MOSIS BƖRA WULLI WƖA WOMBIIŊ 17
17
1Ma pɔ má sɩ́ nɛŋ koo piese sɩ kɛŋ nyɔɔ kpʋ a sʋl Wɩɩsʋlʋŋ a pɩ ma TƖƖNA Wɩa, ʋʋ kɩsɛ ŋɩɩ nɛ.
2Tasɩ-la ma TƖƖNA Wɩa sɩ jaŋ joŋo pɩma dɩ ma hɔŋ ba lɛ, dɩ baal koo haal nɛ hɛ ma tʋɔŋ a vɩa La TƖƖNA niiŋ, a ŋaa wʋbɔŋ a chei nii-la sɩ hɛ ma dɩ ma TƖƖNA pɛgɛ, 3a zizil wɩa-nyuŋ kʋŋ, wɩɩpɔsʋŋ, chɛnɛ, koo chɛnwʋlaa, arɩ vesiŋ dɔnsʋŋ La TƖƖNA sɩ bɩ ŋɩɩ daga, 4dɩ ma nɛ nɩɩ ŋɩɩ, má nyilimi wɩɩ-la tʋɔŋ woruŋ. Dɩ ma nɛ na dɩ wɩɩ-la ŋaa wʋtɩtɩɩ, arɩ wʋbɔmʋŋ deeŋ nɛ ba sɛnɛ ŋaa Iziral tinteeŋ lɛ, 5má kɛŋ baal-la koo haal-la sɩ ŋaa wʋbɔŋ-la a lɩɩ taŋ-la lɛ, a yagʋ kpʋ arɩ tabɩaa. 6Dɩ nɩaa balɩa koo batori nɛ pɛ na wɩɩ arɩ ʋ ŋaa wʋtɩtɩɩ nɛ, ma jaŋ wuo kpʋ nɩa. Ama ma bɩ jaŋ wuo kpʋ nʋʋ dɩ nɩbala dʋndʋŋ nɛ pɛ na. 7Nɩalɩŋ sɩ dii pɛ na nɛ maga dɩ ba laa sɩpaaŋ paa tabɩaa a yagɛ nɩɩ-la ba sɩɩ chɛ dɩ ba kpʋ, ka dɩ nɩkaanaa na pɛ. Ŋɩɩ ma sɩ jaŋ ŋaa a giri wʋbɔŋŋɔɔ deemba doho ta Iziral tinteeŋ lɛ nɛ ŋɩɩ.
Sarɩya dɩ-diiliŋ
8Dɩ ba nɛ kɛŋ wɩaa kaa kɔ ma sarɩya dɩ-diilee, dɩ wɩalɩŋ dolie kɩɩ ma jɩmɩŋ, má kaa mʋ lee-la ma TƖƖNA Wɩa sɩ jaŋ lɩɩsɛ. Wɩalɩŋ nɛ ŋ-la: dɩ nʋʋ nɛ ba kpʋ koo dɩ nʋʋ nɛ pɩrɛ ʋ dɔŋɔ, koo dɩ nɩaa nɛ kɛŋ dʋa wɩaa yuyuo dɔŋɔ. 9Má kɛŋ wɩɩ-la mʋ Levi doho Wɩɩsʋllɩ sɩpaalaaraa arɩ sarɩya diiri-la sɩ hɔŋ kpasa nyuŋ bʋa-la lɛ teeŋ, a bʋla pɩba. Ba jaŋ laa wɩɩ-la jɩma pɩma. 10Lee-la La TƖƖNA sɩ jaŋ lɩɩsɛ lɛ, wɩɩ-la kala ba sɩ bʋla pɩma, ʋ maga dɩ ma fɩɛlɛ ma sɩaa a to ba kala. 11Ʋ maga dɩ má to wɩalɩŋ kala ba sɩ beŋ wɩɩ-la tʋɔŋ a bʋla pɩma, má sɩ́ begilu wɩalɩŋ kʋŋkala lɛ. 12Nɩɩ-la kala sɩ vɩa wɩalɩŋ sarɩya diire sɩ dagɩŋ koo wɩalɩŋ Wɩɩsʋllɩ sɩpaalaara sɩ hɛ lee-la a tɩma pɩpɩ ma TƖƖNA Wɩa sɩ dagɩŋ, ʋ maga dɩ má kpʋʋ nɛ. Ʋ maga dɩ ma ŋaa ŋɩɩ nɛ a giri wʋbɔŋŋɔɔ ta Iziral tinteeŋ lɛ. 13Ŋɩɩ nɛ Iziral tɩŋŋaa kala jaŋ nɩɩ dɩ fawʋllʋŋ kɛmba, dɩ ba bɩra sɩ́ wʋdosunu-la ŋaa.
Ŋɩɩ ba sɩ jaŋ to a lɩɩsɛ kuoro
14Dɩ ma nɛ mʋ yi tintee-la ma TƖƖNA Wɩa sɩ sɩ ʋ jaŋ joŋo pɩma dɩ ma hɔŋ ʋ lɛ a tɩɩʋ, ma jaŋ chɩchɛ dɩ ma kɛŋ kuoro, arɩ tinteye-la dɔnsʋŋ sɩ golli ma sɩ kɛŋ kuoroo ŋɩɩ. 15Má beŋ woruŋ arɩ nɩɩ-la ma sɩ jaŋ lɩɩsɛ dɩ ʋ ŋaa ma kuoro, ŋaa nʋʋ ma TƖƖNA Wɩa sɩ lɩɩsa. Ʋ maga ʋ ŋaa ma naambii nɛ, nɩwogo bɩ maga ʋ ŋaa ma kuoro. 16Kuoru-la bɩ maga ʋ kɛŋ janɩŋ yʋgɛ. Ʋ bɩ maga ʋ chɩchɛ dɩ nɩaa mɩɩra mʋ Ijipiti tinteeŋ a yɔɔ janɩŋ kaa kʋ pʋ, bɛɛ wɩaa La TƖƖNA Wɩa sɩ, ʋ bɩ chɛ dɩ ʋ nɩaa bɩra joŋ ba sɩaa chaasɛ lee-la. 17Kuoru-la bɩ maga dɩ ʋ kɛŋ haalaa yʋgɛ, bɛɛ wɩaa ŋɩɩ jaŋ leŋ dɩ ʋ joŋ harɩŋ yɩa La TƖƖNA. Ʋ bɩ maga dɩ ʋ chɩchɛ ʋ kɛŋ hɔpʋla arɩ sɛlɩmɛ yʋgɛ. 18Dɩ ʋ nɛ dii kuoruŋ, ʋ maga ʋ laa ba sɩ ŋmʋnsɛ Wɩa niiŋ wɩaa hɛ teŋ-la lɛ Levi doho nɩaa sɩ ŋaa Wɩɩsʋllɩ sɩpaalaaraa teeŋ, a leŋ ba ŋmʋnsa hɛ teniŋ dɔŋɔ lɛ pʋ dɩ ʋ bil, a kɩkarɩmɛ bʋa na-kala lɛ. 19Teŋ-la maga ʋ hɛ ʋ teeŋ nɛ dɩ ʋ kɩkarɩmɛ ʋ mɩɩsɩŋ kala lɛ, dɩ ŋɩɩ leŋ ʋ zizil ʋ Tɩɩna Wɩa a tuto ʋ wombiiŋ arɩ wɩalɩŋ kala ʋ sɩ daga. 20Ŋɩɩ nɛ jaŋ leŋ dɩ ʋ sɩ́ Wɩa wombiiŋ lɛ bibegili, a bɩɩnɛ arɩ ʋ nɛ kpɩa ʋ naambiiriŋ Iziral tɩŋŋaa kala. Dɩ ʋ nɛ to woruŋ, ʋ dɩ ʋ doho nɩaa jaŋ dii kuoruŋ a dieni Iziral tinteeŋ lɛ.
Currently Selected:
MOSIS BƖRA WULLI WƖA WOMBIIŊ 17: SIS
Highlight
Copy
Compare
Share
Want to have your highlights saved across all your devices? Sign up or sign in
©Ghana Institute of Linguistics Literacy and Bible Translation 1984, 2014
