Mak 1
1
Jọn Mengisaraḅọ ḅe ḍuko Tamụnọ Ḅẹrẹ Mị
(Mat 3.1-12; Luk 3.1-18; Jọn 1.19-28)
1Mịn anị Jizọs Kraịst, Tamụnọ Tọkụ Ḅe gboloma Iḅi Ḅẹrẹ mị-ẹ. 2Ịkịankoro Aịzaya ḅe gịẹịn ḅara ḅụ anị wẹrị sakịmẹ:
“Tamụnọ Ḅe nwọ ḅẹmẹ, ‘Àrị ị̀ya okunwẹngịḅọ ḅe seni ị́ tọrọkọ fịrịmaḅẹ,
ateli mị finji ị́ pịrịḅịa ẹrẹchị.’
3Gbọrịḅọ piri ele mị ḅie olokuaḅẹ,
‘Ateli mị karakarama se Nyanaḅọ Ḅe pịrị;
gbụkụkụ ateli nwọ karakarama Ọ̀ pịrị!’”
4Anị ḅara mị ḅụ, anị Jọn ḅe piri ele mị ḅie tolupakaḅoye-ẹ, ò mengi se tomoni sara se pịkị Tamụnọ ọkwẹịn nwọ kọn simemẹ. Ọ̀ nwọse tomonima ḅẹmẹ, “Ómine ọ́mịna sima ḅụ vinpịkị, se ini mengi se ọ́ sara, se Tamụnọ Ḅe Ori ọ́mịna sima ḅụ ḅarasin ọ́ pịrịḅịa.” 5Tọn-apụ Judia pẹkẹrẹ ḅụ na, Jerusalẹm opuama mị ḅie na, pakamun Jọn ḅe pokimẹ. Ini inia sima ḍukopakụmamẹ, se ò mengi seni ini saramẹ Jọdan tọrụ mị ḅie.
6Ike asụn namaichuka ini nwọse ḍori ḅụchụaye Jọn ḅe ọ̀ nwọ chụamẹ, nama apụra ḅirikunye ọ̀ nwọse ò ḅiri kunmẹ, igurube na ḅẹịn na ọ̀ nwọse fịye mịẹ fịmẹ. 7Ọ̀ nwọ ḍuko tomonima pịrịmẹ, “Ị̀ya ọḅụju ḅoarị ḅọ Ḅe, opu sọ ị̀ nẹngịmẹ. Anị ị̀ gbẹịnkẹ, tu Ọ̀ ḅụọ sime akpaka-ḍikima nwọ finma. 8Mengi mị à se ọ́ sararịye-ẹ, ọkụma Ori Fịafịa Tẹmẹ Ḅe mị Ò se mengi se ọ́ saraḅịaye-ẹ.”
Jizọs Ḅe Mengisara Mị Na Telima Mị Na
(Mat 3.13—4.11; Luk 3.21-22; 4.1-13)
9Ma ḅọlọka simeogbo, Jizọs Ḅe Nazarẹt, Galili pẹkẹrẹ sime ama mị ḅie, pakaḅo se Jọdan tọrụ ḅie, Jọn ḅe mengi se Ọ̀ saramẹ. 10Jizọs Ḅe mengi mị ḅie pakaḅo kirikiri, so mị finji ọkụ Ọ̀ nwọ ọrịmẹ, se Tẹmẹ Ḅe okuku ḅara se koro Ọ̀ damaḅomẹ. 11Se pụkọ soḅie wẹrị ḅo se nwọ ḅẹmẹ, “Ị́rị́ anị ị̀ ḅụ yela Tọkụ Ḅe-ẹ. Àrị iḅiọkụ ị́ ḍikiḅieḅẹlẹmẹ.”
12Anịkirikiri Tẹmẹ Ḅe Ọ̀ mịẹse Ò piri ele mị ḅie mun mẹ, 13anị ḍin-a mesi Ọ̀ nwọse sime se, Oru ḅe Ò telima nyọ mị. Owoi-a nama sọnị anịnyọ ḅụ simemẹ, ọkụma enjẹlapụ ḅo fịrịnwẹngị Ọ̀ pịrịmẹ.
Jizọs Ḅe Inein-a Injiḅaapụ Chịnmẹ
(Mat 4.12-22; Luk 4.14-15; 5.1-11)
14Ini Jọn ḅe seni ikoli ḅie chu so sịkị, Jizọs Ḅe so Galili mun se Tamụnọ Ḅe Iḅi Ḅẹrẹ mị nwọ ḍukomẹ. 15Se Ọ̀ nwọ ḅẹmẹ, “Sịkị mị anị ḅo sam, Tamụnọ Amanyanakiri mị pịkị kpekisam! Ómine ọ́mịna sima ḅụ vinpịkị se Iḅi Ḅẹrẹ mị ḅereni!”
