Okunwẹngịapụ 16
16
Timoti Ḅe Pọl Ḅe Na Saịlas Ḅe Na Ḅụ Sọ Mun mẹ
1Pọl ḅe so mun Dabi na Listra na lamẹ. Ḅereni nyana gbọrịḅọ, Timoti nwọ chịn gbọrị ḅereniḅọ anịnyọ anga waraḅẹ. Nyọngọrọ ma sọnị Kraịst Ḅe ḅereniḅọ-ẹ, árị Juḅọ-ẹ, ọkụma ḍawu ḅe Grik ḅọ-ẹ. 2Listra na Aịkonịọm na ḅie sime ḅereniapụ mamgba Timoti ḅe ḅụ iḅiye ḍukomẹ. 3Pọl ḅe ḅimẹ ò Timoti ḅe ọkị se ọ̀ ḅụ chụa mun, anị ò Timoti ḅe ḅụpẹlẹye-ẹ. Ori anị ḅara mị nwọ mịẹmẹ anịatịḅị àrị nyọma ḅie sime Juapụ mamgba nemimẹ na Timoti ḍa ḅe Grik ḅọ-ẹ. 4Ini amama ḅie tolu ḅọrọ mun-arị sịkị ini okunwẹngịapụ ma na sẹnịapụma na Jerusalẹm ḅie ḍukopẹlẹ olokoma ḅụ ḅẹrẹ mị nwọ daḅọrọma ini pịrịaḅẹ, pịkị ḍuko ini pịrịaḅẹ na ini ma olokoma ḍukoarịye ma nwọ mịẹ. 5Anị ḅara mị ḅụ ini chọchị ma nwọ mịẹ kụrọmatẹịnmẹ ḅereni ḅụ, pịkị mịẹse arịa kịẹnḅịpị eneḅeneḅene sẹnịmẹ.
Pọl Ḅe Troas Ḅie Ori Ịkịan Ọrị Mẹ
6Ini nwẹngị Frijia na Galesia amama ḅe irima ḅie tolu ḅọrọmẹ, anịatịḅị Fịafịa Tẹmẹ Ḅe ò ḅereni ini pịrịkẹ ini ḅẹrẹ mị ḍuko Esia sẹ mị ḅie. 7Iniḅo Misia ama oke mị lasịkị, ini mịẹse Bitinia sẹ mị ḅie sọḅịa ọkụ ini nwọ ḍọkịmẹ, ọkụma Jizọs Ḅe Tẹmẹ ḅereni ini pịrịkẹ. 8Anị ini Misia ḅie dada nwẹngị ideri Troas mun ye-ẹ. 9Pọl ḅe anị ḍin mị ḅie ịkịan ọrịmẹ, anị ịkịan mị ḅie ọ̀ Masidonia ḅie gbọrị owuḅọ nwọ ọrịmẹ chịẹsime se ọ̀ tẹkẹaḅẹ, “Saḅa Masidonia ḅo se ḅarachụa wa pịrị!” 10Pọl ḅe mị ịkịan mị ọrị kirikiri, wa ḅụkarakaramamẹ, so Masidonia mị mun, anịatịḅị wa ḍukopẹlẹmẹ na Tamụnọ Ḅe ò mine chịnsam na wa mun Iḅi Ḅẹrẹ mị ḍuko anịnyọ sime apụma pịrị.
Filipaị Ḅie Lidia Ma Siḅụ-vinpịkị Mẹ
11Wa owoin arụ ḅie wẹrị Troas koromaso saḅa dada Samotres nwọ mun mẹ, se anị ḅe eneḅa ḅụ so Niapọlis nwọ mun mẹ. 12Anịnyọ, wa arụ sin so Filipaị mun mẹ, anị Masidonia sẹ tatarị opuama mị anị sọ Romapụ chuku ḅie sime ama-ẹ. Tọn-a ḍin wa nwọse anị ama ḅie simemẹ. 13Ịnyọsara Ene ḅie wa ama mị ḅie pakaso tọrụaka mun mẹ, wa koroma ḅara ḅụ Juapụ koḅirima sime tẹkẹtẹkẹ nyọ anịanga omi-ẹ. Wa kpọnjị sime ọkwẹịn anịanga koḅirima sime eremeni ma pịrịmẹ. 14Wa ḍukoye naa apụma ḅie gbọrịḅọ anị Lidia ma-ẹ, Tayatira ama ḅọ-ẹ, awụwụ ḅịtẹ dẹrịdẹrịḅọ. Árị anị Tamụnọ tẹkẹtẹkẹ eremeniḅọ-ẹ, se Nyanaḅọ Ḅe á kuḅie finji se árị iḅiọkụ se Pọl ḅe ḍukoarịye ma pokimẹ. 15Árị na árịa warịapụ ma na, ini mengi se ini sara so sịkị, anị á mine chịnye-ẹ, “Ó ḅo ị̀ya warị ḅie sime, ó nemikase ị̀rị̀ kọkọma Nyanaḅọ Ḅe ḅereniḅọ ḅara nwọse ị̀ ọkịmẹ ḅẹḅẹ.” Á ḍuko mịnaḅụ lọkọmamẹ anị wa mun ye-ẹ.
