Israelfɔ Ɩlʋ 104
104
Bulu Numnyam Itsia Brɛ Fɛ́ɛ́
1Oo mɩ ɔkla, kanfʋ Nana Bulu.
Nana Bulu mɩ Bulu, fɔkʋkʋ moni o!
Fʋdɩdɩ obú mʋ́a numnyam.
2Fʋdɩdɩ wankɩ fɛ tati.
Fʋlɛtɛɩ nwʋlʋtatɔ fɛ fʋ tati-obu.
3Feyi fʋ woyi dɩnka ɔsʋsʋ ntsusʋ,
pʋ́ agyinde bwɛ fʋ keke,
fʋtɛnatɩ afu abambasʋ.
4Fɔpʋ afu bwɛ fʋ abɔpʋ,
bwɛ ogya plɛnplɛn fʋ asumpʋ.
5Fɔwa ɔyɩ ntswɩasɩ,
mɛnɩ ɩmɛ́ɛkpɩnkɩ ɛkɛkɛɛkɛ.
6Fɔpʋ ɔpʋ okluklukpa tɛɩ bun mʋ́sʋ fɛ tati.
Ntsu lɔbʋla dɩnka abʋsʋ.
7Brɛá fɛlɛ ɔnɔ a, ntsu amʋ ɩlɛsrɩ.
Ɩlɛsrɩ natɩ brɛá fʋ ɔmɛ lɛlɩn fɛ ɔprada.
8Ntsu amʋ lɔbʋla dɩnka abʋsʋ,
kplɩ bowie abʋnkpatɔ,
ɔtɩnɛá fɛha mʋ́ fɛɛ, ɩdɩ.
9Fɔtswɩ ɔka ha mʋ́,
mɛnɩ ɩmɛ́ɛdafa mʋ́sʋ.
Fowun ɩmɛ́ɛtra tsu ɔsʋlʋ ɛkɛkɛɛkɛ.
10Fɛha ntsu letii wa abʋnkpatɔ,
ɩdɛtsʋn abʋ nsɩnɛ.
11Ilemli ntsu nunhɛ ha pututɔ-mbwɩ.
Pututɔ mpɔnsʋra aná ɛ
bʋtɔpʋka amʋ́ ɔmɛwʋlɩ itin.
12Ntsu amʋ ɔnɔ nyi abambitɔ
mbubwi bɔbwɛ amʋ́ asia wa,
bʋtɛdɩnka mʋ́tɔ wa ɩlʋ.
13Fʋtɛha nyankpʋ totswie tsu fʋ woyitɔ ɔsʋsʋ wʋlɩ abʋsʋ.
Fʋ gyumagyihɛtɔ-abi labʋla ɔsʋlʋsʋ.
14Fʋtɛha ɩfa tɔkwɛ ha woyitɔ-mbwɩ.
Fʋtɛha nyankpʋsa atɔ abi otodu,
pʋnya atogyihɛ tsu ɔsʋlʋtɔ,
15nta ánɩ́ ɩbɛ́ha mʋ ansɩ bégyi,
ofobiá ɔbɛ́kpa wa akɩlɛ
pʋ́ atogyihɛá ɩbɔ́wa mʋ ɔwʋnlɩn.
16Fʋ nyi amʋ fɛ́ɛ́ tenya ntsu bregyibrɛ.
Lebanon ndum ánɩ́ foswie ɛ.
17Mbubwi bʋtɔlʋ amʋ́ asia wa nyi amʋtɔ.
Ntsusʋ-akpakpa bʋtetsia kwɩan nyitɔ.
18Abrɛ ɔdɩkpa gyi abʋ amʋsʋ,
awɩa bʋteŋain abwi mbɔtɔ.
19Fɔbwɛ ɔtsra ánɩ́ isuna ɩbrɛtɔ,
owi yin brɛá ɔtɔpʋkplɩ wie.
20Fɔbwɛ oklun, igyi onye.
Alɩ brɛ amʋtɔ pututɔ-mbwɩ fɛ́ɛ́ bʋtɛdalɩ nɩ.
21Agyata bʋtokpoun dunka tɔá bɛ́kɩta,
pʋnya atogyihɛ tsu Bulu wa.
22Owi ɩdalɩ a,
bʋteyinki yɔ amʋ́ ɔdɩkpa,
23nyankpʋsa ɛ tɛdalɩ yɔyɔ mʋ agyʋma
alɩɩ yɛfʋn ntʋpwɛsʋ.
24Oo Nana Bulu, fʋ gyumagyihɛ ɩhɩɛ tsɔ o!
Nyansa fɔpʋbwɛ mʋ́ fɛ́ɛ́.
Fʋ atɔ bwɛhɛ labʋla ɔyɩtɔ fɛ́ɛ́.
25Ɔpʋ da a. Ilomoni, ɩlɛtɛɩ.
Mʋ́tɔ mbwɩ ayile mʋ́a akusubi
bʋma ɩklatɔ.
26Ntsusʋ-yibi na mʋ́sʋ, ɩdɛyɔ ɩdɛba.
Fɔbwɛ Leviatan#Hiob 41:1; Isr. 74:14; Yes. 27:1, oteplei mʋ́tɔ.
27Amʋ́ fɛ́ɛ́ bʋkɩ fʋ ansɩtɔá
fɛ́ha amʋ́ atogyihɛ mʋ́ brɛtɔ.
28Fʋtɛsankɩ ɩbɩtɔ,
pʋ atɔ wanklaan sɩsɩ amʋ́,
bʋtɔtɔsɩ gyi mwɛ.
29Nɩ fɛdamli ɔma ha amʋ́ a,
ifu tɛkɩta amʋ́.
Nɩ fepio amʋ́ ɔŋɛ lɛ a,
bʋtowu yinki yɔ ɩsɩtɔ.
30Fʋtɔpʋ fʋ ɔŋɛ sɩsɩ, bʋtɛbɛlɩn.
Fʋtɛla ɔsʋlʋ bwɛ.
31Nana Bulu numnyam itsia brɛ fɛ́ɛ́.
Mʋ ansɩ igyi mʋ gyumagyihɛ fɛ́ɛ́ ɩwɩ.
32Ɔdamli kɩ ɔsʋlʋ a, ɩtɛkpɩnkɩ.
Ɔpʋ ɩbɩ da abʋ a, ogyasi tɛdalɩ tsu mʋ́tɔ!
33Nɔ́wa ɩlʋ ha Nana Bulu mɩ nkpatɔ fɛ́ɛ́.
Nɔ́wa ɩlʋ kanfʋ mɩ Bulu brɛ anfɩ ntsie nkpa anfɩ.
34Mɩ agywɩɩn anfɩ ɩwa mʋ ɔdwɛ,
tsufɛ mʋtɛha ansɩ tegyi mɩ.
35Ha lakpan abwɛpʋ abʋta lɛ ɔsʋlʋsʋ.
Lalahɛ abwɛpʋ bʋmátra tsia!
Mɩ ɔkla, kanfʋ Nana Bulu!
Mlɩkanfʋ Nana Bulu!
Currently Selected:
Israelfɔ Ɩlʋ 104: nko
Highlight
Copy
Compare
Share
Want to have your highlights saved across all your devices? Sign up or sign in
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation
