Egberima-Ẹkwẹn 8
8
Kẹ Nimi Tokiniarị Ye
1 #
Egb 1.20,21 Ó pokii! Nimi kịnị mamgba sịịn-olokuarị. Sịḅịḅio-kịẹn mịẹ tẹ kịnị á pọkọ naarị. 2Tụndụ ma ọgọnọ-jụ ḅụ etela mẹ kpeki anga, tẹ etela ḅo jen-jen saḅa-ḅọrọ wararị yọ mẹ ḅụ á sịẹsime wararị.
3Ḅọrọ ama mẹ sọarị yọ mẹ ḅụ,
onu aḅọkọ ma akaka, á sịn-arị:
4Tomikiri ḅẹ atomi, àrị ọ́ tẹkẹarị,
tomikiri sime-ḅọ sime-ḅọ à sịn-arị.
5Amụ ọ́ ḍụḅa paka-ḅo tomi la-a?
Ọ́ ḍụḅa paka-ḅo tomi la tẹ ḅara simee.
Ọmịnị oḅori-sọarị aro? Ọ́ ḍawọ tẹ
sịḅịḅio nyanaa.
6Ọmịnị ì iḅi ẹkwẹn ma pokii;
à ḍuko ọ́ pịrịarị aị mamgba kuram.
7Karakara ye mẹ mie à ḍukoarị;
arị iruo aị ḍiki-ḅioḅuarị.
8À ḍukoarị ye goyegoye karakaram;
anị ḅụ iruo ye anịanịa kịnị da-irima
arị gberie-sọ ofori.
9Ye ḅio sime ye lekiriarị ḅọ mẹ ḅụ,
arịmgba giregire wararị;
ye ḍuko pịrị lamatẹ ḅọ mẹ ḅụ, anị banabana wararị.
10Seleḅa nakara à ḍuko ị́ pịrịm mịẹ ḅẹ
ye mẹ sẹlẹ-ọkịị;
iḅi tẹịn golu nakara ḍawọye ḍin sẹlẹ ọkịị.
11Yẹrị Nimi, arị iḅiọkụ iḅi yela ḅiriaị nẹngịm
ó ḅiiarị ye tẹ ọ́ kẹ ị̀ tọnma ḅẹ gberie-sọ ofori.
12Yẹrị Nimi, à pịkị ye ḅio sime ye lekiri nyana wararị;
à ḍawọ ye ḍin wararị, tẹ karakara ḅẹrẹkọn-arị.
13KỊNỊNYANAḄỌ ḅe mangịma mẹ anie siye ḍiki-ḅioḅu;
à ḅụụ-gelemarị apụ na opu ẹkwẹn kọn-arị apụ na ḍiki-ḅioḅuarị,
si etela ma na iruo ẹkwẹn ma na.
14À ye kuroma ḅo-ḅo tẹ arị mịẹ-mịẹ pakama ḅoarị.
À yefieye naarị, à pịkị kụrọ wararị.
15À ḅarasụa amadapụ pịrị tẹ ini ama-daarị
pịkị ḅẹrẹtọn apụ mịẹ tẹ ini iḅi oloko sụarị.
16Tomikiri ḅụ ḅẹrẹtọn-arị apụ mamgba ị̀
ḅarasụa ḅụ ḅẹrẹtọn-arị;
ama-ḍikiḍiki kụrọ-ḅara ḅụ simearị apụ
na ama ḅẹ opu atomi na sọ gbọrụ ḅara mẹ.
17Àrị ị̀ ḅẹlẹmarịapụ ḅẹlẹmarị;
ị̀ ḍọkịḅọ-ḍọkịḅọ inetẹ ị̀ ḍọkị-ẹrị ḅa.
18Àrị ngọ na kụn na nyana tẹ kẹ kịnị pịrịarị,
lolo na mịẹ ye ḅara-ḅẹsọ na.