16Jizọs Ḅe Galili tọrụaka mị ḅụ nwẹngịarịogbo, Ọ̀ mama injiḅaapụ ọrịmẹ, Saịmọn ḅe na numbireowu Andru ḅe na, ini ịgbọ se tọrụ mị ḅie inji kun-aḅẹ. 17Jizọs Ḅe nwọse ini ḅẹmẹ, “Ómine ị̀ ḍuko ḅo, se à tomoni inji kun ọkụ se ó ḍieḅịa.” 18Anịkirikiri, ini inia ịgbọma wẹrịso se Ò ḍuko mun mẹ.
19Ò kele pịkị nwẹngị tọrọkọ mun-arịogbo, Ò jịn mama mịnapụ nwọ ọrịmẹ, Jems ḅe na Jọn ḅe na, anị Zẹbidi owuapụ awọma. Ini inia arụ ḅie sime se inia ịgbọma sẹlẹaḅẹ. 20Jizọs Ḅe ini ọrị kirikiri, Ori ini chịnmẹ ini arụ mị ḅie inia ḍa Zẹbidi ḅe na ini ọkọ owuapụma na wẹrịso se Jizọs Ḅe ḍukomẹ.
Sitẹmẹ ḅie sime Owuḅọ
(Luk 4.31-37)
21Jizọs Ḅe na Oria ọḅụḍukoapụma na ḅo Kapanịọm ama mị lamẹ, se Ịnyọsara Ene mị ḅie ḅụ, Jizọs Ḅe tẹkẹwarị mị ḅie mun se sakị yeḍiemẹ. 22Oria yeḍie ḅara mị naa apụma anị inia ḅụgbiripumamẹ, anịatịḅị Oloko ḍieapụma simeọkụ Ọ̀ nwọ simekẹ; anịnakaraka, kụrọ nyanaḅọ ḅara Ọ̀ nwọse yeḍiemẹ.
23Anị gbọrị sịkị mị ḅụ, sitẹmẹ ḅie ḅụ sime gbọrị owuḅọ tẹkẹwarị mị ḅie sọ ḅo, se olokumẹ, 24“Che mịẹgboloma wa ị́rị́ na nwọ nyana Jizọs Nazarẹt ḅọ? Ị́ ḅo mịnyọ wa fama-ẹ ḅo? Àrị ị́ nemimẹ—ị́rị́ anị Tamụnọ Fịafịa Okunwẹngịḅọ Ḅe-ẹ!”
25Jizọs Ḅe sitẹmẹ ḅe ḍiki ịganịmẹ, “ị́ ḅịpị gbẹịn, se tomoniḅọ ḅe ḅie pakaḅo!”
26Sitẹmẹ ḅe kụrọma tomoniḅọ ḅe jike se gelema olokumẹ, se ò ḅie pakaḅomẹ. 27Anị tomonima ḅụgbiripuma so ọkụma, ini sakị nwọse jịnḅọ jịnḅọ ḅẹmẹ, “Mịn ḅọrọ cheye? Mịn ịwọ yeḍie ḅara mụnọ? Ḅe tomoniḅọ ḅe Ọ̀ kụrọ nyanamẹ ḅẹrẹtọn sitẹmẹma pịrị, se àrị Ọ̀ ḅịpị pokimẹ!”
28Mịn mị gose, Jizọs Ḅe ḅụ ḅẹrẹ mị, wasama Galili pẹkẹrẹ mị ḅie nyọ layelaye nwọ kelemamẹ.
Jizọs Ḅe Tọn-a Apụ Gwọmẹ
(Mat 8.14-17; Luk 4.38-41)
29Jizọs Ḅe na Oria ọḅụḍukoapụma na pịkị Jems ḅe na Jọn ḅe na tẹkẹwarị mị wẹrịso se dada Saịmọn ḅe na Andru ḅe na warị nwọ mun mẹ. 30Saịmọn ḅe fuarọma, árị ọfịrị se mọnọye ọgọnọ ḅọlọlọ sime waraḅẹ, se Jizọs Ḅe anịnyọ la kirikiri ini á gbolomaye nwọ ḍuko Ọ̀ pịrịmẹ. 31Ori á damamun se á ḅara ḅụ árị ọlọmẹ, se á dekichịẹmamẹ. Ọfịrị mị á wẹrịso se á fịrịnwẹngị ini pịrịmẹ.
