MOSIS KƐŊ IZIRAL TƖŊŊAA LƖƖ 14
14
1Ŋɩɩ nɛ La TƖƖNA bʋla pɩ Mosis, 2“Bʋla pɩ Iziral tɩŋŋaa dɩ ba mɩɩra mʋ hɔŋ a kpagɛ lee-la ba sɩɩ yɩrɛ Pɩ-Hahɩrɔf, a hɛ Mɩgɩdɔl arɩ mʋgʋ-balɩŋ pɛgɛ a chaasɛ Baal-Zɛfɔŋ. 3Ijipiti tinteeŋ kuoro jaŋ bɩɩnɛ Iziral tɩŋŋaa lɛlɛ nɛ tintee-la lɛ aa baarɛ tintee-hɩlɩŋ tʋɔŋ. 4Mɩ jaŋ ŋaa dɩ Ijipiti tinteeŋ kuoro tʋɔŋ pɩrɛ, dɩ ʋ lɩɩ kiri ba harɩŋ. Mɩ yɩrɩŋ jaŋ yɩrɛ dɩ mɩ nɛ yuo dii Ijipiti tinteeŋ kuoro arɩ ʋ laalɩyuoroo kala. Ijipiti tɩŋŋaa jaŋ jɩŋ arɩ mɩ nɛ ŋaa ba TƖƖNA.” Ŋɩɩ nɛ Iziral tɩŋŋaa ŋaa wɩɩ-la La TƖƖNA sɩ bʋla.
5Ijipiti tinteeŋ kuoro sɩ nɩa arɩ Iziral tɩmma-la fá viiri nɛ, ʋ dɩ ʋ nɩhɩasɩŋ tʋɔbɩɩnaa bɩrɩmɛ. Ba bʋl, “Bɛɛ nɛ tɩɩ la ŋaa ŋ-la a leŋ Iziral tɩmma-la sɩ tɩma pɩpɩla fá viiri?” 6Ŋɩɩ nɛ Ijipiti tinteeŋ kuoro ŋaa siri a paa ʋ laalɩŋ janɩŋ torukoba a kɛŋ ʋ laalɩyuoroo ba lɩɩ kiri nɩalɩŋ harɩŋ. 7Ʋ tʋɔsɛ ʋ janɩŋ toruko zɔŋŋɔɔ zɔɔ-balɩdʋ a pɛ janɩŋ torukoba dɔnsʋŋ sɩ hɛ Ijipiti tinteeŋ lɛ, a leŋ ʋ laalɩyuori-hɩasɩŋ kʋbala kala hɛ ʋ janɩŋ torukoba-la kʋŋkala tʋɔŋ. 8Ŋɩɩ nɛ La TƖƖNA ŋaa Ijipiti tinteeŋ kuoro tʋɔŋ pɩrɛ, ʋ kiri Iziral tɩŋŋaa harɩŋ, ka Iziral tɩŋŋaa vɩvɛŋ, ba bɔyɛ bɩ joŋ. 9Ijipiti tinteeŋ kuoro ja-jɩllaa arɩ ʋ laalɩyuoroo arɩ ʋ laalɩyuoroo janɩŋ torukoba kiri a mʋ puuba dɩ ba hɔŋ mʋgʋ-balɩŋ niiŋ, a kpagɛ Pɩ-Hasɩrɔf a chaasɛ Baal-Zɛfɔŋ.
