MOSIS KƐŊ IZIRAL TƖŊŊAA LƖƖ 15
15
Mosis yɩɩ yɩɩlɩŋ a dɛnnɛ La TƖƖNA
1Ŋɩɩ nɛ Mosis arɩ Iziral tɩŋŋaa yɩɩ yɩɩlɩŋ deeŋ a dɛnnɛ La TƖƖNA:
“Mɩ jaŋ yɩɩ yɩɩlɩŋ a dɛnnɛ La TƖƖNA,
bɛɛ wɩaa ʋ leŋ ʋ yɩrɩŋ faasa yɩrɛ nɛ.
Ʋ yuo dii janɩŋ arɩ ba jɩjɩllaa a jomba yuo hɛ mʋga lɛ.
2La TƖƖNA nɛ ŋaa mɩ doluŋ, mɩ jaŋ yɩɩ yɩɩlɩŋ aa dagɛ wɩalɩŋ ʋ sɩ ŋaa.
Ʋ nɛ ŋaa mɩ Laataara.
Ʋ nɛ ŋaa mɩ Wɩa, mɩ jaŋ dɛnnʋ.
Ʋ nɛ ŋaa mɩ nyɩmma Wɩa, mɩ jaŋ leŋ dɩ ʋ yɩrɩŋ yɩrɛ.
3La TƖƖNA ŋaa bayuoru nɛ,
ʋ yɩrɩŋ nɛ La TƖƖNA.
4Ʋ joŋ Ijipiti tinteeŋ kuoro janɩŋ torukoba
arɩ ʋ laalɩyuoroo yuo hɛ mʋgʋ-balɩŋ lɛ nɛ.
Ijipiti kuoro laalɩyuori-kpaŋkpamba kala jʋʋ Mʋgʋ-fɩaŋ.
5Lɩɩ-luŋii-la tɔba nɛ,
ba tuu lɩɩŋ bʋbʋɔŋ nɛ a nagɛ tabɩɩŋ.
6La TƖƖNA, ŋ naduo-la kɛŋ doluŋ woruŋ,
ʋ nɛ ŋ kaa ŋmoo ŋ dʋndɔŋŋɔɔ pɩsɛ.
7Ŋ doluŋ yʋga, ŋɩɩ nɛ ŋ yuo dii nɩalɩŋ sɩ bɩ ŋ niiŋ sɛyɛ.
Ŋ leŋe ŋ baanɩŋ guu sii nɛ,
a diiba a nagɛ nyiniŋ sɩ dii ya-yʋalaa.
8Ŋ mɩɩ-boiŋ peliŋ nɛ yigi lɩɩŋ mʋ hɛ dɔŋɔ,
ʋ sii chɩŋ a nagɛ kɛrɛ,
ka fuo-luŋii-la tʋɔŋ kala hɩl.
9Ŋɩɩ nɛ ŋ dʋndɔŋŋɔɔ bigisi ba tɩtɩa lɛ a bʋl,
‘La jaŋ kire kɛmba a kpʋba arɩ tokobiee
aŋ laa kɩalɩŋ kala la sɩɩ chɛ ba dʋa tʋɔŋ.’
10Ŋ wiese hɛ ba lɛ nɛ, mʋgʋ-balɩŋ tɔ ba kala,
ba tuu lɩɩŋ bʋbʋɔŋ a nagɛ hɔɔ-yuŋuŋ sɩ tuu lɩɩ-balɩŋ.
11La TƖƖNA, vesiŋ tʋɔŋ, veŋ bɛɛ nɛ hɛ nɩmɛ a magɩŋ?
Kʋbɛɛ nɛ hɛ nɩmɛ a jaŋ wuo dagɛ ʋ tʋɔpʋla
arɩ ʋ doluŋ a magɛ dɩ la fɩfáʋ
a dɛnnʋ a tɩŋ ʋ sɩɩ ŋaa wʋkpuŋkperisiŋ?
12Ŋ dagɛba ŋ doluŋ nɛ,
tinteeŋ paaba liŋ.
13Ŋ chonuŋ sɩ bɩ dɛrɛ wɩaa
ŋ jaŋ laa nɩalɩŋ ŋ sɩ laata sɩpaaŋ.
Ŋ dol-la nɛ ŋ jaŋ kaa kɛmba hɛ
ŋ dɩɩ-zɔmʋŋ tʋɔŋ.
14Dɩ tinteyee dɔnsʋŋ nɩaa nɛ nɩɩ wɩɩŋ deeŋ, fawʋllʋŋ jaŋ jʋʋba dɩ ba chichel. Fawʋllʋŋ jaŋ jʋʋ Fɩlɩsɩtɩa tɩŋŋaa ma woruŋ.
15Fawʋllʋŋ jaŋ kɛŋ Ɛdɔm tinteeŋ kuoroo,
dɩ Mʋab tinteeŋ babiibalaa ma chichel,
dɩ Kɛnaŋ tinteeŋ nɩaa nandaasɩŋ kala yʋɔrɛ.
