MOSIS BƖRA WULLI WƖA WOMBIIŊ 7

Má kiri tintee-wogusu-la nɩaa sɩ hɛ tintee-la lɛ

1Ma TƖƖNA Wɩa jaŋ kɛmma jʋʋ tintee-la ʋ sɩɩ chɛ ʋ joŋo pɩma dɩ ʋ ŋaa ma kʋŋ, a kiri tintee-wogusuŋ deemba balɩpɛ nɩaa sɩ kɛŋ doluŋ a kɩɩma a yʋgɛ kɩɩma ma sɩ hɛ tintee-la lɛ: Hiti tɩŋŋaa, Gɩgasɩ tɩŋŋaa, Amɔrɩ tɩŋŋaa, Kɛnaŋ tɩŋŋaa, Pɛrɛs tɩŋŋaa, Hivi tɩŋŋaa arɩ Jebus tɩŋŋaa. 2Dɩ ma TƖƖNA Wɩa nɛ jomba hɛ ma nɩsɩŋ lɛ dɩ ma yuo dii, má sɩ́ ba nenige fá, má chei ba kala. Má sɩ́ leŋe ma dɩ ba pɛ nii. 3Má sɩ́ ba toloo jaa, a sɩ́ leŋe dɩ ba ma jaa ma toloo. 4Dɩ ma nɛ leŋe ma biiriŋ jaa ba toloo, tolie-la jaŋ lɛrɛba mʋ dɩ ba ma tuto ba vesiŋ. Dɩ ba nɛ saa ŋaa ŋɩɩ, La TƖƖNA jaŋ chaasa na baanɩŋ ma nyuŋ a guu cheima. 5Wɩalɩŋ sɩ maga dɩ ma ŋaa nɩalɩŋ lɛ nɛ ŋ-la: Má giri ba vʋɩyaa korunuŋ, a ŋmoo ba vesiŋ tabɩaa yɛrɛ, a keri ba vene-la ba sɩɩ yɩrɛ Asɩra daasɩŋ lo aŋ nyɩgɛ ba tɔŋŋɔɔ kala. 6Ma chaasa ŋaa ma TƖƖNA Wɩa nɩaa nɛ. Ʋ lɩɩsɛma nɛ dʋnɩa nɩaa kala tʋɔŋ dɩ ma nɛ chaasa ŋaa ʋ nɩchooloo.

7Ʋ bɩ naga ma sɩ yʋga nɛ tɩɩ La TƖƖNA choma a lɩɩsɛma dɩ ma nɛ ŋaa ʋ nɩaa, ma nɛ paala ŋaa doho-la nɩaa sɩ bɩ yʋgɛ dʋnɩa nɩaa kala tʋɔŋ. 8Ama La TƖƖNA paala choma nɛ a bɩ chɛ dɩ nii-la ʋ sɩ hɛ pɩ ma naabalɩmaba kʋ ŋaa pɛɩ. Ŋɩɩ nɛ tɩɩ ʋ yuo laama arɩ ʋ doluŋ Ijipiti tinteeŋ kuoro nɩsɩŋ lɛ, a kɛmma kaa kʋ lɩɩ Ijipiti tinteeŋ lɛ, lee-la ma fa sɩ hɛ a ŋaa yosi. 9Ŋɩɩ wɩaa, ʋ maga dɩ ma jɩŋ arɩ La TƖƖNA Wɩa dʋndʋŋa nɛ Wɩa, ʋ nɛ kɛŋ wʋtɩtɩɩ. Ʋ jaŋ leŋ dɩ nii-la sɩ hɛ ma dɩ ʋ pɛgɛ chɩŋ. Ʋ jaŋ dagɛ ʋ chonuŋ a pɩ nɩalɩŋ kala sɩ chou a tuto wɩalɩŋ kala ʋ sɩ daga doho doho bʋɩba. 10Ama nɩalɩŋ sɩ bɛrʋ, ʋ bɩ jaŋ lemba, ʋ jaŋ cheiba. 11Ŋɩɩ wɩaa, má hɛ doluŋ aŋ to wombie-la arɩ niiri-la arɩ wɩalɩŋ kala mɩ sɩɩ dagɛma jɩnɩŋ.

12Dɩ ma nɛ to wombie-la woruŋ a kɛmba tɩtɩŋ, ma TƖƖNA Wɩa jaŋ choma a leŋ dɩ nii-la ʋ sɩ hɛ ʋ dɩ ma pɛgɛ chɩŋ, arɩ ʋ sɩ ŋmɩɛsɛ ŋɩɩ pɩ ma naabalɩmaba. 13Ʋ jaŋ choma a pɛ ma lɛ, a leŋ dɩ ma pʋŋ. Ʋ jaŋ pɛ ma lɛ dɩ ma lʋl biiriŋ yʋgɛ, a leŋ ma mɩaa, girep arɩ olif tɩɩsɩŋ wasɛ, a leŋ dɩ ma pʋsʋŋ ma pʋŋ. Ʋ jaŋ ŋaa wɩaa deemba kala a pɩma tintee-la lɛ ʋ sɩ hɛ niiŋ pɩ ma naabalɩmaba arɩ ʋ jaŋ joŋo pɩma. 14Ʋ jaŋ pɛ ma lɛ a kɩɩ tintee dɔŋ kala. Ma tʋɔŋ, bapɩrɩ koo hapɩrɩ bɩ jaŋ hɛ nɩmɛ. Ma pʋsʋŋ ma kala jaŋ lʋlʋl. 15La TƖƖNA bɩ jaŋ leŋ dɩ nyanyalɩɩ kala jʋʋma. Ʋ bɩ jaŋ joŋ nyanyal bɔmɔ-la ma sɩ na Ijipiti tinteeŋ lɛ kʋŋkala hɛ ma lɛ. Ama La TƖƖNA jaŋ joŋ nyanyal bɔŋŋɔɔ hɛ ma dʋndɔŋŋɔɔ lɛ. 16Tintee kala ma TƖƖNA Wɩa sɩ jaŋ joŋo hɛ ma nɩsɩŋ lɛ, má cheiba, má sɩ́ ba nenige fá. Má sɩ́ ba vesiŋ kpaarʋ. Dɩ ma nɛ ŋaa ŋɩɩ, ba jaŋ to ŋɩɩ lɛ a nyɩsa kɛmma.

17Ŋ bɩ pɔ ma jaŋ bʋl arɩ tinteyee deemba nɩaa dolie kɩɩma nɛ, ɛɛ nɛ ma jaŋ ŋaa a kiriba dɩ ba lɩɩ tintee-la lɛ? 18Ama má sɩ́ leŋe dɩ fawʋllʋŋ kɛmma a tɩŋ ba wɩaa. Má liisi wɩalɩŋ ma TƖƖNA Wɩa sɩ joŋo ŋaa Ijipiti tinteeŋ kuoro arɩ Ijipiti tɩŋŋaa kala lɛ. 19Ma na wʋkpuŋkperisi-la arɩ wʋmagɩla-la arɩ wʋduoru-la La TƖƖNA Wɩa sɩ kɛŋ ʋ doluŋ ŋaa nɛ, aŋ kɛmma kaa kʋ lɩɩ Ijipiti tinteeŋ lɛ. Wɩalɩŋ tɩtɩa nɛ ma TƖƖNA Wɩa jaŋ joŋo ŋaa nɩalɩŋ ma sɩɩ fá lɛ. 20Ma TƖƖNA Wɩa jaŋ leŋ dɩ fawʋllʋŋ faasa jʋʋba. Nɩalɩŋ sɩ foro ma nɩsɩŋ lɛ a faa, ʋ jaŋ kpʋba. 21Má sɩ́ leŋe dɩ fawʋllʋŋ kɛmma a tɩŋ nɩalɩŋ wɩaa, ma TƖƖNA Wɩa hɛ ma teeŋ nɛ, ʋ ŋaa Wɩa sɩ kɛŋ doluŋ nɛ woruŋ a magɛ dɩ nʋʋkala fɩfáʋ. 22Ma TƖƖNA Wɩa jaŋ kiri tinteye-la nɩaa sɩ hɛ tintee-la lɛ dɩ ba lɩɩ kʋŋ kʋŋ. Ʋ bɩ jaŋ leŋ dɩ ma guu kiri ba kala bala. Dɩ ʋ nɛ leŋe ma guu kiri ba kala bala, baga kɩaa jaŋ pʋrɩgɛ tintee-la lɛ a wʋwalɩmɛma. 23Ma TƖƖNA Wɩa jaŋ joŋ ma dʋndɔŋŋɔɔ a hɛ ma nɩsɩŋ lɛ, a leŋ dɩ ba wɩaa kala vʋgʋmɛ dɩ ba to ŋɩɩ lɛ a kala sʋʋ. 24Ʋ jaŋ joŋ ba kuoroo ma a hɛ ma nɩsɩŋ lɛ, dɩ ma leŋ dɩ ba yɩraa lɛl dʋnɩa kala lɛ. Nɩalɩŋ kʋŋkala bɩ jaŋ wuo yuo diima. Ma nɛ jaŋ yuo diiba a cheiba. 25Má nyɩgɛ ba vesi-la kala. Má sɩ́ vesi-la sɛlɩmɛ arɩ hɔpʋla paa a kɛŋ. Dɩ ma nɛ ŋaa ŋɩɩ, ʋ jaŋ lɔrɛ a pɩma, bɛɛ wɩaa ma TƖƖNA Wɩa ka kɩsɛ ŋɩɩ nɛ. 26Ma pʋpɔ má sɩ́ vesiŋ deemba kʋŋkala kaa kʋ jʋʋ ma dɩa. Dɩ ma nɛ ŋaa ŋɩɩ, ŋmɩaŋ-la sɩɩ to vesi-la jaŋ mɩɩra toma. Má kɩkɩsɛ kɩaa deemba a sɩ́ leŋe dɩ ba kpagɛma, bɛɛ wɩaa La TƖƖNA ŋmɩɛsa hɛ vesi-la lɛ nɛ.

Currently Selected:

MOSIS BƖRA WULLI WƖA WOMBIIŊ 7: SIS

Highlight

Copy

Compare