MOSIS BƖRA WULLI WƖA WOMBIIŊ 6
6
Má cho ma TƖƖNA Wɩa
1Wombiee arɩ niiriŋ deemba nɛ ma TƖƖNA Wɩa dagɛmɛ dɩ mɩ joŋo dagɛma, dɩ ma tutoba dɩ ma nɛ mʋ chol Jɔdaŋ fuo-la a jʋʋ tintee-la ʋ sɩ jaŋ joŋo pɩma dɩ ʋ ŋaa ma kʋŋ. 2Ma dɩ ma biiriŋ arɩ ma nihee kala maga dɩ má zizil ma TƖƖNA Wɩa nɛ bʋa na-kala lɛ, a tuto wombie-la arɩ niiri-la kala mɩ sɩ jaŋ dagɛma, dɩ ŋɩɩ leŋ dɩ ma kɛŋ mɩɩ-duduoŋ tintee-la lɛ ʋ sɩ jaŋ joŋo pɩma. 3Iziral tɩmma, má tuto wombie-la woruŋ dɩ ŋɩɩ leŋ dɩ wɩaa vɛŋ woruŋ a pɩma, dɩ ma pʋŋa yʋgɛ tintee-la sɩ sɩma woruŋ a kɛŋ kɩaa lɛ, arɩ La TƖƖNA ma nyɩmmaba Wɩa sɩ hɛ niiŋ ŋɩɩ a pɩma.
4Iziral tɩmma, má jɩŋ arɩ La TƖƖNA Wɩa ŋaa kʋbala nɛ. 5Má kɛŋ ma tʋɔŋ arɩ ma wɩɩ-wɩɩkala a cho ma TƖƖNA Wɩa. 6Wɩaa deemba mɩ sɩɩ dagɛma jɩnɩŋ, má joŋo hɛ ma tʋɔŋ lɛ. 7Má joŋ wɩalɩŋ a dɩdagɛ ma biiriŋ bʋa na-kala, ma dɩɩsɩŋ lɛ koo dɩ ma nɩɩ vɛŋ wombiiŋ. 8Má ŋmʋnsɛ wɩalɩŋ a joŋo vɔɔ ma nɩsaa arɩ ma tilliŋ lɛ dɩ ba liliisima bʋa na-kala lɛ. 9Má ŋmʋnsɛ wɩalɩŋ a hɛ ma borusuŋ arɩ boi-baalaa lɛ. 10La TƖƖNA Wɩa jaŋ kɛmma kaa mʋ tintee-la ʋ sɩ hɛ niiŋ pɩ ma naabalɩmaba Abɩraham, Aɩzɩk arɩ Jekɔb arɩ ʋ jaŋ joŋo pɩma, tabalaa sɩ kɛŋ dʋa ma sɩ dee bɩ chɛ, 11dɩɩsɩŋ kala su arɩ kʋzɔŋŋɔɔ ma dee sɩ bɩ chɛ. Vilee ma hɛ nɩmɛ ma sɩ dee bɩ luo, girep arɩ olif tɩɩsɩŋ bagɩsɩŋ ma hɛ nɩmɛ ma sɩ dee bɩ pɛrɛ. Ŋɩɩ wɩaa, dɩ ma nɛ kʋ dii kɩaa deemba a vɔgɛ, 12má sɩ́ ma TƖƖNA wɩaa yʋ. Ʋ nɛ kɛmma kaa kʋ lɩɩ Ijipiti tinteeŋ lɛ, lee-la ma fa sɩ hɛ a ŋaa yosi.
13Má zizil ma TƖƖNA Wɩa a chʋchʋɔlɛ ʋ dʋndʋŋa a tutou, a ŋɩŋaa wɩɩkala ʋ yɩrɩŋ lɛ. 14Má sɩ́ vene kala to, nɩalɩŋ sɩ hɔnɔ kpagɛma vesiŋ. 15Ma Tɩɩna Wɩa bɩ hadɔrʋŋ ka chɛ. Dɩ ma nɛ to vene dɔŋ, ʋ baanɩŋ jaŋ faasa sii ma nyuŋ dɩ ʋ cheima ta tintee-la lɛ. 16Má sɩ́ ma TƖƖNA Wɩa magɩsʋ arɩ ma fa sɩ ŋaa ŋɩɩ lee-la ba sɩɩ yɩrɛ Masa lɛ. 17Má hɛ doluŋ aŋ to wombie-la, niiri-la arɩ wɩalɩŋ kala ma TƖƖNA Wɩa sɩ dagɛma. 18Má ŋɩŋaa wɩaa ba bʋa lɛ arɩ wɩalɩŋ sɩ zɔmɔ La TƖƖNA teeŋ, dɩ wɩɩkala vɛŋ woruŋ a pɩma dɩ ma wuo jʋʋ tintee-zɔŋ-la La TƖƖNA sɩ hɛ niiŋ pɩ ma naabalɩmaba arɩ ʋ jaŋ joŋo pɩma, 19dɩ ŋɩɩ leŋ dɩ ma wuo yuo kiri ma dʋndɔŋŋɔɔ kala tintee-la lɛ arɩ La TƖƖNA sɩ bʋl ŋɩɩ.
20Maachie dɩ ma biiriŋ nɛ pɩɛsɛma, “Bɛɛ nɛ tɩɩ La TƖƖNA Wɩa bʋl dɩ la to wombiee deemba arɩ niiriŋ deemba arɩ wɩalɩŋ kala ʋ sɩ dagɛla?” 21Má bʋla pɩba, “La fa ŋaa yosi nɛ Ijipiti tinteeŋ kuoro nɩsɩŋ lɛ, ŋɩɩ nɛ La TƖƖNA joŋ doluŋ a yuo laala. 22La sɩɩŋ lɛ nɛ La TƖƖNA ŋaa wʋkpuŋkperisiŋ, wʋmagɩlaa arɩ wʋduoruŋ Ijipiti tinteeŋ kuoro arɩ ʋ tɩntɩnnɩ-hɩasɩŋ kala lɛ. 23Ʋ laala ba nɩsɩŋ lɛ nɛ, a kɛnla kaa kɔ tinteeŋ deeŋ arɩ ʋ sɩ hɛ niiŋ ŋɩɩ a pɩ la naabalɩmaba arɩ ʋ jaŋ joŋo pɩla. 24Ŋɩɩ nɛ La TƖƖNA Wɩa bʋla pɩla arɩ la to wɩaa deemba kala aa zilu. Dɩ la nɩɩ toba bʋa na-kala, ʋ jaŋ beŋ la nyuŋ woruŋ a leŋ dɩ la wɩaa kala vɩvɛŋ ba bʋa lɛ. 25Dɩ la nɛ chaasa to wombie-la kala, arɩ ŋɩɩ La TƖƖNA sɩ daga, ʋ tʋɔŋ jaŋ tɔrɛ la nyuŋ.”
Currently Selected:
MOSIS BƖRA WULLI WƖA WOMBIIŊ 6: SIS
Highlight
Copy
Compare
Share
Want to have your highlights saved across all your devices? Sign up or sign in
©Ghana Institute of Linguistics Literacy and Bible Translation 1984, 2014
