MOSIS BƖRA WULLI WƖA WOMBIIŊ 5

Wɩa niiriŋ fii-la

1Ŋɩɩ nɛ Mosis yɩrɛ Iziral tɩŋŋaa kala kʋ hɛ dɔŋɔ a bʋla pɩba: Iziral tɩmma, má jegile nɩɩ niiri-la arɩ wombie-la mɩ sɩɩ dagɛma jɩnɩŋ. Má gʋnnɛba woruŋ a kɛmba kaa tɩŋ. 2Sɩnaɩ peel-la lɛ La TƖƖNA Wɩa hɛ niiŋ nɛ la dɩ ʋ pɛgɛ. 3Ʋ dɩ la nyɩmmaba dʋndʋŋa pɛgɛ dee ʋ hɛ nii-la, ama ʋ hɛ nii-la ʋ dɩ la nɩalɩŋ kala ha sɩ hɛ la mɩɩsɩŋ lɛ jɩnɩŋ pɛgɛ nɛ. 4Sɩnaɩ peel-la lɛ La TƖƖNA hɛ nyiniŋ tʋɔŋ nɛ a chaasɛma, aŋ bʋl wɩaa pɩma. 5Bʋa-la lɛ, mɩ chɩŋ ma dɩ La TƖƖNA pɛgɛ nɛ aŋ laa wɩalɩŋ kala ʋ sɩɩ bʋl a bʋla pɩma, bɛɛ wɩaa nyiŋ-la fa leŋe fawʋllʋŋ kɛmma nɛ, ma bɩ peel-la jɩla. La TƖƖNA sɩ: 6Mɩ nɛ ŋaa ma TƖƖNA Wɩa, mɩ nɛ kɛmma kaa kʋ lɩɩ Ijipiti tinteeŋ lɛ, lee-la ma fa sɩ hɛ a ŋaa yosi. 7Ma bɩ maga dɩ má kɛŋ wɩa kala a pɛ mɩ-na Wɩa lɛ. 8Ma pɔ má sɩ́ tɔŋ kala mɛ a pɩ ma tɩtɩa dɩ ʋ nagɛ wɩa-nyuŋ kʋŋ koo tinteeŋ nyuŋ kʋŋ koo lɩɩŋ tʋɔŋ kʋŋ. 9Ma pɔ má sɩ́ ba sɩpaaŋ kpirimu koo a zilba. Mɩ nɛ ma TƖƖNA Wɩa, mɩ bɩ hadɔrʋŋ ka chɛ, nɩalɩŋ sɩ bɛrɩmɛ, mɩ jaŋ dɔgɩsɛba. Mɩ jaŋ dɔgɩsɛ nyɩmmaba arɩ biiriŋ arɩ ba nihee arɩ ba nihi-lɩɛrɛba a tɩŋ nyɩmmaba wʋbɔŋŋɔɔ wɩaa. 10Ama nɩalɩŋ sɩ chomi a tuto mɩ niiriŋ, mɩ jaŋ dagɛ mɩ chonuŋ a pɩba arɩ ba doho doho bʋɩba sɩ jaŋ to ba harɩŋ kɔ. 11Má pɔ ma sɩ́ mɩ yɩrɩŋ yɩrʋ pɛɩ. Mɩ-na ma Tɩɩna Wɩa jaŋ dɔgɩsɛ nɩɩ-la kala sɩ yɩrɛ mɩ yɩrɩŋ pɛɩ. 12Má liisi chɛ-wiesii-la wɩaa a joŋu dɩ ʋ ŋaa chɛ-zɔŋ mɩ teeŋ, arɩ mɩ-na ma TƖƖNA Wɩa sɩ dagɛma ŋɩɩ. 13Má tɩŋ ma tɩntɩŋŋaa tapʋlaa balɩdʋ pɛgɛ, 14ama tapʋl-pɛɩ chɛɛŋ ŋaa chɛ-wiesii nɛ, a pɩ mɩ-na ma TƖƖNA Wɩa. Má sɩ́ tɩntɩmɩɩ kala tɩŋ, ma biiriŋ, arɩ nɩwogusu-la sɩ hɛ ma tʋɔŋ, ma pʋsʋŋ arɩ ma dɩa tɩntɩnnaa kala baalaa arɩ haalaa, dɩ ŋɩɩ leŋ dɩ ma tɩntɩnnaa baalaa arɩ haalaa ma kala wiesi. 15Má jɩŋ arɩ ma fa ŋaa yosi nɛ Ijipiti tinteeŋ lɛ, mɩ-na ma TƖƖNA Wɩa kɛŋ mɩ doluŋ a kɛmma kaa kʋ lɩɩ. Ŋɩɩ nɛ tɩɩ mɩ-na ma TƖƖNA bʋla pɩma arɩ ma tuto mɩ chɛ-wiesii-la woruŋ ŋɩɩ. 16Má zizil ma nyɩmmaba arɩ ma naamba, arɩ mɩ-na ma TƖƖNA Wɩa sɩ dagɛma ŋɩɩ. Dɩ mɩ leŋ dɩ ma mɩɩsɩŋ duomi, dɩ wɩaa vɛŋ woruŋ a pɩma tintee-la mɩ sɩ jaŋ joŋo pɩma lɛ. 17Má sɩ́ nʋʋ kpʋ. 18Má sɩ́ nʋʋ haal chɛ. 19Má sɩ́ gaa. 20Má sɩ́ wɩaa nyɩɛ a joŋ cheeriŋ pɩ ma dɔnsʋŋ tɩŋŋaa. 21Má sɩ́ ma dɔnsʋŋ tɩŋŋaa kɩaa hɩɛnʋ, ba haalaa ba dɩɩsɩŋ, ba tinteyee, ba dɩa tɩntɩnnaa baalaa koo haalaa, ba nɛsɩŋ, ba kakusuŋ koo kʋŋ na-kala ba sɩ kɛnɛ.

22La TƖƖNA niiri-la ʋ sɩ heele bʋl a dagɛma Sɩnaɩ peel-la nyuŋ nɛ ŋɩɩ. Bʋa-la lɛ ʋ sɩ hɛ nyiniŋ arɩ duoŋ-bɩlɩmbaaŋ-bine tʋɔŋ aŋ bʋl wɩalɩŋ aŋ bɩra bɩ wɩɩ bʋla pɛ. Ŋɩɩ nɛ ʋ ŋmʋnsɛ niiri-la a hɛ tabɩɩ-taalaa balɩa lɛ a joŋo pɩmɛ.

23Peel-la kala fa sɩ tɔ arɩ nyiniŋ ŋɩɩ, ka ma nɩɩ yikoro biriŋ-la tʋɔŋ, ma doho doho-la kala sɩpaalaaraa arɩ ma nɩhɩasɩŋ kɔ mɩ teeŋ nɛ, 24a bʋl, “La TƖƖNA Wɩa kɛŋ ʋ doluŋ arɩ ʋ tʋla dagɛla nɛ, la nɩɩ ʋ yikoro ma nyiŋ-la tʋɔŋ. Jɩnɩŋ la jɩma arɩ Wɩa arɩ nuhuobiine jaŋ wuo bʋl wɩaa, ka dɩ tɩɩna ha kɛŋ mɩɩsɩŋ. 25Ama bɛɛ nɛ tɩɩ la jaŋ chɛ sʋʋŋ a pɩ la tɩtɩa? Dɩ la nɛ bɩra nɩɩ La TƖƖNA Wɩa yikoro, nyiŋ-balɩŋ deeŋ jaŋ diila dɩ la sʋʋ. 26Nuhuobiiŋ bɛɛ nɛ hɛ nɩmɛ Wɩa sɩ weye hɛ nyiniŋ tʋɔŋ aŋ bʋl wɩaa pʋ, ka ʋ bɩ sʋba arɩ la sɩ nɩɩ ŋɩɩ? 27Mosis, mʋ́ kpagɛ a nɩɩ wɩalɩŋ kala La TƖƖNA Wɩa sɩɩ bʋl, a kaa kʋ bʋla pɩla, la jaŋ jegile nɩɩ a kaa tɩŋ.”

28La TƖƖNA nɩɩ wɩalɩŋ ma sɩ bʋla pɩmɛ nɛ, ŋɩɩ nɛ ʋ bʋla pɩmɛ, “Mɩ nɩɩ wɩalɩŋ kala nɩalɩŋ sɩ bʋla pɩŋ nɛ, ba bʋl woruŋ nɛ. 29Dɩ ba nɛ jaŋ kɛŋ ŋɩɩ naaŋ lɛ a zizilmi, aŋ tuto wɩalɩŋ mɩ sɩ daga, ŋɩɩ fa jaŋ leŋ dɩ wɩaa vɛŋ woruŋ a pɩ ba dɩ ba biiriŋ kala a kaa mʋ wuu.

30Mʋ́ a bʋla pɩba dɩ ba mɩɩra mʋ ba lɛŋŋɛɛ. 31Ama ŋ-na Mosis, hɛ mɩ teeŋ daha, dɩ mɩ dagɩŋ mɩ wombiee arɩ mɩ niiriŋ ŋ sɩ jaŋ kaa mʋ a dagɛba dɩ ba tutoba tintee-la lɛ mɩ sɩ jaŋ joŋo pɩba dɩ ʋ ŋaa ba kʋŋ.”

32Ŋɩɩ wɩaa, má hɛ doluŋ aŋ to wɩalɩŋ kala ma TƖƖNA Wɩa sɩ dagɛma, má sɩ́ begilu. 33Má to wɩalɩŋ kala ma TƖƖNA Wɩa sɩ́ dagɛma, dɩ wɩaa vɛŋ woruŋ a pɩma dɩ ma hɔŋ tintee-la ma sɩɩ mʋ dɩ ma tɩɩ lɛ, a dieni.

Currently Selected:

MOSIS BƖRA WULLI WƖA WOMBIIŊ 5: SIS

Highlight

Copy

Compare