Okunwẹngịapụ 14

Iniḅo Aịkonịọm Lasịkị

1Anị gbọrị ḅara mị anị Aịkonịọm ḅie sọ anị paka ọkụ-ẹ: Pọl ḅe na Banabas ḅe na tẹkẹwarị mị ḅie mun mẹ, se ọkwẹịn so ọkụma tọn-a Juapụ na Jịnsẹapụ na pịkị ḅo ḅereniapụ sọmẹ. 2Ọkụma Juapụma ḅie ḅereni ḍụkụka apụma, Jịnsẹapụma nwọ kpẹịnmamẹ mịẹse ini mịna apụma na tụḅụrụmẹ. 3Okunwẹngịapụ ma anịnyọ sime ḅọlọ sịkị lamẹ. Ini kuḅie kụrọma Nyanaḅọ Ḅe gboloma ọkwẹịn mị kọnmẹ, ò kụrọ se ini pịrị, ini se tọn-a ḅụgbiripumaye na ḅụbuamaye na nwọ mịẹmẹ, se ḍiepakụmamẹ na oria ḍikiḅụgerere oku mị kọkọmaye-ẹ. 4Opuama mị ḅie sime tomonima ini puamẹ: dapụ Juapụma ḅụ sọmẹ, ísíapụma okunwẹngịapụ ma ḅụ sọmẹ.

5Anịsịkị Jịnsẹapụma na Juapụma na ḅo tịḅịnịma na ḅịpịogbo sọmẹ se sitọrụ se ini ḍiki se imgbele se ini gbinmẹ. 6Okunwẹngịapụ ma ḅo anị mị nwọ nemi sịkị ini mangị Listra na Dabi na mun mẹ, Laịkaonịa ḅie sime amama pịkị anị kelema nyọma ḅie na. 7Anịnyọ ini Iḅi Ḅẹrẹ mị ḍukomẹ.

Iniḅo Listra Na Dabi Na Lasịkị

8Listra ḅie gbọrị ikeliḅọ omi-ẹ, ikeli ḅụ ini wẹrị ò yimẹ, ini ò yi sịkị ngịsị ma ọ̀ nwẹngịkẹ. 9Ori anịnyọ kpọnjị sime se Pọl ḅe ọkwẹịn ma nwọ poki simemẹ. Pọl ḅe ọrịmẹ na ò ḅereni nyanamẹ ọ̀ pịkị ineda gwọḅịa, anị Pọl ḅe gbụkụkụma ò ḍikiye-ẹ, 10se gele pụkọ ḅụ nwọse ọ̀ ḅẹye-ẹ, “Sịsẹ chịẹ!” Nweniḅọ ḅe ḍosi chịẹ se sakị nwẹngị nyọ kelemamẹ. 11Tomonima Pọl ḅe mịẹye mị nwọ ọrị sịkị, ini sakị inia ama ọkwẹịn Laịkaonịa ḅịpị ḅụ olokumẹ, “Oru ma àrị tomoni tọrụ nwọse koro wa damaḅosam!” 12Ini nwọse Banabas ḅe chịnmẹ Zụs, pịkị nwọse Pọl ḅe chịnmẹ Hẹmis, anịatịḅị ori mị ọkwẹịn ḅụ tịḅịdaḅọ-ẹ. 13Zụs orualaḅọ ḅe, oria oruwarị ama mị tọrọkọ sime ḅọ ḅe, owoi nambulo na ngwengwe na nwọse ama mị ḅie nụngọ ḅọkọ ḅomẹ, se tomonikpo mị ḅimẹ ini agba mịẹ okunwẹngịapụ ma pịrị.

