ʋ lɛ.”
2Ŋɩɩ nɛ Arɔŋ bʋla pɩba, “Má chaarɛ ma haalaa, ma hambolibiisiŋ arɩ ma toloo sɛlɩmɛ dɩgɩlɩŋ-kpɛnsɩŋ kaa kʋ pɩmɛ.” 3Ŋɩɩ nɛ nɩalɩŋ kala chaarɛ ba sɛlɩmɛ dɩgɩlɩŋ-kpɛnsɩ-la ba fa sɩ hɛ, a kaa mʋ pɩ Arɔŋ. 4Ŋɩɩ nɛ ʋ laa kɩalɩŋ kala ba sɩ kaa kɔ, a kaa libi vene ʋ nagɛ nɛ-bie. Ŋɩɩ nɛ nɩalɩŋ bʋl, “Iziral tɩmma, vene-la sɩ kɛnla lɩɩ Ijipiti tinteeŋ kɔ nɛ ŋ-la.”
5Arɔŋ sɩ na ŋɩɩ, ʋ saa Wɩɩsʋllɩ koruŋ vene-la sɩpaaŋ aŋ heele bʋl, “Chie la jaŋ gbieli a zil La TƖƖNA.” 6Taŋ sɩ pʋla, ba sii chʋchʋɔ-fɩɛla a ŋaa kʋnyɩgaa Wɩɩsʋlʋŋ aŋ joŋ kɩaa dɔnsʋŋ ma ŋaa nii-magɛ dɔŋɔ Wɩɩsʋlʋŋ. Ŋɩɩ nɛ ba hɔnɔ dii kɩaa aŋ nyʋa aŋ sii gbigbieli aŋ ŋɩŋaa wʋlɩɩlɩŋ.
7Ŋɩɩ nɛ La TƖƖNA bʋla pɩ Mosis, “Tuu lɩma, bɛɛ wɩaa nɩalɩŋ ŋ sɩ kaa lɩɩ Ijipiti tinteeŋ lɛ, ba chei ba tɩtɩa nɛ. 8Ba daŋa vɩa wombii-la mɩ sɩ dagɛba nɛ, aŋ libi vene ʋ nagɛ nɛ-bie, ba kpʋ kɩaa pʋ aŋ zilu a bʋl, ‘Iziral tɩmma, vene-la sɩ kɛmma kaa kʋ lɩɩ Ijipiti tinteeŋ lɛ nɛ ŋ-la.’ ”
9Ŋɩɩ nɛ La TƖƖNA bɩra bʋla pɩ Mosis, “Mɩ jɩŋ nɩaa deemba nɛ, ba ŋaa nyu-duo tɩmma nɛ. 10Lɛɛlɛ mʋ aŋ lemmi, mɩ baanɩŋ sie nɛ woruŋ ba nyuŋ. Mɩ jaŋ cheiba, aŋ leŋ dɩ ŋ doho nɩaa pʋŋ a ŋaa tinteeŋ sɩ jaŋ kɛŋ yɩrɩ-balɩŋ.”
11Ŋɩɩ nɛ Mosis sʋl ʋ Tɩɩna Wɩa a bʋl, “Ou, mɩ Tɩɩna, bɛɛ nɛ tɩɩ ŋ na baanɩŋ a chɩchɛ dɩ ŋ chei nɩalɩŋ ŋ sɩ kaa kʋ lɩɩ Ijipiti tinteeŋ lɛ arɩ ŋ doluŋ? 12Ŋŋ chɛ dɩ Ijipiti tɩŋŋaa bʋl arɩ tʋɔbɔmʋŋ nɛ ŋ kaa kɛŋ ŋ nɩaa Iziral tɩŋŋaa lɩɩ dɩ ŋ kpʋba peelee tʋɔŋ, aŋ cheiba ta tinteeŋ kala lɛɛ? Leŋ dɩ ŋ baanɩŋ tuu tinteeŋ dɩ ŋ sɩ́ ŋ nɩaa chei ta. 13Liisi ŋ tɩntɩnnaa Abɩraham, Aɩzɩk arɩ Jekɔb wɩaa. Ba nɛ ŋ kɛŋ ŋ tɩtɩa yɩrɩŋ kaa ŋmɩɛsa pa arɩ ŋ jaŋ leŋ dɩ ba doho nɩaa pʋŋ a nagɛ chɛnwʋlaa sɩ hɛ wɩa-nyuŋ, aŋ joŋ tinteeŋ deeŋ ma kala a pɩba dɩ ʋ ŋaa ba dɩ ba doho nɩaa kʋŋ a kaa mʋ wuu.” 14Ŋɩɩ nɛ La TƖƖNA leŋ wʋbɔŋ-la ʋ fa sɩ bɩɩna dɩ ʋ joŋo ŋaa ʋ nɩaa lɛ.
15Ŋɩɩ nɛ Mosis lɩɩ peel-la nyuŋ kʋ tuu a kori tabɩɩ-taalɩa-la balɩa lɛ Wɩa niiriŋ sɩ hɛ. Wɩa tuuri wɩalɩŋ hɛ ba sɛsɩŋ balɩa lɛ nɛ, sɩpaaŋ arɩ harɩŋ kala. 16Wɩa nɛ ŋaa tabɩɩ-taalɩa-la, ʋ nɛ tuuri wɩalɩŋ ma hɛ ba lɛ.
17Josua sɩ nɩa dɩ nɩalɩŋ ka ŋaa goŋ, ŋɩɩ nɛ ʋ bʋla pɩ Mosis, “Ʋ naga laalɩŋ nɛ sie la dɩhɔnʋŋ.”
18Ŋɩɩ nɛ Mosis bʋl,
“Goŋ-la bɩ laalɩyuori-diiri goŋ naga,
ʋ bɩ yele ma ŋaa,
ama ʋ nagɛ yɩɩlaa nɛ baa yɩɩ.”
19Mosis sɩ kʋ kpagɛ ba dɩhɔnʋŋ, a na vene-la ba sɩ libe ʋ nagɛ nɛ-bie arɩ gʋala, ʋ baanɩŋ faasa sii. Ʋ joŋ tabɩɩ-taalɩa-la ʋ sɩ koro lo peel-la bʋbʋɔŋ ba kala yɛrɛ. 20Ŋɩɩ nɛ Mosis mʋ joŋ vene-la ba sɩ libe ʋ nagɛ nɛ-bie a hɛ nyiniŋ lɛ ʋ dii, ʋ lɩɩsɛ a nɔŋ ʋ bii a nagɛ munuŋ. Ʋ paa a hɛ lɩɩŋ lɛ a leŋ Iziral tɩŋŋaa kala nyʋa.
21Ŋɩɩ nɛ Mosis pɩɛsɛ Arɔŋ, “Bɛɛ nɛ nɩaa deemba ŋaa ŋ lɛ, ŋ lɛrɛ wʋbɔŋ-balɩŋ deeŋ kʋ hɛ ba lɛ?”
22Arɔŋ sɩ, “Mɩ kʋhɩaŋ, sɩ́ baanɩŋ na, ŋ jɩŋ ŋɩɩ nɩaa deemba sɩ cho wʋbɔŋŋɔɔ nɛ. 23Ba bʋla pɩmɛ, ‘Mɛ vesiŋ pɩla dɩ ba laa la sɩpaaŋ a kɛnla vɩvɛŋ, Mosis-la sɩ kɛnla lɩɩ Ijipiti tinteeŋ lɛ, la bɩ jɩŋ wɩɩ-la kala sɩ ŋaa ʋ lɛ.’ 24Ŋɩɩ nɛ mɩ bʋla pɩba, ‘Nɩɩ-la kala sɩ kɛŋ sɛlɩmɛ kʋŋ, ʋ lɩɩsa kaa kʋ pɩmɛ.’ Ba kaa kɔ mɩ joŋo hɛ nyiniŋ lɛ a libi vene deeŋ sɩ nagɛ nɛ-bie.”
