MOSIS KƐŊ IZIRAL TƖŊŊAA LƖƖ 12
12
La TƖƖNA kieli Iziral tɩŋŋaa dɩɩsɩŋ bal
1Ŋɩɩ nɛ La TƖƖNA bʋla pɩ Mosis arɩ Arɔŋ Ijipiti tinteeŋ lɛ, 2“Chɛnɛ deeŋ nɛ jaŋ ŋaa ma jɩna tʋɔŋ chɛŋ-bumbuŋ. 3Bʋla pɩ Iziral tɩŋŋaa kala, chɛnɛ deeŋ tapʋlaa fii chɛɛŋ, dɩa tɩɩna-kala jaŋ kpʋ pie-bie a pɩ ʋ dɩa nɩaa. 4Dɩ dɩa-la nɩaa nɛ bɩ yʋgɛ a bɩ pie-pilimiŋ wuo chaŋ, ʋ maga dɩ ba pɛ dɩa-la sɩ kpagɛba nɩaa lɛ dɩ ba kala kpʋ pie-bala a chaŋ. 5Pʋna-la ma sɩ jaŋ lɩɩsɛ maga dɩ ʋ ŋaa pie-bele koo gbuŋgbogo a yi jɩna a sɩ́ nyɔɔ kala kɛŋ. 6Dɩ ma nɛ lɩɩsɛ pʋsʋ-la, má beŋ ba nyuŋ a mʋ yi chɛŋ-bumbuŋ-la tapʋlaa fii arɩ banɛsɛ chɛɛŋ, dɩ Iziral tɩɩna-kala kpʋ ʋ pʋna wɩɩ-mul-jʋʋlʋŋ lɛ. 7Dɩɩsɩ-la lɛ ma sɩ jaŋ hɔnɔ chaŋ nammɩa-la, má ŋaa pʋsʋ-la chalɩŋ a taa boiŋ niiŋ sɛsɩŋ arɩ nyuŋ. 8Tɩtaŋ-la tɩtɩa, má wasɛ nammɩa-la arɩ pɩpaa-haarɩŋ, a kɛŋ boroboro-la sɩ bɩ sɩbʋrʋŋ kɛnɛ a dii. 9Má sɩ́ nammɩa-la kʋhuoŋ koo kʋchɔɔlʋŋ chaŋ, má wasɛ ba kala, nyusuŋ, naasɩŋ arɩ tʋɔŋ kɩaa kala. 10Má sɩ́ leŋe dɩ nammɩa-la chɩna chʋa. Dɩ ʋ nɛ ka dɩ taŋ pʋl, má joŋo nyɩgɛ. 11Ŋ-la nɛ ma jaŋ dii kɩalɩŋ: Má vɔɔ ma gɛnnɩŋ arɩ damɛrɩsɩŋ, a hɛ nɛntɛŋŋɛɛ aŋ paa ma dantɩgɩsɩŋ kori a dii kɩalɩŋ lɩma lɩma. Mɩ-na ma TƖƖNA dɩɩsɩŋ kiele bal gbiele nɛ.
12Tɩtaŋ-la tɩtɩa, mɩ jaŋ gɔllɛ Ijipiti tinteeŋ a kpʋ ba hambolibii-hɩasɩŋ arɩ ba pʋsʋŋ bii-bumbumba sɩ ŋaa belliŋ a leŋ vesi-la kala sɩ hɛ Ijipiti lɛ jɩŋ arɩ ba bɩ kɩaa ŋaa, mɩ nɛ ŋaa ma TƖƖNA. 13Chal-la ma sɩ ŋaa taa ma dɩɩsɩŋ jaŋ ŋaa magɩl, dɩ mɩ nɛ kʋ naʋ, mɩ jaŋ kiele bal, wʋbɔŋ kala bɩ jaŋ ŋaa ma lɛ dɩ mɩ nɛ kɔ dɩ mɩ yuo Ijipiti tɩŋŋaa.
