Okunwẹngịapụ 15

Jerusalẹm Ḅie Koḅirima Mị

1Da owuapụ Judia ḅie sime so Antiọk ḅomẹ se sakị ye se ḅereniapụma ḍiemẹ, “Ómine ineda ḍụaḅọrọma nyana ẹkẹ ómine ọ́mịna ḅụ ma pẹlẹka simeogbo, Moziz Oloko mị ḅi ḅara ḅụ.” 2Pọl ḅe na Banabas ḅe na mịn mị gose opuma ḅalafama ḅara se piki-a, se ini na ye jineamẹ anịẹrẹchị ini ḍukopẹlẹmẹ na Pọl ḅe na Banabas ḅe na Antiọk ḅie sime jịn apụ na Jerusalẹm mun se mị ḅẹrẹ mị gose okunwẹngịapụ ma na pịkị sẹnịapụma na ịrịa.

3Chọchị mị ini se anịanga fịrịmamẹ, se ini Fonisia na, Sameria na, amama ḅie tolu mun-arị sịkị, Jịnsẹapụma vinpịkị Tamụnọ Ḅe damaḅosa ọkụ nwọ ḍukomẹ; mịn ḅẹrẹ mị opu ḅieḅẹlẹ nwọse ḅereniapụma pịrịmẹ. 4Iniḅo Jerusalẹm mị lasịkị, chọchị mị iḅi ḅara nwọse ini ọkịmẹ, okunwẹngịapụ ma na sẹnịapụma na, anị Tamụnọ Ḅe ini se nwẹngị fịrịma ini nwọ ḍuko pịrị apụma. 5Ọkụma ḅereniapụma ḅie dapụ Farisiapụ ma ḅụ sime apụma, sịsẹ chịẹ se nwọ ḅẹmẹ, “Jịnsẹapụma ini inia ḅụ ma pẹlẹḅịa, se pịkị ḍuko ini pịrị na ini Moziz Oloko mị koko.”

6Okunwẹngịapụ ma na sẹnịapụma na ịrịa gboloma se koroma nyana mịn ḅẹrẹ mị pịrịmẹ. 7Ini ḅọlọ sịkị se anịa ḅẹrẹ nwọ jinea so sịkị, Pita ḅe sịsẹ chịẹ se nwọ ḅẹmẹ, “Ị̀ya mịnapụ, ó nemimẹ na ḅọlọsa sịkị ngịsị Tamụnọ Ḅe ọ́mịna ogboku ị̀ sẹlẹpakụmamẹ, na à mun Iḅi Oku mị nwọ ḍuko Jịnsẹapụma nwọ pịrị-ẹ, mịẹse ini ineda naa se ḅereniḅịa ọkụ. 8Se tomoni-a kuḅiemgbọlụma nwọ nemi Tamụnọ Ḅe ò Jịnsẹapụma sọ ọkịmẹ nwọ ḅẹye gose, Fịafịa Tẹmẹ Ḅe se ini pịrịmẹ anị ò se wa pịrị ḅara mị. 9Mine na ini na ogboku ò ye mịẹ kịrịmakẹ; ori inia kuḅiemgbọlụma nwọ mịẹfịafịamamẹ ini ḅerenimẹ nwọ ḅẹye gose. 10Nde anịọkụma ó gose Tamụnọ Ḅe nwọ ḍaḍikiḅịa ḅara nwọ ḍọkịarịye, ikuye nwọ seni ḅereniapụma aba gbana ḅụ, anị mịna ḅieju-aḍapụma na mine na ineda deki ẹkaye ikuye mị? 11Ẹn-ẹn! Wa ḅereni se Nyanaḅọ Jizọs Kraịst Ḅe ḍikiḅụgerere ḅụ ḍụaḅọrọma nyana ọkụ mị anị ini sọ ḅereni pịkị ḍụaḅọrọma nyana ọkụ-ẹ.”

12Anị bebe kpo mị mgba yawụmamẹ, ini Banabas ḅe na Pọl ḅe na Tamụnọ Ḅe inia ḅụ ḅọrọ se Jịnsẹapụma ogboku mịẹ ḅụgbiripumaye ma na ḅụbuamaye ma na nwọ naa sịkị. 13Ini ọkwẹịn so sịkị, Jems ḅe pụkọ deki ọkwẹịnmẹ, “Ómine ị̀ poki ị̀ya mịnapụ! 14Saịmọn ḅe ma ḅọlọka sịkị ḅụ Tamụnọ Ḅe sakị ḅụ Jịnsẹapụma nwọse yechịn ọkụ mị, na inia ogboku ò se oria tomoni mịẹḅịa apụ nwọ sẹlẹọkị ọkụ nwọ ḍuko ḅelema wa pịrịsam. 15Ịkịankoroapụ ọkwẹịnma iḅiọkụ mịn mị na kuramẹ. Fịafịa ḍiri mị ḍuko ḅara ḅụ, na

16‘Mịn mị ḅọrọ sịkị à vinpịkị ḅoḅịa, Nyanaḅọ Ḅe ọkọ ḅẹmẹ,

se pịkị Devid Amanyanakiri mị ọkị ḅoḅịa.

Anịa ḅụ kan ayema à nwọ tẹlịmaḅịa

se mịẹse anị kụrọḅịa.

17Anị ḅara ḅụ kirikọn apụ mamgba ị̀ damaḅoḅịa,

à se ị̀ya tomoni mịẹḅịa ẹrẹchị à chịn ọkị Jịnsẹapụ mamgba na.

18Anị Nyanaḅọ Ḅe ḍuko ọkụ-ẹ, mịn mị nwọ ḍuko pakụmaḅọ ḅe ḅọlọ sịkị ngịsị.’ ”

19Jems ḅe nwọ ḅẹmẹ, “Ị̀ kuḅie ọkụma, nwọ Jịnsẹapụma ḅụ vinpịkị Tamụnọ Ḅe damaḅoarị apụma wa ḅụfụka se ini pịrị ẹkẹ. 20Anịnakaraka wa ḍiri gịẹịn ini pịrị, ḍuko ini pịrị na fịafịaka fịye goyegoye ini fịma, anịatịḅị ini anị se oru pịrịsam: sẹfị ḅụ ini inia ḅụ ma sin; ini fọngọlọ ḅaa nama goyegoye nwọ pẹị ma, pịkị nama pulo sọnị. 21Anịatịḅị ḅọlọ sịkị ngịsị ini Moziz Oloko mị nwọ gogosam tẹkẹwarịma ḅie Ịnyọsara Ene goyegoye ḅie, oria ọkwẹịn ma ama goyegoye ḅie ini pịkị nwọ ḍukoaḅẹ.”

Ini Ḍiri Gịẹịn Ḅereni Nyana Jịnsẹapụ Ma Pịrịmẹ

22Anịsịkị okunwẹngịapụ ma na sẹnịapụma na pịkị bebe chọchị mị na, ḍukopẹlẹmẹ na nweniogbo mị ḅie ini da owuapụ sẹlẹ se ini Pọl ḅe na Banabas ḅe na ḅụ sọ Antiọk mun. Ḅereniapụ ma ḅakama osi se pịrị mama apụ nwọ sẹlẹ ḅomẹ, Judas ini Basabas nwọse chịnḅọ ḅe na pịkị Saịlas ḅe na, 23se ini inia ḅụ ḅọrọ mị ḍiri mị se fịrịmamẹ:

“Mine, okunwẹngịapụ ma na sẹnịapụma na, ọ́mịna mịnapụma na, kereni ḅịpị se mịna mịnapụma anị Jịnsẹ ḅie ini yi apụ mamgba sẹịnmamẹ, anị Antiọk na, Siria na, pịkị Silisia na ḅie anga apụma. 24Wa naamẹ, na mịna ḅie dapụ pakamun ḅụfụka se ọ́ pịrị pịkị ó kuḅie lọkọmaḅẹ inia ọkwẹịnma ḅụ; ọkụma mine ọkọ se ini fịrịmakẹ. 25Anịẹrẹchị wa ḅo ịrịamasam, mine mgba ḅịpị pịkị ogbosọsam na wa nweni sẹlẹ, se ini seni ọ́ fịrịma. Ini mịna ḅụ yela ikiapụ, Banabas ḅe na Pọl ḅe na ḅụ sọ munḅịa, 26nwọ inia ḍumo ma abalaka ḅara se fama wa Nyanaḅọ Jizọs Kraịst Ḅe fịrị mị pịrịarị apụma. 27Anịọkụma, wa Judas ḅe na Saịlas ḅe na nwọ seni ọ́ fịrịmaḅẹ, ini ḅo tọrụ na gịẹịn ayema nwọ ḍuko ọ́ pịrịḅịa ọkụ. 28Fịafịa Tẹmẹ Ḅe na mine na ḅịpị ogbosọsam na jịn ikuye ḅarị ọ́mịna ọgọnọ gbana ma, ma mịẹka mịẹka ḅara sime olokoma sikima ọkụma: 29ini seni oru pịrị fịye goyegoye ọ́ fịma, ó pulo ḅu ma, fọngọlọ ḅaasa nama goyegoye ọ́ pẹị ma, pịkị ama na ere na si nwẹngị ḅụ ómine ọ́ ḅụ ọlọ. Ómine iḅiye mịẹḅịa ó nemikase mayema ḅụ ọ́ ḅụ ọlọ ọkụma. Ómine iḅiọkụ sime.”

30Tomonima ini nwọ fịrịma pakụmamẹ, se ini Antiọk nwọ mun ḅereniapụ mamgba koḅirima se ḍiri mị se ini pịrịmẹ. 31Tomonima ḍiri mị go so sịkị ḅieḅẹlẹ inia ḅie ḅeinmẹ kuḅie kụrọma ọkwẹịn ma gose. 32Judas ḅe na Saịlas ḅe na, ini sọnị ịkịankoroapụ ḅara ḅụ ḅọlọ sịkị se mịnapụma na ọkwẹịnmamẹ, kụrọkuḅie na ịnyọ na nwọ seni ini pịrịmẹ. 33Ini anị anga kele sime so sịkị, mịnapụma deinma ḅụ ini ḅọrọma se ini somẹ, se ini vinpịkị so ini se fịrịma apụma damamunmẹ. 34[Ọkụma Saịlas ḅe ò kuḅie ḅụ tọnmẹ na ori anịnyọ simeḅịa.]

35Pọl ḅe na Banabas ḅe na Antiọk ḅie ini kele sịkị fama simemẹ. Tọn-a jịn apụ na ini na Nyanaḅọ Ḅe ọkwẹịn mị nwọse yeḍie pịkị anị ḍukomẹ.

Pọl Ḅe Na Banabas Ḅe Na Puamẹ

36“Ye wa vinpịkị mun mịna mịnapụma la opuamama ḅie anị wa Nyanaḅọ Ḅe ọkwẹịn mị ḍuko ḅọrọsa nyọma, se ḍumo ini na simeọkụ nwọ nemi.” 37Banabas ḅe ò ḅimẹ ọ̀ Jọn Mak ḅe nwọ ọkị inia ḅụ chụa mun, 38ọkụma Pọl ḅe ò koromakẹ na anị karakaramẹ ini ori ọkị, anịatịḅị ori ini na sime ini mun ye mị ḅe kuluma mị lakẹ, ọkụma ori ini koroma vinpịkị somẹ Pamfilia ḅie. 39Ini kụrọma ye jinea se ḅịpịogbosọka inia ogboku pakaḅomẹ, se ini pua sikimamẹ. Banabas ḅe Mak ḅe ọkị se dọkụpaka Saịprọs nwọ mun mẹ, 40anịsịkị Pọl ḅe Saịlas ḅe sẹlẹọkị se ori na somẹ, ḅereniapụma ini tokoni se ini se Nyanaḅọ Ḅe ḍikiḅụgerere ḅara chụamẹ. 41Siria na Silisia na ḅie ọ̀ ḅọrọmẹ, se ọ̀ chọchị ma mịẹkụrọmamẹ.

Currently Selected:

Okunwẹngịapụ 15: OBTP

Highlight

Copy