Pakaso 35
35
Ịnyọsara Ene Oloko Ma
1Moziz ḅe ori Izrẹlapụ mamgba chịn koḅirima se nwọse ini ḅẹmẹ, “Mị anị Nyanaḅọ Ḅe tọn ọ́ pịrị se ọ́ mịẹḅịaye-ẹ: 2Sonio-a ḍin mị ó se ọ́mịna fịrịnwẹngịḅịaye-ẹ, ọkụma sọnọma ḍin karama ene mị, anị osiḅụ sime, ịnyọsara ḅụ sime ị̀ pịrị ene-ẹ, Ị̀rị̀, Nyanaḅọ Ḅe. Anị ene ḅie fịrịnwẹngịḅọ goyegoye ini nụḅọ ḅaaḅịa. 3Ịnyọsara ene mị ḅie fịnị kẹngẹ sọnị ọ́mịna warịma ḅie ọ́ tọnọ ma.”
Osiḅụ Sime Ikowarị Mị Anịa Ḍiepịrịaye
(Pak 25.1-9)
4Moziz ḅe nwọse Izrẹlapụ mamgba ḅẹmẹ, “Mịn mị anị Nyanaḅọ Ḅe tọnsaye-ẹ: 5Ó ḍiepịrịaye se Nyanaḅọ Ḅe pịrịḅịa. Ọkọsimeye mịẹ ḍọkịḅọ goyegoye nụḅọ goli na seleḅa na anịkanịka alapẹlẹka ḍiepịrịaye nwọse ḅo; 6iḅi lọkọ ḅịtẹ; bulu tọrụ nyanaye, awụwụ tọrụ nyanaye na, pịkị pulo-pulo wulu na; oḅori ichuka se mịẹ ḅịtẹ; 7ajirima apụra, ini pulo-puloye se bileye; iḅi nama oju apụra, ọjị chịn; 8tọnjie pulo; seni tịḅị saraḅịa osi nyana pulo mịẹḅịa ye kụnụmaye na, pịkị se iḅi insẹnsị mịẹḅịa aye na; 9ifọd ḅirimaye na pịkị pu yela ḍụparị na, anị se Gele Agbamịẹḅọ ḅe oria ifọd ḅụ na ekpe gbẹịnye mị ḅụ chụaḅịa ayema.
Nyanaḅọ Ḅe Pakaḅoḅo Ikowarị Mị Ḅirimaḅịa Aye Ma
(Pak 39.32-43)
10“Ọ́mịna ḅie sime ḅarafịrịnwẹngị ḍin apụ mamgba ini ḅo Nyanaḅọ Ḅe tọn fịrị goyegoye nwọ nwẹngịḅịa: 11Ikowarị mị, ọḅụ-na-kuḅu-na ḅụ se anị gbẹịnḅịa ayema na yesụkarịye ma na, anịa chịnma na, mgbẹsẹ ḅọrọ ikulele ma na, anịa ogbochịnma na pịkị chuku sẹkẹ ayema na; 12Ọḅọkụ Igbe mị na anịa chịnma na, ḅịpịgbẹịnye mị na, pịkị seni anị kikimaḅịa ḅịtẹ mị na, 13dẹbụl mị na anịa chịnma na, pịkị anịa fịrịnwẹngị aye mamgba na, ḍiepịrịye agbamịẹ Tamụnọ pịrị fịturu mị na; 14tọnjie gbanaye mị na; tọnjie ma na arịa pulo na; 15insẹnsị dọkịma dọkịmaḅịa ẹbẹ mị na anịa chịnma na, osi nyana pulo mị na; iḅi insẹnsị mị na; Ikowarị ḅọkọ kikima ḅịtẹ mị na; 16agbamịẹ aye dọkịma dọkịmaḅịa ẹbẹ mị na anị gbori kelema alapẹlẹka gbasa ma na anịa chịnma na, pịkị anịa fịrịnwẹngị aye mamgba na, ḅụ-sịkịrị-mengi-chụaye mị na pịkị anịa chuku sẹkẹye mị na; 17ḅọkọ gbẹịn-kelema ḅịtẹ mị na; anịa chịnma na pịkị chuku sẹkẹye ma na, ḅọrọ nyọ mị gbẹịn kelema ḅịtẹ mị na; 18Ikowarị mị na anịa ḅọkọ mị na ḅe ikiḅa-chịn ma na ḍiki ma na; 19pịkị agbamịẹapụma Fịafịa Nyọ mị ḅie fịrịnwẹngị-nwẹngịḅịa sịkị chụachụaḅịa iḅi ḅụchụayema na—Erọn agbamịẹḅọ ḅe, oria osi nyana ḅụchụaye na pịkị oria owuapụ awọma ḅụchụayema na.”
