MOSIS BƖRA WULLI WƖA WOMBIIŊ 15
15
Jɩna-la ba sɩ jaŋ joŋ chɩŋ diiree chɩŋŋaa chɛba
1Dɩ nʋʋkala nɛ joŋ kɩaa chɩŋ ʋ dɔŋɔ, dɩ jɩ-pɛɩ nɛ kʋ dɛrɛ, ʋ maga dɩ ʋ giri chɩŋ-la ta. 2Ŋ-la nɛ maga ma ŋɩŋaa: Dɩ Iziral tɩɩna nɛ joŋ kɩaa a chɩŋ ʋ dɔŋɔ, ʋ bɩra sɩ́ pɩɛsa laa, bɛɛ wɩaa bʋa-la lɛ La TƖƖNA sɩ sɩ ba giri chɩŋŋaa ta yie nɛ. 3Ma jaŋ wuo pɩɛsa laa ma chɩŋŋaa nɩwogusuŋ teeŋ, ama ma naambiiriŋ-na teeŋ, má gire ta. 4Nʋʋkala bɩ maga dɩ ʋ ŋaa summu ma tʋɔŋ, bɛɛ wɩaa tintee-la ma TƖƖNA Wɩa sɩ jaŋ joŋo pɩma dɩ ʋ ŋaa ma kʋŋ, ʋ lɛ, ʋ jaŋ pɛ ma lɛ woruŋ, 5dɩ ma nɛ sɛɩ ma TƖƖNA Wɩa niiŋ, a to wɩalɩŋ kala mɩ sɩɩ dagɛma jɩnɩŋ. 6Ma TƖƖNA Wɩa jaŋ chaasa pɛ ma lɛ arɩ ʋ sɩ hɛ niiŋ pɩma ŋɩɩ. Tinteyee jaŋ yʋgɛ a chɩŋ kɩaa ma teeŋ, ama ma-na bɩ jaŋ chɩŋ kʋŋ nʋʋkala teeŋ. Tintee kala nɩaa bɩ jaŋ bibemma, ama ma-na jaŋ bibeŋ tintee daŋ.
7Dɩ ma nɛ mʋ tintee-la ma TƖƖNA Wɩa sɩ jaŋ joŋo pɩma, dɩ summoo hɛ ma naambiiri-la tʋɔŋ tasɩ-la kʋŋkala lɛ, má sɩ́ tʋɔhɛɛŋ kɛŋ a vɩaba ta. 8Má kɛŋ zile a joŋ kɩalɩŋ kala ba sɩɩ chɛ a chɩmba. 9Dɩ jɩ-pɛɩ-la lɛ ma sɩ jaŋ giri chɩŋŋaa ta nɛ kpaga ma, ka dɩ ma naambiiri-la kʋŋ nɩsɩŋ buo, dɩ ʋ chɩchɛ ʋ chɩŋ kʋŋ ma teeŋ, má sɩ́ tʋɔhɛɛŋ kɛŋ a vɔmʋ. Dɩ ma nɛ vɔmʋ dɩ ʋ yele pɩ La TƖƖNA, ma jaŋ laa cheeriŋ La TƖƖNA teeŋ. 10Má sɩ́ wɩaa gʋrʋmʋ aŋ-na pɛ ʋ lɛ, má pɛ ʋ lɛ arɩ tʋɔtɔrʋŋ. Dɩ ma nɛ ŋaa ŋɩɩ, ma TƖƖNA Wɩa jaŋ pɛ ma lɛ tɩntɩmɩɩ kala ma sɩɩ tɩŋ lɛ, ma nɩsɩŋ jaŋ su. 11Bʋa na-kala lɛ nyaabaa jaŋ hɛ ma Iziral tɩŋŋaa tʋɔŋ, ŋɩɩ wɩaa, mɩ bʋlaa pɩma, má kɛŋ zile ma naambiiriŋ arɩ nyaaba-la sɩ hɛ ma tʋɔŋ teeŋ.
