MOSIS BƖRA WULLI WƖA WOMBIIŊ 20

Laalɩŋ Wɩaa

1Dɩ laalɩŋ nɛ sii ma dɩ ma dʋndɔŋŋɔɔ pɛgɛ, dɩ ma nɛ na ba janɩŋ arɩ ba janɩŋ torukoba arɩ ba laalɩyuoroo dɩ ba yʋga kɩɩma, má sɩ́ leŋe dɩ fawʋllʋŋ kɛmma, bɛɛ wɩaa ma TƖƖNA Wɩa sɩ kɛmma kaa lɩɩ Ijipiti tinteeŋ lɛ chɩŋ ma harɩŋ nɛ. 2Dɩ ma nɛ kɛŋ ma tɩtɩa hɛ dɔŋɔ dɩ ma mʋ laalɩŋ, Wɩɩsʋllɩ sɩpaalaara maga dɩ ʋ kʋ lɩɩ chɩŋ ma laalɩyuoroo sɩpaaŋ nɛ a bʋl wɩaa pɩba. 3Ʋ jaŋ bʋl, “Iziral tɩmma, má jegile nɩɩ, jɩnɩŋ maa mʋ laalɩŋ nɛ dɩ ma yuo ma dʋndɔŋŋɔɔ. Má sɩ́ ba fá, má sɩ́ leŋe dɩ ma bɔyɛ joŋ, má sɩ́ leŋe dɩ ma nandaasɩŋ yʋɔrɛ, má sɩ́ chel ba sɩpaaŋ. 4Ma Tɩɩna Wɩa nɛ kɛmma vɩvɛŋ, ʋ jaŋ yuo dii ma dʋndɔŋŋɔɔ a pɩma.”

5Laalɩyuori-hɩasɩŋ ma jaŋ pɩɛsɛ laalɩyuoro-la, “Ma kʋŋ hɛ nɩmɛ a saa dɩɩ-falɩɩ aŋ ha bɩ suroo? Ʋ tɩɩna mɩɩra mʋ dɩa, dɩ ŋɩɩ dee ʋ jaŋ wuo sʋʋ laalɩŋ lɛ ka dɩ nɩwogo mɩɩra mʋ suri dɩa-la. 6Ma kʋŋ hɛ nɩmɛ a chɔnsɛ tɩɩsɩŋ baga, aŋ ha bɩ ba nɛnɛɛ die? Ʋ tɩɩna mɩɩra mʋ dɩa, dɩ ŋɩɩ dee ʋ jaŋ wuo sʋʋ laalɩŋ lɛ, ka dɩ nʋʋ dɔŋ mɩɩra dii tɩɩnɛnɛ-la. 7Ma kʋŋ hɛ nɩmɛ a sʋgɛ haala aŋ ha bɩ jaa? Ʋ tɩɩna mɩɩra mʋ dɩa, dɩ ŋɩɩ dee ʋ jaŋ wuo sʋʋ laalɩŋ lɛ, ka dɩ nʋʋ dɔŋ jaa haal-la.” 8Laalɩyuori-hɩasɩ-la jaŋ bɩra pɩɛsɛ, “Ma kʋŋ hɛ nɩmɛ ʋ nandaasɩŋ yʋɔrɛ koo fawʋllʋŋ kɛnʋ? Ʋ tɩɩna mɩɩra mʋ dɩa, dɩ ŋɩɩ dee ʋ naambiiri-la ma nandaasɩŋ jaŋ yʋɔrɛ.” 9Dɩ laalɩyuori-hɩasɩ-la nɛ bʋl wɩalɩŋ pɩ laalɩyuoro-la a dɛrɛ, ba jaŋ lɩɩsɛ sɩpaalaaraa dɩ ba bibeŋ laalɩyuoro-la.

10Dɩ ma nɩɩ mʋ dɩ ma yuo taŋ na-kala, má laa sɩpaaŋ leŋ dɩ ba jɩŋ arɩ maa kɔ dɩ ma yuoba nɛ. 11Dɩ ba nɛ sɛyɛ arɩ ma wuoba nɛ, má bɩra sɩ́ ba yuo. Má kɛsɛ ba kala dɩ ba ŋaa ma yosi a tɩŋ yoŋ-tɩntɩŋŋaa a pɩpɩma. 12Dɩ taŋ-la nɩaa nɛ bɩ sɛyɛ arɩ ma wuoba nɛ, a chɩchɛ dɩ ma yuo laal-la, má leŋ dɩ ma laalɩyuoroo golli taŋ-la chu a yuoba. 13Dɩ ma TƖƖNA Wɩa nɛ pɛ ma lɛ dɩ ma yuo diiba, má kpʋ baala-la kala sɩ hɛ taŋ-la lɛ. 14Ama, má kɛsɛ ba haalaa, ba biiriŋ arɩ ba pʋsʋŋ, a paa kʋŋ na-kala sɩ hɛ taŋ-la lɛ dɩ ba ŋaa ma kɩaa. Ma Tɩɩna Wɩa nɛ joŋ ma dʋndɔmɔ-la kɩaa pɩma. Ma jaŋ wuo kaa ŋaa wɩɩ-la kala ma sɩɩ chɛ. 15Wɩɩ-la ma sɩ jaŋ joŋo ŋaa tasɩ-la sɩ bɩ ma kpaga lɛ nɛ ŋɩɩ. Tasɩ-la sɩ kpagɛma lɛ dee.

16Ama tabala-la sɩ hɛ tintee-la ma TƖƖNA Wɩa sɩ jaŋ joŋo pɩma dɩ ʋ ŋaa ma kʋŋ lɛ, má kpʋ kʋŋ na-kala sɩɩ wiesu a hɛ nɩmɛ. 17Ʋ maga dɩ má kpʋ tinteyee deemba nɩaa kala: Hiti tɩŋŋaa, Amɔrɩ tɩŋŋaa, Kɛnaŋ tɩŋŋaa, Pɛrɛs tɩŋŋaa, Hivi tɩŋŋaa arɩ Jebus tɩŋŋaa arɩ ma TƖƖNA Wɩa sɩ dagɛma ŋɩɩ. 18Dɩ ma nɛ bɩ ba kpʋa, ba jaŋ dagɛma dɩ ma to ba lɛ a ŋɩŋaa wɩalɩŋ sɩɩ kɩsʋ aa kpaarɛ ba vesiŋ a ŋaa wʋbɔŋ ma TƖƖNA Wɩa lɛ. 19Dɩ ma nɛ mʋ yuo taŋ kala, dɩ yuosu-la nɛ diene magɛ ɛɛ ma, má sɩ́ tɩɩsɩ-la sɩɩ nɛŋ taŋ-la lɛ keru, bɛɛ wɩaa ma jaŋ wuo dii ba nɛnɛɛ. Tɩɩsɩ-la-na bɩ nuhuobiine ŋaa dɩ ma yuyuoba. 20Ma jaŋ wuo keri tɩɩsɩ-la nɛnɛɛ ma sɩ bɩ dii, a kaa ŋaa lusuŋ-cholluŋ a jʋʋ taŋ-la a yuo diiba.

Currently Selected:

MOSIS BƖRA WULLI WƖA WOMBIIŊ 20: SIS

Highlight

Copy

Compare