Okunwẹngịapụ 23
23
1Pọl ḅe gbụkụkụma Ḅẹrẹchiri mị ḍiki se nwọ ḅẹmẹ, “Ị̀ juo Izrẹlapụ! Ị̀ kuḅie ma ḅẹrẹsi kọn ị̀ pịrịkẹ ọkịḅo mịmgba la sọ, à se Tamụnọ Ḅe tọrọkọ ḍumo kọn-arị ḅara mị gbolomaye ḅụ.” 2Ananayas, Gele Agbamịẹḅọ ḅe, tọnmẹ na Pọl ḅe na kpekima chịẹ apụma ini ọ̀ ḅịpị ḅụrọ. 3Pọl ḅe nwọse ọ̀ ḅẹmẹ, “Tamụnọ Ḅe gbarịmaka ḅara ḅụ ị́ ḅụrọḅịa—ị́rị́ ḅịaḅịa agba se ọmbị warị agbagba! Anịnyọ sime Oloko mị ḍiki se ḅẹrẹkọn anị ini se ị́ ḅẹye-ẹ, anị sọ ị́ Oloko mị kansam, se tọnmẹ na ini ị̀ ḅụrọ!”
4Pọl ḅe na kpekima sime owuapụma nwọse ọ̀ ḅẹmẹ, “Ị́ Tamụnọ Gele Agbamịẹḅọ ḅe wọlọaḅẹ!”
5Pọl ḅe pẹkẹrẹmẹ, “Ị̀ya mịnapụ à nemikẹ ori Gele Agbamịẹḅọ ọkụ. Fịafịa ḍiri mị nwọ ḅẹmẹ, ‘Tịḅịda ḅẹrẹtọn tomonima pịrịarịḅọ ḅe ḅụ, ị́ siye ḍuko ẹkẹ.’”
6Pọl ḅe ori na koḅirima mị ḅie sime dapụ Sadusiapụ na Farisiapụ na-ẹ, nwọ ḅẹ sịkị, ọ̀ Ḅẹrẹchiri mị ḅie olokumẹ, “Ị̀ juo Izrẹlapụ ị̀rị̀ Farisiḅọ-ẹ, Farisiapụ tọkụ-ẹ. À ḅẹrẹkọn ḅie omi-ẹ, anịatịḅị à tọrụ se ḍikimẹ na fịapụ sịsẹ se ḍumoḅịa!”
7Ọ̀ mịn mị nwọ ọkwẹịn kirikiri, Farisiapụ ma na Sadusiapụ ma na sakị kamụsọmẹ se koḅirima mị puamẹ. 8(Anịsịkị Sadusiapụ ma nwọ ḅẹmẹ, na tomoni fịḅụ sịsẹ ẹkẹ, ini pịkị nwọ ḅẹmẹ, na enjẹlapụ na tẹmẹ na ofori-ẹ; ọkụma Farisiapụ ma tẹrẹ mamgba nwọ ḅerenimẹ.) 9Olokutịḅị mị pịkị geletẹịnmẹ, se Oloko ḍieapụma ḅe dapụ, Farisiapụ ma ḅie sime apụma sịsẹ chịẹ se kụrọma mịn mị na tụḅụrụmẹ: “Ḅe tomoniḅọ ḅe ḅụ wa ineda ḍọkịḅoḅịa si ofori-ẹ! Ḅụtimaka tẹmẹ anịkanịka enjẹlḅọ kọkọma ọkwẹịn ọ̀ pịrịmẹ!”
10Ḅẹrẹ jinea mị owoi so ọkụma owuni ḅẹrẹtọnḅọ ḅe ọ̀ ḅalafamẹ nwọfa ini Pọl ḅe kanị kọsịmaḅịa etuḅo. Anị ọ̀ tọn oria owunima pịrịye-ẹ na ini koro tomonikpo mị damamun se inia ḅie Pọl ḅe ọkịpakụmaḅo, se ori ọkịmun owuni ḅụkikima warị mị ḅie koroma.