25Ŋɩɩ nɛ Mosis na arɩ nɩalɩŋ hoso, Arɔŋ ma leŋ ba yeŋŋi a ŋaa mɔmɩa ba dʋndɔŋŋɔɔ teeŋ. 26Mosis chɩŋ ba dɩhɔnʋŋ boiŋ niiŋ aŋ bʋl, “Nɩɩ-la kala sɩ jaŋ to La TƖƖNA harɩŋ, ʋ kɔ mɩ teeŋ.” Ŋɩɩ nɛ Levi doho nɩaa kala mʋ ʋ teeŋ.
27Mosis bʋla pɩba, “Ŋ-la nɛ Iziral tɩŋŋaa Wɩa bʋl, ‘Má paa ma tokobiee a chɩŋ ma dɩhɔnʋŋ boiŋ deeŋ lɛ a kpʋ ma naambiiriŋ, ma nandɔsʋŋ arɩ ma dɔnsʋŋ tɩŋŋaa a mʋ yi boiŋ nii-la dɔŋɔ.’ ” 28Ŋɩɩ nɛ Levi doho nɩalɩŋ ŋaa ŋɩɩ Mosis sɩ bʋla, a kpʋ nɩaa bʋɩ batori tapʋlɩɩ-la. 29Ŋɩɩ nɛ Mosis bʋl, “Jɩnɩŋ ma joŋ ma tɩtɩa pɩ La TƖƖNA nɛ, ʋ pɛ ma lɛ nɛ a tɩŋ ma sɩ na baanɩŋ ma biiriŋ arɩ ma naambiiriŋ nyuŋ ba sɩ vɩa La TƖƖNA, ma kpʋba.”
30Taŋ sɩ pʋla, Mosis bʋla pɩ nɩalɩŋ sɩ ka, “Ma ŋaa wʋbɔŋ bal nɛ, ama lɛɛlɛ mɩ jaŋ mʋ La TƖƖNA teeŋ a sʋlʋ, kapo, ʋ jaŋ joŋ ma wʋbɔŋ-la chɛma.”
31Ŋɩɩ nɛ Mosis mɩɩra mʋ La TƖƖNA teeŋ a bʋl, “Ou, nɩaa deemba ŋaa wʋbɔŋ-bal nɛ, ba kɛŋ sɛlɩmɛ nɛ libi vene pɩ ba tɩtɩa. 32Ama lɛɛlɛ mɩɩ sʋlʋŋ, joŋ ba wʋbɔŋ-la chɛba, dɩ ŋɩɩ dee, lɩɩsɛ mɩ yɩrɩŋ ta ŋ teŋ-la tʋɔŋ ŋ sɩ ŋmʋnsɛ ŋ nɩaa yɩraa hɛ.”
33Ŋɩɩ nɛ La TƖƖNA bʋla pɩ Mosis, “Nɩɩ-la kala sɩ ŋaa wʋbɔmʋŋ mɩ teeŋ, ʋ yɩrɩŋ nɛ mɩ jaŋ lɩɩsa ta mɩ teniŋ tʋɔŋ. 34Ŋɩɩ wɩaa, mʋ a kɛŋ nɩalɩŋ mʋ lee-la wɩaa mɩ sɩ bʋla pɩŋ, mɩ tɩndaara jaŋ laa ma sɩpaaŋ. Ama dɩ bʋa-la nɛ kʋ yi a magɛ dɩ mɩ dɔgɩsɛba a tɩŋ ba wʋbɔŋ-la wɩaa, mɩ jaŋ dɔgɩsɛba.”
35Ŋɩɩ nɛ La TƖƖNA joŋ nyanyal-bɔŋ a hɛ nɩalɩŋ lɛ a tɩŋ ba sɩ leŋe Arɔŋ mɛ vene-la sɩ nagɛ nɛ-bie pɩba arɩ ŋɩɩ ba sɩ zil vene-la.
Currently Selected:
MOSIS KƐŊ IZIRAL TƖŊŊAA LƖƖ 32: SIS
Highlight
Copy
Compare
Share
Want to have your highlights saved across all your devices? Sign up or sign in
©Ghana Institute of Linguistics Literacy and Bible Translation 1984, 2014