Yosuŋ joŋo tanɩŋ wɩaa
12Dɩ ma Iziral tɩŋŋaa baal koo haal nɛ joŋ ʋ tɩtɩa a yalla pɩ ma dɔŋɔ a ŋaa yoŋ, dɩ ʋ nɛ tɩŋ tɩntɩŋŋaa pɩŋ jɩsɩŋ balɩdʋ, jɩ-pɛɩ lɛ, ʋ maga dɩ ŋ joŋu ta nɛ. 13Dɩ ŋ nɛ taʋ, sɩ́ leŋe dɩ ʋ mʋ arɩ na-hɩllɩŋ. 14Lɩɩsɛ kɩalɩŋ dɔnsʋŋ ma TƖƖNA Wɩa sɩ pɛ ŋ lɛ ŋ dʋa a pʋ, piesee, mɩaa arɩ tɩɩnɛnɛɛ sɩnɩŋ. 15Ma jɩŋ arɩ ma ma fa ŋaa yosi nɛ Ijipiti tinteeŋ lɛ, ma TƖƖNA Wɩa laama ta, ŋɩɩ nɛ tɩɩ mɩ joŋ wɩɩŋ deeŋ aa dagɛma jɩnɩŋ. 16Dɩ ŋ yomo-la nɛ bʋla pɩŋ arɩ ʋ bɩ jaŋ viiri, a tɩŋ ʋ sɩ cho ŋ dɩ ŋ dɩa nɩaa wɩaa, ka ʋ nɩsɩŋ ma jʋjʋʋ, 17ŋɩɩ-na kɛŋ ʋ dɩgɩlɩŋ mʋ mɛrɛ boro lɛ a tɔɔ luri arɩ luro. Ʋ jaŋ ŋaa ŋ yoŋ a kaa mʋ wuu. Dɩ yomo-la nɛ ŋaa haal, ŋɩɩ tɩtɩa nɛ ŋ jaŋ ŋaa ʋ lɛ.
18Sɩ́ leŋe dɩ ŋ tʋɔŋ wɩɩ dɩ ŋ nɩɩ chɛ ŋ joŋ ŋ yomo ta, a tɩŋ ʋ sɩ tɩŋ jɩsɩŋ deemba balɩdʋ a pɩŋ, ʋ tɩntɩŋŋaa sɩ yʋga kɩɩ nʋʋ ŋ fa sɩ jaŋ joŋ dɩ ʋ tɩŋ, ka dɩ ŋ timu naansɩɩŋ bʋlɩa wɩaa. Dɩ ŋ nɛ bɩ leŋe ŋ tʋɔŋ wɩɩ, ma TƖƖNA Wɩa jaŋ pɛ ŋ lɛ wɩɩ na-kala ŋ sɩɩ ŋaa lɛ.
Pʋsʋŋ bii-bumbumba
19Má joŋ ma pʋsʋŋ bii-bumbumba sɩ ŋaa belliŋ a pɩ ma TƖƖNA Wɩa. Ma pɔ má sɩ́ ma nɛsɩŋ bii-bumbumba-la kaa tɩŋ tɩntɩŋŋaa, a pʋpɔ má sɩ́ ma piesee ma bii-bumbumba pʋnaa kɛ. 20Jɩna na-kala ma dɩ ma dɩa nɩaa jaŋ kɛŋ pʋsʋ-la mʋ ma TƖƖNA Wɩa sɩpaaŋ, lee-la ʋ sɩ jaŋ dagɛ, a kpʋ chaŋ. 21Ama dɩ pʋsʋ-la kʋŋ nɛ kɛŋ nyɔɔ, dɩ ʋ nyʋlɩma nɛ koo dɩ ʋ gbɛrɩgɛ nɛ koo dɩ ʋ kɛŋ nyanyal-bɔŋ dɔŋ nɛ, ma bɩ jaŋ wuo kɛnʋ kʋ kpʋ a ŋaa Wɩɩsʋlʋŋ pɩ ma TƖƖNA Wɩa. 22Ma nɩalɩŋ sɩ kɛŋ disiniŋ La TƖƖNA teeŋ arɩ nɩalɩŋ sɩ bɩ disiniŋ kɛnɛ ʋ teeŋ, ma kala jaŋ wuo chamba ma tasɩŋ lɛ a nagɛ ma sɩ yie chaŋ tɛhɩɩ koo aamɩŋ ŋɩɩ. 23Má sɩ́ ba chalɩŋ dii, má joŋo bɩsa ta.
Currently Selected:
MOSIS BƖRA WULLI WƖA WOMBIIŊ 15: SIS
Highlight
Copy
Compare
Share
Want to have your highlights saved across all your devices? Sign up or sign in
©Ghana Institute of Linguistics Literacy and Bible Translation 1984, 2014