11Anị ḍukoma ḍin mị ḅie Nyanaḅọ Ḅe Pọl ḅe anga chịẹ sime se nwọ ḅẹmẹ, “Ḅalafama! Ị́ mịnyọ Jerusalẹm ḅie onyechịẹ ị̀ pịrịsam, ị́ pịkị Rom ḅie anị gbọrịye mị nwọ mịẹḅịa.”
Ini Siḅẹrẹ Ḅia Pọl Ḅe Pịrị Mẹ
12Anịḅe eneḅa dede ḅie da Juapụ ḅo gboloma se ḅẹrẹḅiamẹ. Ini ye karịfịmẹ na ini gbọrịye sọnị fị ẹkẹ pịkị mengi sọ ḅu ẹkẹ ini Pọl ḅe nwọ ḅaaka simeogbo. 13Ini nweni-a mesi nwọ nẹngịye lamẹ, gboloma se mị ḅẹrẹḅia apụma. 14Anịsịkị ini tịḅịnị agbamịẹapụma na sẹnịapụma na damamun se nwọ ḅẹmẹ, “Wa gboloma yekarịfịsam na gbọrịye sọnị wa fị ẹkẹ wa Pọl ḅe ḅaaka simeogbo. 15Anịẹrẹchị ómine na Ḅẹrẹchiri mị na epele ḅara ḅụ ḅịpị se Rom Owuni ḅẹrẹtọnḅọ ḅe fịrịma se ọ̀ Pọl ḅe se ọ́ sẹịnma, ómine iḅiọkụ ò gbolomaye nemi ḅimẹ nwọ ḅẹ ḅara ḅụ. Ọkụma mine wa ḅụkarakaramamẹ ọ̀ ḅaa, ma ò ḅo mịnyọ laka simeogbo.”
16Ọkụma Pọl nụmbụrarọ ma tọkụ ḅe ini ḅia ye mị nwọ naasam; anị ò so owuni ḅụkikima warị ḅie mun se anị ḍuko Pọl ḅe pịrịye-ẹ. 17Anịsịkị Pọl ḅe owunima ḅie gbọrị tịḅịdaḅọ chịn se nwọse ọ̀ ḅẹmẹ, “Ḅe asẹmẹnịḅọ ḅe ọkị owuni ḅẹrẹtọnḅọ ḅe damamun, ò ḍuko ọ̀ pịrịḅịaye omi-ẹ.” 18Owunitịḅịdaḅọ ḅe ori ọkị ọ̀ ḅọrọma mun owuni ḅẹrẹtọnḅọ ḅe pịrị, se nwọ ḅẹmẹ, “Pọl, ikoliḅọ ḅe ị̀ chịnmẹ, se ị̀ ḅẹmẹ, à ḅe asẹmẹnịḅọ ḅe nwọ ọkịḅo ị́ pịrị, anịatịḅị ò ḍuko ị́ pịrịḅịaye omi-ẹ.”
19Owuni ḅẹrẹtọnḅọ ḅe ḅara ḅụ ori ọkị sikima ngẹrị ọ̀ ḅụ pịrị, se ò gbelamẹ, “Cheye ị́ nwọ nyana se ị́ ḍuko ị̀ pịrị ḅe?”
20Ọ̀ nwọ ḅẹmẹ, “Ju ḅẹrẹtọn apụma ḅịpị se ogbo chụasam, ḅa ini ị́ ḅara Pọl ḅe nwọ ḅi se ò se ḅẹrẹchiri mị munḅịa, ini iḅiọkụ ò gbolomaye nwọ ḍọkị nemi ḅiaḅẹ nwọ ḅẹ ḅara ḅụ. 21Ọkụma ini poki ma, anịatịḅị owuapụ-a mesi nẹngịmaye ḅọị ò koruḅịa. Ini ye karịfịsam na ini yefị ẹkẹ pịkị mengi sọ ḅu ẹkẹ ini ọ̀ ḅaaka simeogbo. Mịọkụ ini ḅụkarakaramasam anị mịẹḅịa ẹrẹchị se ị́ ḍukoḅịaye nwọ koruaḅẹ.”
22Owuni ḅẹrẹtọnḅọ ḅe nwọ ḅẹmẹ, “Ḍuko gbọrịḅọ sọnị pịrị ma na mịn mị ị́ ḍuko ị̀ pịrịsam, nwọ ḅẹye mị.” Se ori asẹmẹnịḅọ ḅe ḅẹ se ò somẹ.
