MOSIS BƖRA WULLI WƖA WOMBIIŊ 33
33
Mosis sʋl Wɩa pɩ Iziral doho doho
1Wɩɩsʋlɩɩ-la Wɩa tɩntɩnna Mosis sɩ sʋla pɩ Iziral tɩŋŋaa aŋ-na sʋʋ nɛ ŋ-la: 2Ʋ sɩ,
“La TƖƖNA lɩɩ Sɩnaɩ peel-la lɛ nɛ a mʋ chugili ʋ nɩaa nyuŋ,
a chaana hɛ ba lɛ a chɩŋ Ɛdɔm lɛ a kaa mʋ yi Paraŋ peel-la.
Ʋ kɔ arɩ Wɩa tɩndaarɩ-daŋ nɛ
a lɩɩ ʋ peel-la wɩɩpɔsʋŋ nadiiŋ dɩɩrɩŋ lere-la sɩ chullo a tutuu.
3Wʋtɩtɩɩ, La TƖƖNA cho ʋ nɩaa nɛ.
Nɩalɩŋ kala sɩ kɛŋ tʋɔpʋla hɛ ʋ nɩsɩŋ lɛ nɛ,
ʋ sɩpaaŋ nɛ ba kala kpirimi a laa wɩalɩŋ ʋ sɩ daga,
4arɩ wombie-la Mosis sɩ daga dɩ ba tuto.
Ʋ ŋaa Jekɔb doho nɩaa kʋŋ nɛ.
5Ʋ nɛ kʋ ŋaa ʋ nɩaa Iziral tɩŋŋaa kuoro
bʋa-la lɛ ba sɩpaalaaraa arɩ ba doho doho nɩaa kala sɩ kʋ hilimi.”
6Ŋ-la nɛ ʋ bʋl a tɩgɛ Rubiŋ doho lɛ:
Ʋ sɩ, “Rubiŋ nɩaa bɩ yʋgɛ,
ama ba jaŋ hɛ nɩmɛ a kaa mʋmʋ.”
7Ŋ-la nɛ ʋ bʋl a tɩgɛ Juda doho ma lɛ:
“Ou La TƖƖNA, jegile nɩɩ Juda nii-ŋmobo,
aŋ kɛnʋ kɔ ʋ nɩaa teeŋ,
ʋ doluŋ nɛ ʋ kaa pɔ ʋ tɩtɩa.
La TƖƖNA, pɛ ʋ lɛ dɩ ʋ wuo ʋ dʋndɔŋŋɔɔ.”
8Wɩalɩŋ ʋ sɩ bʋla a tɩgɛ Levi doho lɛ nɛ ŋ-la,
“La TƖƖNA, ŋ yie to ŋ kɩalɩŋ ba sɩɩ yɩrɛ Tumim arɩ Urim lɛ nɛ
a dagɛ wɩalɩŋ ŋ sɩɩ chɛ
a pɩ ŋ tɩntɩnna Levi doho nɩaa.
Ŋ magɩsɛba nɛ Masa lɛ, aŋ dagɛ arɩ ba kɛŋ wʋtɩtɩɩ nɛ Mɛrɩba lɩɩ-la leriŋ.
9Ba bɩ leŋe, ba nyɩmmaba arɩ ba naamba,
ba naambiiriŋ arɩ ba biiriŋ wɩaa
chɩlba a magɛ ŋ wɩalɩŋ ŋ sɩ daga.
Ba sɛɩ ŋ niiŋ wɩaa nɛ a to nii-la ma ŋ sɩ bile ŋ dɩ ba pɛgɛ.
10Levi doho nɩaa nɛ yie dagɛ wɩalɩŋ kala ŋ sɩɩ chɛ
arɩ ŋ wombiee a pɩ Iziral tɩŋŋaa.
Ba nɛ yie nyɩgɛ kʋsʋɔrʋsʋŋ sʋara sɩ sɩma ŋ sɩpaaŋ,
aŋ nyɩgɛ kʋnyɩgaa Wɩɩsʋlʋŋ ma ŋ koru-la nyuŋ.
11Ou La TƖƖNA, pɛ ba lɛ
dɩ ba wʋjɩmɩŋ yʋgɛ, dɩ ŋ tʋɔŋ tɔrɛ ba tɩntɩŋŋaa nyuŋ.
Yuo dii ba dʋndɔŋŋɔɔ
a sɩ́ leŋe dɩ ba bɩra kɛŋ doluŋ.”
12Bɛnjamɩŋ doho ma lɛ ŋ-la nɛ ʋ bʋl:
“Nɩalɩŋ La TƖƖNA sɩ cho nɛ ŋ-la a leŋ ba hɔŋ sɔm.
Ʋ hɛ ba teeŋ nɛ bʋa na-kala lɛ a pʋpɔba.”
13Josɛf doho nɩaa ma lɛ, ŋ-la nɛ ʋ bʋl:
“La TƖƖNA, leŋ dɩ duonuŋ nɩɩ woruŋ
a pɩba, dɩ lɩɩŋ ma bulo lɩɩ tinteeŋ dɩ ba tinteeŋ kɛŋ fɩɛlɩŋ.
14Leŋ dɩ wɩa pɔsɔ hɛ ba kɩaa lɛ
dɩ ba wasɛ woruŋ bʋa-la sɩ maga lɛ.
15Leŋ dɩ ba peel-bɩnaa kɛŋ tɩɩ-nɛŋ-zɔŋŋɔɔ
dɩ kʋdiilee hɛ ba dundolluŋ ma lɛ.
16La TƖƖNA, leŋ dɩ ŋ tʋɔŋ tɔrɛ ŋ nɩaa nyuŋ
a leŋ dɩ kʋŋ na-kala sɩ zɔmɔ hɛ ba tinteeŋ lɛ.
Ŋ nɛ Nɩɩ-la fa sɩ hɛ nyiniŋ sɩɩ dii tɩɩ-pugu-la lɛ aŋ bʋl wɩaa pɩmɛ.
Leŋ dɩ wɩaa deemba kala ŋaa Josɛf doho nɩaa lɛ.
Ʋ nɛ ŋaa ʋ naambiiriŋ sɩpaalaara.
17Josɛf kɛŋ doluŋ a nagɛ nɛŋ bii-bumbuŋ sɩ ŋaa bele nɛ.
Ʋ nyilliŋ nagɛ baga nɛŋ nɛ.
Ʋ nyilli-la nɛ ŋaa Manasɛ doho nɩaa bʋɩ-la
arɩ Efirem doho nɩaa bʋɩ fii-la.
Nyilli-la nɛ ʋ jaŋ kaa gbaa tinteyee a hɛ dɔŋɔ
a yigiba mʋ ta dʋnɩa dɩdɛrɩŋ.”
18Zebuluŋ arɩ Ɩsaka doho ma lɛ, ŋ-la nɛ ʋ bʋl:
“Leŋ dɩ Zebuluŋ doho nɩaa dʋa woruŋ ba bayalɩŋ lɛ,
dɩ Ɩsaka doho nɩaa ma dʋa pʋŋa pɛ ba dɩɩsɩŋ lɛ.
19Ba jaŋ yɩrɛ nɩaa dɩ ba kɔ peeliŋ nyuŋ
dɩ ba ŋaa Wɩɩsʋlʋŋ sɩ maga a pɩ Wɩa,
aŋ gbieli tʋɔtɔrɛ gbiele,
a tɩŋ dʋa-la ba sɩ jaŋ na mʋga arɩ fuo-niiŋ.”
20Gad doho nɩaa ma lɛ, ŋ-la nɛ ʋ bʋl:
“Wɩa jaŋ pɛ nɩɩ-la kala sɩ jaŋ leŋ dɩ Gad tinteeŋ jalla pɛ.
Gad nagɛ naachigiŋ nɛ,
aa chɔl nɩaa vaasɩŋ koo aa bori nyusuŋ.
