Egberima-Ẹkwẹn 10
10
Sọlọmọnị Gbaa Egberi ma
1Ma ma anie Sọlọmọnị egberi ma:
Ye-nimi tụḅọ mịẹ tẹ ọ̀ ḍa ọ̀ kẹ ḅụụ-tọn-arị; oḅori-sọarị tụḅọ mẹ ḅioḅẹngbọ si dogi-ḅo mḅọ iyingiḅọ pịrịarị.
2Japụ mingirima ḅụ ị́ kọn-arị ngọ mẹ gbọrụ iḅi sọ kẹ ị́ mịẹ ḅịa; kụma jen-apụ mingirima-a inetẹ í ḍumo ḅọrọma ḅa.
3KỊNỊNYANAḄỌ ḅe ḍụkụ tẹ iḅi atomi ḅuru-pọkọtarị ḅụ so ḅịa, kụma ọ̀ ḍụkụ tẹ si-sịḅịḅio-sụapụ in ḅiiarị ye nyana ḅịa.
4Kọrịnama ḅụ ḅụụ-sarasara-a mịẹ tẹ í igoin ḅa, kụma kụrọma namakọrị mịẹ tẹ ị́ ngọ kọn ḅa.
5Sịḅịḅio nyana tomḅọ ḅe ḍụọ ḅio ḍiḅi pakama ḅo aị ma kobiri wẹrịarị arị kpọọ tẹ ḅẹḅẹ; anị tọrụ-tuu ye sọm, fịaị soku sakị mamgba kẹ mono mẹ.
6Iḅi tomḅọ boma nyana ḅa. Si-sịḅịḅio-sụa tomḅọ ḅe ori ẹkwẹn mamgba kụrọ-kụrọ amịẹaị arị ḅụ ḅin wararị.
7Ini iḅi atomi kẹ ḅiokoroma ḅa Tamụnọ boma ḅara ḅụ, kụma Si-sịḅịḅio-sụa apụ ma ala-a tomi ịn kẹ ḅioḅọrọma ḅa.
8Sịḅịḅio-nyana apụ iḅi toluma-ẹkwẹn daa-ọkịarị. Oḅori-sọ ḅara kẹ ẹkwẹn-arị apụ ma ḅo fa ḅio sọ ḅa.
9Ja atomi mingirima-mingirima-a apụ ma in simearị anga ḅụ in la-la ye ofori, kụma jen-apụ mingirimarị apụ ma ini in kun ḅa.
10Karakara mẹ ḅọịarị ḅọ mẹ ḅụụ-fụka dogi-ḅoarị, kụma ye-kikima-a ḅara kẹ ye sime na-iḅi ḅara ḍukoarị ḅọ dein kọrịnama kọrịarị.
11Iḅi tomḅọ kọn-arị ẹkwẹn ma anie ḍumo ngụngụḅa, kụma si-sịḅịḅio-sụa tomḅọ ḅe ẹkwẹn ma kụrọ-kụrọ amịẹaị arị ḅio emi.
12 #
Jem 5.20; 1 Pit 4.8 Ḍiki-ḅioḅu ḅẹrẹ dogi-ḅoarị, kụma ḅẹlẹ ma kịnị ịganịma aị mamgba ḍiki-tọrụsin-arị.
13Iḅi sịḅịḅio nyana apụ nimi ẹkwẹn kọn-arị, kụma oḅori apụ ma fomu-ḅara kẹ ịn pịrị gbẹm.
14Ye-nimiapụ ma ini ine-ye ine-ye ḍawọ ḍịn-arị; kụma oḅori-sọarị apụ ma ẹkwẹn sakị goyegoye, ḅẹrẹ kpeki wararị.
15Pẹrẹ, kọnḅọ gbaịn ḅọrọmarị; igoin, igoinḅọ ḅaa-gulugulumarị.
16Iḅi mịẹ ḅẹ gbẹẹ-ye anie ḍumo, kụma si tomḅọ dogi-mu jen si ḅio suuarị.
17Ịn mịẹ-irima-ye ḅụ ịn daa-karakaramarị tẹ pokiarị apụ ma ḍumo ḅa, kụma ini mịẹ-irima tẹ mẹ minini ḍụkụ ḅịa apụ ma in ye kẹ ịn lama ḅẹ ye ḅio sọ ḅa.
