MOSIS BƖRA WULLI WƖA WOMBIIŊ 21

Dɩ nʋʋ nɛ ba kpʋ, ka ba bɩ jɩŋ nɩɩ-la sɩ kpʋa, ŋɩɩ sɩ maga dɩ ba to

1Tintee-la ma TƖƖNA Wɩa sɩ jaŋ joŋo pɩma dɩ ʋ ŋaa ma kʋŋ lɛ, dɩ ma nɛ na nʋʋ dɩ ʋ sʋʋ pɩŋ pɔkɔŋ nyuŋ, ka ma bɩ jɩŋ nɩɩ-la sɩ kpʋʋ, 2ma nɩhɩasɩŋ arɩ sarɩya diiree maga dɩ ba mʋ lee-la sʋʋ-la sɩ pɩna, a magɩsɛ a na tasɩ-la sɩ golli lee-la, kʋ-la ʋ sɩ kpaga. 3Taŋ-la sɩ kpagɛ sʋʋ-la, ʋ nɩhɩasɩŋ jaŋ kɛŋ napaha ba ha sɩ bɩ kaa tɩŋ aŋ ka, 4a kaa tuu fuonaaŋ sɩ kɛŋ lɩɩŋ sɩɩ pɛllʋ ba ha sɩ bɩ lee-la pɛrɛ aŋ ka, a mɩlɩmɛ ʋ baŋŋaa bori. 5Levi doho sɩ ŋaa Wɩɩsʋllɩ sɩpaalaaraa maga dɩ ba hɛ nɩmɛ, bɛɛ wɩaa ba nɛ ma TƖƖNA Wɩa lɩɩsɛ dɩ ba tɩtɩŋ ʋ tɩntɩŋŋaa, aŋ sʋl Wɩa pɩpɩma, a laa ma wɩaa jɩma pɩpɩma dɩ nɩaa nɛ kɛŋ kaalɛrɛ koo dɩ ba yuo dɔŋɔ. 6Sʋʋ-la sɩ pɩna a kpagɛ taŋ-la, ʋ nɩhɩasɩ-la jaŋ sɔŋ ba nɩsaa a hɛ napaha-la ba sɩ kaa mʋ fuonaaŋ a mɩlɩmɛ ʋ baŋŋaa bori lɛ, 7aŋ chaasa bʋl, “La dee bɩ baala deeŋ kpʋa, la bɩ nɩɩ-la sɩ kpʋʋ ma jɩŋ. 8La TƖƖNA, joŋ wʋbɔmʋŋ deeŋ a chɛ ŋ nɩaa Iziral tɩŋŋaa, nɩalɩŋ ŋ sɩ kaa lɩɩ Ijipiti tinteeŋ lɛ, aŋ sɩ́ leŋe dɩ la laa cheeriŋ a tɩŋ baala deeŋ sɩ bɩ wɩɩŋ cheye sʋʋŋ bʋbʋɔŋ lɛ.” Dɩ ma nɛ ŋaa ŋɩɩ, ʋ jaŋ joŋo chɛma. 9Má sɩ folo ŋaa ŋɩɩ La TƖƖNA sɩɩ chɛ, ma bɩra bɩ jaŋ laa cheeriŋ baal-la ba sɩ kpʋa bʋbʋɔŋ lɛ.

Haalaa ba sɩ yuo laalɩŋ kɛsɛ jaanɩŋ wɩaa

10Dɩ laalɩŋ nɛ sii ma dɩ ma dʋndɔŋŋɔɔ pɛgɛ, dɩ ma TƖƖNA Wɩa pɛ ma lɛ dɩ ma yuo diiba aŋ kɛsɛ ba haalaa, 11dɩ hazɔŋ nɛ hɛ ba tʋɔŋ, dɩ ŋ na a cho dɩ ŋ jaa, 12ŋ jaŋ kɛŋ haal-la mʋ ŋ dɩa dɩ ʋ fʋŋ ʋ nyuŋ a kɩɛrɛ ʋ naanii-fʋlaa, 13aŋ wuri gɛnnɩ-la ʋ fa sɩ laala, ka ma yuo kɛnʋ aŋ laalɛ gɛrɩ-wogusuŋ. Leŋ dɩ ʋ hɛ ŋ dɩa lɛ a yel ʋ nyɩmma arɩ ʋ naaŋ yoho chɛŋ-piliŋ. Ŋɩɩ harɩŋ, ma jaŋ wuo jaa dɔŋɔ. 14Dɩ ʋ nɛ kʋ magɛ bʋa dɔŋ dɩ ŋ bɩra bɩ ʋ cho, ŋ jaŋ wuo leŋ dɩ ʋ mʋ lee-kala ʋ sɩɩ chɛ. Ŋ bɩ maga dɩ ŋ joŋu yallɛ arɩ yomo, bɛɛ wɩaa ŋ kɛnʋ ŋaa haal nɛ aŋ ka.

Kpaal-la sɩ maga dɩ hambolibii-hɩaŋ laa

15Dɩ baal nɛ kɛŋ haalaa balɩa, a cho dɔŋɔ a kɩɩ dɔŋɔ, dɩ haala-la balɩa kala lʋl hambolibiisiŋ, dɩ haal-la ʋ sɩ bɩ faasa cho hambolibie nɛ ŋaa ʋ bii-hɩaŋ, 16dɩ ʋ nɩɩ chɛ dɩ ʋ kɛŋ ʋ dʋa kpaa ʋ biiri-la, ʋ bɩ maga dɩ ʋ joŋ ʋ bii-hɩaŋ-la kpaalɩŋ pɩ ʋ hachooluŋ bie, aŋ vɔŋ haal-la ʋ sɩ bɩ faasa cho bie. 17Ʋ maga dɩ ʋ kɛŋ dʋa-la kpaa dɩ kʋhɩaŋ kɩaa kɩɩ kʋbie kɩaa naansɩɩŋ bʋlɩa. Bile nɛ ŋaa ʋ nyɩmma doluŋ, ʋ maga dɩ ʋ laa bii-hɩaŋ kpaalɩŋ.

Ŋɩɩ sɩ maga dɩ ba ŋaa hambolibii-nyu-duo tɩɩna lɛ

18Dɩ baal arɩ ʋ haala nɛ kɛŋ ba bii, dɩ bile kɛŋ nyuduoŋ a bɩ ba niiŋ ka nɩɩ, dɩ ba dagʋ a lɔl, 19ʋ nyɩmma arɩ ʋ naaŋ maga dɩ ba kɛŋ bile mʋ ba jaŋ nɩhɩasɩŋ sɩpaaŋ lee-la ba sɩɩ hilimu. 20Ba jaŋ bʋla pɩ nɩhɩasɩ-la, “La bie deeŋ ŋaa nyu-duo tɩɩna nɛ, ʋ bɩ la niiŋ wɩaa ka nɩɩ, a chichei moribiee aŋ pɛ ŋaa sɩ-nyʋarʋ ma.” 21Baala-la kala sɩ hɛ ʋ taŋ-la lɛ maga dɩ ba yagʋ kpʋ nɛ arɩ tabɩaa, a lɩɩsɛ wʋbɔŋ-la ta ma tʋɔŋ. Iziral tɩŋŋaa kala jaŋ nɩɩ wɩɩ-la dɩ fawʋllʋŋ kɛmba.

Wombie-la ba sɩ bile dɔnsʋŋ

22Dɩ nʋʋ nɛ chaasa ŋaa wʋbɔŋ dɩ ma kpʋʋ a joŋo sagɛ tɩa nyuŋ, 23ʋ bɩ maga dɩ ma leŋ dɩ ʋ sagɛ nɩmɛ dɩ taŋ pʋl. Ʋ maga dɩ ma hugu tapʋlɩɩ-la tɩtɩa nɛ, bɛɛ wɩaa Wɩa ŋmɩɛsa hɛ nɩɩ-la kala kʋsʋʋŋ sɩ sagɛ tɩa nyuŋ nɛ. Ʋ bɩ maga dɩ ma ŋaa disiniŋ a hɛ tintee-la ma TƖƖNA Wɩa sɩ joŋo pɩpɩ ma dɩ ʋ ŋaa ma kʋŋ lɛ.

Currently Selected:

MOSIS BƖRA WULLI WƖA WOMBIIŊ 21: SIS

Highlight

Copy

Compare