Okunwẹngịapụ 22
22
1“Ị̀ juo Juapụ, ómine ị̀ poki àrị ọ́ tọrọkọ ị̀ ḅụ kọnfiriarị sịkị!” 2Ò Hibru ḅịpị nwọse ọkwẹịn ini pịrị-a ḅara ini nwọ naa sịkị, ini pịkị yawụma simetẹịnmẹ se Pọl ḅe ọkwẹịnma mun mẹ:
3“Ị̀rị̀ Juḅọ-ẹ, Silisia ḅie Tasọs ḅie ini ị̀ yimẹ, ọkụma mị Jerusalẹm ḅie ini ị̀ ḍikiḍiki pakụmaḅomẹ, Gamaliẹl ḅe ḅara ḅie yeḍawọ ḅọ-ẹ. Àrị iḅiọkụma mịna ḅieju-aḍapụma Olokoma ḅie yeḍawọmẹ, se ị̀ ḅụ se gbọtụḅara ḍie Tamụnọ Ḅe pịrịmẹ mịmgba ómine mịnyọ sime apụ mamgba sọnị simeọkụ mị. 4À ḅụfụka se mị Ateli nwẹngị sime apụma pịrị mun fị sọ nwọ lamẹ. Àrị owuapụ na eremeni na kun se ini se ikoli sẹịnmẹ. 5Gele Agbamịẹḅọ ḅe na bebe Ḅẹrẹchiri mị na ineda onyechịẹḅịa na à kọkọmaye ḍukoaḅẹ. Àrị inia ḅara gịẹịn ḍiri ọkị Damaskọs ḅie sime Ju mịnapụma nwọ damamun-aḅẹ, àrị anị nyọ mun ikoli se ini ịkasị se ini kun ḅo ḅụfụka se ini pịrịḅịa ẹrẹchị.
Pọl Ḅe Oria Siḅụ Vinpịkị Ḅẹrẹ Ḍukomẹ
(Oku 9.1-19; 26.12-18)
6“À nwẹngịma mun se ḅo Damaskọs na kpeki sịkị, eneogboin ḅiri ḅụ, sotọrụ ḅụ wẹrị ḅo ḅịa ḅịa enekuḅu ḅụnemika ḅụ ḅịa ị̀ kelemamẹ. 7À ḅịkị kiri koro se pụkọ naamẹ, pụkọ mị nwọse ị̀ ḅẹaḅẹ, ‘Sọl, Sọl! Ị́ che gose ḅụọ se ị̀ chụa-ao?’ 8‘Ị́rị́ tụḅọ, Nyanaḅọ?’ à nwọ gbelamẹ. ‘Ị̀rị̀ Jizọs Nazarẹtḅọ Ḅe-ẹ, ị́ ḅụọ se chụarịḅọ ḅe,’ Ọ̀ nwọse ị̀ ḅẹmẹ. 9Ị̀rị̀ na sime owuapụma enekuḅu mị ọrịmẹ, ọkụma ọkwẹịn ị̀ pịrịarịḅọ ḅe pụkọ mị ini naakẹ. 10À gbelamẹ, ‘Nyanaḅọ, cheye à nwọ mịẹḅe?’ Se Nyanaḅọ Ḅe nwọse ị̀ ḅẹmẹ, ‘Sịsẹ se Damaskọs ḅie sọmun anịnyọ Tamụnọ Ḅe tọn se ị́ mịẹḅịaye goyegoye ini nwọ ḍuko ị́ pịrịḅịa.’ 11Ị̀ tọrụmgbọlụ pụnmẹ enekuḅu mị gose, anị mịẹse ị̀ ḅụ sọmun apụma ḅara ḅụ ị̀ ọlọ ị̀ se Damaskọs ḅie sọmunmẹ.
12“Ananayas nwọ chịn gbọrị owuḅọ anị ama ḅie omi-ẹ, Tamụnọ tẹkẹtẹkẹ ḅọ-ẹ, mịna oloko mị ḍukoye mịẹarị ḅọ, anịnyọ Juapụma opu osi se pịrị ḅọ-ẹ. 13Ori ị̀ damaḅo se ị̀ya anga sịkị chịẹsime, se nwọ ḅẹmẹ, ‘Ị̀ mbire Sọl, ị́ tọrụmgbọlụma finji!’ Anị gbọrị kirikiri mị ḅụ à pịkị yeọrị se àrị ò ḍikimẹ. 14Ọ̀ nwọ ḅẹmẹ, ‘Mịna ḅieju-aḍapụma Tamụnọ Ḅe ori ị́ sẹlẹsam ò ḅiarịye ị́ nwọ nemiḅịa ẹrẹchị, oria karakara Fịrịnwẹngịḅọ Ḅe ị́ nwọ ọrị, se ori ọ̀ pụkọ se ọkwẹịn se ị́ naaḅịa ọkụ. 15Anịatịḅị, oria onyechịẹḅọ ị́ nwọ sọḅịa, se ị́ ọrịsaye na ị́ naasaye na nwọ ḍuko tomonima pịrịḅịa. 16Se mịọkụ nde ị́ gose pa koruma mun-arịye? Sịsẹ, se mengisara se ị́ya sima sịkịrị sin ọ̀ tẹkẹ ḅụ.’
Ini Pọl Ḅe Chịn Se Ò Ḅo Tamụnọ Ḅẹrẹ Nwọ Ḍuko Jịnsẹapụ Ma Pịrị Mẹ
17“À vinpịkị so Jerusalẹm mun mẹ, Oputẹkẹwarị mị ḅie sime tẹkẹarị ogbo, à ḍawọ kọnmẹ, 18anịa ḅie à Nyanaḅọ Ḅe ọrịmẹ se ọ̀ nwọse ị̀ ḅẹmẹ, ‘Sarama Jerusalẹm koromaso fịkịrị, anịatịḅị mịnyọ sime apụma ini ị́ya onyechịẹ mị nwọ ọkị ẹkẹ ị̀ gbolomaye ḅụ.’ 19À pẹkẹrẹmẹ, ‘Nyanaḅọ, ini iḅiọkụ nemimẹ na à tẹkẹwarịma ḅie mun se ị́ ḅereniapụma kun se ini fomu fomumẹ. 20Se ini ị́ya onyechịẹḅọ Stivin ḅe ḅaa sịkị, ị̀rị̀ sọnị ị̀ ḅara ḅie omi-ẹ, se anị mịẹkụrọmamẹ na ini ò ḅaa-ẹ, pịkị na ò ḅaa apụma ḅụchụayema nwọ ọlọmẹ.’ 21Nyanaḅọ Ḅe nwọse ị̀ ḅẹmẹ, ‘Mun, anịatịḅị àrị ị́ seni ḅọlọ anga ḅụ Jịnsẹapụma fịrịmaḅịa.’”
22Tomonima Pọl ḅe poki mun ọ̀ ḅẹrẹ mị ḍuko so sịkị lamẹ; anịsịkị ini sakị pụkọ deki gelema olokumẹ, “Ómine ò se so! Ọ̀ ḅaa! Ò ḍumo gbẹịnkẹ!” 23Ini olokuaḅẹ, inia ḅụchụayema se ọfọngọaḅẹ, se fọn ọpụrụ ọgọnọ saraḅẹ. 24Rom owunitịḅịnịḅọ ḅe tọn oria tomonima pịrịmẹ na ini Pọl ḅe ọkị owuni ḅụkikima warị mị ḅie chu-ẹ, pịkị ḍuko ini pịrịmẹ na ini ò fomu se Juapụma gose mị ḅara se ọ̀ tịḅị olokuarịye ọ̀ nwọ ḍọkị pakụmaḅoḅịa ọkụ. 25Ọkụma ini ò fomuḅịa ẹrẹchị ọ̀ fịna so sịkị Pọl ḅe nwọse anịnyọ chịẹ sime owunitịḅịnịḅọ ḅe ḅẹmẹ, “Anị ọ́mịna oloko na kura, Rom furotọkụ nwọ fomu ọ̀ mịẹye ḅụ ma ḅẹrẹ sọnị kọn ọ̀ pịrịka simeogbo?”
26Owunitịḅịnịḅọ ḅe mịn mị naa sịkị, ori owuni ḅẹrẹtọnḅọ ḅe damamun se ò gbelamẹ, “Cheye ị́ nwọ mịẹ-ao? Ori ḅọ ḅe Rom furotọkụ-ẹ!”
27Anị owuni ḅẹrẹtọnḅọ ḅe Pọl ḅe damamun se ò gbelaye-ẹ, “Ḍuko ị̀ pịrị, ị́rị́ Rom furotọkụ?”
“Iin, Pọl ḅe nwọ pẹkẹrẹmẹ.
28“À gbọrịḅọ sọ waraḅẹ opu igbiki nwọ gbẹịn ḅụ,” owuni ḅẹrẹtọnḅọ ḅe nwọ ḅẹmẹ.
“Ọkụma ị̀rị̀ à gbọrịḅọ sọ waraḅẹ, yi ḅụ,” Pọl ḅe nwọ pẹkẹrẹmẹ.
29Anịkirikiri ḅẹrẹ se Pọl ḅe gbela-ẹ tọn owuapụma ọḅụdamẹ; owuni ḅẹrẹtọnḅọ ḅe ọ̀ ḅalafamẹ ò ḅo nemi na Pọl ḅe Rom furotọkụ-ẹ nwọ ḅẹ sịkị na ọ̀ tẹtẹ ikoli se ori ịkasị waraḅẹ.
Pọl Ḅe Ḅẹrẹchiri Mị Tọrọkọ Chịẹmẹ
30Owuni ḅẹrẹtọnḅọ ḅe ḅimẹ Juapụma se Pọl ḅe ọgọnọ gbanarị ḅẹrẹtịḅị mị jokoma ọ̀ nwọ ḍọkị nemi, anị anịḅe eneḅa mị ḅụ ọ̀ Pọl ḅe ḅụ ikoli ma sinye-ẹ, se tọnmẹ na tịḅịnị agbamịẹapụma na Ḅẹrẹchiri mị mgba ḅo ịrịama. Anịsịkị ọ̀ Pọl ḅe ọkịmẹ, ọ̀ mịẹse ori inia tọrọkọ chịẹ simemẹ.
Currently Selected:
Okunwẹngịapụ 22: OBTP
Highlight
Share
Copy
Want to have your highlights saved across all your devices? Sign up or sign in
The Bible Society of Nigeria
