Okunwẹngịapụ 17

Tẹsalonaịka Ḅie

1Amfipolis na Apolonia amama ḅie anị Pọl ḅe na Saịlas ḅe na tolu ḅọrọ mun Tẹsalonaịka ama mị laye-ẹ, ama mị ḅie Juapụ tẹkẹwarị omi-ẹ. 2Se Pọl ḅe oria mịẹmịẹye ḅara ḅụ sọ tẹkẹwarị mị ḅie mun mẹ. Anịnyọ tẹrẹ-a Ịnyọsara Ene na gbasịye ọ̀ nwọse Fịafịa ḍiri mị ḅie simeaye go pịkị, 3àrị pufinji ini pịrịmẹ, se ḍiepakụmamẹ na Mẹsaya Ḅe ọ̀ tọrụsiọrịḅịa se pịkị fịḅụsịsẹḅịa. Pọl ḅe nwọ ḅẹmẹ, “Ḅe à nwọ ḅẹrẹ ḅẹarị Jizọs Ḅe anị Mẹsaya Ḅe-ẹ.” 4Anị inia ḅie dapụ ḅụokoromẹ se Pọl ḅe na Saịlas ḅe na ḅụsọmẹ anị Tamụnọ tẹkẹtẹkẹ tọn-a Grik apụ mịẹ ọkụ-ẹ, pịkị tọn-a ẹrẹpaka eremeni na.

5Ọkụma anị Juapụma ḅụnwọnwọmamẹ se yeḅụsọka pịkị oforifori ḅara se ateliogbo nwẹngịma ḅọrọ apụma koḅirimamẹ amafiemaye mịẹḅịa ẹrẹchị. Ini bebe ama mị mgba fiema se owu se Jasịn nwọ chịn gbọrị owuḅọ warị pakamẹ, mịẹse ini Pọl ḅe na Saịlas ḅe na ọkị ḅo nweni ma pịrịḅịa ọkụ. 6Ọkụma ini ini ḍọkịọrịka sịkị, ini Jasịn ḅe na pịkị ḅereniapụma ḅụ dapụ na fọnọ ama mị ḅie ḅẹrẹtọn apụma damamunmẹ, se olokumẹ, “Mịna owuapụma ḅụfụka pịrịsam nyọ goyegoye ḅụ! Mịọkụ ini mịna ama ḅosam. 7Se Jasịn ḅe ini se oria warị ḅie koromamẹ Rom Sẹdaḅọ ḅe oloko mamgba ini kansam, ḅẹaḅẹ na jịn amanyanaḅọ omi-ẹ, Jizọs nwọ chịnḅọ.” 8Ma ọkwẹịnma ini nwọse nyọ fiema tomonikpo mị na ḅẹrẹtọn apụma na pịrịmẹ. 9Ḅẹrẹtọn apụma mịẹse Jasịn ḅe na ísíapụma na ini gbẹịn na iḅi igbiki ḅịpị nwọ gbẹịnmẹ, anị ini inia ḅụ ḅarasin se ini soye-ẹ.

Biria Mị Ḅie

10Ene san kirikiri ḅereniapụma Pọl ḅe na Saịlas ḅe na nwọse Biria fịrịmamẹ. Ini mun lasịkị, ini Juapụ tẹkẹwarị mị nwọ mun mẹ. 11Anịnyọ sime apụma iḅi kuḅie nyanatẹịn Tẹsalonaịka ḅie sime apụma nẹngịmẹ. Ini opuma ḅụkarakarama oku mị pokimẹ, se eneḅeneḅene ini Fịafịa ḍiri ma ḍawọmẹ, mịẹse ini Pọl ḅe kọn-arị ọkwẹịn mị se karakaraye ḍọkị nemiḅịa ọkụ. 12Inia ḅie tọn-a apụ ḅerenimẹ Grik eremeni ma ḅie ḅịpịḅẹrẹlapụ ma na pịkị owuapụma ḅie dapụ sọ ḅerenimẹ. 13Ọkụma Tẹsalonaịka ḅie sime Juapụma ḅo naa na Pọl ḅe pịkị Biria mị ḅie Tamụnọ ḅẹrẹ mị ḍukosam nwọ ḅẹ sịkị, ini anịnyọ ḅo se sakị tomonima chukuruma se amafiemaye mịẹmẹ. 14Anị kirikiri ḅereniapụma Pọl ḅe seni tọrụ aka fịrịma pakụmamẹ; ọkụma Saịlas ḅe na Timoti ḅe na Biria mị ḅie pa simemẹ. 15Pọl ḅe pamun sime owuapụma ori na mun gbọtụḅara Atẹns nwọ chịn ama mị lamẹ. Anịsịkị ini vinpịkị Biria nwọ mun mẹ, Pọl ḅe ini fịrịmamẹ na ini mịẹse Saịlas ḅe na Timoti ḅe na ḅo ọ̀ ḅụ sọ ini ineda anị mị mịẹḅịa sịkị paka kirikiri.

Atẹns Ḅie

16Pọl ḅe Atẹns ḅie Saịlas ḅe na Timoti ḅe na koruarị sịkị, ò kuḅie opuma lọkọmẹ ama mị ḅie oru ma ḅein ḅara mị ọ̀ nwọ ọrị sịkị. 17Anị ọ̀ tẹkẹwarị mị ḅie Juapụma na pịkị Tamụnọ tẹkẹtẹkẹ Jịnsẹapụma na ọkwẹịnmaye-ẹ, pịkị amaogbo ḅụ na, ene goyegoye ḅụ ḅo àrị nyọma la apụ goyegoye na. 18Epikuria ogbo apụma na Stọịk ogbo apụma na ḅie da yeḍieapụ ọ̀ damaḅomẹ se ori na ḅẹrẹ piki-amẹ, “Cheye ḅe yenemika pakayepakaye ḍọkịḅọ ḅe nwọ ḍuko ḍọkị-ao?”

Ísíapụma pẹkẹrẹmẹ, “Jịn ama oru ḅẹrẹ ọ̀ nwọ ḍukoarị ọkụ simemẹ.” Ini mịn mị nwọ ḍukomẹ, anịatịḅị Pọl ḅe Jizọs Ḅe gbolomaye na fịḅụsịsẹ mị na nwọ ḍukosimemẹ. 19Anị ini Pọl ḅe ọkị, se ò se Arịopagọs nwọ chịn ama koḅiria mị tọrọkọ mun ye-ẹ, se nwọ ḅẹmẹ, “Wa ḅimẹ ị́ ḅẹrẹ ḍukoarị ịwọ ḍieye mị wa nwọ nemi. 20Ị́ ḍuko se wa naa àrị daye mịna ḅụ kịrịaye fiemẹ, wa àrị fiearịye nwọ nemi ḅimẹ.” 21(Anịatịḅị Atẹns apụma na ama ḅie anga igoniapụ mamgba na inia sịkị fama se ịwọma paka ḅẹrẹ poki pịkị anị ḍuko mị inia ḅụḅẹlẹḅẹlẹmẹ.)