10Ijipiti tinteeŋ kuoro arɩ ʋ laalɩyuoroo sɩ mʋʋ kpagɛba, Iziral tɩŋŋaa bee na dɩ Ijipiti tɩŋŋaa nɛ kiri ba harɩŋ kʋkɔ. Fawʋllʋŋ chaasa kɛmba. Ba ŋmoo niiŋ pɩ La TƖƖNA dɩ ʋ pɛ ba lɛ. 11Ŋɩɩ nɛ Iziral tɩŋŋaa pɩɛsɛ Mosis, “A tɩŋ leriŋ sɩ tuo dɩ ba hugila Ijipiti tinteeŋ lɛ wɩaa nɛ tɩɩ ŋ kɛnla kaa kʋ lɩɩ tintee-hɩlɩŋ deeŋ tʋɔŋ dɩ la sʋʋ? Bɛɛ nɛ ŋ ŋaala ŋ-la? 12La bɩ bʋla pɩŋ arɩ ŋ lenla Ijipiti tinteeŋ lɛ la tɩma pɩpɩbaa? La sɩ jaŋ tɩma pɩ Ijipiti tɩŋŋaa bɩ kpɩa la sɩ jaŋ sʋʋ ta tintee-hɩlɩŋ deeŋ tʋɔŋ?”
13Ŋɩɩ nɛ Mosis bʋla pɩ nɩalɩŋ, “Má sɩ́ leŋe dɩ fawʋllʋŋ kɛmma. Má nyɩrɛ bɔyɛ. Ma jaŋ na ŋɩɩ La TƖƖNA sɩ jaŋ laama ta jɩnɩŋ. Ijipiti tɩmma-la ma sɩɩ na jɩnɩŋ, ma maachie bɩra bɩ jaŋ naba. 14La TƖƖNA jaŋ yuo laama, má-na bibeŋ Wɩa lɛ.”
15Ŋɩɩ nɛ La TƖƖNA bʋla pɩ Mosis, “Bɛɛ nɛ tɩɩ ŋ bunso pɩpɩmɛ? Bʋla pɩ Iziral tɩŋŋaa dɩ ba vɩvɛŋ, ba sɩ́ chɩŋ. 16Kɛŋ ŋ dantɩga-la je a zaarɛ mʋga-la nyuŋ, lɩɩ-la jaŋ pɔɩ balɩa, dɩ Iziral tɩmma-la vɛŋ tintee-hɩlɩŋ lɛ mʋga-la tʋɔŋ. 17Mɩ jaŋ leŋ dɩ Ijipiti tɩmma-la tʋɔŋ pɩrɛ dɩ ba kire to ma harɩŋ jʋʋ mʋga-la tʋɔŋ. Nɩmɛ nɛ mɩ jaŋ yuo dii Ijipiti tinteeŋ kuoro arɩ ʋ laalɩyuoroo, ʋ janɩŋ torukoba arɩ ʋ ja-jɩllaa kala a laa yɩrɩŋ. 18Dɩ mɩ nɛ yuo diiba, mɩ yɩrɩŋ jaŋ yɩrɛ, dɩ Ijipiti tɩŋŋaa jɩŋ arɩ mɩ nɛ ŋaa ba TƖƖNA.”
19Ŋɩɩ nɛ Wɩa tɩndaarʋ-la fa sɩ laa Iziral tɩŋŋaa sɩpaaŋ mɩɩra bala chɩŋ ba harɩŋ, duoŋ-bɩlɩmbaaŋ-la ma fa sɩ nagɛ jebiiŋ ma lɩɩ ba sɩpaaŋ kʋ bala chɩŋ ba harɩŋ. 20Ʋ kʋ chɩŋ Iziral tɩŋŋaa arɩ Ijipiti tɩŋŋaa pɛgɛ a kɛrɛ birimiŋ hɛ Ijipiti tɩŋŋaa lɛ aŋ leŋ pʋlʋmʋŋ hɛ Iziral tɩŋŋaa leriŋ. Biriŋ-la sɩ hɛ ba pɛgɛ ŋɩɩ, ba kʋŋkala bɩ wuo mʋ kpagɛ ʋ dɔŋɔ tɩtaŋ-la kala.
21Ŋɩɩ nɛ Mosis kɛŋ dantɩga-la sɩ hɛ ʋ nɩsɩŋ lɛ zaarɛ mʋga-la nyuŋ. La TƖƖNA leŋ pel-duoŋ lɩɩ wɩɩpɔsʋŋ a lu tɩtaŋ-la kala a ŋaa mʋga-la lɩɩŋ pɔɩ balɩa aŋ ka tintee-hɩlɩŋ. 22Ŋɩɩ nɛ Iziral tɩŋŋaa vɛŋ mʋga-la tʋɔŋ tintee-hɩlɩŋ, ka lɩɩ-la nagɛ jebiiŋ ba nadiiŋ arɩ ba nagʋa.
