Israelfɔ Ɩlʋ 106
106
Bulu, Nɩ Fʋdɛ Fʋ Ɔmá Nkpa Hɔ A, Gyi Mɩ Bʋalɛ
1Mlɩkanfʋ Nana Bulu!
Mlɩda mʋ ɩpan, tsufɛ ɔbʋ alɛ.
Mʋ ɔdwɛ ɩma ɔka!
2Ma ɔbɛ́talɩ blɩ ntobi akpɔnkpɔntɩá Nana Bulu labwɛ?
Ntɛ ma ɔbɛ́talɩ kanfʋ mʋ, ɩbɔ́fʋn?
3Ansɩ igyi aha ánɩ́ bʋtegyi asʋn ɔnɔkwalɩsʋ,
bʋtɔbwɛ tɔá ɩda ɔkpa brɛ fɛ́ɛ́.
4Nana Bulu, nɩ fʋdɛ fʋ ɔmá bʋalɛ gyi a, kaɩn mɩsʋ.
Nɩ fʋdɛ amʋ́ nkpa hɔ a, gyi mɩ bʋalɛ.
5Mɛ́nɩ nówun siadɩɛá faha aha amʋʋ falɛ amʋ.
Mɩa fʋ ɔmá amʋ anya ansigyi,
mɩa fʋ siadɩɛ akanfʋ fʋ.
6Anɩa anɩ anain anɩlapʋ ɩla gyi fʋ.
Anɩlabwɛ lalahɛ, wa owuntɔlɩn kpan.
7Brɛá anɩ anain betsia Egyipte a, bʋmowun fʋ ofula labi.
Bʋmɛkaɩn fʋ ɔdwɛá ɩma ɔka tsɔtsɔɔtsɔá fɔwa ha amʋ́sʋ.
Ɩnɩ sʋ bɔkʋsʋ lɩɩ fʋsʋ Ɔpʋ Pɛpɛ ɔnɔ.
8Mʋ́ o a, ɔlɔhɔ amʋ́ nkpa mʋ ɩda amʋ sʋ,
mɛnɩ ɔbɛ́lɛ mʋ tumi kpɔnkpɔntɩ ɔwan.
9Ɔlɛlɛ ɔnɔ, Ɔpʋ Pɛpɛ lɛkpɩ.
Ɔlɛkpa amʋ́ tsʋn bʋnkpa kluklutɔ fɛ ɔsʋlʋkpansʋ bʋna.
10Alɩ ɔlɛlɛ amʋ́ alupʋ ɩbɩ,
ka amʋ́ lɛ adʋn tumi asɩ nɩ.
11Ntsu lɛmɛ amʋ́ alupʋ.
Amʋ́tɔ ɔkʋlɛ kʋraa mésian.
12Ɩnʋ bɔhɔ mʋ asʋnsʋ gyi,
wa ɩlʋ kanfʋ mʋ.
13Ɩmɔwa ɔpá kʋkʋ bɛtan mʋ gyumagyihɛsʋ,
bʋmetsia gyo mʋ otswii amʋ́.
14Atɔ lɛhɩɛ tsia dɩnka amʋ́ ɔwɔlɩ ɔsʋlʋkpansʋ ɩnʋ.
Mʋ́ sʋ bɔsɔ Bulu kɩ ɔsʋlʋ wʋlɩhɛ amʋsʋ.
15Ɩnɩ sʋ ɔlɔbwɛ tɔá bɛfɩtɛ ha amʋ́,
tamɛ ɔlɛha amʋ́ bɔlɔ ɩlɔ lalahɛ.
16Brɛá bʋtsie amʋ́ ɔswɩɩkpa a, amʋ́ ansɩ lɛpɛ
Mose mʋa Nana Bulu igyi ɔhapʋ Aaronsʋ.
17Ɔsʋlʋ lɛyaa ɔnɔ mɛ Datan,
pula Abiram mʋa mʋ aha.#Num. 16
18Ogya ɛ lɛda amʋ́ abuopʋtɔ,
ɩlɔhɔ awuntɔlɩnpʋ amʋ fɛ́ɛ́.
19Bɛŋlaɩn sika pɛpɛ bwɛ ɔnantswiebi,
sum mʋ́ Hɔrɛb ɩbʋasɩ.
20Bɔpwɛ ɔnantswieá ɔtɔwɩ ɩfa tunku,
pʋtsɛ Buluá ogyi amʋ́ numnyam.
21Bɛtan amʋ́ Ɔhɔpʋ Bulusʋ.
Mʋlɔbwɛ atɔ akpɔnkpɔntɩ Egyipte,
22bwɛ tɔá ɩbʋ ifu Ham#Gyen. 10:6 ɔsʋlʋsʋ
pʋ́ tɔá ɩbʋ wanwan Ɔpʋ Pɛpɛ ɔnɔ.
23Mʋ́ sʋ ɔlɛblɩ ɔbɛɛ,
mɔ́mɔ amʋ́,
tamɛ Moseá ɔlɛlɛ lɔkʋsʋ kokoli amʋ́ nwunsʋ,
ha mʋ ɔblɔ lɛka itin,
ɔmɛtra mɔ amʋ́.