16Fawʋllʋŋ jaŋ chaasa jʋʋba dɩ ba chichel.
Ŋ doluŋ jaŋ leŋ dɩ ba chɩŋ jim a nagɛ bʋŋ,
ka ŋ nɩaa kʋ bal, nɩalɩŋ ŋ sɩ laa ta.
17Ŋ jaŋ kɛmba jɩla hɛ ŋ peeliŋ nyuŋ,
ŋ tɩtɩa dɩhɔnʋŋ, lee-la ŋ sɩ sɩ ŋ jaŋ joŋo pɩba,
lee-la ŋ sɩ saa pɩ ŋ tɩtɩa a jʋjʋʋ.
18La TƖƖNA jaŋ dii kuoruŋ
a kaa mʋ wuu.”
19Iziral tɩŋŋaa vɛŋ tintee-hɩlɩŋ lɛ nɛ a lɩɩ mʋgʋ-balɩŋ tʋɔŋ, ama Ijipiti tinteeŋ kuoro janɩŋ arɩ ʋ janɩŋ torukoba arɩ ja-jɩllaa sɩ mʋ jʋʋ mʋga-la, La TƖƖNA leŋe lɩɩŋ mɩɩra kʋ tɔba nɛ. 20Mɩrɩam fa ŋaa Arɔŋ dɩhaala nɛ, a ŋaa Wɩa wʋlaabʋllʋ. Ʋ sii a joŋ chɩnchɩga. Haalaa dɔnsʋŋ ma sii to ʋ harɩŋ a paa ba chɩnchɩgɩsɩŋ a gʋgʋa. 21Ŋɩɩ nɛ Mɩrɩam ta yɩɩlɩŋ pɩba.
Ʋ sɩ, “Má yɩɩ yɩɩlɩŋ pɩ La TƖƖNA,
má leŋ dɩ ʋ yɩrɩŋ yɩrɛ woruŋ.
Ʋ joŋ ja-jɩlla arɩ ʋ jaaba kala
a yuo hɛ mʋgʋ-balɩŋ tʋɔŋ nɛ.”
22Ŋɩɩ nɛ Mosis kɛŋ Iziral tɩŋŋaa ba sii Mʋgʋ-fɩaŋ-la niiŋ. Ba mʋ jʋʋ Suu tintee-hɩlɩŋ. Ba vɛŋ tintee-hɩlɩɩ-la tʋɔŋ tapʋlaa batori aŋ bɩ lɩɩŋ na dɩ ba nyʋa. 23Ŋɩɩ nɛ ba kʋ yi lee kʋbala baa yɩrɛ Mara. Ba bɩ lɩɩ-la sɩ hɛ lee-la wuo nyʋa, bɛɛ wɩaa lɩɩ-la hɛyɛ nɛ. (Ŋɩɩ nɛ tɩɩ ba kɛŋ lee-la yɩyɩrɛ Mara.) 24Ŋɩɩ nɛ nɩalɩŋ gʋgʋrɩmɛ wɩaa Mosis teeŋ, aa bʋl, “Nɩɩ nɛ la jaŋ na lɩɩŋ a nyʋa?”
25Ŋɩɩ nɛ Mosis bunso pɩ La TƖƖNA. La TƖƖNA dagʋ daaŋ ʋ joŋo yuo hɛ lɩɩ-la lɛ ʋ zɔŋ arɩ nyʋanʋŋ.
Nɩmɛ nɛ La TƖƖNA bil wombiee pɩba a magɩsɛba. 26Ʋ sɩ, “Dɩ ma nɛ jaŋ jegile nɩɩ mɩ-na ma TƖƖNA Wɩa niiŋ woruŋ a ŋɩŋaa wɩaa ba bʋa lɛ, a to wɩalɩŋ kala mɩ sɩ dagɛma, mɩ bɩ jaŋ joŋ nyanyalɩa-la mɩ sɩ joŋo hɛ Ijipiti tɩŋŋaa lɛ a hɛ ma lɛ. Mɩ nɛ ŋaa ma TƖƖNA, mɩ nɩɩ vaarɛ ma nyanyalaa.”
27Ŋɩɩ nɛ ba kɔ lee kʋbala baa yɩrɛ Elim. Lɩɩ-bulo bʋɔsʋŋ fii arɩ balɩa hɛ nɩmɛ, abɛ tɩɩsɩŋ mahɩŋ batori arɩ fii ma hɛ nɩmɛ. Ba hɛ ba lɛŋŋɛɛ a hɔŋ a kpagɛ lɩɩ-la.
Currently Selected:
MOSIS KƐŊ IZIRAL TƖŊŊAA LƖƖ 15: SIS
Highlight
Copy
Compare
Share
Want to have your highlights saved across all your devices? Sign up or sign in
©Ghana Institute of Linguistics Literacy and Bible Translation 1984, 2014