18Mḅọ kịnị ḍiki-ḅioḅuarị mẹ ḅọịarị ḅọ mẹ iruoḅọ. Ḅẹḅọ-ḅẹḅọ tẹ kịnị kẹ fiema ḅọrọarị ḅọ anie oḅori-ḅọ.
19Ị́ ẹkwẹn pẹlẹ-a la ḅara la ḅara, anie ị́ pịkị si mịẹ mu la ḅarị ḅara, anị mịẹ-mịẹ ḅara ḅụ. Í ye-nimi ḅẹḅẹ, ị́ gbọsime ḅa.
20Iḅi tomḅọ kọn-arị ẹkwẹn ma jen ye kẹ gwa-a tẹ mịẹ seleḅa na kịkarị si-sịḅịḅio-sụa tomḅọ ḅe sụa ḅoarị akuroma ma kẹ mịẹ ḅụ suu-suu ye arị ḅụ ofori.
21Iḅi tomḅọ kọn-arị ẹkwẹn ma sọye mị tọnwa-apụ pịrị ḅa, kụma í inetẹ ị́ ḅụụ ḅaa ḅa oḅori-sọ ḅụ.
22KỊNỊNYANAḄỌ ḅe boma mie mịẹ tẹ í ngọ-kọn-arị. Kụrọ-kụrọ kọrịnama inetẹ mịẹ tẹ ị́ kọn anị ḅara nẹngị ḅịa.
23Ị́yẹrị oḅori-ḅọ, ị́ iri-ye mịẹ ḅụ ḍerekuarị ḅẹḅẹ. Iḅi sịḅịḅio nyana apụ nimi ḅụ tọrụ-ḅẹlẹ nyanarị.
24Karakaraye-mịẹapụ in ḅii ye nyanarị, kụma si-sịḅịḅio-sụapụ ma in gotẹ ḅalafa tẹịn ye mẹ, mie ịn nyana ḅarịye.
25Erise fie tẹ si-sịḅịḅio-sụapụ ma fọnọ soarị, kụma kịnị mingirima-apụ ma sakị mamgba ịn la-la ye ofori.
26Gbala-gbala kọrịnama ḅụ ḅụụ-sarasara nyana-a ḅọ ḅe ọkị tẹ ọ̀ nama kọrị ị́ pịrị ma viniga nwẹn-sịn ye mẹ kẹ aka-ḅumarị ḅara, anịanịa onwi ị́ atọrụngbọ ḅio sọ tẹ mịẹ-mịẹ ḅara, anie ọ̀ kẹ ị́ ḅụụ-sịnịsịnịma ḅarị ḅara.
27KỊNỊNYANAḄỌ ḅe ḅịḅị pokii, anịsakị í ḍumo nangwọ ḅa. Si-sịḅịḅio-sụapụ ma in ḍumo la ḅẹ sakị la-a ogbo fịị ḅa.
28Iḅi atomi kẹ ḅiokpọmarị aị ma ịn kẹ mu ḍereku lamarị, kụma si-sịḅịḅio-sụapụ ma kẹ tọrọkọ-jụ tọrụ-ḅaamarị gberie-sọ ofori.
29KỊNỊNYANAḄỌ ḅe kịnị-mingirima-a apụ ma gbaịn ḅọrọmarị, kụma iri-ye mịẹarị apụ ḅaa-gulugulumarị.
30Karakaraye-mịẹapụ ma sakị mamgba ịn la-la ye ofori, kụma si-sịḅịḅio-sụapụ ma in ḍumo sime ḅịa ama mẹ ḅio.
31Karakaraye-mịẹapụ ma nimi ẹkwẹn kọn-arị, kụma siye ḍukoarị ḅẹlẹ mẹ anị daasịẹ ḅa.
32Karakaraye-mịẹapụ ma nimi wararị, in ḍuko ḅẹ ye iḅiye, kụma si-sịḅịḅio-sụapụ ma sakị mamgba si kẹ kịnị mịẹ ḅẹ aị ḍukoarị.
Currently Selected:
Egberima-Ẹkwẹn 10: KBTP
Highlight
Copy
Compare
Share
Want to have your highlights saved across all your devices? Sign up or sign in
(C) The Bible Society of Nigeria