MOSIS BƖRA WULLI WƖA WOMBIIŊ 32
32
1Wɩa-nyuŋ arɩ tinteeŋ, má nɩɩ wɩalɩŋ mɩ sɩɩ chɛ dɩ mɩ bʋl,
má jegile woruŋ a nɩɩ mɩ wʋbʋlaa.
2Leŋ dɩ wɩalɩŋ mɩ sɩɩ dagʋ nagɛ duonuŋ sɩɩ nɩɩ,
dɩ mɩ wʋbʋlaa nagɛ nyalɩŋ,
a nagɛ duonuŋ sɩ mirise hɛ yaŋ sɩ bumo nyʋ lɛ,
a nagɛ duonuŋ sɩ faasa nɩɩ a hɛ kʋduuloo ha sɩ bɩ waa lɛ.
3Mɩ jaŋ leŋ dɩ La TƖƖNA yɩrɩŋ yɩrɛ
dɩ ʋ nɩaa dagɛ ŋɩɩ ʋ doluŋ sɩ maga.
4Ʋ doluŋ nagɛ bʋŋ nɛ,
a ŋɩŋaa wɩaa ba bʋa lɛ.
Ʋ kɛŋ tɛŋɛ nɛ woruŋ ʋ wombiee kala lɛ.
Ʋ ŋaa Wɩa sɩ kɛŋ wʋtɩtɩɩ a bɩ wɩaa ka chei nɛ.
5Ama ma Iziral tɩŋŋaa bɩ wʋtɩtɩɩ kɛnɛ Wɩa teeŋ,
ma bɩra bɩ maga dɩ ma ŋaa ʋ biiriŋ,
ma ŋaa nɩa sɩɩ pillu nɛ, ma bɩ dɩ-bala chɩna.
6Ma nɩyaaraa deemba sɩ bɩ wɩɩkala jɩŋ,
ŋ-la nɛ maga dɩ ma joŋo ŋaa La TƖƖNA lɛɛ?
Ʋ dee ma nyɩmmaa? Ʋ dee bɩ ma ta,
a leŋ ma ŋaa nɩaa?
7Má liisi wɩalɩŋ sɩ ŋaa faafaa,
a pɩɛsɛ ma nyɩmmaba dɩ ba bʋl wɩalɩŋ sɩ ŋaa a pɩma,
má pɩɛsɛ ma nɩhɩasɩŋ ma,
dɩ ba dagɛ wɩalɩŋ pɩma.
8Wɩa sɩ kɩɩ kʋŋkala kɛŋ tinteeŋ
a kpaa tinteyee kala nɛ, a kɛŋ nuhuobiine kaa pɔrɛ
a dagɛ ba tinteeŋ bʋa,
a leŋ ʋ tɩndaaraa bibemba.
9Ama La TƖƖNA lɩɩsɛ Jekɔb doho nɩaa nɛ
dɩ ba ŋaa ʋ nɩaa.
10Ʋ na Iziral tɩŋŋaa tintee-hɩlɩŋ lɛ nɛ,
tintee-la sɩ bɩ kʋŋkala kɛnɛ, ka peliŋ huhuuri.
Ŋɩɩ nɛ ʋ chu tɔba a bemba woruŋ,
a pɔba a nagɛ jimiŋ sɩ chu tɔ ʋ halaa,
11a nagɛ kachuuŋ sɩɩ gʋnnɛ ʋ biiriŋ filiŋ
a pʋpɔba ŋɩɩ dɩ kʋŋ nɩɩ chɛ ʋ tel,
ʋ kɛŋ ʋ kɩŋkɛnsɩŋ kɛrɛ kɛŋ dɩ ʋ sɩ́ tel.
12La TƖƖNA dʋndʋŋa nɛ laa ba sɩpaaŋ,
vene kala bɩ ʋ lɛ pɛ.
13Ʋ leŋe ba hɔŋ tintee-la sɩ chaasa zɔŋ lɛ nɛ,
a dii tintee-la kɩaa a leŋ ba na tʋʋŋ bʋ-bʋa lɛ.
Ʋ leŋe ba olif tɩɩsɩŋ wasɛ nɛ woruŋ kpagɩnyɩlɩŋ nyuŋ.
14Ba nɛsɩŋ arɩ ba piesee kɛŋ yɩlɩŋ woruŋ,
ba nɛsɩŋ, ba piesee arɩ ba bʋʋnaa kala
chaasa nɛrɛ, a nagɛ Basaŋ tinteeŋ pʋsʋŋ.
Ba mɛmpɛba ma chaasa zɔŋ woruŋ.
Ba nyʋa girep nɛnɛɛ sɩnɩŋ ma sɩ chaasa zɔŋ.
15Ma Iziral tɩŋŋaa dii kɩaa deemba nɛ
a nɛrɛ woruŋ aŋ joŋ harɩŋ yɩa Wɩa
sɩ dolie a nagɛ bʋŋ a ŋaama,
aŋ vɩa ma Laataara.
16Ma to vesiŋ, wɩɩ-la ʋ sɩɩ kɩsʋ
a leŋ ʋ yaraa bieri ʋ na baanɩŋ ma nyuŋ.
17Ma vɩa Wɩa nɛ aŋ tuto jɩŋ-bɔŋŋɔɔ,
a kpʋkpaarɛ veŋ-falɩa-la ma sɩ bɩ jɩŋ,
Vesi-la ma naabalɩmaba sɩ bɩ fá.
18Ma vɩa ma nyɩmma Wɩa sɩ dolie a nagɛ bʋŋ nɛ,
ma yʋ Wɩa sɩ ŋaama wɩaa nɛ.
19La TƖƖNA sɩ na wɩalɩŋ ʋ biiriŋ sɩ ŋaa,
ʋ baanɩŋ sii ba nyuŋ nɛ ʋ vɩaba.
20Ŋɩɩ nɛ ʋ bʋl, “Mɩ jaŋ joŋ mɩ harɩŋ a yɩaba
aŋ na ba dɩdɛrɩŋ sɩ jaŋ nagɛ ŋɩɩ,
bɛɛ wɩaa ba ŋaa nyu-duo tɩmma nɛ,
ba bɩ wʋtɩtɩɩ kɛnɛ.
21Ba leŋe mɩ yaraa bieri ba veŋ-kpaarɩɩ-la lɛ nɛ,
mɩ na baanɩŋ ba nyuŋ. Mɩ jaŋ leŋ dɩ nɩalɩŋ ba sɩ bene dɩ ba bɩ nɩa ŋaa,
ma ŋaa dɩ ba yaraa bieri.
Mɩ jaŋ leŋ dɩ tintee-la nɩaa sɩ bɩ wɩɩkala jɩŋ
ŋaa dɩ ba baanɩŋ sii.
22Mɩ baanɩŋ jaŋ sii a nagɛ nyiŋgeliŋ
a dii kʋŋkala sɩ hɛ tinteeŋ lɛ.
Ʋ jaŋ dii a tuu yi lɛlɛɛ-jaŋ,
a dii peelee kala. Kʋdiilii kala jaŋ tuo.
23Mɩ jaŋ joŋ wʋlɔrʋnʋŋ a nyagɛba, aŋ leŋ dɩ mɩ to-hɛŋŋɛɛ kala dɛrɛ ba lɛ.
24Mɩ jaŋ leŋ dɩ losuŋ-bɔŋ jʋʋba,
a joŋ nyanyal bɔŋŋɔɔ ma hɛ ba lɛ dɩ ba sʋʋ.
Mɩ jaŋ lɛrɛ gɩrɩŋ kʋbɔŋŋɔɔ kʋ hɛ ba lɛ
a pɛ dɩma-la sɩ kɛŋ huoŋ lɛ woruŋ dɩ ba dɩmba.
25Laalɩŋ jaŋ diiba womporuŋ lɛ.
Ba dɩɩsɩŋ ma lɛ fawʋllʋŋ jaŋ kɛmba.
Ba bapʋɔsaa arɩ ba hatoloo,
bii-mulluŋ arɩ banɩhɩasɩŋ kala jaŋ sʋʋ.
26Mɩ fa sɩ mɩ jaŋ kɛmba pɩsɛ
aŋ leŋ dɩ ba yɩrɩŋ lɛl dʋnɩa lɛ.
