MOSIS KƐŊ IZIRAL TƖŊŊAA LƖƖ 13
13
Iziral tɩŋŋaa maga dɩ ba joŋ ba hambolibii bumbumba pɩ La TƖƖNA
1Ŋɩɩ nɛ La TƖƖNA bʋla pɩ Mosis, 2“Dɩ Iziral tɩɩna kala nɛ lʋl ʋ hambolibii bumbuŋ, ʋ joŋo pɩmɛ, dɩ pʋna ma nɛ lʋl ʋ bii-bumbuŋ dɩ ʋ ŋaa bele, mɩ nɛ tɩɩʋ.”
3Ŋɩɩ nɛ Mosis bʋla pɩ Iziral tɩŋŋaa, “Má liisi tapʋlʋŋ deeŋ La TƖƖNA sɩ kɛmma lɩɩ Ijipiti tinteeŋ lɛ wɩaa, lee-la ma fa sɩ hɛ a ŋaa yosi. Ʋ chaasa joŋ doluŋ nɛ a kɛmma kʋ lɩɩ. Má sɩ́ kʋŋkala sɩ kɛŋ sɩbʋrʋŋ dii tapʋlɩɩ-la. 4Má lɩɩ Ijipiti tinteeŋ lɛ jɩnɩŋ tapʋlʋŋ, chɛnɛ-la ba sɩɩ yɩrɛ Abib tʋɔŋ nɛ. 5Dɩ La TƖƖNA nɛ kɛmma kaa mʋ Kɛnaŋ tɩŋŋaa, Hiti tɩŋŋaa, Amɔrɩ tɩŋŋaa, Hivi tɩŋŋaa arɩ Jebus tɩŋŋaa tinteeŋ, tintee-la sɩ sɩma a kɛŋ kɩaa, ʋ hɛ niiŋ pɩ ma naabalɩmaba arɩ ʋ jaŋ joŋo pɩma, ma jaŋ gbieli gbiele-la chɛnɛ-la tɩtɩa tʋɔŋ. 6Ma jaŋ dii boroboro-la sɩ bɩ sɩbʋrʋŋ kɛnɛ tapʋlaa balɩpɛ. Tapʋl-pɛɩ chɛɛŋ, má gbieli gbiele a zil La TƖƖNA. 7Tapʋlaa deemba balɩpɛ ma jaŋ dii boroboro-la sɩ bɩ sɩbʋrʋŋ kɛnɛ, aŋ paala sɩ́ leŋe dɩ sɩbʋrʋŋ koo boroboro-la sɩ kɛŋ sɩbʋrʋŋ kpagɛ lee-la ma sɩ hɛ. 8Tapʋlɩɩ-la má bʋla pɩ ma biiriŋ, ‘Laa gbieli gbiele deeŋ a tɩŋ wɩɩ-la La TƖƖNA sɩ ŋaa pɩla nɛ bʋa-la lɛ ʋ sɩ kɛnla kaa lɩɩ Ijipiti tinteeŋ lɛ.’ 9Gbiele deeŋ jaŋ nagɛ magɩl ma nɩsaa lɛ, a nagɛ magɩl ma tilliŋ lɛ dɩ La TƖƖNA niiŋ wɩaa sɩ́ ma niiŋ lɛ lɛl. Ʋ doluŋ nɛ ʋ kaa kɛmma lɩɩ Ijipiti tinteeŋ lɛ. 10Má gbigbieli gbiele deeŋ bʋa deeŋ lɛ jɩna na-kala.
11Dɩ La TƖƖNA nɛ kɛmma mʋ Kɛnaŋ tɩŋŋaa tintee-la ʋ sɩ hɛ niiŋ pɩ ma naabalɩmaba arɩ ʋ jaŋ joŋo pɩma, 12má joŋ ma hambolibii bumbumba arɩ ma pʋsʋŋ ma kala bii-bumbumba sɩ ŋaa belliŋ a pɩ La TƖƖNA. 13Kakusuŋ bii-bumbumba sɩ ŋaa belliŋ, má kɛŋ pie-pɔrɔɔ lenniba. Dɩ ma nɛ bɩ pie-biisiŋ kaa lenni, má mɩlɩmɛ ba baŋŋaa bori. Ma Iziral tɩŋŋaa hambolibii bumbumba maga dɩ ma mɩɩra time laaba.
14Maachie dɩ ŋ bie nɛ pɩɛsɩŋ a chɩchɛ dɩ ʋ jɩŋ wɩɩ-la ŋ sɩɩ ŋaa bʋbʋɔŋ, bʋla pʋ, ‘La TƖƖNA kɛŋ ʋ doluŋ nɛ a kɛnla lɩɩ Ijipiti tinteeŋ lɛ, lee-la la fa sɩ hɛ a ŋaa yosi. 15Ijipiti tinteeŋ kuoro tʋɔŋ fa sɩ pɩra ʋ bɩ chɛ dɩ ʋ leŋ la lɩɩ ʋ tinteeŋ lɛ, ŋɩɩ nɛ La TƖƖNA kpʋ Ijipiti tɩŋŋaa hambolibii bumbumba arɩ ba pʋsʋŋ bii-bumbumba sɩ ŋaa belliŋ kala. Ŋ-la nɛ tɩɩ mɩ joŋ mɩ hambolibii bumbumba arɩ mɩ pʋsʋŋ ma kala bii-bumbumba sɩ ŋaa belliŋ a ŋaa Wɩɩsʋlʋŋ pɩ La TƖƖNA, ama mɩ hambolibii bumbumba-na mɩ yie time laa nɛ.’ 16Wɩaa deemba saa jaŋ nagɛ magɩlɩŋ ŋ nɩsɩŋ lɛ, a nagɛ magɩl ŋ tile lɛ arɩ La TƖƖNA nɛ kɛnla lɩɩ Ijipiti tinteeŋ lɛ arɩ ʋ doluŋ.”
Iziral tɩŋŋaa sɩɩ chol mʋgʋ-balɩŋ
17Ijipiti tinteeŋ kuoro sɩ ta Iziral tɩŋŋaa dɩ ba viiri, Wɩa bɩ ba kaa to wombii-kuu-la sɩ to Fɩlɩsɩtɩa tɩŋŋaa tinteeŋ. Wɩa sɩ, “Dɩ ba nɛ mʋ cheŋ laalɩŋ wombiiŋ lɛ, ba jaŋ wuo bɩrɩmɛ ba tʋɔbɩɩnaa a mɩɩra mʋ Ijipiti tinteeŋ.” 18Ŋɩɩ nɛ Wɩa kɛŋ Iziral tɩŋŋaa gollo to tintee-hɩlɩɩ-la tʋɔŋ a chaasɛ mʋgʋ-bal-la ba sɩɩ yɩrɛ Mʋgʋ-fɩaŋ. Iziral tɩŋŋaa sɩ lɩɩ Ijipiti tinteeŋ lɛ, ba laalɛ ba bayuori kɩaa nɛ.
19Mosis pɛ paa Josɛf haŋgbelee arɩ Josɛf fa sɩ leŋe Iziral tɩŋŋaa hɛ niiŋ ŋɩɩ. Ʋ fa sɩ, “Wɩa sɛnɛ jaŋ kʋ laama ta. Dɩ ʋ nɛ kʋ laama ta, má pɛ paa mɩ haŋgbelee kaa lɩɩ Ijipiti tinteeŋ lɛ.”
20Iziral tɩŋŋaa sɩ sii lee-la ba sɩɩ yɩrɛ Sʋkɔf, ba mʋ hɔŋ Ɛtam lɛ nɛ a kpagɛ tintee-hɩlɩŋ niiŋ. 21Dɩ taŋ nɛ pʋla, La TƖƖNA yie laa ba sɩpaaŋ nɛ a nagɛ duoŋ-bɩlɩmbaanɩŋ sɩ nagɛ jebiiŋ. Tɩtaŋɩŋ ma ʋ nagɛ jebiiŋ sɩ ŋaa nyiniŋ a kɛŋ pʋlʋmʋŋ a laa ba sɩpaaŋ, ba wuo vɩvɛŋ wɩɩhɛyɛ arɩ tɩtaŋɩŋ kala. 22Duoŋ-bɩlɩmbaaŋ-la sɩ nagɛ jebiiŋ a laa ba sɩpaaŋ wɩɩhɛyɛ, arɩ jebii-la sɩ nagɛ nyiniŋ a laa ba sɩpaaŋ tɩtaŋɩŋ bɩ ba harɩŋ mɩɩra.
Currently Selected:
MOSIS KƐŊ IZIRAL TƖŊŊAA LƖƖ 13: SIS
Highlight
Copy
Compare
Share
Want to have your highlights saved across all your devices? Sign up or sign in
©Ghana Institute of Linguistics Literacy and Bible Translation 1984, 2014