22Pọl ḅe Arịopagọs ḅẹrẹchiri mị tọrọkọ chịẹ se nwọ ḅẹmẹ, “À ḍọkịḅo ọrịmẹ na ḅọkọ tọrụkịrịkịrị ḅụ ómine Atẹns apụma anị tẹkẹ mịẹmịẹaye opuma nwọ ḅẹlẹma apụ-ẹ. 23Anịatịḅị àrị ọ́mịna ama mị ḅie nwẹngịarị sịkị, ọ́ tẹkẹarị nyọma à nwọ ḍiki sịkị, à gbọrị ẹbẹ ọrịmẹ, anị ọgọnọ ye gịẹịnmẹ, ‘Sime Nweni ma nemika Tamụnọ Ḅe pịrịye.’ Ori, ó nemika se tẹkẹarị ḅọ ḅe anị mịọkụ à ḍuko pakụma ọ́ pịrịarịḅọ ḅe-ẹ. 24Tamụnọ Ḅe tomonikiri mị tẹmẹḅọ ḅe, pịkị anịa ḅie sime yegoyegoye na, ori anị so mị na tomonikiri mị na Nyanaḅọ Ḅe-ẹ, ọ̀ pịkị tomoni nama warịma ḅie anga-angakẹ. 25Ori na ọ̀ ḅụ na anị ḍumo na ọwụsara na pịkị yegoyegoye na nwọ se tomoni mamgba pịrịaḅẹ nwọ ḅẹ sịkị, mine tomonima nwẹngị ọ̀ pịrị se ọ̀ ḅụpalịma se ori ḅiḅịaye ofori-ẹ. 26Gbọrị owuḅọ ḅụ ọ̀ ḅọrọ kịrịkịrị tomoni mamgba nwọ tẹmẹmẹ, se ini mịẹse ini bebe tomonikiri mị ḅie angamẹ. Ori na mịnaḅụ na sịkị ma laka simeogbo ini angaḅịa sịkị na eke ma na nwọ tọn koromamẹ. 27Ọ̀ mịn mị nwọ mịẹmẹ, mịẹse ini ọ̀ ḍọkịḅịa ọkụ, sosiọkụma ini ọ̀ ḍọkịḅịa ini ò ḅiarị sịkị ḅụ. Anịẹḅẹ sọ, Tamụnọ Ḅe ò jokoma mịna ḅụ wẹrị sasama sime sịkị ofori-ẹ; 28anị gbọrịḅọ ḍukosa ḅara ḅụ na,

‘Oria kụrọ ḅụ mị wa wẹrị ḍumo, nwẹngị se ḍumoarịye-ẹ.’

Anị sime ḅara, anị ọ́mịna nime gịẹịn apụma ḅẹ ọkụ-ẹ na,

‘Mine sọnị oria awọ-ẹ.’

29Mine Tamụnọ awọ-ẹ nwọ ḅẹ sịkị, wa koroma gbẹịnkẹ na ò sime ḅara, anị goli-ẹ, anịkanịka seleḅa-ẹ se tẹmẹye-ẹ, anịkanịka ḍụparị simeọkụ ọ̀ nwọ simemẹ, tomoniḅọ aka na nemi na nwọse mịẹḅoye ḅara. 30Tamụnọ Ḅe tomonima ò nemika sịkị ma ọ̀ nwọ ḍikitọrụsinsam, ọkụma mịọkụ, ọ̀ tọn nyọ nyọ ḅụ sime apụ mamgba pịrịmẹ na, ini inia simịẹmịẹaye ma ḅụ vinpịkị. 31Anịatịḅị ọ̀ karakara ḅẹrẹkọn tomonikiri mị mgba pịrịḅịa ene ọ̀ nwọ tọn wẹrịsam, anị ọ̀ sẹlẹpakụmaḅo sa ḅọ ḅe ḅụ. Ọ̀ mị elekima mị se ḅẹḅọ ḅẹḅọ nwọ ḍiesam, anị ọ̀ fịḅụsịsẹma ḅọ ḅe ḅụ!”

32Pọl ḅe fịḅụsịsẹ ḅẹrẹ ḍuko se ini naa sịkị, inia ḅie dapụ ò se ḍẹrịye mịẹmẹ, ọkụma ísíapụma nwọ ḅẹmẹ, “Mịn mị gbolomaye mị jịn sịkị ḅụ wa pịkị anị naa ḅimẹ.” 33Anị Pọl ḅe ḅẹrẹchiri mị ḅie pakasoye-ẹ. 34Da owuapụ ọ̀ ḅụ sọmẹ, se ḅerenimẹ, inia ḅie Dioniesọs, Arịopagọs ḅẹrẹchiri ḅọ ḅe na, Damaris nwọ chịn gbọrị eremeniḅọ na, da jịn apụ na pịkị ḅerenimẹ.

Currently Selected:

Okunwẹngịapụ 17: OBTP

Highlight

Copy