Israelfɔ Ɩlʋ 105
105
Mlɩda Bulu Gyumagyihɛ Ɔkan
(1 Brɛsʋ Asʋn 16:8-22)
1Mlɩda Nana Bulu ɩpan,
amlɩsu kpoli mʋ.
Mlɩda mʋ gyumagyihɛ ɔkan suna ɔmá fɛ́ɛ́.
2Mlɩwa ɩlʋ ha mʋ.
Mlɩwa ɩlʋ kanfʋ mʋ.
Mlɩblɩ mʋ ofula ánɩ́ alabwɛ fɛ́ɛ́.
3Mlɩnya mʋ ɩda wankɩhɛ amʋ ɩwɩ ansigyi.
Nana Bulu adunkapʋ, mlɩnya ansigyi.
4Mlɩdunka Nana Bulu mʋa mʋ ɔwʋnlɩn.
Mlɩdunka mʋ brɛ fɛ́ɛ́.
5Mlɩkaɩn mʋ ofulabwɛ,
pʋ́ mʋ asʋnbuasʋ.
6Mʋ osumbi Abraham abi-aná,
Yakob abiá alalɛ.
7Mʋgyi Nana Bulu, anɩ Bulu amʋ nɩ.
Mʋtegyi ɔyɩ fɛ́ɛ́ asʋn.
8Ɔtamatan mʋ ntam amʋsʋ ɛkɛkɛɛkɛ,
asʋn ánɩ́ ɔlɔpʋha otuntufla mpɩm-mpɩm.
9Ɩnɩgyi ntam ánɩ́ mʋa Abraham bɛka,
pʋ́ mʋ́á ɔlɛka ha Isakɩ nɩ.
10Ɔlɛdɩnka ibwi mʋ́sʋ, ɩlɔbwɛ amandɩɛá ɩda ha Yakob ɔmá.
Igyi ntam ánɩ́ ibétsia ha Israel brɛ fɛ́ɛ́.
11Ɔbɛɛ, “Fʋ nɔ́pʋ Kanaan ɔsʋlʋ ha,
ɩbɔ́bwɛ mɩ siadɩɛ ogyikpa ánɩ́ fénya.”
12Brɛá bʋmɔtsɔ bʋgyi kpalobi ɩkʋ,
bʋgyi afɔɔ ɔsʋlʋ amʋsʋ,
13bɛnatɩ ki tsʋn ɔmá-ɔmátɔ,
tsu iwie ogyikpa yɔ iwie ogyikpa.
14Nana Bulu mɛ́ha ɔhaa ɔkpa osisi amʋ́.
Amʋ́ sʋ ɔlɔwa ɩyɩn wa awie
15ɔbɛɛ, “Mlɩmápʋ ɩbɩ da aha anfɩ nada ofuli.
Mlɩmábwɛ mɩ ɔnɔsʋ atɔɩpʋ tɔtɔ.”
16Ɔlɛha akʋn lɛba ɔsʋlʋ amʋsʋ,
oletin amʋ́ atogyihɛ otsukpa ɔkpa fɛ́ɛ́.
17Ɔlɔwa oyin ɔkʋ gya amʋ́ nkpa,
mʋgyi Yosef amʋʋ bɛfɛ, oleyemli ɔkpábi amʋ.#Gyen. 37:28; 45:5
18Bɔwa mʋ ayabi kplakitsi,
wa mʋ ɔmɛtɔ ɩkan.
19Nana Bulu asʋn lɔsɔ Yosef kɩ,
yɛfʋn ɛkɛá mʋ asʋn blɩhɛ amʋ lɛba mʋ́tɔ.
20Ɩnʋ Egyipte owie lɛha bɛlɛ mʋ obú.
Ɔmásʋ ogyipʋ anfɩ lɛha mʋ olegyi ɩwɩ.
21Ɔlɔpʋ mʋ bwɛ mʋ woyi pʋ́ mʋ atɔ fɛ́ɛ́sʋ ɔkɩpʋ.#Gyen. 41:14, 39-41
22Ɔlɛlɛ mʋ ɔkpa ánɩ́ ɔhɩɛ mʋ ahandɛ abʋbwɛ tɔá odekle,
isuna amʋ́ nyansa.
23Ɩnʋ mʋ sɩ Israel lɛba Egyipte.
Yakob mʋa mʋ aha bemli afɔɔ Ham#Gyen. 46:6; 47:11 ɔsʋlʋsʋ.
24Nana Bulu lɛha amʋ́ bɛhɩɛ klɛɩ,
wa ɔwʋnlɩn dʋn amʋ́ alupʋ.
25Ɔlɛha Egyiptefɔ agywɩɩn lɛdamli, bolu Israelfɔ,
bɔgywɩɩn amʋ́ ɩwɩ lalahɛ.
26Mʋ́ sʋ ɔlɔwa mʋ osumbi Mose
pʋ́ Aaron amʋʋ ɔlɛlɛ amʋ.
27Bɔbwɛ mʋ ofula Egyiptefɔtɔ,
bwɛ osuna Ham ɔsʋlʋsʋ ɩnʋ.
28Ɔlɛha oklun ɩlɛba, ɔsʋlʋ amʋsʋ ilebi tuun,#Eks. 10:21-23
bʋmegyi mʋ asʋnsʋ.
29Ɔlɛha amʋ́ ntsu#Eks. 7:17-21 lɛdamli obugya,
aklɛmɛtɩ bowu.
30Nkle bɔbʋla ɔsʋlʋ amʋsʋ ɔtɩnɛgyiɔtɩnɛ,
bowie yɔ amʋ́ awie obutotɔ aná fɛ́ɛ́.
31Ɔlɛlɛ ɔnɔ, awʋlʋ mʋ́a ntsʋnkɩ#Eks. 8:16-17, 20-24
bɔbʋla amʋ́ ɔsʋlʋsʋ.
32Ɔlɛha atsufolibi lotswie si nyankpʋ,
ɔprada lɔpʋtɩ ɔsʋlʋ amʋ fɛ́ɛ́sʋ.#Eks. 9:22-25
33Oleyinta amʋ́ waɩn afla pʋ́ amʋ́ apɔntɔ,
biabia amʋ́ oyi kugyikʋ.
34Ɔlɛlɛ ɔnɔ, atsantsankʋá#Eks. 10:12-15 bʋma ɩklatɔ bɛdalɩ.
35Bɔwɩ ɔsʋlʋ amʋsʋ ɩfa pʋ́ amʋ́ ndɔtɔ-atɔ fɛ́ɛ́.
36Ɔlɔmɔ amʋ́ ɔsʋlʋsʋ abitɩ fɛ́ɛ́,
amʋ́ yasʋtɔ fɛ́ɛ́ abi gyankpapʋ.
37Ɔlɛha Israelfɔ bɔpʋ Egyiptefɔ sika pɛpɛ mʋ́a fututu dalɩ ɔmá amʋtɔ.
Ɔpɔnpʋ ɔkʋkʋ métsia abusuan anfɩtɔ.
38Amʋ́ natɩ lɔwa Egyiptefɔ ɔdwɛ,
tsufɛ amʋ́ ɩwɩ lɔwa amʋ́ ifu.
39Ɔlɛtɛɩ agyinde bun amʋ́sʋ fɛ tati,
ha ogya lɔwankɩ ha amʋ́ onye.
40Bɛfɩtɛ mʋ iye, ɔlɛha amʋ́ apʋtsatsa.
Ɔlɔpʋ ɔsʋsʋ atogyihɛ ɛ bʋla amʋ́.
41Olefinki bʋta, ntsu lɛfɛn dalɩ mʋ́tɔ,
ɩna ɔsʋlʋ wʋlɩhɛsʋ fɛ ntsu tsʋnhɛ,
42tsufɛ ɔlɛkaɩn mʋ ntam amʋʋ
ɔlɛka ha mʋ osumpʋ Abraham amʋsʋ.
43Ɔlɛkpa mʋ ɔmá ansigyisʋ dalɩ Egyipte.
Aha amʋʋ ɔlɛlɛ amʋ, bʋna bʋdɛ ɩlʋ wa kʋklʋkʋʋ.
44Ɔlɔpʋ ɔmá-ɔmá ɔsʋlʋ ha amʋ́.
Ɔlɛha botsu amʋ́ ɔsʋlʋsʋ atɔ bwɛ amʋ́ klɛ.
45Alɩá bégyi mʋ amandɩɛ pʋ́ mʋ atosunahɛsʋ,
sʋ ɩnɩ fɛ́ɛ́ lɛba mʋ́tɔ.
Mlɩkanfʋ Nana Bulu!
Currently Selected:
Israelfɔ Ɩlʋ 105: nko
Highlight
Copy
Compare
Share
Want to have your highlights saved across all your devices? Sign up or sign in
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation
