Pakaso 34
34
Maịn Karama Oloko Ḍụparị Ma
(Maịn 10.1-5)
1Nyanaḅọ Ḅe nwọse Moziz ḅe ḅẹmẹ, “Tatarị ḍụparị pẹkẹrẹ ma sime ọkụ sime mama ḍụparị nwọ pu pakụmaḅo, se tatarị ḍụparị pẹkẹrẹ ma ḅụ sime ọkwẹịn ma, arịa ọgọnọ à nwọ gịẹịnḅịa anị ị́ ḅaa ayema. 2Eneḅa dede ḅie, ḅụkarakarama iwo ḅo ị̀rị̀ na ịrịa Saịnaị Tụndụ mị ọgọnọju ḅụ. 3Gbọrịḅọ sọnị ị́rị́na iwo ẹkẹ; tụndụ mị na kpeki nyọ ḅụ gbọrịḅọ sọnị ḅụkpekima ma, anana sọnị anịkanịka nambulo sọnị tụndụ mị chuku osuein fị ma.” 4Anịẹrẹchị Moziz ḅe, ọ̀ jịn mama ḍụparị pẹkẹrẹ nwọ pumẹ, se anịḅe ene ḅa dede ḅie ori àrị deki Saịnaị Tụndụ mị tanjị iwomẹ, Nyanaḅọ Ḅe tọnsa ḅaraḅụ.
5Nyanaḅọ Ḅe soḅuno ḅie ò koroḅomẹ, ori orina anịnyọ chịẹmẹ, se ori oria fịafịa ẹrẹ mị go pakụmamẹ, Nyanaḅọ. 6Nyanaḅọ Ḅe anịeso ọ̀ tọrọkọ ḅọrọ se ọkwẹịn pakụma se nwọ ḅẹmẹ, “Ị̀rị̀, Nyanaḅọ Ḅe, anị ḍikitịḅịfoin na, ḍikiḅụgerere na ḅie ḅụ ḅein, sarasarama ịganị-ịganịka, opu ḅẹlẹma nyana pịkị kuḅie-se-ḅụgbana gbẹịn Tamụnọ-ẹ. 7À ḅereniye mị, à mịẹ ḅụọ-a mẹndẹ oyiasi fịnjị fịnjị nwọ pịrịpịrịmẹ, à pịkị simịẹmịẹaye na mịẹirima aye na nwọ wẹrịsosomẹ; ọkụma ḍapụ na nyengiapụ na mịẹasi gose, à fomuḅara se inia awọ na, inia awọ yi awọ na pịrị mun tẹrẹ-a ḅụọ na inein-a ḅụọ na lalamẹ.”
8Moziz ḅe kirikiri, ò tu ọ̀ fụḅara se kiri lama se tẹkẹmẹ. 9Ọ̀ nwọ ḅẹmẹ, “Nyanaḅọ, ị̀ya mịẹmịẹye kọkọma ị́rị́na deinmẹ ḅẹḅẹ àrị ị́ tẹkẹ aḅẹ na, mine na mun. Mịna apụma tịḅịḅie kụrọ apụ-ẹ, ọkụma wa mịẹasi ma na mịẹirima ma na ḅụ ḅarasin wa pịrị se ị́ya tomoni ḅara nwọse wa ọkị.”
Ini Pịkịna Ọḅọkụ Mị Mịẹ Ịwọmamẹ
(Pak 23.14-19; Maịn 7.1-5; 16.1-17)
10Nyanaḅọ Ḅe nwọse Moziz ḅe ḅẹmẹ, “À mịọkụ Izrẹlapụma na ọḅọkụ fịaḅẹ. Jenejene sẹkiri ḅie sime sẹma ḅie ma mịẹka opuye inia tọrụkuḅu mịọkụ à nwọ mịẹḅịa. Tomoni mamgba ineda Ị̀rị̀ Nyanaḅọ Ḅe mịẹḅịa opuye mị ọrịḅịa, anịatịḅị à mun ḅalafamaye mịẹ ọ́ pịrị-ẹmun-aḅẹ. 11À se mịmgba ọ́ pịrịarị olokoma ọ́ nwọ koko. Amọraị apụma na, Kenan apụma na, Hitaị apụma na, Pẹrizaị apụma na, Hivaị apụma na, pịkị Jebus apụma na àrị ini desinḅịa ọ́ sọmun-arị sịkị. 12Ọ́ sọmun-arị sẹma ḅie apụma, ómine inina ḅịpịse-ogbosọ ḍiri gịẹịn ma, anịatịḅị mịn mị anị ineda ómine famaḅịa ḍẹịn sọ ọ́ pịrịḅịa. 13Anịnakaraka inia oru-agbamịẹ ẹbẹ ma, ọ́ kansin, ini pike chịẹma oru-a chịnma, ó sumagbin kọsịma, ini tẹmẹ, inia eremeni oru Ashera lụgụ mị ó gbogbo kọsịma.
14“Ngịsị ó jịn-a oru tẹkẹma, anịatịḅị Ị̀rị̀ Nyanaḅọ Ḅe ḅụse ị̀ otoma mị ị̀ ḅụḅẹlẹḅẹlẹkẹ. 15Sẹ mị nyana apụma ómine inina ḅịpịse-ogbosọ ḍiri gịẹịn ma, anịatịḅị ini inia oru ma tẹkẹ pịkị agbamịẹ àrị pịrịḅịa sịkị, ini ómine chịnḅịa na ó ḅo inia ḅụ sọ, anị ḅụ ini se agbamịẹ inia oru ma pịrị fịaye fị telima ḅụ ó mun sọḅịa. 16Ọ́mịna owuapụ awọma sosi ini jịn sẹ eremeni ma na simeḅịa, ini ini dairima se ini ḅarị ị̀ ḅụ ḅereni nyana ẹkẹ, se ini inia oru ma tẹkẹḅịa.
17“Ómine ikulele se oru tẹmẹ ma, pịkị anị tẹkẹma.
18“Suka Fịturu Alalị mị ómine anị fị gbaso. À tọn ọ́ pịrịsa ḅaraḅụ, Abib akalụ mị ḅie sọnọma ḍin ọ́ nwọse suka fịturu alalị mị fịfị, anịatịḅị anị akalụ mị ḅie mị ómine Ijipt mị wẹrịsoye-ẹ.
19“Tatarị yi owutọkụ goyegoye na pịkị na tomoni na anga, pịkị se fịrịnwẹngịarị nama tatarị yi owoi goyegoye sime ị̀ pịrịmẹ, 20ọkụma yepụra asụn ḅụ tatarị yi wu goyegoye ọ́ fẹ ọkịḅịa; ayamburama anana ọ́ nwọse ḍiepịrịye agbamịẹ ḅaraḅụ ọ̀ tịḅị ḍinmaḅịa. Ómine ọ̀ fẹ ọkịkẹ ḅẹḅẹ, ọ̀ kọngọ mị nwọ anyịma. Tatarị yi owutọkụ goyegoye ọ́ fẹ ọkị.
“Ḍiepịrịaye nyanakaḅọ ị̀ tọrọkọ ḅụ pakaḅoma.
21“Ó se ọ́mịna fịrịnwẹngịḅịa sonio-a ḍin ọ́ nwọ nyanamẹ, ọkụma sọnọma ḍin karama ene mị ọ́ fịrịnwẹngị ma, ḅọrọ ozu ḍipi-o anịkanịka fịaye soku sịkị ḅụ sọnị.
22“Fịaye Soku sịkị Alalị mị ọ́ fịfị, ọ́mịna fịturu mịẹ ịpịamgba ma ḅụ tatarị ayema ọ́ nwọ pẹlẹ sịkị goyegoye, ọ́ pịkị Oguruguru se Tịḅị Kikima Alalị mị sọnị fịfị, ịrụakpoin ḅiri ómine ọ́mịna fịayema kpokponimarị sịkị ḅụ.
23“Gbọrị kụra ḅie tẹrẹ-a sịkị tẹrẹ-a sịkị ọ́ nwọse ḅo ị̀ tẹkẹtẹkẹḅịa, Nyanaḅọ Izrẹl Tamụnọ Ḅe. 24Àrị ọ́mịna tọrọkọ ḅụ sẹma desin se pịkị ọ́mịna eke mị finjimasosa ḅẹḅẹ, gbọrị sẹ sọnị ineda ọmụ ḅie ómine inuma ẹkẹ ma tẹrẹ-a alalị ma sịkị ḅụ.
