Okunwẹngịapụ 25

Pọl Ḅe Ḅẹrẹ Se Siza Ḅe Suamẹ

1Fẹstọs ḅe ḅo mị pẹkẹrẹ mị la, tẹrẹ-a ḍin ḅọrọ sịkị, ò Sizaria ḅie so Jerusalẹm mun mẹ. 2Anịanga tịḅịnị agbamịẹapụma na Ju tịḅịnịma na, ini se Pọl ḅe pụnụma ḅẹrẹ ma nwọ ọkị ḅomẹ, ini Fẹstọs ḅe tẹkẹmẹ, 3na ọ̀ mịn iḅi mị nwọ mịẹ ini pịrị, Pọl ḅe nwọ ọkị Jerusalẹm ḅo ḅụ, anịatịḅị ini ḅẹrẹ ḅia ọ̀ pịrịsam, na ini ateliogbo ọ̀ ḅaaḅịa. 4Fẹstọs ḅe ini pẹkẹrẹ se nwọ ḅẹmẹ, “Pọl ḅe, Sizaria ḅie ori ikoli ḅie omi-ẹ; ị̀rị̀ na mịnaḅụ na ḅọlọka sịkị à vinpịkị anịnyọ munḅịa. 5Ye ọ́mịna tịḅịnịma ị̀ ḅụ sọ Sizaria mị mun, se ini se ọ̀ pụnụmaḅịaye ma ḍuko, ọ̀ mịẹirimaye omi-ẹ ḅẹḅẹ.”

6Fẹstọs ḅe jịn nine anịkanịka oyi-a ḍin nwọse ini na simemẹ anịsịkị re mị ò so Sizaria mun ye-ẹ. Anịḅe eneḅa ò mun ḅẹrẹkọn warị mị ḅie simemẹ, se tọnmẹ na ini Pọl ḅe ọkịḅo. 7Pọl ḅe ḅo lasịkị, Jerusalẹm ḅie wẹrị ḅo Juapụma chịẹ ò kelemamẹ se sakị tọn-a kụrọ aye nwọ ḍuko ọ̀ pụnụmamẹ, ini ineda tịḅị nemi se ḍuko ḅelema ẹkaye. 8Ọkụma Pọl ḅe ọ̀ ḅụ ḍụa gose nwọ ḅẹmẹ, “À Juapụ Olokoma ḅie mịẹ simasa gbọrịye sọ ofori-ẹ, Oputẹkẹwarị mị sọnị, anịkanịka Rom ḅie sime Siza ḅe sọnị.”

9Fẹstọs ḅe Juapụma tọrụ iḅifẹ gose Pọl ḅe gbelamẹ, “Ị́ ḅereni se Jerusalẹm mun, se anịnyọ mịọkụ ini se ị̀ tọrọkọ ị́ pụnụmaye ma nwọ ḍuko ḅe?”

10Pọl ḅe pẹkẹrẹmẹ, “À Siza ḅẹrẹkọn warị ḅie chịẹ waraḅẹ, anị ini ḅẹrẹkọn ị̀ pịrị gbẹịn nyọ mị-ẹ. À se Juapụ mịẹsimasaye ofori-ẹ, ị́rị́ sọ iḅiọkụ nemi ḅara ḅụ. 11À nemikase oloko mị kanmẹ se fị gbẹịnmẹ ḅẹḅẹ, à ḅikẹ anị ị̀ gbarị. Ọkụma ini se ị̀ pụnụmaye ma ḅie kọkọmaye ofori-ẹ ḅẹḅẹ, ineda ị̀ ḅọrọma ini pịrịḅịaḅọ ofori-ẹ. À ḅẹrẹ mị saḅama Siza ḅe pịrịmẹ.”

12Anịsịkị Fẹstọs ḅe, tetema se ọ̀ pịrịpịrịapụ ma na ḅia so sịkị, pẹkẹrẹmẹ, “Ị́ ḅẹrẹ mị saḅama Siza ḅe pịrịsam, anịẹrẹchị ị́ pịkị Siza ḅe damamunḅịa.”