Filipaị Ḅie Ini Pọl Ḅe Se Ikoli Ḅie Chumẹ
16Gbọrị ene wa tẹkẹ nyọ mun-arịogbo, gbọrị omoni eremeni tọkụ mine na ịrịamẹ sitẹmẹ á ḅie omi-ẹ, anị á mịẹse á tọrọkọ mịẹḅịaye nwọ ḍukoḍukomẹ. Á ḅakama igbiki mịẹ á nyana apụma pịrịmẹ, mị ḅara se ye ḍuko tomoni pịrị ḅụ. 17Á Pọl ḅe na mine na ḍukoaḅẹ, se olokuaḅẹ, “Mịna owuapụma anị Geletẹịn Tamụnọ Ḅe fịrịnwẹngịapụ-ẹ! Ọ́ mịẹse ineda ḍụaḅọrọma nyanaḅịa ọkụ ini nwọ ḍuko ọ́ pịrịaḅẹ!” 18Tọn-a ene á nwọse mịn mị mịẹmẹ, anị Pọl ḅe ḅụḅalaḅalama so ọkụma ò vinpịkị nwọse tẹmẹ mị ḅẹmẹ, “Jizọs Kraịst Ḅe ẹrẹ ḅụ à tọn ị́ pịrịaḅẹ, á ḅie pakaso!” Anị gbọrị sịkị mị ḅụ tẹmẹ mị á ḅie pakasomẹ. 19Á nyanapụ ma ḅo nemi na ini seni igbiki mịẹarịye ḅarị ofori-ẹ nwọ ḅẹ sịkị, ini Pọl ḅe na Saịlas ḅe na nwọ kunmẹ, se ini fọnọ ḅẹrẹtọn apụma tọrọkọ mun mẹ amaogbo. 20Ini ini ọkị Rom fịrịnwẹngịapụma tọrọkọ mun, se nwọ ḅẹmẹ, “Mịna owuapụma Juapụ-ẹ, se ini mịna ama mị ḅie ḅụfụka pịrịaḅẹ. 21Mịna olokoma na kuraka ama mịẹmịẹaye ini nwọ ḍieaḅẹ; mine Romapụ-ẹ, wa ineda ini ḍiearịye ma ọkị pịkị àrị mịẹ ẹkẹ.” 22Tomonikpo mị inia ḅụ sọ se Pọl ḅe na Saịlas ḅe na tụḅụrụmẹ.
Tịḅịnị ma Pọl ḅe na Saịlas ḅe na ḅụchụayema ọkị kanmẹ, se tọnmẹ na ini ini fomu. 23Ini siḅara se ini fomu so sịkị, ini ini se ikoliwarị ḍikiḍikiḅọ ḅe pịrịmẹ na ori iḅiọkụ se ini ịkasị koroma. 24Ini tọnye mị nwọ mịẹ ḅụ ikoliwarị ḍikiḍikiḅọ ḅe ini seni ikoliwarị ḅieju chumẹ, se inia ḅụo ma se mama opu chịn ikiḅa ḅụ ịkasịmẹ.
25Ḍin ogbo kpekima ḅiri ḅụ, Pọl ḅe na Saịlas ḅe na ini tẹkẹ pịkị nime chu Tamụnọ Ḅe bomaḅẹ, ísí-a ikoliapụma ini pokiaḅẹ. 26Ḅụnemika ḅụ kiri mị opuma jikemẹ, anị ikoliwarị mị jike mun anị ḅe chuku sẹkẹ ḍụparịma sọ lamẹ. Anịkirikiri ḅọkọ mamgba finji saramẹ, se ikoli ma pịkị ikoliapụma ḅụọma ḅụ wọrọ saramẹ. 27Ikoliwarị ḍikiḍikiḅọ ḅe boma sịsẹmẹ, se ikoliwarị ḅọkọ ma finji ọkụ nwọ ọrị sịkị, ọ̀ nwọ chịnmẹ na ikoliapụ mamgba-o ini mangị sosam; anị ori oria okola-agiji mị wọrọ pakụmaye-ẹ, se ọ̀ ḅụ ḅaa-ẹtọn-aḅẹ. 28Ọkụma Pọl ḅe oria ịnyọ laḅara se kụrọma olokumẹ, “Ye se ị́ ḅụ lama ma, mine mgba wa mịnyọ omi-ẹ!”
