MOSIS BƖRA WULLI WƖA WOMBIIŊ 14

Kʋdiile-la sɩɩ kɩsʋ arɩ kɩalɩŋ sɩ bɩ kɩsɛ

1Ma ŋaa La TƖƖNA Wɩa biiriŋ nɛ. Dɩ nʋʋ nɛ sʋba dɩ ma yiyel ʋ yoho, má sɩ́ ma yaraa kpɛrʋ, a sɩ́ ma tilliŋ ma fʋŋ arɩ nɩaa dɔnsʋŋ sɩɩ ŋaa ŋɩɩ, 2bɛɛ wɩaa ma ŋaa ma TƖƖNA Wɩa nɩaa sɩ bɩ disiniŋ kɛnɛ nɛ. Dʋnɩa kala tʋɔŋ, ma TƖƖNA lɩɩsɛma nɛ dɩ ma ŋaa nɩa ʋ sɩ chaasa cho.

3Má sɩ́ kɩalɩŋ La TƖƖNA sɩ sɩ baa kɩsʋ kʋŋkala dii. 4Pʋsʋ-la arɩ bagɩla-la ma sɩ jaŋ wuo chaŋ nɛ ŋ-la: nɛsɩŋ, piesee, bʋʋnaa, 5aamaa, bʋrʋŋ, tɛhɩɩ, tabʋmbʋŋ koo komo. 6Ma jaŋ wuo chaŋ pʋna koo bagɩl na-kala sɩ kɛŋ naachɛŋŋɛɛ aŋ gbu kɩaa chɩchaŋ. 7Ama pʋsʋ-la arɩ bagɩla-la sɩ bɩ naachɛŋŋɛɛ kɛnɛ aŋ gbu kɩaa chɩchaŋ tʋɔŋ, má sɩ́ bʋntaŋŋa, chuomo arɩ bʋŋ-nyuŋ gbuŋgbogo chaŋ, ba kɛŋ disiniŋ nɛ ma teeŋ. 8Tooŋ ma kɛŋ disiniŋ nɛ ma teeŋ, ʋ ma kɛŋ naachɛŋŋɛɛ nɛ aŋ bɩ kɩaa gbu chɩchaŋ, má sɩ́ ʋ nammɩa chaŋ a sɩ́ ʋ kʋsʋʋŋ ma digu.

9Kɩalɩŋ kala sɩ hɛ lɩɩŋ tʋɔŋ a kɛŋ kerikee arɩ horuŋ ma jaŋ wuo chamba. 10Ama kɩalɩŋ sɩ bɩ horuŋ arɩ kerikee kɛnɛ, ba kɛŋ disiniŋ nɛ ma teeŋ má sɩ́ ba chaŋ.

11Ma jaŋ wuo chaŋ diibiisi-la sɩ bɩ disiniŋ kɛnɛ. 12Má sɩ́ diibiisiŋ deemba chaŋ: kachuuŋ, duuŋ arɩ duuŋ-bine, 13habal-joŋ doho na-kala, 14gɩlɩŋgaaŋ doho na-kala, 15hajaaŋkuŋkuŋ-la sɩ kɛŋ dɩgɩlaa, gʋra nyilimi arɩ kɩl doho na-kala, 16hajaaŋkuŋkuŋ-pʋla, hajaaŋkuŋkuŋ-bine arɩ hajaaŋkuŋkuŋ-bie, 17hajaaŋkuŋkuŋ-la sɩ hɛ tintee-hɩlɩŋ lɛ, kachuunaa-fɩaŋ arɩ kamege, 18naliiribommie, kʋlʋŋkʋɔl doho na-kala, diibii-kantɔmʋŋ arɩ jɩŋ.

19Filli-biisi-la kala sɩ yie hɛ dɔŋɔ a fifil, ba kɛŋ disiniŋ nɛ ma teeŋ, má sɩ́ ba chaŋ. 20Ma jaŋ wuo chaŋ filli na-kala sɩ kɛŋ kɩŋkɛnsɩŋ aŋ bɩ disiniŋ kɛnɛ.

21Má sɩ́ kʋŋ na-kala sɩ sʋʋ pimee dii. Ma jaŋ wuo joŋo pɩ nɩwogusu-la sɩ hɛ ma tʋɔŋ dɩ ba dii koo ma yalla pɩ nɩwogusu-la dɔnsʋŋ sɩ hɔnɔ kpagɛma. Ma ŋaa ma TƖƖNA nɩaa sɩ bɩ disiniŋ kɛnɛ nɛ. Má sɩ́ bʋʋ-bie koo pie-bie chɔ ʋ naaŋ yɩlɩŋ lɛ.

Kpaalɩŋ fii-la sɩ ŋaa La TƖƖNA kʋa

22Dɩ ma nɛ ŋaa ma baga kɩaa jɩna na-kala, ma kaa kpaa leree fii a joŋ dɔŋɔ bil. 23Ma sɩ jaŋ kɛŋ ma mɩaa, ma tɩɩnɛnɛɛ sɩnɩŋ arɩ nʋʋŋ a kpaa leree fii-la a joŋ kɩalɩŋ pɩ La TƖƖNA, a pɛ ma pʋsʋŋ bii-bumbumba lɛ, má kaa mʋ lee-la ma TƖƖNA Wɩa sɩ jaŋ dagɛma dɩ ma mʋ a zizilu nɩmɛ a dii kɩalɩŋ ʋ sɩpaaŋ. Má ŋaa wɩɩŋ deeŋ a zizil ma TƖƖNA Wɩa bʋa na-kala lɛ. 24Dɩ lee-la La TƖƖNA sɩ daga nɛ bolie arɩ ma dɩɩsɩŋ, ma sɩ bɩ jaŋ wuo chʋŋ kpaalɩŋ fii time-la kaa mʋ, kɩalɩŋ ma TƖƖNA sɩ pɛ ma lɛ ma na, 25má joŋo yallɛ a kɛŋ moribie-la mʋ lee-la ʋ sɩ jaŋ dagɛ dɩ ma zizilu nɩmɛ. 26Ma joŋ moribie-la a yɔɔ kʋŋ na-kala ma sɩɩ chɛ: Nɛsɩŋ, piesee, tɩɩnɛnɛɛ sɩnɩŋ koo sɩ-yele. Ma dɩ ma dɩa nɩaa jaŋ dii kɩalɩŋ ma TƖƖNA Wɩa sɩpaaŋ aŋ gbieli. 27Ma pɔ má sɩ́ Levi doho nɩalɩŋ sɩ hɛ ma tʋɔŋ wɩaa yʋ, bɛɛ wɩaa ba-na bɩ tinteeŋ kpaalɩŋ kɛnɛ ma tʋɔŋ.

28Jɩ-tori na-kala dɩdɛrɩŋ, ma sɩ yie kɛŋ ma baga kɩaa kpaa lere fii a joŋ kʋbala-la a pɩ La TƖƖNA, má joŋ ba kala bil ma tasɩŋ lɛ. 29Kʋdiile-la nɛ jaŋ ŋaa Levi doho nɩalɩŋ sɩ bɩ kpaal kɛnɛ ma Iziral tɩŋŋaa tʋɔŋ kʋdiilee, ba dɩ nɩwogusuŋ, biisinsiŋ arɩ yo-haala-la sɩ hɛ ma tasɩŋ lɛ, dɩ ba dii a vɔgɛ. Dɩ ma nɛ ŋaa ŋɩɩ, ma TƖƖNA Wɩa jaŋ pɛ ma lɛ wɩɩkala ma sɩɩ ŋaa lɛ.

Currently Selected:

MOSIS BƖRA WULLI WƖA WOMBIIŊ 14: SIS

Highlight

Copy

Compare