MOSIS BƖRA WULLI WƖA WOMBIIŊ 19

Tasɩ-la ma sɩ jaŋ fá mʋ yuyuori

1Dɩ ma TƖƖNA Wɩa nɛ chei tinteye-la nɩaa tinteeŋ ʋ sɩ sɩ ʋ jaŋ joŋo pɩma, dɩ ma kiriba ta aŋ laa ba tasɩŋ arɩ ba dɩɩsɩŋ a hɔŋ, 2má lɩɩsɛ tabalaa batori a pɩ ma tɩtɩa, dɩ ba hɛ tintee-la ma TƖƖNA Wɩa sɩ jaŋ joŋo pɩma tʋtʋɔbaanɩŋ. 3Má kɛŋ tintee-la ma TƖƖNA Wɩa sɩ joŋo pɩma dɩ ʋ ŋaa ma kʋŋ kaa kpaa leree batori, dɩ lere-la kʋŋkala kɛŋ taŋ ba sɩ jaŋ fá mʋ yuyuori. Má bil wombiee a mʋmʋ tasɩ-la, dɩ nʋʋkala nɛ kpʋ nʋʋ, ʋ jaŋ wuo fá mʋ tasɩ-la dɔŋɔ.

4Dɩ nʋʋ nɛ bɩ sɛnɛ aŋ kpʋ nʋʋ sɩ tuo ʋ dʋndɔŋ, ʋ jaŋ wuo fá mʋ tasɩ-la a laa ʋ mɩɩsɩŋ. 5La joŋ arɩ nʋʋ arɩ ʋ dɔŋɔ tɩɩna nɛ sii mʋ gɩrɩŋ dɩ ba keri daasɩŋ. Ʋ sɩɩ keri ŋɩɩ, dɩ saaŋ fogi a yagɛ ʋ dɔŋɔ tɩɩna-la kpʋ. Baal-la jaŋ wuo fá mʋ tasɩ-la dɔŋɔ a laa ʋ mɩɩsɩŋ. 6Dɩ ŋɩɩ dee, nɩɩ-la ʋ sɩ kpʋa naambile sɩ jaŋ dii ʋ dʋa nɛ na wɩɩ-la sɩ ŋaa, ʋ jaŋ na baanɩŋ a kire to nɩɩ-la sɩ kpʋ ʋ naambie harɩŋ. Dɩ taŋ-la ʋ sɩ jaŋ mʋ yuori nɛ bolie, ʋ jaŋ kire kɛnʋ a kpʋʋ, ka ʋ fa bɩ maga dɩ ʋ kpʋʋ, bɛɛ wɩaa ʋ bɩ sɛnɛ. 7Wɩɩ-la sɩ tɩɩ mɩ bʋl ma lɩɩsɛ tabalaa batori a pɩ ma tɩtɩa a fá mʋ yuyuori nɛ ŋɩɩ.

8Dɩ ma TƖƖNA Wɩa nɛ leŋe dɩ ma tinteeŋ jallɛ, arɩ ʋ sɩ hɛ niiŋ a pɩ ma naabalɩmaba ŋɩɩ, a joŋ tintee-la kala pɩma arɩ ʋ sɩ hɛ niiŋ ŋɩɩ, 9a tɩŋ ma sɩ fɩɛlɛ ma sɩaa a to wombie-la kala mɩ sɩ joŋo dagɛma jɩnɩŋ, a cho ma TƖƖNA Wɩa a tuto ʋ wombiee bʋa na-kala, ʋ maga dɩ má bɩra lɩɩsɛ tasɩŋ batori nɛ a pɛ. 10Má ŋaa ŋɩɩ tintee-la ma TƖƖNA Wɩa sɩ jaŋ joŋo pɩma dɩ ʋ ŋaa ma kʋŋ lɛ, dɩ nʋʋ sɩ bɩ wɩɩ cheye chalɩŋ sɩ́ tintee-la lɛ jaasʋ, dɩ ma laa cheeriŋ.