24Ɩnʋ bekina ɔsʋlʋ wanklaan amʋsʋ yɔ,
tsufɛ bʋmɔhɔ tɔá ɔlɛhɩɛ ha amʋ́sʋ gyi.
25Botsu ɔnɔ mʋsʋ amʋ́ tati-obuto ɩnʋ,
tsufɛ bʋmobu mʋ asʋn amʋ.
26Ɩnɩ sʋ olotsu ɩbɩ fʋa ka ntam bun amʋ́sʋ ɔbɛɛ,
mɛha amʋ́ bówu ɔsʋlʋkpan amʋsʋ.
27Mɛ́ha amʋ́ abi-aná bɛ́da saɩn yɔ ɔmá-ɔmátɔ,
ntɛ wie aputu.
28Ɩnʋ bɔpʋ ɩwɩ yɛmanta Peor ɔkpɩsʋ#Num. 25:1-13,
bʋdɛ atogyihɛá bapʋha afuli gyi.
29Bɔpʋ amʋ́ bwɛhɛ anfɩ wa Bulu ɔblɔ.
Mʋ́ sʋ ɩlɔ lalahɛ lɛkpa wie amʋ́tɔ, bʋdewu.
30Tamɛ Finehas lɔkʋsʋ kɔ ha Bulu#Num. 25:1-9 amʋ́ nwunsʋ,
ɩlɔ amʋ lɛka itin.
31Mʋ́ sʋ Nana Bulu lotsu mʋ
ánɩ́ mʋ asʋn da ɔkpa brɛ fɛ́ɛ́.
32Bɛtra wa Bulu ɔblɔ Meriba,
bɛha Mose lenyaa asʋn amʋ́ sʋ,#Num. 20:2-13
33tsufɛ bɛha mʋ olenya ɔblɔ tsʋn,
ɩlɛha mʋ ɔlɛblɩ mimlala.
34Israelfɔ bekina bʋmɔmɔ ɔmá-ɔmá amʋ,
fɛ alɩá Nana Bulu lɛblɩ.
35Mboun amʋ́a ɔmátɔfɔ amʋ bɔbwɛ ɩkʋlɛ,
bɛkasɩ amʋ́ amandɩɛ.
36Bosum amʋ́ ɩkpɩ,
ilemli agbla kɩta amʋ́.
37Bɔpʋ amʋ́ abi yinhɛ mʋ́a abi tsɩhɛ kʋraa ha ɩkpɩ igyi.
38Bɛtsɛɩ obugya ánɩ́ ɔlala ma mʋ́ ɩwɩ wʋlɩ asɩ,
tsufɛ bɔpʋ amʋ́ abi ha Kanaanfɔ ɩkpɩ igyi,
ɩlɛha ifin lɛda ɔsʋlʋ amʋ.
39Amʋ́ bwɛhɛ anfɩ lɛha bɔkpɔɩ Bulu ansɩtɔ,
mli mbʋa atɔpʋ ɔŋɛtɔ.
40Ɩnʋ Nana Bulu lɛhɩɛ nya ɔblɔ mʋ ɔmásʋ,#Nkp. 2:14-18
mʋ ogyikpa lɔwa mʋ nyanya.
41Olesi amʋ́ ha ɔmá-ɔmá,
amʋ́ alupʋ begyi amʋ́sʋ.
42Amʋ́ alupʋ bɛkpa amʋ́ manta,
ha betsia amʋ́ tumi asɩ.
43Oletsia lɛ amʋ́,
tamɛ bɛhɩɛá bɔ́wa asʋtɔ-ɔnlɩn.
Mʋ́ sʋ amʋ́ lalahɛbwɛ lɛba amʋ́ asɩ.
44Mʋ́ alɩ o a, olowun amʋ́ nwɛ,
brɛá olonu amʋ́ isu.
45Ɔlɛkaɩn ntam ánɩ́ ɩbʋ mʋa amʋ́nyɔ nsɩnɛsʋ.
Mʋ ɔdwɛá ɩma ɔka sʋ,
ilowie mʋ ɩwɩtɔ.
46Ɔlɛha amʋ́ aha ánɩ́ bɛkɩta amʋ́ ndoun
bowun amʋ́ nwɛ.
47Oo Nana Bulu anɩ Bulu, gyi anɩ bʋalɛ!#1 Br. 16:35-36
Lɛ anɩ tsu ɔmá-ɔmátɔ befia,
mɛnɩ abɛ́da fʋ ɩpan,
kanfʋ fʋ ɩda ansigyisʋ.
48Bʋkanfʋ Nana Bulu, Israel Bulu,
tsu brɛá ɔyɩ mɔkʋlɩn yɛfʋn brɛá ɩtamata.
Ɔmá fɛ́ɛ́ bʋblɩ bɛɛ, “Ɩba mʋ́tɔ!”
Mlɩkanfʋ Nana Bulu!
Currently Selected:
Israelfɔ Ɩlʋ 106: nko
Highlight
Copy
Compare
Share
Want to have your highlights saved across all your devices? Sign up or sign in
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation
