MOSIS BƖRA WULLI WƖA WOMBIIŊ 16
16
La TƖƖNA dɩɩsɩŋ kiele bal gbiele
1Chɛnɛ-la ba sɩɩ yɩrɛ Abib tʋɔŋ, má gbieli ma TƖƖNA Wɩa dɩɩsɩŋ kiele bal gbiele, bɛɛ wɩaa chɛnɛ-la tʋɔŋ tɩtaŋɩŋ nɛ ʋ kɛmma kaa kʋ lɩɩ Ijipiti tinteeŋ lɛ. 2Má lɩɩsɛ piese koo nɛŋ a kaa mʋ lee-la ma TƖƖNA Wɩa sɩ jaŋ lɩɩsɛ dɩ ma zizilu a kpʋ a ŋaa ma TƖƖNA dɩɩsɩŋ kiele bal gbiele-la kʋdiilee. 3Dɩ ma nɩɩ dii gbiele-la kʋdiilee, má sɩ́ boroboro-la sɩ kɛŋ sɩbʋrʋŋ dii. Má dii boroboro-la sɩ bɩ sɩbʋrʋŋ kɛnɛ ŋɩɩ tapʋlaa balɩpɛ, dɩ ʋ liliisima hɛɛ-la ma sɩ na bʋa-la lɛ ma sɩɩ chɛ lɩma lɩma dɩ ma lɩɩ Ijipiti tinteeŋ lɛ. 4Má sɩ́ leŋe dɩ sɩbʋrʋŋ hɛ ma teeŋ tapʋlaa balɩpɛ. Má pʋpɔ dɩ pʋsʋ-la ma sɩ kpʋa chɛ-bumbuŋ-la dɩdaanɩŋ nammɩa sɩ chɩna chʋa.
5Má sɩ́ La TƖƖNA dɩɩsɩŋ kiele bal gbiele-la pʋna kpʋ taŋ kala ma sɩ cho lɛ, tasɩ-la ma TƖƖNA Wɩa sɩ joŋo pɩma lɛ, 6see lee-la ʋ sɩ jaŋ dagɛma dɩ ma mʋ a zizilu. Nɩmɛ nɛ ma jaŋ kpʋ pʋsʋ-la wɩɩ-mul-jʋʋlʋŋ, bʋa-la tɩtɩa lɛ ma sɩ lɩɩ Ijipiti tinteeŋ lɛ. 7Má wasɛ nammɩa-la a chaŋ lee-la ma TƖƖNA Wɩa sɩ jaŋ dagɛma. Dɩ taŋ nɛ pʋla chʋchʋɔŋ, má mɩɩra mʋ ma dɩɩsɩŋ. 8Má dii boroboro-la sɩ bɩ sɩbʋrʋŋ kɛnɛ tapʋlaa balɩdʋ, ama tapʋl-pɛɩ chɛɛŋ má sɩ́ tɩntɩmɩɩ kala tɩŋ, má hilimi a zil ma TƖƖNA Wɩa.
Baga kɩaa ŋaanɩŋ gbiele
9Má chɩŋ tapʋlɩɩ-la ma sɩ suomo a kʋkʋŋ ma mɩaa a dɩɩsɛ yɔɔsʋŋ balɩpɛ, 10aŋ gbieli ma baga kɩaa ŋaanɩŋ gbiele a pɩ ma TƖƖNA Wɩa. Nʋʋkala jaŋ kɛŋ Wɩa sɩ pɛ ʋ lɛ magɛ ŋɩɩ tʋɔtɔrɛ Wɩɩsʋlʋŋ kɩaa a kaa kʋ ŋaa Wɩɩsʋlʋŋ pɩ ma TƖƖNA Wɩa. 11Ma dɩ ma biiriŋ, ma tɩntɩnnaa, baalaa arɩ haalaa, Levi doho nɩalɩŋ arɩ nɩwogusuŋ, biisinsiŋ arɩ yo-haala-la sɩ hɛ ma tʋɔŋ, ma kala maga dɩ má mʋ lee-la ma TƖƖNA sɩ jaŋ lɩɩsɛ dɩ ma zilu nɩmɛ a gbieli ʋ sɩpaaŋ. 12Má jɩŋ arɩ ma fa ŋaa yosi nɛ Ijipiti tinteeŋ lɛ, ŋɩɩ wɩaa má fɩɛlɛ ma sɩaa a to wɩaa deemba mɩ sɩɩ dagɛma.
Lɛŋŋɛɛ gbiele
13Dɩ ma nɛ ŋaa ma baga kɩaa dɛrɛ, a tɔrɛ ma tɩɩnɛnɛɛ, má gbieli lɛŋŋɛɛ gbiele tapʋlaa balɩpɛ. 14Ma dɩ ma biiriŋ, ma tɩntɩnnaa, baalaa arɩ haalaa, Levi doho nɩalɩŋ arɩ nɩwogusu-la, biisinsiŋ arɩ yo-haala-la kala sɩ hɛ ma tʋɔŋ, ma kala maga dɩ má gbieli gbiele-la arɩ tʋɔtɔrʋŋ. 15Má mʋ lee-la ma TƖƖNA Wɩa sɩ jaŋ dagɛma dɩ ma zizilu a gbieli gbiele-la tapʋlaa balɩpɛ. Má leŋ dɩ ma tʋɔŋ tɔrɛ, bɛɛ wɩaa ma TƖƖNA pɛ ma lɛ nɛ ma baga kɩaa wasɛ, a pɛ ma lɛ ma nɩsɩŋ tɩntɩŋŋaa ma kala lɛ.
16Jɩna na-kala tʋɔŋ Iziral tɩŋŋaa baalaa kala maga má mʋ ma TƖƖNA sɩpaaŋ naansɩɩŋ butori nɛ, lee-la ʋ sɩ jaŋ dagɛma dɩ ma zizilu, a gbieli gbielee deemba: La TƖƖNA dɩɩsɩŋ kiele bal gbiele, baga kɩaa ŋaanɩŋ gbiele arɩ lɛŋŋɛɛ gbiele. Nʋʋkala bɩ maga dɩ ʋ mʋ La TƖƖNA sɩpaaŋ arɩ na-hɩllɩŋ. 17Nʋʋkala maga dɩ ʋ kɛŋ kʋŋ nɛ a mʋ dii zile pɩ ma TƖƖNA Wɩa a magɛ ŋɩɩ ʋ sɩ pɛ ʋ lɛ.
Sarɩya diiree
18Tasɩ-la kala ma TƖƖNA Wɩa sɩ jaŋ joŋo pɩma lɛ, doho kala maga dɩ ʋ lɩɩsɛ sarɩya diiree arɩ tɩntɩnnɩ-hɩasɩŋ. Ba maga ba kɛŋ wʋtɩtɩɩ a laa nɩalɩŋ wɩaa jɩjɩŋ. 19Nɩaa deemba bɩ maga dɩ ba joŋ wʋtɩtɩɩ faa, a sɩ laa pɛ nʋʋ lɛ dɩ ʋ kɩaa nɛ bɩ sɩŋ, a sɩ́ kpalaa laa. Kpalaa nɛ yie leŋ nɩaa joŋ wʋtɩtɩɩ faa aŋ kɛŋ wʋtɩtɩɩ bɩrɩmɛ wʋnyɩɛrɩŋ. 20Má leŋ dɩ wʋtɩtɩɩ dʋndʋŋa nɛ laa ma wɩɩkala sɩpaaŋ, dɩ ŋɩɩ leŋ dɩ ma hɔŋ tintee-la lɛ ma TƖƖNA Wɩa sɩ jaŋ joŋo pɩma a tɩɩʋ.
Má sɩ́ vesiŋ to
21Dɩ ma nɛ saa Wɩɩsʋllɩ koruŋ dɩ ma pɩ ma TƖƖNA Wɩa, má pɔ dɩ vene-la ba sɩɩ yɩrɛ Asɩra daa kala sɩ́ nɩmɛ pɛ. 22Má sɩ́ tabɩɩ kala joŋo bil aa kpaarɛ, ma TƖƖNA Wɩa bɛrɛ ŋɩɩ nɛ.
Currently Selected:
MOSIS BƖRA WULLI WƖA WOMBIIŊ 16: SIS
Highlight
Copy
Compare
Share
Want to have your highlights saved across all your devices? Sign up or sign in
©Ghana Institute of Linguistics Literacy and Bible Translation 1984, 2014