14Tapʋlʋŋ deeŋ jaŋ ŋaa magɩl a pɩma, dɩ ma dɩ ma doho nɩaa kala gbieli a liliisi wɩalɩŋ mɩ-na ma TƖƖNA sɩ ŋaa a kaa mʋ wuu. 15Ma jaŋ dii boroboro-la sɩ bɩ sɩbʋrʋŋ kɛnɛ tapʋlaa balɩpɛ. Tapʋl-bumbuŋ, má paa sɩ-bʋrʋ-la kala sɩ hɛ ma dɩɩsɩŋ lɛ lɩɩ ta. A lɩɩ tapʋl-bumbuŋ a kaa mʋ tapʋl-pɛɩ chɛɛŋ, dɩ nʋʋkala nɛ dii kʋdiilii sɩ kɛŋ sɩbʋrʋŋ, má lɩɩsʋ ta Iziral tɩŋŋaa tʋɔŋ. 16Tapʋl-bumbuŋ arɩ tapʋl-pɛɩ chɛɛŋ má hilimi La TƖƖNA yɩrɩŋ lɛ. Tapʋlaa deemba, má sɩ́ tɩntɩmɩɩ kala tɩŋ, see kʋdiile-la ma sɩ jaŋ ŋaa dii.
17Ʋ maga dɩ maa gbieli boroboro-la sɩ bɩ sɩbʋrʋŋ kɛnɛ gbiele nɛ, bɛɛ wɩaa tapʋlɩɩ-la nɛ mɩ kɛŋ ma doho nɩaa kala kʋ lɩɩ Ijipiti tinteeŋ lɛ. Ma dɩ ma doho nɩaa kala sɩ jaŋ to ma harɩŋ kɔ jaŋ gbigbieli tapʋlʋŋ deeŋ chɛɛŋ a kaa mʋ wuu. 18A chɩŋ chɛŋ-bumbuŋ tapʋlaa fii arɩ banɛsɛ chɛɛŋ dɩdaanɩŋ a kaa mʋ tapʋlaa mara arɩ kʋbala dɩdaanɩŋ, nʋʋkala maga dɩ ʋ didii boroboro-la sɩ bɩ sɩbʋrʋŋ kɛnɛ nɛ. 19Tapʋlaa balɩpɛ-la pɛgɛ, nʋʋkala bɩ maga dɩ ʋ leŋ dɩ sɩbʋrʋŋ hɛ ʋ dɩa lɛ. Dɩ nʋʋkala nɛ dii kʋŋ sɩ kɛŋ sɩbʋrʋŋ, má lɩɩsʋ ta Iziral tɩŋŋaa tʋɔŋ, dɩ tɩɩna ŋaa Iziral tɩɩna koo nɩwogo. 20Má sɩ́ kʋŋkala sɩ kɛŋ sɩbʋrʋŋ dii lee na-kala ma sɩ hɛ. Má didii kɩalɩŋ sɩ bɩ sɩbʋrʋŋ kɛnɛ.”
21Ŋɩɩ nɛ Mosis yɩrɛ Iziral tɩŋŋaa kʋhɩasɩŋ hɛ dɔŋɔ a bʋla pɩba, “Má kʋŋkala mʋ lɩma a lɩɩsɛ pie-bel pɔrʋŋ a pɩ ma dɩa nɩaa dɩ ba kpʋ La TƖƖNA dɩɩsɩŋ kiele bal pʋna. 22Má chɔl kaku-dɩgɩlɩŋ a kaa yuu pʋna-la ma sɩ kpʋa chalɩŋ sɩ hɛ taasɩ-gbaŋa lɛ a taa ma boiŋ niiree sɛsɩŋ arɩ nyuŋ. Nʋʋkala bɩ maga dɩ ʋ kʋ lɩɩ ʋ dɩa tʋɔŋ see taŋ pʋla. 23Dɩ La TƖƖNA nɩɩ gɔllɛ Ijipiti tinteeŋ dɩ ʋ kpʋ Ijipiti tɩŋŋaa, ʋ jaŋ na chal-la sɩ taa ma boiŋ niiree a kiele bal, ʋ bɩ jaŋ leŋ dɩ wʋbɔŋ kala jʋʋma.
