Egberima-Ẹkwẹn 9
9
Nimi na Oḅori-sọ na
1Nimi á warị nama tẹẹ, sọnọma ḅeriye mie anị nyana yee. 2Árị á kẹ alalị fịye mịẹ ḅẹ nama ḅaa tẹ, tala kẹ iru ḅio sụa tẹ, dẹbịlẹ mẹ dẹẹ tẹẹ. 3Árị á fịrịmẹnjị-eremịna-awọmẹ fịrịma pakama tẹ in mu ama mẹ ḅio geletẹịn yọ mẹ ḅụ olokuu, 4“Ye-nimia atomi, ó ḅoo!” Tẹ árị oḅori tomḅọ ḅe ḅẹẹarị, 5“Ḅoo, ì fịye fịị, pịkị à gwa tẹ iru mẹ ḅuu. 6Ḅarị ye-nimia atomi ma na mẹnjị ma, tẹ ḍumoo. Ḍawọye nimi etela mẹ ḅio mẹnjịị.”
7Í iḅiọkụ ḅụụ-gelema ḍin tomḅọ mịẹ-irima ye ḅụ ọ̀ karakaramarị kụma ori ị́ mịẹ-sima ḅa. Í si tomḅọ ḍiki-ịganịarị kụma ò ye kẹ ị́ lama ḅa. 8Gbala-gbala iḅiọkụ ḅụụ-gelemarị tomḅọ mịẹ-irima ye ḅụ ọ̀ karakarama ma; ori anị gotẹ í ḍiki-ḅioḅu ḅa. Kụma í ye-nimi tomḅọ karakaramarị kụma, ori ị́ kụn ḅa. 9Í ḍuko ye-nimiapụ pịrị ye pịrị ye, anị mịẹtẹ in nimi nyana tọrọkọ mu ḅa. Í ḍuko karakaraye-mịẹapụ pịrị ye tiye-o tiye-o sọ, anị ye kẹ ịn ḍawọ ḍịn tẹ ye ḅụ sụa ḅa.
10 #
Job 28.28; Dev 111.10; Egb 1.7 Í nimi nyana ḅarị ḅẹḅẹ, tarị-tarị KỊNỊNYANAḄỌ ḅe mangịma tẹ ọ̀ ḅịḅị pokii. Ị́ Fịafịa Ḅọ ḅe nimi tẹ ḅẹḅẹ í yefieye naa nyana tẹẹ. 11Nimi ye kẹ í ḍumo mu la ḅarị akụra ḅụ sụa ḅa. 12Í ye-nimi-nimi, ị́yẹrị mie anị ḅẹ sọye fị ḅarịye; tẹ ị́ anị sịkị-sịkị, ị́yẹrị mie anị ḅẹ tọrụsiẹrị kọn ḅarịye.
13Oḅori-sọ kịkarị ye anie oloku-ma ḅọrọarị ye-nimia, ḅụụ-jịrị-jịrị-a ẹrẹḅọ. 14Árị nyana tẹ mịẹarị ye anie, á warị ḅọkọ lẹgị-sime, anịanịa ama mẹ ḅio geletẹịn yọ ḅụ lẹgịye kẹ yaụ-sime, 15tẹ nwẹnị mẹnjị-ḅọrọapụ-ḅọrọapụ sịn, amịna mịẹ gotẹ paka muarị apụ ma. 16Ọ́ sọ-ḅoo, ye-nimia-apụ! Á nwẹnị oḅori tomḅọ ḅe ḅẹẹarị: 17“Furu ḅo wararị minji ḅẹlẹ ḅara-kuḅu ḅẹ ye nẹngịm. Furu ḅo wararị fịturu ḅẹlẹ ḅara-kuḅu ḅẹ ye nẹngịm.” 18Á ḅara-ḅio sọ tẹ apụ ma nimi-a mịnẹ á warị mu-apụ mu-apụ fị-fịịm, anịsakị tarị sọ-mu tẹ apụ ma mịọkụ ideri mu ḍuḅu ḅio sọ tẹẹ.
Currently Selected:
Egberima-Ẹkwẹn 9: KBTP
Highlight
Copy
Compare
Share
Want to have your highlights saved across all your devices? Sign up or sign in
(C) The Bible Society of Nigeria