Pọl Ḅe Agiripa Ḅe Na Banaịsị Ma Na Tọrọkọ Chịẹmẹ

13Sịkị kele ḅọrọ sịkị Amanyanaḅọ Agiripa ḅe na Banaịsị ma na ini Sizaria ḅo Fẹstọs ḅe kereni-ẹ ḅomẹ. 14Ini tọn-a ḍin se anịnyọ sime so sịkị, Fẹstọs ḅe ye Pọl ḅe na simeọkụ nwọ ḍuko amanyanaḅọ ḅe pịrịmẹ: “Gbọrị owuḅọ mịnyọ omi-ẹ Fẹliks ḅe se ikoli ḅie koromaḅọ; 15à Jerusalẹm mun sịkị Juapụ tịḅịnị agbamịẹapụma na sẹnịapụma na ḅẹrẹ se oria ọgọnọ gbanamẹ se ḅimẹ na à ḅẹrẹkọn ọ̀ ḅarasima. 16Ọkụma à ḍuko ini pịrịmẹ na Romapụ ma ini tomoniḅọ saḅama ḅẹrẹ se iniḅọ pụnụma apụ pịrị mịẹmịẹye nyanakẹ, ḅẹrẹ se iniḅọ pụnụma apụ iniḅọ na tọrụdamaka simeogbo, iniḅọ pịkị sịkị nyana se iniḅọ ḅụ ḍụaka simeogbo ini se iniḅọ pụnụmaye ma ḅie. 17Ini mịnyọ ḅo sịkị à sịkị famakẹ, ọkụma anị gbọrị eneḅa mị ḅie à ḅẹrẹkọn warị mị ḅie kpọnjị sime, se tọnmẹ na ini tomoniḅọ ḅe ọkị ḅo. 18Ori na tarakapụma chịẹsimemẹ, ọkụma ini se ọ̀ pụnụmaye ma ma ini àrị ḍukokẹ à se ḅietọn ḅara mị. 19Ini ori na jinearịye mamgba anị inia Tamụnọ ḅereni mị gbolomaye-ẹ, anị gbọrị Jizọs nwọ chịnḅọ ḅe-ẹ, ọ̀ fị ḅọrọsam ọkụma Pọl ḅe nwọ ḅẹmẹ na ò ḍumo waraḅẹ. 20Anị ị̀ ḅụḅalaḅalamamẹ, mịẹse ma ḅẹrẹ ma ḅe karakaraye à nwọ nemiḅịa ọkụ, anịgose à Pọl ḅe gbelamẹ nwọfa ori ineda Jerusalẹm mị mun se anịnyọ ini se oria ọgọnọ gbanaye ma pẹkẹrẹḅịa otuḅo. 21Ọkụma Pọl ḅe ò ḅẹrẹ mị saḅamamẹ; ò ḅimẹ ini ò se ò koruḅịa apụ ḅarachụa se ye Siza ḅe oria ḅẹrẹ mị pẹlẹ. Anịgose à kụrọ pịrịmẹ na ini ò se ò koruḅịa apụ ḅarachụa ọkịmun àrị ineda ò se Siza ḅe fịrịmaḅịa sịkị la.”

22Agiripa ḅe nwọse Fẹstọs ḅe ḅẹmẹ, “À ḅimẹ à ḅarana ḅe ḅọ ḅe poki.”

“Ḅa ò ḍukoḅịaye ma ị́ nwọ naaḅịa,” Fẹstọs ḅe nwọ pẹkẹrẹmẹ.

23Anịḅe eneḅa, Agiripa ḅe na Banaịsị ma na opu osi na mịẹmịẹaye ḅụ na sọḅomẹ, se tomonima ḅẹrẹ poki warị mị ḅie sọḅomẹ, ọmụalapụ ma na ama ḅie ẹrẹpaka apụma na ini na. Fẹstọs ḅe kụrọ pịrịmẹ anị ini Pọl ḅe ọkịḅoye-ẹ. 24Fẹstọs ḅe nwọ ḅẹmẹ, “Amanyanaḅọ Agiripa na pịkị mịọ mine na sime apụ mamgba na. Ḅe ḅọ ḅe ọ́ nwọ ḍiki, ori mị Juapụ mamgba, mịnyọ na pịkị Jerusalẹm ḅie sime apụma na, oria ḅẹrẹ nwọse ị̀ sua ḅọ ḅe-ẹ. Ini ịgbanịmẹ na ọ̀ ḅarị ngịsị ḍumo ma. 25Ọkụma àrị ineda ọ̀ mịẹse fị gbẹịn aye nwọ ḍọkịḅo ọrịkẹ. Se ori sọ ḅarana ḅẹrẹ mị saḅama Siza ḅe pịrịsam nwọ ḅẹ sịkị, à tọnsam ò se ọ̀ fịrịma. 26Ọkụma ọ̀ ḅụ à sosikima nyana ḅẹrẹtịḅị ofori-ẹ se ḍiri gịẹịn Siza ḅe sẹịnmaḅịaye, anị mịẹse àrị ori ọkị ọ́mịna tọrọkọ ḅosam—anịtẹịn anga, ị́ tọrọkọ, Amanyanaḅọ Agiripa—mịẹse ị́ oria ḅẹrẹ mị ḍọkị nemi so sịkị, à gịẹịnḅịaye à nwọ nyanaḅịa ọkụ. 27Ị̀ ḅụ inuma sọmẹ tomoniḅọ nwọse ikoli sẹịn, ḅelema ọ̀ mịẹye ḍukoka ḅụ.”

Currently Selected:

Okunwẹngịapụ 25: OBTP

Highlight

Copy