24Ma dɩ ma doho nɩaa kala maga dɩ ma tuto wɩaa deemba nɛ a kaa mʋ wuu. 25Dɩ ma nɛ mʋ tintee-la La TƖƖNA sɩ sɩ ʋ jaŋ joŋo pɩma, má tuto wɩɩŋ deeŋ. 26Dɩ ma biiriŋ nɛ pɩɛsɛma, arɩ wɩɩŋ deeŋ ma sɩɩ ŋaa ʋ bʋbʋɔŋ nɛ bɛɛ, 27ma jaŋ bʋla pɩba, ‘Ʋ ŋaa dɩɩsɩŋ kiele bal gbiele nɛ aa zil La TƖƖNA, ʋ sɩ kieli Iziral tɩŋŋaa dɩɩsɩŋ bal Ijipiti tinteeŋ lɛ aŋ kpʋ Ijipiti tɩŋŋaa aŋ leŋ la.’ ” Ŋɩɩ nɛ nɩalɩŋ tuu kpirimi a dɛnnɛ La TƖƖNA. 28Ŋɩɩ nɛ Iziral tɩŋŋaa ŋaa wɩalɩŋ kala La TƖƖNA sɩ dagɛ Mosis arɩ Arɔŋ.
29Ŋɩɩ nɛ tɩta-siesee La TƖƖNA kʋ kpʋ Ijipiti tɩŋŋaa hambolibii bumbumba kala, a chɩŋ Ijipiti tinteeŋ kuoro hambolibii bumbuŋ lɛ, a kaa mʋʋ yi nɩalɩŋ ba fa sɩ kaa tɔ dɩa hambolibii bumbumba, a pɛ ba pʋsʋŋ kala bii-bumbumba lɛ. 30Ŋɩɩ nɛ Ijipiti tinteeŋ kuoro arɩ ʋ tɩntɩnnɩ-hɩasɩŋ arɩ Ijipiti tɩŋŋaa kala sii yele su Ijipiti tinteeŋ tɩtaŋɩŋ, bɛɛ wɩaa dɩa kala tuo Ijipiti tinteeŋ lɛ nʋʋ sɩ bɩ sʋba.
31Tɩtaŋ-la Ijipiti tinteeŋ kuoro yɩrɛ Mosis arɩ Arɔŋ a bʋla pɩba, “Ma Iziral tɩŋŋaa kala sii aŋ leŋ mɩ nɩaa a mʋ zil ma TƖƖNA arɩ ma fa sɩ bʋl ŋɩɩ. 32Má to kɛsɛ ma piesee, bʋʋnaa arɩ ma nɛsɩŋ a viiri. Dɩ ma nɛ mʋa, ma sʋl Wɩa pɩ mɩ ma.”
33Ŋɩɩ nɛ Ijipiti tɩŋŋaa yigiba dɩ ba lɩɩ ba tinteeŋ lɛ lɩma, aŋ bʋl, “Ma lɩɩ, dɩ ŋɩɩ dee la kala jaŋ sʋʋ.” 34Ŋɩɩ nɛ nɩalɩŋ joŋ ba munnuŋ ba fa sɩ bɩ sɩbʋrʋŋ hɛ a hɛ gbansɩŋ lɛ a kɛŋ gɛnnɩŋ vɔɔ tɔ a joŋo baasɛ baasɛ. 35Ŋɩɩ nɛ Iziral tɩŋŋaa ŋaa wɩɩ-la arɩ ŋɩɩ Mosis fa sɩ bʋla pɩba. Ba sʋl gɛnnɩŋ, hɔpʋla arɩ sɛlɩmɛ kpɩɛraa Ijipiti tɩŋŋaa teeŋ. 36Ŋɩɩ nɛ La TƖƖNA leŋ Ijipiti tɩŋŋaa lɛɛlɛ zizil Iziral tɩŋŋaa a joŋ kɩalɩŋ ba sɩ pɩɛsaa chɛ a pɩba. Iziral tɩŋŋaa to ŋɩɩ lɛ a chʋŋ Ijipiti tɩŋŋaa dʋa kala viiri.
