Okunwẹngịapụ 24
24
Juapụ Ma Ḅẹrẹ Se Pọl Ḅe Tịḅị Gbanamẹ
1Sọnọ-a ḍin ḅọrọ sịkị, Gele Agbamịẹḅọ, Ananayas ḅe so Sizaria mun mẹ, da sẹnịapụ na ori na, pịkị Tatulọs nwọ chịn gbọrị oloko nemiḅọ na. Ini Gọvịna Fẹliks ḅe tọrọkọ mun mẹ se inia ḅẹrẹ ma ḍuko Pọl ḅe ọgọnọ gbanamẹ. 2Tatulọs ḅe ini nwọ chịn se ọ̀ sakị ḅẹrẹ ḍuko Pọl ḅe pụnụmamẹ. Mịn ọ̀ ḅẹrẹ mị ḍuko ḅara mị-ẹ.
“Ị́ya Opu osi mị ḅụ! Ị́ya yenemi tọrọkọ ịsụn mị deinma se ḅọlọ sịkị ḅụ wa pịrịsam, tọn-aye pịkị tẹlịmaḅẹ, mịna ama mị ḅe iḅi mị gose. 3Wa nyọ goyegoye iḅiọkụ se mịn mị ọkịmẹ sịkịmamgba, wa pịkị tẹmẹla mịẹḅaka se ị́ ḅẹmẹ. 4À ḅikẹ àrị opuma ị́ya sịkị fama, anị simeọkụ simeọkụ sọnị, àrị ị́ tẹkẹmẹ iḅi kuḅie nwọse wa ḍukoarị kpụlụ ḅẹrẹ mị poki. 5Wa ḅe ḅọ ḅe ḍọkịḅomẹ, na ori fa ọkịḅoḅịa yeḅụsọka ḅọ-ẹ; ò Juapụ ogboku amafiemaye nwọ mịẹ tomonikiri mị nwọ kelemasam, mịnaḅụ pusikima Nazarẹt ogbo tịḅịdaḅọ-ẹ. 6Ọ̀ pịkị Oputẹkẹwarị mị pụlamaḅịa ọkụ nwọ ḍọkịmẹ, se wa ò kunmẹ. (Wa tọnmẹ mịna ḅarakuḅu oloko sime ḅara ḍiki ḅẹrẹkọn ọ̀ pịrị, 7ọkụma owuni ḅẹrẹtọnḅọ Lisias ḅe, ḅie sọ ḅo se opu kụrọ ḅara ḅụ mịna ḅara ori ọkịmẹ. 8Anịsịkị Lisias ḅe tọnmẹ na ḅẹrẹ se ọ̀ pụnụmapụ ma ị́ tọrọkọ ḅo,) ị́ nemikase ḅẹrẹ se ò gbela ọkụma, ị́rị́ sọ ị́ ḅara na ineda wa se ọ̀ pụnụmarịaye mamgba ọrịḅịa.” 9Juapụma gboloma ini seni ọ̀ pụnụmaye ma ḅereni se nwọ ḅẹmẹ, na àrịmgba kọkọmaye-ẹ.
Pọl Ḅe Fẹliks Ḅe Tọrọkọ Ọ̀ Ḅịpị Pẹkẹrẹmẹ
10Gọvịna ḅe anịsịkị ḅara se Pọl ḅe damẹ na ori ọkwẹịn, se Pọl ḅe nwọ ḅẹmẹ:
“À nemimẹ na ị́ tọn-a kụra nwọse ḅẹrẹkọn mị sẹ mị pịrịsam, anịẹrẹchị ị̀ ḅieḅẹlẹmẹ ị́ tọrọkọ àrị ị̀ ḅịpị ḍuko. 11Ị́ ineda ḅarana ḍọkịḅoḅịa ḅara ḅụ, ma anị oyimaịn ḍin fịnjị nẹngịkẹ, à so Jerusalẹm mun mẹ, Tamụnọ tẹkẹḅịa ẹrẹchị. 12Juapụma ma ini ḍọkịọrịkẹ àrị Oputẹkẹwarị mị ḅie nweni na ḅẹrẹ pikiarị ogbo, ma ini pịkị tomoni chukuruma nyọ fiemaye ḅụ ị̀ ọrịḅokẹ, anị ḅọrọ tẹkẹwarịma ḅie anịkanịka ama mị ḅie sọnị. 13Ini pịkị ineda ini se ị̀ pụnụmaye ma ḍuko ḅelema ẹkẹ. 14À kọkọma mịn mị ḅereni ị́ pịrịaḅẹ na à mịna ḅieju-aḍapụma Tamụnọ Ḅe tẹkẹmẹ anị inina karakarakẹ nwọ ḅẹ Ateli mị ḍukonwẹngị ḅụ. Ọkụma ị̀rị̀ sọnị Moziz Oloko mị ḅie gịẹịn aye mamgba nwọ ḅerenimẹ, pịkị ịkịankoroapụma ḍiri ma ḅie simeayema na. 15À pịkị ini sọ Tamụnọ Ḅe ḅụ nyana gbọrị tọrụseḍikiarịye mị nwọ nyanamẹ, na tomoni mamgba si apụ na iḅi apụ na fịḅụsịsẹḅịa. 16Anị à pịkị ị̀ya ịnyọ laḅara nwọse ị̀ya si na iḅi na nemi kuḅie mị nwọse ḅelema Tamụnọ na tomoni na tọrọkọ anga ọkụ-ẹ.
17“À tọn-a kụra nwọse Jerusalẹm mị nwọ wẹrịso sịkị, àrị anịnyọ mun mẹ igbiki ọkị se ị̀ya tomonima pịrị se ini se agbamịẹḅịa ẹrẹchị. 18À mịn mị nwọ mịẹarịogbo mị ini Oputẹkẹwarị mị ḅie ị̀ ọrịye-ẹ, à ḅụmịẹfịafịama mịẹmịẹye mị nwọ mịẹ famaso sịkị. Tomoniogbo pịkị ị̀rị̀ na simekẹ, ye pịkị ọrụtọnka ḅara simekẹ. 19Ọkụma Esia pẹkẹrẹ ḅo da Juapụ anịnyọ omi-ẹ, ini na mịnaḅụ na mgbọkụ ị́ tọrọkọ ḅo gbẹịnmẹ, nemikase ini ị̀ ḅụ ḍukoye nyana ọkụma. 20Anịkanịka ye mịnyọ sime apụma ini ḍọkịḅo na ị̀ ḅarasimẹ nwọ ḅẹye mị ḍuko, à nwọ Ḅẹrẹchiri mị tọrọkọ chịẹ sịkị ḅụ. 21Àrị inia tọrọkọ chịẹsime se ḍukopakụma gbọrịye mị sikima ọkụma: ‘Ị́ gose ḅẹrẹkọn ị̀ pịrịarịye mị mgba, anị fịḅụsịsẹ omi-ẹ à nwọ ḅereniye ẹrẹchị-ẹ.’”
22Anịsịkị Fẹliks, ini iḅiọkụ se Ateli mị gbolomaye nwọ ḍuko pịrịsaḅọ ḅe ḅẹrẹ mị naa so se anị dachịẹmamẹ se ò ḍuko ini pịrịmẹ, “Ọ́mịna ḅẹrẹ mị àrị anị pẹlẹḅịa owuni ḅẹrẹtọnḅọ, Lisias ḅe ḅo lasịkị.” 23Ọ̀ tọn Pọl ḅe ḅara ḅie sime owunitịḅịnịḅọ ḅe pịrịmẹ na ori ò se koru ḅụ wẹrị, ọkụma ini kele ẹmbẹ se ọ̀ pịrị ori ọ̀ ḅụ nyana, pịkị ḅereni oria ikiapụ ma pịrị ini ọ̀ ḅụpalịmaye nwọ mịẹ ọ̀ pịrị.
Pọl Ḅe Fẹliks Ḅe Na Drusila Ma Na Tọrọkọ Chịẹmẹ
24Ene kele ḅọrọ sịkị Fẹliks ḅe na tarọ Drusila ma na ḅomẹ, árị Juḅọ-ẹ. Ọ̀ Pọl ḅe fịrịmaḅo se ò pokimẹ ọ̀ Kraịst Ḅe ḅụ ḅereni nyana mị gboloma ọkwẹịn kọn sịkị. 25Ọkụma Pọl ḅe ọkwẹịnma mun se ḅo iḅimịẹ na, ḅụpikima na, ḅoarị Ḅẹrẹkọn Ene na gbolomaye nwọse chụa ọkwẹịn sịkị, Fẹliks ḅe ọ̀ ḅalafamẹ, se nwọ ḅẹmẹ, “Ị́ ineda mịọkụ soḅịa, à pịkị ị́ chịnḅịa, à sịkị nyana sịkị.” 26Anị gbọrị sịkị mị, ọ̀ tọrụ se ḍikimẹ na Pọl ḅe igbiki ḅereni ọ̀ pịrịḅịa, mịn mị gose ọ̀ ḅọlọka ḅọlọka ọ̀ chịn se ori na ọkwẹịn-ọkwẹịnmẹ.
27Mama kụra ḅọrọ so sịkị, Pọsịọs Fẹstọs ḅe Fẹliks ḅe kiri mị ọkịmẹ gọvịna ḅara ḅụ. Fẹliks ḅe Juapụma tọrụ iḅi fẹ nwọ ḍọkịmẹ, anịẹrẹchị ọ̀ Pọl ḅe se ikoli ḅie wẹrịmẹ.
Currently Selected:
Okunwẹngịapụ 24: OBTP
Highlight
Share
Copy
Want to have your highlights saved across all your devices? Sign up or sign in
The Bible Society of Nigeria