14Banabas ḅe na Pọl ḅe na ini mịẹḅịa ẹrẹchị ḍọkịarịye nwọ naa sịkị ini inia ḅụchụayema nwọ jine kanmẹ, se mangị tomonikpo mị ḅie sọ, se olokuaḅẹ, 15“Cheye gose ọ́ mun mịn mị mịẹ ḍọkị-ao? Mine ma ọ́mịna juo-a tomoni-ẹ! Wa mịnyọ ḅomẹ Iḅi Ḅẹrẹ mị ḍuko ọ́ pịrịḅịaye gose, mà ye ḅụ sọkaye ma ḅụ ọ́ pịkị se so ḍumo Tamụnọ Ḅe daḅịa ẹrẹchị anị so mị na, sẹkiri mị na, tọrụ mị na, ḅo pịkị arịa ḅie simeye ma nwọ tẹmẹ ḅọ ḅe. 16Ḅọrọsa sịkị mị ò ḅereni tomoni mamgba pịrịmẹ na ini inia ḅụḅẹlẹ ateli ma nwọ nwẹngị. 17Ọkụma ọ̀ sịkịmamgba oria sime ḅara nwọ ḍiepakụma-pakụmamẹ, ọ̀ mịẹarị iḅiaye ma ḅụ ḅọrọ soḅie ene seni ọ́ pịrịmẹ, pịkị chịnmgbọlụ na arịa karakara sikima ḅụ ò fịye se ọ́ pịrịmẹ pịkị ḅieḅẹlẹ se ọ́mịna kuḅie ḅeinmamẹ.” 18Mà ọkwẹịn ma ini nwọ kọn ini pịrịaḅẹ nwọ ḅẹ sọnị anị sarasara okunwẹngịapụ ma pịrịkẹ tomonikpo mị kiki, agbamịẹ ini pịrị ḅụ.

19Da Juapụ Pisidia sẹ mị ḅie sime Antiọk na Aịkonịọm ḅie na sime ḅomẹ se tomonikpo mị fẹ inia ḅụ pịrịmẹ, ini imgbele se Pọl ḅe gbin se ama mị ḅie ọ̀ fọnọ pakụmamẹ, ini nwọ chịnmẹ na ọ̀ fịsam. 20Ọkụma ḅereniapụma koḅirima ò kelema sịkị, ọ̀ sịsẹmẹ, se vinpịkị so ama mị ḅie mun mẹ. Anịḅe ene ḅa mị ḅụ ori na Banabas ḅe na so Dabi mun mẹ.

Ini Vinpịkị Siria Ḅie Sime Antiọk Mị Mun Mẹ

21Pọl ḅe na Banabas ḅe na Dabi mị ḅie Iḅi Ḅẹrẹ mị ḍukomẹ, se tọn-a ọḅụḍukoapụ nwọ nyana ḅomẹ. Anịsịkị ini vinpịkị so Listra na Aịkonịọm na pịkị Pisidia ḅie sime Antiọk na mun mẹ. 22Ini ịnyọ se ḅereniapụma ḅụ chụa se inia kuḅie kụrọmamẹ mịẹse ini kọkọma ḅara nwọse ḅereni ḅụ simeḅịa ọkụ. “Wa tọn-a tọrụsiọrị ḅie ḅọrọ mun Tamụnọ Amanyanakiri mị ḅie sọḅịa,” ini nwọse ini ḍiemẹ. 23Chọchị goyegoye ḅie ini tịḅịdapụ tọn koroma ini pịrịmẹ tẹkẹ ḅụ na ḅuruseḅụḅaama ḅụ na, se ini ini ḅọrọma Nyanaḅọ Ḅe ḅara chụamẹ, ini inia kuḅie se ḅụgbanasa Ḅọ ḅe.

24Ini Pisidia sẹ mị ḅọrọ sịkị ini tolu mun Pamfilia lamẹ. 25Ini Pẹga ḅie oku mị ḍukomẹ, se anịsịkị so Atalia mun mẹ, 26se anịnyọ wẹrị tọrụ ḅụ ḅọrọ Antiọk mun mẹ, ini ini seni Tamụnọ Ḅe ḍikiḅụgerere ḅarama ḅie chụa nyọ mị anị ini mịọkụ nwẹngị karamasa fịrị mị gose.

27Ini ḅo Antiọk ḅie lasịkị ini chọchịapụ ma koḅirima se Tamụnọ Ḅe ini se mịẹye mamgba nwọ ḍuko ini pịrịmẹ, ọ̀ pịkị ateli finji Jịnsẹapụma pịrị se ini ọkwẹịn mị ḅereni ḅara mị na. 28Ini ḅereniapụma na sime ḅọlọ sịkị lamẹ.

Currently Selected:

Okunwẹngịapụ 14: OBTP

Highlight

Copy