25“Fịturu sumaye sọ fịturu, ọ́ nama se agbamịẹ ị̀ pịrịḅịa sịkị ọ́ nwọse chụa ma. Saḅaḅọrọ Alalị ḅie ọ́ ḅaasa nama ḅụ pẹkẹrẹ sọnị ó se koroma mun jịn eneḅa-dede la ma.
26“Kụra goyegoye ọ́ tatarị pẹlẹ ịpịamgba ma ó seni Nyanaḅọ Ḅe warị ḅo.
“Nyengiwu kuḅu ndo ndo àrị anana tọkụ anịkanịka oḅori tọkụ ọ́ chụọ pẹịma.”
27Nyanaḅọ Ḅe nwọse Moziz ḅe ḅẹmẹ, “Ma ọkwẹịn ma gịẹịn koroma, anịatịḅị ma ọkwẹịn ma ḅụ mị àrị ị́rị́na pịkị Izrẹl mị na ọḅọkụ mị fịarịye-ẹ.” 28Moziz ḅe, ọ̀ Nyanaḅọ Ḅe na anịju sime mun enekaka mesi na ḍin-a mesi na lamẹ, gbọrịye sọnị ọ̀ fịkẹ, ọ̀ pịkị gbọrịye sọnị ḅukẹ. Ḍụparị pẹkẹrẹ ma ọgọnọ ọḅọkụ mị ọkwẹịn ma ọ̀ nwọ gịẹịn mẹ—Oyi Olokoma.
Moziz Ḅe Saịnaị Tụndụ Ọgọnọ Ò Koroḅomẹ
29Moziz ḅe, ori Oyi Olokoma deki se Saịnaị Tụndụ ọgọnọ koroḅo sịkị, ọ̀ tọrụ ḅịamẹ anịatịḅị ọ̀ Nyanaḅọ Ḅe na ọkwẹịn simemẹ, ọkụma ọkọsimeye ọ̀ ḅụ mịẹọkụ ò nemikẹ. 30Erọn ḅe na ísíapụ mamgba na, ini Moziz ḅe ḍiki se ọrịmẹ na ọ̀ tọrụ ḅịamẹ, anịgose ò kpekima mị inia ḅalafamẹ. 31Ọkụma Moziz ḅe ori ini chịnmẹ, Erọn ḅe na tomonima inia tịḅịnịma na ini ọ̀ damamunmẹ, se Moziz ḅe ori ọkwẹịn ini pịrịmẹ. 32Anịeso, Izrẹlapụ mamgba ini ò gbori kelemamẹ, se Saịnaị Tụndụ mị ọgọnọ Nyanaḅọ Ḅe se ọ̀ pịrị oloko mamgba ọ̀ nwọse ini pịrịmẹ. 33Moziz ḅe, ori ọkwẹịn ini pịrịso sịkị, ọ̀ ḅịtẹ se ọ̀ tọrụ gbẹịnmẹ. 34Moziz ḅe, Nyanaḅọ Ḅe pakaḅoḅo Ikowarị mị ḅie ọ̀ nwọ sọmun ọkwẹịn Nyanaḅọ Ḅe pịrị sịkị pịrị sịkị ḅịtẹ mị ò sinsinmẹ. Ọ̀ pakaḅo sịkị Nyanaḅọ Ḅe tọn ọ̀ pịrị na ò ḍuko Izrẹlapụma pịrị nwọḅẹ aye mamgba ọ̀ nwọ ḍuko ini pịrịḅịa, 35ọ̀ tọrụ mị ḅịarị ọkụ ini ọrị aḅẹ. Anịsịkị ọ̀ pịkị ḅịtẹ mị se ọ̀ tọrụ gbẹịnḅịa, ọkịmun ò mun ọkwẹịn Nyanaḅọ Ḅe pịrịḅịa sịkị laḅịa.
Currently Selected:
Pakaso 34: OBTP
Highlight
Copy
Compare
Share
Want to have your highlights saved across all your devices? Sign up or sign in
The Bible Society of Nigeria