27Ama mɩ bɩ jaŋ leŋ dɩ ba dʋndɔŋŋɔɔ
na wombiiŋ a bigisi ba tɩtɩa lɛ a bʋl,
‘La-na nɛ yuo dii nɩalɩŋ ŋɩɩ,
ba TƖƖNA dee bɩ wɩaa deemba ŋaa.’
28Iziral tɩŋŋaa ŋaa tintee nɩaa nyuŋ sɩ bɩ tɩŋ nɛ,
ba bɩ wʋjɩmɩŋ kɛnɛ.
29Dɩ ba nɛ fa kɛŋ wʋjɩmɩŋ,
a jɩŋ wɩaa deemba bʋbʋɔŋ,
ba fa jaŋ wuo jɩŋ ŋɩɩ ba dɩdɛrɩŋ sɩ jaŋ nagɛ.
30Bɛɛ nɛ tɩɩ nɩbala wuo kiri Iziral tɩŋŋaa bʋɩ?
Koo nɩaa balɩa yuo a dii Iziral tɩŋŋaa bʋɩ fii?
Dɩ mɩ-na ba TƖƖNA sɩ kɛŋ doluŋ dee bɩ ba joŋo pa
koo dɩ mɩ-na ba Wɩa dee bɩ ba harɩŋ mɩɩra, nʋʋ bɩ wɩɩ wuo ŋaa.
31Ba dʋndɔŋŋɔɔ jɩma arɩ ba vene bɩ doluŋ kɛnɛ,
ʋ bɩ Iziral tɩŋŋaa Wɩa maga.
32Ba wʋŋaalaa nagɛ Sodom arɩ Gomora nɩaa nɛ.
Ba nagɛ girep nɛnɛɛ sɩ kɛŋ huoŋ nɛ,
ba nɛnɛɛ jagɩsɩŋ kala hɛɩ.
33Ba wʋŋaalaa nagɛ dɩmɩŋ huoŋ ba sɩ
kaa bɩrɩmɛ sɩnɩŋ nɛ, a nagɛ kataha huoŋ.
34Mɩ joŋ wɩɩ-la ba sɩ ŋaa a hɛ mɩ tʋɔŋ lɛ nɛ aa gbɛrɛba.
35Mɩ jaŋ laa yuo pɩma a tiŋ ma chɩmɩŋ bʋa-la lɛ sɩ maga.
Bʋa kʋbala jaŋ yi dɩ ba sɩɛrɛ.
Bʋa-la lɛ wʋlɔrʋnʋŋ sɩ jaŋ ŋaa ba lɛ kpagɛ nɛ,
ba sʋʋŋ yie nɛ.”
36La TƖƖNA jaŋ laa ʋ nɩaa ta,
aŋ fá ʋ tɩntɩnnaa nenige,
dɩ ʋ nɛ na dɩ ba doluŋ kala dɛrɛ,
nɩalɩŋ sɩ ŋaa yosuŋ arɩ nɩalɩŋ sɩ tɩɩ ba tɩtɩa.
37Ʋ jaŋ pɩɛsɛ, “Vesi-la lɛ ma sɩ joŋ ma yɩɛlaa hɛ, nɩɩ nɛ ba hɛ?
38Vesi-la sɩ dii ma vʋɩ-kpaarɛ kɩaa nʋʋŋ leree
aŋ nyʋnyʋa ma tɩɩnɛnɛɛ sɩnɩŋ,
má leŋ dɩ ba sii a pɛ ma lɛ,
a tɔ hɛ ma lɛ.
39Má bee na, mɩ-na nɛ Wɩa,
Wɩa dɔŋ bɩra tuo.
Mɩ yie kpʋ nɛ aŋ bɩra chɩsɛ, a pɩrɛ aŋ vaarɛ,
nʋʋkala bɩ jaŋ wuo laa nʋʋ ta mɩ nɩsɩŋ lɛ.
40Mɩ kɛŋ nɩsɩŋ a je wɩa-nyuŋ nɛ aŋ ŋmɩɛsɛ,
mɩ sɩ hɛ nɩmɛ a kaa mʋ deeŋ deeŋ,
41dɩ mɩ nɛ taa mɩ tokobiiŋ dɩ ʋ tʋtʋl palpal,
dɩ mɩ kori sarɩya chɛ-diiliŋ,
mɩ jaŋ joŋ mɩ baanɩŋ a fɩɩsɛ mɩ dʋndɔŋŋɔɔ lɛ
aŋ dɔgɩsɛ nɩalɩŋ sɩ bɛrɩmɛ.