23Ŋɩɩ nɛ Ijipiti tinteeŋ kuoro laalɩyuoroo janɩŋ, ʋ janɩŋ torukoba arɩ ja-jɩllaa kire to ba harɩŋ a kala jʋʋ mʋga-la tʋɔŋ. 24Sɩɩpʋʋraa, La TƖƖNA to duoŋ-bɩlɩmbaaŋ-la sɩ nagɛ jebiiŋ aŋ kɛŋ nyiniŋ lɛ, a na Ijipiti tɩŋŋaa laalɩyuoroo a ŋaa ba wɩɩkala vʋgʋmɛ. 25Aŋ ka ʋ ŋaa ba janɩŋ torukoba naasɩŋ yuŋ a bɩ wuo vɩvɛŋ. Ŋɩɩ nɛ Ijipiti tɩmma-la bʋl, “Má leŋ la fá, aŋ ka Iziral tɩŋŋaa. La TƖƖNA yuola a pɩpɛ Iziral tɩŋŋaa lɛ nɛ.”
26Ŋɩɩ nɛ La TƖƖNA bʋla pɩ Mosis, “Kɛŋ ŋ dantɩga-la sɩ hɛ ŋ nɩsɩŋ lɛ tɩɛnɛ a zaarɛ mʋga-la nyuŋ, dɩ lɩɩŋ mɩɩra kʋ tɔ Ijipiti tɩŋŋaa arɩ ba janɩŋ torukoba arɩ ba ja-jɩllaa lɛ.” 27Ŋɩɩ nɛ Mosis kɛŋ ʋ nɩsɩŋ zaarɛ mʋga-la lɛ. Chʋchʋɔ-fɩɛla mʋga-la mɩɩra kʋ tɔ a nagɛ ʋ nagɩsɩŋ. Ijipiti tɩŋŋaa nɛrɩgɛ dɩ ba laa ba tɩtɩa a bɩ wuo lɩɩ. Ŋɩɩ nɛ La TƖƖNA leŋ lɩɩ-la pɛllɛ paaba. 28Lɩɩ-la kʋ tɔ janɩŋ torukoba arɩ ja-jɩlla-la arɩ Ijipiti tinteeŋ kuoro laalɩyuoroo kala fa sɩ to Iziral tɩmma-la harɩŋ jʋʋ mʋga-la. Ba nɩbala ma bɩ wuo lɩɩ.
29Ama Iziral tɩŋŋaa wuo vɛŋ tintee-hɩlɩŋ lɛ nɛ mʋga-la tʋɔŋ, aŋ ka lɩɩŋ nagɛ jebiiŋ ba nadiiŋ arɩ ba nagʋa kala. 30Tapʋlɩɩ-la nɛ La TƖƖNA laa Iziral tɩŋŋaa ta Ijipiti tɩŋŋaa nɩsɩŋ lɛ. Ba na Ijipiti tɩŋŋaa kʋsʋʋnʋŋ sɩ pɩŋ mʋga-la niiŋ kala. 31Iziral tɩŋŋaa sɩ na tɩntɩŋ-duoru-la La TƖƖNA sɩ tɩma Ijipiti tɩŋŋaa lɛ, ŋɩɩ nɛ nɩalɩŋ laa Wɩa arɩ ʋ tɩntɩnna Mosis wɩaa dii.
Currently Selected:
MOSIS KƐŊ IZIRAL TƖŊŊAA LƖƖ 14: SIS
Highlight
Copy
Compare
Share
Want to have your highlights saved across all your devices? Sign up or sign in
©Ghana Institute of Linguistics Literacy and Bible Translation 1984, 2014