19Ị́ ị̀ ḅara nyanarị ye mẹ iḅi iḅitẹịn
golu mẹ nẹngịm;
iḅi gwaye gbala-gbala ofori seleḅa mẹ nẹngịm.
20Karakara mịẹ etela mie à mẹnjịarị;
aḍụa ofori ḅẹrẹkọn etela ma mie à ḍuka-muarị,
21Ị̀ ḅẹlẹmarịapụ ma kọnmarị,
ngọ tan-tan ịna awarị ḅinmarị.
22 #
Mịẹ 3.14
KỊNỊNYANAḄỌ ḅe tarị ị̀ tẹmẹm ye-mẹmgba ḅụ,
iḅere-iḅerea kụra-ḅio ọ̀ kọrị akọrịnama
ma ḅẹ tarị ye.
23Gbọrsịḅị sukuyọ-saakị mẹ ḅụ mie ori ị̀ mịẹ ye,
tarị pịrị-pịrị mẹ ḅụ, tẹrẹmẹ tomikiri mẹ saakịm.
24Yẹrị iyi tẹrẹmẹ abajị ma iyim,
ngụngụḅa minji amụ paka-a sakị.
25Yẹrị iyi tẹrẹmẹ tụndụ ma iyim,
tẹrẹmẹ ịn tụndụ ma kẹ arịḅẹ akiri ḅụ sịẹmam,
26tẹrẹmẹ Tamụnọ kiri mẹ na anị ḅẹ aḍụọ
ḍiḅi anga ma na mịẹm,
anịanịa tarị lịka tẹ ḅara-kuḅu ḅin ḅẹ ye.
27Ò So-tọrụ mẹ kẹ anị ḅẹ sime kiri wẹrịarị sakị à simem,
Ò So-tọrụ mẹ nụnụ finji abajị mẹ ọgọnọ
gbaịn-koro sakị,
28Ori oḅuto kẹ So-tọrụ koroma sakị,
ori abajị mẹ ḅẹ minji aḅọkọ ma finji sakị
29tẹ tọnm tọrụ mẹ ḅẹ aminji ma
iwo ori ḅẹẹ ḅara nẹngị ma.
À simem ò tomikiri mẹ ḅẹ asuku ma saakị sakị.
30Arị ori akaka simem warị nama aka ḍin ḅọ pembe ḅara,
ene-ḅaaene-ḅaaene ori ì gotẹ ḍerekum,
sakị mamgba à ḅioḅẹlẹm ọ̀ tọrọkọ
31Ò tomikiri mẹ gotẹ ḅioḅẹlẹm,
Ọ̀ tẹmẹ atomi ḅụ tọrụ-ḅẹlẹ nyanam.
32“Mịọkụ, asawọ, ọmịnị ì pokii.
Ọmịnị à ḍuko ḅara mịẹẹ, anịsakị ó ḅioḅẹlẹ ḅa.
33Ọmịnị ịn kẹ ó toluma ye mẹ pokii.
Nimi ḅara simee; ọmịnị anị ḍiki-tọrụsin ma.
34Ì pokiarị ḅọ ḅioḅẹlẹ ḅa,
ene-ḅaaene-ḅaaene ị̀ ḅọkọ anga simearị ḅọ mẹ,
ḅọrọ ị̀ sime-yọ sọ-sọ anga mẹ ḅụ koruarị.
35Ị̀ ḍọkị ẹrịarị ḅọ ḍumo ḍọkị ẹrịarị,
tẹ KỊNỊNYANAḄỌ ḅe mḅọ ḍiki-ḅioḅẹlẹ ḅa.
36Ị̀ ḍọkị ẹrị-a ḅọ mẹ, si kẹ amịna ḅụụ mịẹarị;
ì ḍiki-ḅioḅuarị ḅọ goḅọ-goḅọ, fị ḅẹlẹmarị.”
Currently Selected:
Egberima-Ẹkwẹn 8: KBTP
Highlight
Copy
Compare
Share
Want to have your highlights saved across all your devices? Sign up or sign in
(C) The Bible Society of Nigeria