Pakaso 36

1“Bẹzalẹl ḅe na Ọholiab ḅe na pịkị ísí fịrịnwẹngịapụ mamgba na Nyanaḅọ Ḅe, yemịẹ kpaịnma na yekaịnḅo na se pịrị apụma, osiḅụ-sime Ikowarị mị namaḅịa ọkụ goyegoye nwọse anị namaḅịa, Nyanaḅọ Ḅe tọn sa ḅaraḅụ.”

Tomoni Ma Tọn-a Ḍiepịrịaye Se Ḅomẹ

2Moziz ḅe ọ̀ Bẹzalẹl ḅe na Ọholiab ḅe na, pịkị Nyanaḅọ Ḅe ịnyọ na fịrịnwẹngị kpaịnma ḍin apụma na pịkị ḅarachụa fịrị mị pịrị ḍọkịarị apụ mamgba na chịnmẹ ini fịrị sakị. 3Ini ọ̀ ḅara Izrẹlapụma ọkịḅo osiḅụ-sime-Ikowarị mị namaḅịa ḍiepịrịaye mamgba nwọ ọkịmẹ. Ọkụma tomonima dede goyegoye, ini pa ḍiepịrịaye ọkịkịḅo Moziz ḅe pịrịaḅẹ. 4Anị fịrịnwẹngịapụma mun 5ḍuko Moziz ḅe pịrịye-ẹ na, “Tomonima, ini se ḅoarịaye ma, àrị ḅakatẹịn Nyanaḅọ Ḅe tọn fịrị mị nẹngịsam.”

6Anịẹrẹchị Moziz ḅe ọ̀ tọn Izrẹlapụ mamgba pịrịmẹ na ini ḅarị osiḅụ-sime-Ikowarị mị gose jịn aye se ḅoma. 7Ini se ḅosa ayema, seni fịrị mị nwẹngị karama iḅiḅịa.

Nyanaḅọ Ḅe Pakaḅoḅo Ikowarị Mị Nama Mị

(Pak 26.1-37)

8Fịrịnwẹngịapụ ma ḅie fịrịnwẹngịtẹịn apụma, Nyanaḅọ Ḅe pakaḅoḅo Ikowarị mị namamẹ. Ini ḍori bulu bulu tọrụ nyana lọkọ-ḅịtẹ oyi-a warị na, awụwụ tọrụ nyanaye na pulo-pulo wulu na pịkị ini iḅi ḅara se ḍori enjẹlapụ na ini nwọ seni anị ḅirimamẹ. 9Ḅịtẹ warịma gbasịmẹ, ịsụn mị sọnọma kuḅu-ẹ, anịsịkị finji mị gbọrị kuḅu-ẹ. 10Arịa ḅụ sọnọ ini nwọ gbin gboloma gbọrịḅụ wẹrịmẹ, anịgbọrị ḅara ini pịkị nwọse ísí sọnọ ma mịẹmẹ. 11Nụngọ da ḅịtẹ-a warịma, ḅụ bulu bulu ḅịtẹ ini nwọse gbọrị kpo gbọrị kpo ḅụ ḍiki tolumaḅịa pokolo, aka ma ḅụ nwọ mịẹmẹ. 12Tatarị ḅịtẹ warị mị ḅụ tatarị ọrụ mị, pokolo-a mesi oyi fịnjị ini nwọ mịẹ mun kuluma ḅịtẹ warị mị ḅụ maịn karama ọrụ mị ḅụ chumẹ. 13Goli goli yesụkaye mesi oyi fịnjị ini nwọ mịẹmẹ, mịẹsosịkị mama ọrụ ma ḅo gbọrịḅụ simeḅịa ọkụ.

14Anịsịkị oḅori ichuka se mịẹ ḅịtẹ, oyi gbọrị warị fịnjị ini nwọ mịẹmẹ, se Ikowarị mị gbẹịn gose. 15Arịmgba ini mịẹ gbasịmamẹ, ịsụn mị sọnọma kuḅu na pẹkẹrẹ, anịsịkị finji mị gbọrị kuḅu. 16Ini arịa ḅụ sọnọ gbin gboloma gbọrị ọrụ mịẹmẹ, se ísí sonio ma pịkị gbọrị ọrụ-ẹ. 17Pokolo-a mesi oyi fịnjị, kuluma ḅịtẹ warị aka mị ḅụ gbọrị ọrụ ini nwọ mịẹmẹ, ísí ọrụ aka mị ḅụ pịkị pokolo-a mesi oyi fịnjị-ẹ. 18Alapẹlẹka ini nwọse yesụkaye ḅụ mesi oyi fịnjị mịẹmẹ, se mama ọrụ ma gboloma gose. 19Ini pịkị jịn mama yegbẹịn aye mịẹmẹ, gbọrịye ajirima ojuapụra, pulo-puloye ini nwọse anị bilemẹ, ísí ye mị se ọgọnọju gbẹịnḅịa iḅi nama oju apụra ini nwọse anị mịẹmẹ.

20Ọjị chịn ḅụ gbụsụnụ aye ini nwọse Ikowarị ḅọkọ chịnma mịẹmẹ. 21Ḅọkọ chịnma arịa gele, gbọrịye jie-a ḅụọ jie-a ḅụọ-ẹ, anịsịkị finji mị gbọrịye mama ḅụọ na kala pẹkẹrẹ pẹkẹrẹ na-ẹ, 22ḅọkọ-a chịnma ọlọgbolomaḅịa mamaye ini nwọ mịẹ arịa ḅụ chumẹ. Ḅọkọ-a chịn mamgba jịnye jịnye na doniaye arịa ḅụ omi-ẹ. 23Chuku ọrụ da anga mị si ḅọkọ-a chịn ini nwọ mịẹmẹ 24ini pịkị seleḅa seni arịa chuku sẹkẹ ayema ḅụ mesi nwọ mịẹmẹ, gbọrị chịn chuku mama chuku sẹkẹ aye, mama chuku sẹkẹ aye, anị se mama doniaye ma ọlọgboloma gose-ẹ. 25Ikowarị mị ḅụ ọgọnọ daọrụ ḅụ, si-a ḅọkọ chịn ini nwọ mịẹmẹ 26seleḅa ini pịkị nwọse chuku sẹkẹ aye ḅụ mesi nwọ mịẹmẹ, mama chuku sẹkẹ aye gbọrị chịn chuku, gbọrị chịn chuku ḅie. 27Ikowarị mị ọḅụju, ịrụasọsọ nyọ daọrụ ḅụ sonio-a ḅọkọ-a chịn ini nwọ chụamẹ 28ịkọlị ma ḅụ mamaye ini pịkị nwọ chụamẹ. 29Ma ịkọlị ma ḅụ sime ḅọkọ-a chịnma, chuku ḅụ mị ini àrị chịrọmaye-ẹ ọkịmun ọgọnọju lamẹ. Mama ḅọkọ-a chịnma ḅụ mama ịkọlị ma mịẹaye ma, anị gbọrị ḅara mị ini se àrị mịẹye-ẹ. 30Anịọkụma nine-a ḅọkọ-a chịn na, seleḅa se mịẹ chuku sẹkẹ aye inein fasi anịa ḅụ omi-ẹ, gbọrị chịn chuku mama chuku sẹkẹ aye, mama chuku sẹkẹ aye-ẹ.

31Ọjị chịn ḅụ jie ini nwọse mgbẹsẹ-a chịn mịẹmẹ, sọnọ aye Ikowarị mị ḅụ gbọrị pẹkẹrẹ ḅọkọ-a chịnma ḅụ omi-ẹ, 32sọnọ pịkị ísí pẹkẹrẹ ḅọkọ-a chịnma ḅụ omi-ẹ, jịn sọnọ pịkị ọḅụju ịrụasọsọ nyọ daọrụ ḅụ ḅọkọ-a chịnma ḅụ omi-ẹ. 33Ogboku mgbẹsẹ-a chịnma, ḅọkọ-a chịnma ọgọnọ ḅụ ogboku ini àrị sara mun Ikowarị mị ḅụ gbọrị ịkọlị ḅụ ọkịmun ísí ịkọlị lamẹ. 34Ḅọkọ-a chịnma goli ini nwọse àrị oḅolomẹ, ini pịkị goli se kelekele aye mịẹ arịaḅụ chụamẹ, anị arịa ḅie tolumaḅịa mgbẹsẹ-a chịnma ọlọchịẹmaḅịaye ma sọnị goli ini nwọse àrị oḅolomẹ.

35Bulu bulu na, awụwụ tọrụ na pulo-pulo wulu se ḍori iḅi lọkọ ḅịtẹ ini nwọse nyọ kikimaye mịẹmẹ, anịaḅụ ini enjẹlapụ ḍori chụamẹ. 36Ini goli se oḅolo ọjị chịn inein ini nwọse ogbochịn mịẹ se nyọ kikima ḅịtẹ mị ọlọchịẹmamẹ, yesụkaye, goli se mịẹ aye ini nwọse anịaḅụ chụamẹ. Seleḅa se mịẹ chuku sẹkẹ aye ini nwọ mịẹ ogbochịnma chuku sẹkẹmẹ. 37Ḅọrọ Ikowarị mị ḅie sọ ḅọkọ-kikima-ḅịtẹ mị, bulu bulu na awụwụ na pịkị pulo-pulo wulu na se ḍori ḅirima lọkọ ḅịtẹ ini nwọse anị mịẹmẹ. 38Mị nyọkikima-ḅịtẹ mị sọnọ-a ogbochịn ini nwọ mịẹ anị pịrịmẹ, yesụkaye arịa ḅụ omi-ẹ, arịa tịḅị ma na ikulele ma na goli ini nwọse oḅolomẹ, ini pịkị sọnọ alapẹlẹka chuku sẹkẹ aye mịẹ àrị pịrịmẹ.

Currently Selected:

Pakaso 36: OBTP

Highlight

Copy

Compare