Ini Pọl Ḅe Se Gọvịna Fẹliks Ḅe Nwọ Fịrịma Mẹ
23Anịsịkị owuni ḅẹrẹtọnḅọ ḅe oria owunitịḅịdapụ ma ḅie mama apụ chịn se nwọ ḅẹmẹ, “Owuni oyiasi ọ̀ nwọ karakarama Sizaria munḅịa apụ, asụn se nwẹngịḅịa owuni-a tesioyifịnjị se chụa, pịkị sụḅa ọlọ owuni oyiasi na se chụa, se ḅụkarakarama, esenia-a so ḅiri mị ḍin. 24Pọl ḅe se nwẹngịḅịa asụn ọ̀ pịkị nwọ karakarama, se deinma ò se mun Gọvịna Fẹliks ḅe pịrị.” 25Anịsịkị owuni ḅẹrẹtọnḅọ ḅe mị ḅara mị sime ḍiri nwọ gịẹịnmẹ:
26“Klọdiọs Lisias ḅe, se Osi nyana, Gọvịna Fẹliks ḅe sẹịnma kereni ḅịpị. 27Juapụma, ḅe tomoniḅọ ḅe kunmẹ, se ọ̀ ḅaa-ẹ tọnmẹ. À naamẹ na ori Rom furotọkụ-ẹ, se àrị ị̀ya owunima na mun se ọ̀ ḍụapakụma ḅomẹ. 28Ini se ọ̀ pụnụmaye à nwọ nemi ḍọkịmẹ, anịẹrẹchị àrị ori ọkị inia Ḅẹrẹchiri mị mun mẹ. 29À ḍọkịḅomẹ na ò se fịḅụ chu gbẹịnye ọ̀ nwọ mịẹkẹ, anịkanịka ò se ikoli ḅie chuḅịaye, ini se ọ̀ pụnụmaye anị inia ḅarakuḅu oloko na gbolomaye-ẹ. 30Se ini ḍuko ị̀ pịrịmẹ na da Juapụ ḅẹrẹ ḅia ọ̀ pịrịaḅẹ nwọ ḅẹ sịkị à tọnpẹlẹmẹ ò se kirikiri ị́ fịrịma. À ḍuko ḅẹrẹ seni ọ̀ pụnụmarị apụma pịrịsam na ini ị́ tọrọkọ ḅo se ini se ọ̀ pụnụmarịye ma ḍuko.”
31Owuni ma ini tọn ini pịrịsa ḅara mị nwọ mịẹmẹ. Anị ḍin, mị ini Pọl ḅe ọkị se ori na mun Antipatris mị laye-ẹ. 32Anịḅe eneḅa mị ḅụ, ḅụọ se nwẹngị owunima vinpịkị ḅo owuni ḅụkikima warị mị lamẹ, se ọ̀ ḅụ ḅarasin se nwẹngịapụma pịrịmẹ ini ò se mun mẹ. 33Ini ò se mun Sizaria lamẹ, se gịẹịn ḍiri mị se gọvịna ḅe pịrị, se Pọl ḅe saḅama ọ̀ pịrịmẹ. 34Gọvịna ḅe ḍiri mị gomẹ se Pọl ḅe ḅo pẹkẹrẹ nwọse ò gbelamẹ. Ọ̀ ḍọkịḅo ọrị na Silisia ḅie ò ḅomẹ nwọ ḅẹ sịkị, 35ọ̀ nwọ ḅẹmẹ, “Àrị ị́ ḍukoḅịaye naaḅịa, ḅẹrẹ se ị́ pụnụmapụ ma ḅo lasịkị.” Anịsịkị ọ̀ kụrọ pịrịmẹ na ini Pọl ḅe se ò koruḅịa apụ chuku ḅie koroma gọvịna odo ḅie.
Currently Selected:
Okunwẹngịapụ 23: OBTP
Highlight
Share
Copy
Want to have your highlights saved across all your devices? Sign up or sign in
The Bible Society of Nigeria