32Ịrụa mị sọ se saso ḅiri ḅụ tomoni obiapụ na sitẹmẹ ḅie sime apụ na nwọ ọkịḅo Jizọs Ḅe pịrịmẹ. 33Se ama mị ḅie sime tomoni mamgba ḅo warị mị tọrọkọ koḅirimamẹ. 34Jizọs Ḅe obi tọrụkịrịkịrị kọn apụ mamgba nwọ gwọ se sitẹmẹ ḅie sime apụma ḅie sitẹmẹma desinmẹ. Ò ḅerenikẹ sitẹmẹma gbọrị ọkwẹịn sọnị kọn, anịatịḅị àrị Ò nemimẹ.
Jizọs Ḅe Galili ḅie Tamụnọ Ḅẹrẹ Ḍukomẹ
(Luk 4.42-44)
35Anị ḍukoma ene mị ḅe dede funfun ḅie, enema ḅa soka simeogbo, Jizọs Ḅe sịsẹ seni warị mị koroma pakamẹ. Ori ama mị ḅie pakaso gbọịn nyọ nwọ mun mẹ, se anịnyọ sime tẹkẹmẹ. 36Ọkụma Saịmọn ḅe na ori na nwẹngịapụma na paka mun Ọ̀ ḍọkịmẹ, 37ini Ọ̀ ḍọkị se Ori ọrị sịkị, ini nwọ ḅẹmẹ, “Nweni mamgba Ị́ ḍọkịaḅẹ.”
38Ọkụma, Jizọs Ḅe pẹkẹrẹmẹ, “Wa pa nwẹngịmamun mịnyọ sime ísí ịwọamama laḅịa. À pịkị arịa ḅie sọnị Tamụnọ ḅẹrẹ mị ḍukoḅịa, anịatịḅị anị mị à gose ḅoye-ẹ.”
39Anịẹrẹchị Ọ̀ nwẹngị Galili mị mgba nwọ kelemamẹ se, inia tẹkẹwarịma ḅie Tamụnọ ḅẹrẹ mị ḍuko, pịkị si-a-tẹmẹma desinmẹ.
Jizọs Ḅe Ḅụkan obi Kọnḅọ Gwọmẹ
(Mat 8.1-4; Luk 5.12-16)
40Gbọrị ene ḅụkan obi kọn gbọrịḅọ Jizọs Ḅe damaḅo, kpẹrẹkị koro se Ọ̀ ḅara ḅarachụa nwọ ḅimẹ. Ọ̀ nwọse Jizọs Ḅe ḅẹmẹ, “Ị́ ḅimẹ ḅẹḅẹ Ị́ ineda ị̀ mịẹfịafịamaḅịa.”
41Ḍikitịḅịfoin Jizọs Ḅe ḅie ḅeinmẹ, se ori Ọ̀ ḅara ịsụn ọ̀ lamamẹ. Se nwọse ọ̀ ḅẹmẹ, “À kọkọma ḅimẹ, ye ị́ fịafịa!” 42Anịkirikiri, ḅụkan obi mị tomoniḅọ ḅe koromaso se ọ̀ fịafịamẹ. 43Anịeso, Jizọs Ḅe kụrọma ọkwẹịn ọ̀ pịrị se, anịkirikiri ọ̀ ḅẹ se ò somẹ, 44“Ọrị na, mịn mị ị́ ḍuko gbọrịḅọ sọnị pịrịkẹ Ọ̀ nwọse ọ̀ ḅẹmẹ. Ọkụma, dada agbamịẹḅọ ḅe damamun se ori ị́ ḍiki anịsịkị Moziz ḅe tọnkoroma agba mị nwọ mịẹ, se ḍiepakụma ḅẹḅọ ḅẹḅọ nwọ pịrị na mịọkụ ị́ fịafịasam.”
45Ọkụma, tomoniḅọ ḅe ọ̀ nwẹngị somẹ, se sakị nyọ mamgba ḅụ ḅẹrẹ mị nwọ ḍuko wasamamẹ. Kọkọmaye-ẹ, ori anị ḍuko so ọkụma Jizọs Ḅe Ọ̀ ḅarị ineda ḅụpakụma gbọrị ama ḅie sọnị sọ munkẹ. Anịnakaraka, Ò so mun gbọịn-a nyọma ḅụ simemẹ, se tomoni nyọ layelaye ḅụ Ọ̀ damaḅomẹ.
Currently Selected:
Mak 1: OBTP
Highlight
Copy
Compare
Share
Want to have your highlights saved across all your devices? Sign up or sign in
The Bible Society of Nigeria