29Ikoliwarị mị ḍikiḍikiḅọ ḅe tọnjie fịrịmamẹ, se mangị sọmun, se ḅụgeregere ḅụ Pọl ḅe na Saịlas ḅe na ḅụọ chuku ma kunmẹ. 30Anịsịkị ori ini ọkịpakụmaḅo se gbelamẹ, “Sẹnịapụ, cheye à nwọ mịẹse à ḍụaḅọrọma nyana ḅe?”
31“Nyanaḅọ, Jizọs Ḅe ḅereni, ini nwọse ọ̀ ḅẹmẹ, anịsịkị re mị ị́rị́ na ị́ furo mị na ḍụaḅọrọma nyanaḅịaye-ẹ.” 32Anịsịkị ini Nyanaḅọ Ḅe ḅẹrẹ mị ḍuko ori na oria warị ḅie sime ísíapụma na pịrịmẹ. 33Anị gbọrị ḍin mị ḅie, kirikiri anị ikoliapụ ḍikiḍikiḅọ ḅe ini ọkị se ini layema sịkịrịye-ẹ; se ori na ò furo ḅie apụ mamgba na anị gbọrị sịkị ḅụ mengi saramẹ. 34Anịsịkị ọ̀ Pọl ḅe na Saịlas ḅe na nwọ ọkị iwo oria warị mun se fịye se ini pịrịmẹ. Ori na ò furo na ḅieḅẹlẹ inia ḅie ḅeinmẹ, anịatịḅị mịọkụ ini Tamụnọ Ḅe nwọ ḅerenisam.
35Anị ḅe eneḅa Rom ḅẹrẹtọn apụma tọn kurukuru ḅụchụaye chụapụ ma fịrịtịḅịnị ma pịrịmẹ na, “Ómine owuapụma ḅụḅarasin se ini so.”
36Anị ikoliwarị ḍikiḍikiḅọ ḅe anị ḍuko Pọl ḅe pịrịye-ẹ, na “Sẹkẹnị ma ini kụrọ pịrịsam na wa ị́rị́ na Saịlas ḅe na ikoli ḅie nwọ sin. Anịgose, ó deinma ḅụ so.”
37Ọkụma Pọl ḅe nwọse kurukuru ḅụchụaye chụapụ ma fịrịtịḅịnị ma ḅẹmẹ, “Wa koro se ḅẹrẹsi nyana gbọrị oloko sọnị ofori-ẹ, anị sọnị ini amaogbo wa fomumẹ, mine pịkị Romapụ-ẹ! Anịsịkị ini wa se ikoliwarị ḅie chumẹ. Se mịọkụ ini ḅọịma wa pakụma ḅi-ao? Anị mị ngịsị mịẹ ẹkẹ! Ye Rom fịrịnwẹngị tịḅịnịma ḅarana mịnyọ ḅo se mine ọkịpakụma.”
38Kurukuru ḅụchụaye chụapụ ma fịrịnwẹngị tịḅịnịma ma ọkwẹịn ma ḍuko Romapụ fịrịtịḅịnị ma pịrịmẹ se ini ḅo naamẹ na Pọl ḅe na Saịlas ḅe na Romapụ-ẹ nwọ ḅẹ sịkị, inia ḅalafamẹ. 39Anị ini sọmun ini tẹkẹye-ẹ, ini anịsịkị ikoli ḅie ini pakụmaḅomẹ, se ini ḅẹmẹ, na ama mị ḅie ini so. 40Pọl ḅe na Saịlas ḅe na ikoli ḅie pakaḅo se Lidia ma warị mun mẹ. Anịnyọ ini mịnapụma na ịrịamẹ, kuḅie kụrọma ọkwẹịn kọn ini pịrị se somẹ.
Currently Selected:
Okunwẹngịapụ 16: OBTP
Highlight
Share
Copy
Want to have your highlights saved across all your devices? Sign up or sign in
The Bible Society of Nigeria