11Ama dɩ nʋʋ nɛ bɛrɛ ʋ dɔŋɔ tɩɩna, a maachie sii lʋara ŋmobu kpʋ, aŋ fá mʋ tasɩŋ deemba dɔŋɔ, 12ʋ taŋ nɩhɩasɩŋ maga dɩ ba leŋ dɩ ba mʋ kɛnʋ mɩɩra kɔ ba jaŋ nɛ, dɩ ba joŋu hɛ nɩɩ-la ʋ sɩ kpʋa naambile sɩ jaŋ dii ʋ dʋa nɩsɩŋ lɛ dɩ ʋ kpʋʋ. 13Má sɩ́ nɩɩ-la nenige fá. Má ŋaa ŋɩɩ a leŋ dɩ nɩalɩŋ sɩ bɩ wɩɩ cheye chalɩŋ sɩ́ jaasʋ Iziral tinteeŋ lɛ, ka dɩ wɩaa wuo vɛŋ woruŋ a pɩma. 14Tintee-la ma TƖƖNA Wɩa sɩ jaŋ joŋo pɩma lɛ, má sɩ́ tinteeŋ bʋɔsʋ-la ma naabalɩmaba sɩ laa sɩpaaŋ bil kaa vʋgʋmɛ a gʋrɛ dɔŋɔ.

Pɛ-naaraa wɩaa

15Dɩ nʋʋ nɛ ba bʋl arɩ ʋ ŋaa wɩɩ nɛ a chei, nɩbala dʋndʋŋ bɩ jaŋ wuo pɛ na arɩ wɩɩ-la ŋaa wʋtɩtɩɩ nɛ. Nɩaa balɩa koo nɩaa batori nɛ jaŋ wuo pɛ na ka dɩ wɩɩ-la na chɩŋ.

16Dɩ nʋʋ nɛ sɩ ʋ pɛ na wɩɩ a nyɩɛ wɩaa pɩ nʋʋ arɩ ʋ ŋaa wɩɩ nɛ a chei, 17ʋ dɩ nɩɩ-la ʋ sɩ nyɩɛ wɩaa pa maga dɩ ba mʋ La TƖƖNA sɩpaaŋ nɛ, Wɩɩsʋllɩ sɩpaalaaraa arɩ sarɩya diire-la sɩ hɛ nɩmɛ bʋa-la lɛ teeŋ. 18Sarɩya diire-la maga dɩ ba beŋ wɩɩ-la tʋɔŋ nɛ woruŋ. Dɩ ba nɛ kʋ na arɩ nɩɩ-la sɩ sɩ ʋ pɛ na wɩɩ-la nɛ ŋaa wʋnyɩɛrʋ, a nyɩɛ wɩaa pɩpɩ ʋ naambile, 19ʋ maga dɩ ba joŋ wɩɩ-la ba fa sɩ jaŋ joŋo ŋaa ʋ naambile lɛ, a ŋaa ʋ lɛ. Ʋ maga dɩ má giri wʋbɔŋ-la ta nɛ ma tʋɔŋ. 20Dɩ nɩkaana-la nɛ nɩɩ wɩɩ-la ma sɩ ŋaa, fawʋllʋŋ jaŋ jʋʋba, ba bɩra bɩ jaŋ ŋaa wʋbɔmʋŋ deeŋ doho ma tʋɔŋ. 21Má sɩ́ nʋʋkala nenige fá. Dɩ nʋʋ nɛ kpʋ ʋ dɔŋɔ, má kpʋʋ ma, dɩ nʋʋ nɛ pʋrɛ ʋ dɔŋɔ sɩɩŋ, má pʋrɛ ʋ ma sɩɩŋ, dɩ nʋʋ nɛ ŋmoo ʋ dɔŋɔ nyɩlɩŋ churi, má ŋmoo ʋ ma nyɩlɩŋ churi, dɩ nʋʋ nɛ bori ʋ dɔŋɔ nɩsɩŋ, má bori ʋ ma nɩsɩŋ, dɩ nʋʋ nɛ bori ʋ dɔŋɔ naaŋ, má bori ʋ ma naaŋ.

Currently Selected:

MOSIS BƖRA WULLI WƖA WOMBIIŊ 19: SIS

Highlight

Copy

Compare