MOSIS BƖRA WULLI WƖA WOMBIIŊ 34

Mosis sʋba

1Ŋɩɩ nɛ Mosis lɩɩ Mʋab tintee-taalɩ-la leriŋ a jɩl peel-la ba sɩɩ yɩrɛ Pisiga, a to ŋɩɩ mʋ jɩl peel-la ba sɩɩ yɩrɛ Nebo nyu-gbaŋa Jeriko cholo. Nɩmɛ nɛ La TƖƖNA dagʋ tintee-la kala, a chɩŋ Gɩlɩad tinteeŋ a mʋ yi Daŋ tinteeŋ, a pɛ 2Nafɩtalɩ tinteeŋ, Efirem arɩ Manasɛ tinteeŋ, a kɛŋ Juda tinteeŋ kala ŋɩɩ a mʋ yi wɩɩjʋʋlʋŋ mʋgʋ-bal-la ba sɩɩ yɩrɛ Mediterenia, 3Nɛgɛf arɩ lee-la sɩ pɩna a chɩŋ Jeriko fuonaa-la lɛ, tabal-la ba sɩɩ yɩrɛ abɛ tɩɩsɩŋ taŋ, a kɛŋ ŋɩɩ mʋ taŋ-la ba sɩɩ yɩrɛ Zʋaa. 4Ŋɩɩ nɛ La TƖƖNA bʋla pʋ, “Tintee-la mɩ sɩ hɛ niiŋ a pɩ Abɩraham, Aɩzɩk arɩ Jekɔb dɩ mɩ joŋo pɩ ba doho nɩaa nɛ ŋɩɩ, mɩ leŋe ŋ naʋ nɛ arɩ ŋ sɩɩŋ, ama mɩ bɩ jaŋ leŋ dɩ ŋ jʋʋ nɩmɛ.”

5Ŋɩɩ nɛ Mosis, La TƖƖNA tɩntɩnna sʋʋ Mʋab tintee-la lɛ arɩ La TƖƖNA sɩ bʋl ŋɩɩ. 6La TƖƖNA hugu Mʋab fuonaa-la lɛ nɛ a chaasɛ taŋ-la ba sɩɩ yɩrɛ Bɛf-Pio. Ama nʋʋkala bɩ ʋ vaamɩŋ leriŋ jɩŋ arɩ jɩnɩŋ kala. 7Mosis fa ŋaa jɩsɩŋ zɔlɔ arɩ mara nɛ aŋ sʋʋ. Ʋ fa ha kɛŋ doluŋ nɛ woruŋ, ʋ sɩaa ma fa ha nɩna. 8Iziral tɩŋŋaa yel Mosis yoho tapʋlaa mara arɩ fii nɛ Mʋab tintee-taalɩsɩ-la lɛ.

9Nuŋ nanʋala Josua fa kɛŋ wʋjɩmɩŋ nɛ woruŋ, bɛɛ wɩaa Mosis fa joŋ ʋ nɩsɩŋ a daŋ ʋ lɛ nɛ a sʋl Wɩa pʋ. Ŋɩɩ nɛ Iziral tɩŋŋaa kala sɛɩ Josua niiŋ, a to wɩalɩŋ kala La TƖƖNA sɩ to Mosis lɛ a dagɛba.

10Mosis sʋʋŋ harɩŋ lɛ, Wɩa wʋlaabʋllʋ kala bɩra bɩ kɔ a nagɛ Mosis, arɩ ʋ dɩ La TƖƖNA fa sɩ yie chaasa dɔŋɔ a bʋbʋl wɩaa ŋɩɩ. 11Mosis nɛ La TƖƖNA tɩŋ ʋ mʋ Ijipiti tinteeŋ a ŋaa wʋduoruŋ, wʋmagɩlaa arɩ wʋkpuŋkperisiŋ Ijipiti tinteeŋ kuoro, arɩ ʋ tɩntɩnnɩ-hɩasɩŋ arɩ ʋ tinteeŋ nɩaa kala lɛ. 12Nʋʋkala ha bɩ dol kala wuo dagɛ koo a ŋaa wɩalɩŋ sɩ jaŋ leŋ dɩ fawʋllʋŋ jʋʋ nɩaa arɩ Mosis sɩ ŋaa ŋɩɩ Iziral tɩŋŋaa sɩɩŋ lɛ.

Currently Selected:

MOSIS BƖRA WULLI WƖA WOMBIIŊ 34: SIS

Highlight

Copy

Compare