21Ʋ lɩɩsɛ tinteeŋ lee-la sɩ faasa zɔŋ nɛ ʋ ŋaa ʋ kʋa.
Sɩpaalaaraa kpaalɩŋ nɛ ʋ tɩɩ.
Dɩ Iziral tɩŋŋaa sɩpaalaaraa nɛ kʋ hilimi,
ʋ yie ŋaa wɩalɩŋ sɩɩ tɔrɛ La TƖƖNA tʋɔŋ nɛ
aŋ dii Iziral tɩŋŋaa sarɩya ʋ bʋa lɛ.”
22Daŋ doho ma lɛ, ŋ-la nɛ ʋ bʋl:
“Daŋ nagɛ naachigi-bie nɛ a fɩla lɩɩ Basaŋ tinteeŋ lɛ.”
23Nafɩtalɩ doho ma lɛ, ŋ-la nɛ ʋ bʋl,
“La TƖƖNA tʋɔŋ tɔrɛ Nafɩtalɩ nyuŋ nɛ woruŋ, ʋ pɛ ʋ lɛ kɩŋkɛŋ.
Ʋ nɛ jaŋ tɩɩ Galilii mʋgʋ-bal-la wɩɩpɔsʋŋ nadiiŋ dɩɩrɩŋ tinteeŋ.”
24Asa doho ma lɛ, ŋ-la nɛ ʋ bʋl:
“Wɩa jaŋ pɛ Asa lɛ kɩɩ ʋ naambiiriŋ kala,
a leŋ dɩ ʋ naambiiriŋ sɛɩ ʋ niiŋ a pɛ ʋ lɛ,
a leŋ dɩ ʋ tinteeŋ ma kɛŋ olif tɩɩsɩŋ a yʋgɛ,
25dɩ ʋ taŋ boi-baalɩŋ kɛŋ doluŋ a nagɛ hɔɔŋ arɩ kɔlɩɩŋ,
dɩ ʋ hɔŋ, dɩ wɩɩkala sɩ́ ʋ walɩmʋ.”
26Kʋŋkala tuo a magɛ ma Iziral tɩŋŋaa Wɩa.
Ʋ yie lɩɩ wɩa-nyuŋ a to duoŋ-bɩlɩmbaanaa tʋɔŋ arɩ ʋ tʋla a kʋ tuu pɛ ma lɛ.
27Wɩa sɩ hɛ nɩmɛ deeŋ deeŋ nɛ ŋaa nɩɩ-la la sɩ yie fá mʋ yuori,
ʋ dol-la sɩ bɩ dɛrɛ nɛ ʋ kaa pʋpɔma.
Ʋ jaŋ kiri ma dʋndɔŋŋɔɔ,
aŋ leŋ dɩ ma cheiba.
28Iziral tɩŋŋaa jaŋ hɔŋ tintee-la sɩ kɛŋ fɩɛlɩŋ lɛ,
tintee-la duoŋ-zɔmʋŋ sɩ jaŋ nɩɩ,
dɩ kʋdiilee arɩ tɩɩnɛnɛɛ sɩnɩŋ hɛ nɩmɛ.
29Iziral tɩmma, La TƖƖNA pɛ ma lɛ nɛ.
Kʋbɛɛ nɛ nagɛma, ma ŋaa nɩa La TƖƖNA sɩ laa ta nɛ.
Ʋ nɛ ŋaa nɩɩ-la sɩ chu tɔma a pɩpɛ ma lɛ.
Ʋ nɛ ma laalɩyuoro,
ma dʋndɔŋŋɔɔ jaŋ kɔ ma teeŋ
a nagɛ ba kɛŋ ba tɩtɩa muuri nɛ
a sʋsʋlma, ka dɩ ma vɩa aŋ yuo diiba.
Currently Selected:
MOSIS BƖRA WULLI WƖA WOMBIIŊ 33: SIS
Highlight
Copy
Compare
Share
Want to have your highlights saved across all your devices? Sign up or sign in
©Ghana Institute of Linguistics Literacy and Bible Translation 1984, 2014
