MOSIS BƖRA WULLI WƖA WOMBIIŊ 18

Wɩɩsʋlʋŋ kɩalɩŋ sɩ ŋaa Levi doho nɩaa arɩ Wɩɩsʋllɩ sɩpaalaaraa kɩaa

1Levi doho nɩalɩŋ sɩ ŋaa Wɩɩsʋllɩ sɩpaalaaraa arɩ Levi doho nɩaa kala bɩ maga dɩ ba kɛŋ tinteeŋ kpaal Iziral tinteeŋ kala lɛ. Ba kpaalɩŋ nɛ kɩalɩŋ Iziral tɩŋŋaa sɩ kaa kɔ dɩ ba ŋaa Wɩɩsʋlʋŋ a pɩ La TƖƖNA. 2A tɩŋ ba sɩ bɩ tinteeŋ kpaal kala kɛnɛ ba naambiiriŋ tʋɔŋ, La TƖƖNA nɛ jaŋ pɩba kʋŋkala ba sɩɩ chɛ, arɩ ʋ fa sɩ bʋl ŋɩɩ pɩba.

3Dɩ nʋʋ nɛ kpʋ nɛ-bele koo piesu dɩ ʋ ŋaa Wɩɩsʋlʋŋ, Wɩɩsʋllɩ sɩpaalaaraa nɛ jaŋ tɩɩ vaaŋ, talaŋa arɩ tʋɔŋ kɩaa. 4Má joŋ ma baga kʋdii falaa ma a pɩba: Mɩaa, tɩɩnɛnɛɛ sɩnɩŋ, nʋʋŋ arɩ ma pie-pʋŋ-bumbumba-la ma sɩ kɛ. 5Ma doho doho kala tʋɔŋ, Levi doho nɩaa arɩ ba doho nɩaa kala nɛ ma TƖƖNA Wɩa lɩɩsɛ dɩ ba nɛ ŋaa Wɩɩsʋllɩ sɩpaalaaraa a kaa mʋ wuu. 6Dɩ Levi tɩɩna nɛ lɩɩ ma Iziral tɩŋŋaa tasɩ-la kʋŋ ʋ sɩ hɛ lɛ, a mʋ lee-la La TƖƖNA sɩ jaŋ lɩɩsɛ dɩ ma zizilu, 7ʋ jaŋ wuo tɩŋ tɩntɩŋŋaa ʋ Tɩɩna Wɩa yɩrɩŋ lɛ nɩmɛ arɩ ʋ Levi doho nɩalɩŋ dɔnsʋŋ sɩɩ tɩŋ La TƖƖNA sɩpaaŋ ŋɩɩ lee-la. 8Ʋ dɩ ʋ dɔnsʋ-la kala kpaalɩŋ jaŋ magɛ dɔŋɔ. Kpaalɩŋ deeŋ-na bɩ ʋ nyɩmma dʋa kpaalɩŋ ʋ sɩ laa lɛ pɛ.

Wɩalɩŋ sɩɩ kɩsʋ

9Dɩ ma nɛ mʋ jʋʋ tintee-la ma TƖƖNA Wɩa sɩ sɩ ʋ jaŋ joŋo pɩma, má sɩ́ tinteye-la sɩ hɛ lee-la nɩaa lɛ to a ŋaa wɩaa deemba sɩɩ kɩsʋ. 10Ma pɔ má sɩ́ ma bii-kala, baal koo haal kaa kpʋ a nyɩgɛ koruŋ nyuŋ a pɩ vene kala. Má sɩ́ vʋgʋ, a sɩ́ chichiribi wɩaa ŋaa, hɩllɩŋ, 11koo a didii koruŋ-barɩŋ, aa yɩrɛ lɛlɛɛ koo kantɔŋŋɔɔ. 12La TƖƖNA bɛrɛ nɩalɩŋ sɩɩ ŋaa wʋkɩsaa deemba nɛ. Wɩalɩŋ wɩaa nɛ tɩɩ ma TƖƖNA Wɩa kikiri tinteye-la nɩaa sɩ hɛ tintee-la lɛ ŋɩɩ. 13Ʋ bɩ maga dɩ ma kɛŋ wʋcheeli kala ma TƖƖNA Wɩa sɩpaaŋ.

Wɩa wʋlaabʋlla

14Tinteye-la ma sɩɩ mʋ dɩ ma yuo kiri aŋ laa ba tinteeŋ, ba nɩaa ka to vʋgʋraa arɩ chichiribee niiŋ nɛ. Ma TƖƖNA Wɩa bɩ chɛ dɩ ma-na tuto wɩalɩŋ. 15Ma TƖƖNA Wɩa jaŋ lɩɩsɛ nʋʋ ma naambiiriŋ tʋɔŋ a pɩma dɩ ʋ ŋaa ʋ wʋlaabʋlla a nagɛ mɩ-na Mosis. Ʋ maga dɩ má jegile nɩnɩɩ ʋ teeŋ. 16Tapʋlɩɩ-la ma sɩ hilimi peel-la ba sɩɩ yɩrɛ Sɩnaɩ bʋbʋɔŋ, ma sɩ, “La bɩra bɩ chɛ dɩ la nɩɩ La TƖƖNA Wɩa yikoro, koo dɩ la na ʋ nyiŋ-bal-la, dɩ la nɛ na ŋɩɩ la jaŋ sʋʋ.”

17Ŋɩɩ nɛ La TƖƖNA bʋla pɩmɛ, “Wɩɩ-la ba sɩ bʋla ŋaa wʋzɔŋ nɛ. 18Mɩ jaŋ lɩɩsɛ nʋʋ ba naambiiriŋ tʋɔŋ dɩ ʋ ŋaa mɩ wʋlaabʋllʋ dɩ ʋ nagɛ ŋ-na Mosis, a joŋ mɩ wɩaa hɛ ʋ niiŋ lɛ, dɩ ʋ bʋl wɩalɩŋ kala mɩ sɩ dagʋ a pɩba. 19Dɩ nʋʋkala nɛ vɩa dɩ ʋ jegile nɩɩ wɩalɩŋ mɩ wʋlaabʋllʋ-la sɩ jaŋ bʋl mɩ yɩrɩŋ lɛ, mɩ-na tɩtɩa nɛ jaŋ dɔgɩsɛ tɩɩna. 20Ama dɩ mɩ wʋlaabʋllʋ kala nɛ bʋl wɩɩ mɩ yɩrɩŋ lɛ, ka mɩ dee bɩ ʋ hɛ, koo dɩ vene dɔŋ yɩrɩŋ lɛ nɛ ʋ ŋaa ŋɩɩ, ʋ maga dɩ ma kpʋʋ nɛ.” 21Ma jaŋ wuo pɩɛsɛ dɔŋɔ a bʋl, “Ɛɛ nɛ la jaŋ ŋaa jɩŋ arɩ La TƖƖNA Wɩa dee bɩ ʋ hɛ ʋ bʋbʋl wɩɩ-la?” 22Dɩ Wɩa wʋlaabʋllʋ nɛ bʋl wɩɩ La TƖƖNA yɩrɩŋ lɛ, ka wɩɩ-la ʋ sɩ bʋla bɩ kʋ ŋaa wʋtɩtɩɩ, ŋɩɩ-na La TƖƖNA dee bɩ ʋ hɛ, ʋ bʋl wɩɩ-la ʋ tɩtɩa doluŋ lɛ nɛ, má sɩ́ ʋ fa.

Currently Selected:

MOSIS BƖRA WULLI WƖA WOMBIIŊ 18: SIS

Highlight

Copy

Compare