37Iziral tɩŋŋaa vɛŋ naasɩŋ lɛ nɛ a lɩɩ Ramesis sɩ hɛ Ijipiti tinteeŋ lɛ a mʋ Sʋkɔf. Ba baalaa dʋndʋŋa yi bʋɩ zɔɔ-balɩdʋ nɛ, ba haalaa arɩ ba biiriŋ bɩ pɛ. 38Nɩwogusuŋ yʋga nɛ woruŋ a to ba harɩŋ a pɛ kɛsɛ ba pʋŋ-laalɩŋ: piesee, nɛsɩŋ arɩ bʋʋnaa. 39Ba sɩ kiriba ba lɩɩ Ijipiti lɛ ŋɩɩ, ba bɩ chɩnɩŋ na dɩ ba ŋaa kʋdiilee. Ŋɩɩ nɛ ba joŋ munnu-la ba sɩ bɩ sɩbʋrʋŋ hɛ a ŋaa boroboro. 40Iziral tɩŋŋaa hɔŋ Ijipiti tinteeŋ lɛ jɩsɩŋ zɔɔ-banɛsɛ arɩ mara arɩ fii nɛ. 41Jɩsɩŋ zɔɔ-banɛsɛ arɩ mara arɩ fii deeŋ dɩdɛrɩŋ nɛ La TƖƖNA kɛŋ Iziral tɩŋŋaa doho nɩaa kala kʋ lɩɩ Ijipiti tinteeŋ lɛ. 42Tɩtaŋ-la La TƖƖNA sɩ kɛŋ Iziral tɩŋŋaa lɩɩ Ijipiti tinteeŋ lɛ, ʋ maga dɩ ʋ ŋaa tapʋlɩɩ nɛ dɩ Iziral tɩŋŋaa hɔŋ a sɩ́ doŋ pɩŋ a liliisi ŋɩɩ La TƖƖNA sɩ pɔba. Iziral tɩŋŋaa doho nɩaa maga dɩ baa ŋaa wɩɩŋ deeŋ nɛ a kaa mʋ wuu. 43Ŋɩɩ nɛ La TƖƖNA Wɩa bʋla pɩ Mosis arɩ Arɔŋ, “Wombiee deemba nɛ ma jaŋ to a gbieli dɩɩsɩŋ kiele bal gbiele.
Nɩwogo kala bɩ maga dɩ ʋ pɛ dii. 44Yomo kala ma sɩ yɔbɔ, dɩ ma nɛ keri ʋ peniŋ, ʋ jaŋ wuo dii gbiele-la kʋdiilee. 45Nʋhʋɔra arɩ pachɩŋ diire-na bɩ kɩalɩŋ wuo dii.
46Má dii kɩalɩŋ dɩa tʋɔŋ, má sɩ́ kaa kʋ lɩɩ dɩ-jalɩŋ, má sɩ́ nammɩa-la haŋgbelee ma dɩma yɛrɛ. 47Iziral tɩŋŋaa kala nɛ maga dɩ ba gbieli gbiele deeŋ.
48Dɩ nɩwogo kala nɛ hɛ Iziral tɩŋŋaa tʋɔŋ aa chɛ dɩ ʋ pɛ gbieli mɩ-na ma TƖƖNA dɩɩsɩŋ kiele bal gbiele-la, ʋ maga dɩ ʋ keri baala-la kala sɩ hɛ ʋ dɩa lɛ penee nɛ, aŋ-na mʋ pɛ a nagɛ ʋ ma ŋaa Iziral tɩɩna nɛ. Nʋʋkala sɩ bɩ ʋ peniŋ kere bɩ jaŋ wuo dii mɩ-na ma TƖƖNA dɩɩsɩŋ kiele bal gbiele kʋdiilee. 49Wombiee deemba nɛ maga Iziral tɩŋŋaa arɩ nɩwogusu-la kala sɩ hɛ ba tʋɔŋ tuto a mʋʋ tɩgɛ mɩ-na ma TƖƖNA dɩɩsɩŋ kiele bal gbiele-la lɛ.”
50Ŋɩɩ nɛ Iziral tɩŋŋaa ŋaa wɩalɩŋ kala La TƖƖNA sɩ dagɛ Mosis arɩ Arɔŋ. 51Tapʋlɩɩ-la tɩtɩa nɛ La TƖƖNA kɛŋ Iziral tɩŋŋaa doho doho kala kʋ lɩɩ Ijipiti tinteeŋ lɛ.
Currently Selected:
MOSIS KƐŊ IZIRAL TƖŊŊAA LƖƖ 12: SIS
Highlight
Copy
Compare
Share
Want to have your highlights saved across all your devices? Sign up or sign in
©Ghana Institute of Linguistics Literacy and Bible Translation 1984, 2014