Tomoni Ma Inia Ḍiepịrịaye Ma Se Ḅomẹ
20Izrẹlapụ mamgba ini somẹ, 21ye mị mịẹ ḅụḅẹlẹḅọ goyegoye ḍiepịrịaye se ḅomẹ, se Nyanaḅọ Ḅe pakaḅoḅo Ikowarị mị namaḅịaye gose. Se tẹkẹ ḅụ fịrịnwẹngị gbẹịnye goyegoye na pịkị agbamịẹapụ ḅụchụaye gbẹịnḅịaye ma na ini nwọ ọkịḅomẹ. 22Nweni mamgba, ama na ere na, ye mị ḅụḅẹlẹḅọ goyegoye yeḅirima aye ḅụ, pini, gulu, iringi, pụkọchụaye, na goli ḅiriaye-kịrịkịrị na pịkị jịn-a yela ḍụparị na ọkịḅo se, àrị se osiḅụ wẹrị Nyanaḅọ Ḅe pịrịmẹ. 23Iḅi lọkọ-ḅịtẹ, bulu bulu tọrụ, awụwụ tọrụ, anịkanịka pulo-pulo wulu; oḅori ichuka-ḅịtẹ, ajirima-oju-apụra ini pulo-puloye se bileye, pịkị iḅi nama oju apụra nyanaḅọ goyegoye ọkịḅomẹ. 24Seleḅa anịkanịka alapẹlẹka nyana apụ mamgba àrị ọkịḅo ḍie Nyanaḅọ Ḅe pịrịmẹ, fịrị ḅụ sọḅịa ọjị chịn nyana apụ mamgba sọ ini se ḅomẹ. 25Yeḍori ḍin eremeni mamgba ini iḅi lọkọ-sịnịnị-sịnịnị iri na bulu bulu iri na, awụwụ tọrụ nyanaye pịkị pulo-pulo tọrụ nyana wulu ma nwọse ḅomẹ, anị ini ngẹrị ḍoriaye-ẹ. 26Ini pịkị oḅori ichuka se iri mịẹmẹ. 27Tịḅịnị ma ifọd ḅirimaye na pu yela ḍụparị na ini nwọse ḅomẹ, anị se ifọd mị na ekpe gbẹịnye mị na ḅụ chụaḅịaye ma 28kụnụ aye na, tọnjie pulo na tịḅịsara-pulo mịẹ aye na pịkị iḅi insẹnsị mịẹḅịaye na ini pịkị nwọse ḅomẹ. 29Nyanaḅọ Ḅe ọ̀ tọn Moziz ḅe pịrị na nwẹngị-ẹ nwọḅẹ fịrị mị gose, Izrẹlapụ mamgba ini ḍiepịrịaye ọkịḅo ḍie Nyanaḅọ Ḅe pịrịmẹ.
Nyanaḅọ Ḅe Pakaḅoḅo Ikowarị Mị Ḅe Fịrịnwẹngịḅịa Apụ
(Pak 31.1-11)
30Moziz ḅe nwọse Izrẹlapụma ḅẹmẹ, “Nyanaḅọ Ḅe, Juda sẹ ḅie Họ ḅe yi Uraị ya Bẹzalẹl ḅe ọ̀ nwọ sẹlẹọkịsam. 31Tamụnọ Ḅe oria kụrọ ọ̀ nwọse ọ̀ ḅie ḅeinmasam, fịrịnwẹngị kpaịnma na, ịnyọ na, pịkị ḅara fịrị kịrịkịrị nwẹngị na yekaịnḅo na, 32kpaịnma yeḍiki se tọn, pịkị goli na, seleḅa na, alapẹlẹka na; 33yela ḍụparị woli woli se ọrụrụ ḅụ fịrịnwẹngị na, chịn-kara-aka na pịkị jịn-a ḅara fịrị kịrịkịrị ye nwẹngị ḍin ọ̀ nwọse ọ̀ pịrịsam. 34Nyanaḅọ Ḅe nwọse ori na Danị sẹ mị ḅie Ahisamak ya Ọholiab ḅe na nwọ ḅẹmẹ na, inia ḅara fịrịnwẹngị ḍin mị ini pịkị se jịn apụ telima. 35Yekara ḍin fịrị, yekẹịn ḍin fịrị, yeḅụ ọḍọ-chụa-fịrị, gẹnịgẹnị aye lọkọ-ḅịtẹ ḅụ nwọ ḍori; bulu bulu aye na awụwụ tọrụ aye na pulo-pulo wulu pịkị jịn-a ḅịtẹ na. Ini ineda fịrị goyegoye nwẹngịḅịa, ini pịkị kpaịn fịrịnwẹngị ḍinmẹ.
Currently Selected:
Pakaso 35: OBTP
Highlight
Copy
Compare
Share
Want to have your highlights saved across all your devices? Sign up or sign in
The Bible Society of Nigeria