42Mɩ to-hɛŋŋɛɛ jaŋ jʋʋba dɩ ba chalɩŋ jaasɛ,
mɩ jaŋ kɛŋ tokobiiŋ a kpʋ nɩalɩŋ kala,
nɩalɩŋ sɩ pɩra arɩ nɩalɩŋ ba sɩ yuo kɛsɛ arɩ ba sɩpaalaaraa kala.”
43Tinteyee nɩaa, ma pɛ La TƖƖNA nɩaa lɛ a jʋɔsɛ,
La TƖƖNA jaŋ chɩŋ ʋ nɩaa nyuŋ a laa ba yuosuŋ yuo,
aŋ joŋ ʋ nɩaa wʋbɔŋŋɔɔ chɛba aŋ pɩɩsɛ ba tinteeŋ disiniŋ ta.
44Ŋɩɩ nɛ Mosis arɩ Nuŋ nanʋala Josua kɔ nɩalɩŋ teeŋ a karɩmɛ yɩɩl-la kala a pɩba. 45Mosis sɩ karɩmɛ yɩɩl-la a pɩ Iziral tɩŋŋaa a dɛrɛ, 46ʋ bʋla pɩba, “Má joŋ wɩalɩŋ mɩ sɩ chaasa bʋla pɩma jɩnɩŋ a hɛ ma tʋɔŋ lɛ, a dagɛ ma biiriŋ dɩ ba fɩɛlɛ ba sɩaa a to wombie-la kala mɩ sɩ daga. 47Wombie-la bɩ wʋpɛɩba ŋaa, ba nɛ ma mɩɩsɩŋ, má toba. Ba nɛ jaŋ leŋ dɩ ma wuo hɔŋ tintee-la ma sɩ jaŋ chol Jɔdaŋ fuo-la a tɩɩ lɛ a dieni.”
Mosis jaŋ sʋʋ peel-la ba sɩɩ yɩrɛ Nebo nyuŋ
48Tapʋlɩɩ-la tɩtɩa nɛ La TƖƖNA bʋla pɩ Mosis, 49“Mʋ́ Abarɩm peele-la sɩ hɛ Mʋab tinteeŋ lɛ a jɩl peel-la ba sɩɩ yɩrɛ Nebo, ʋ hɛ Jɔdaŋ wɩɩpɔsʋŋ dɩɩrɩŋ nɛ a chaasɛ Jeriko, a beŋ a na Kɛnaŋ tintee-la mɩ sɩ jaŋ joŋo pɩ Iziral tɩŋŋaa dɩ ʋ ŋaa ba kʋŋ. 50Peel-la ŋ sɩ jaŋ jɩl, ʋ nyuŋ nɛ ŋ jaŋ sʋʋ a mʋ ŋ naabalɩmaba teeŋ, arɩ ŋ naambie Arɔŋ sɩ sʋʋ ŋɩɩ peel-la ba sɩɩ yɩrɛ Hɔɔ lɛ a mʋ ʋ naabalɩmaba teeŋ. 51Ma kala balɩa fa vɩa dɩ ma ŋaa wɩɩ-la mɩ sɩ dagɛma nɛ Iziral tɩŋŋaa sɩpaaŋ Mɛrɩba lɩɩ-la leriŋ, Zɩŋ tintee-hɩlɩɩ-la lɛ, bɛɛ wɩaa ma vɩa dɩ ma zilmi nɛ Iziral tɩŋŋaa tʋɔŋ. 52Ŋɩɩ wɩaa, tintee-la mɩ sɩ jaŋ joŋo pɩ Iziral tɩŋŋaa, ŋ jaŋ beŋ a naʋ dɩ-bolii, ama ŋ bɩ jaŋ jʋʋ ʋ tʋɔŋ.”
Currently Selected:
MOSIS BƖRA WULLI WƖA WOMBIIŊ 32: SIS
Highlight
Copy
Compare
Share
Want to have your highlights saved across all your devices? Sign up or sign in
©Ghana Institute of Linguistics Literacy and Bible Translation 1984, 2014
