Egberima-Ẹkwẹn 2
2
Nimi Gbẹẹ Aị Ma
1Ị̀ tụḅọ, à kẹ í tolumarị ye ḍawọọ, tẹ gbala-gbala à ḍuko ị́ pịrịarị mịẹ ḅẹ ye kẹ ḅioḅọrọma ma. 2Nimi nyana ye pokii, tẹ ḅụụkụrọma tẹ anị fiearị ye naa. 3Inn, ḍawọye gotẹ tẹkẹẹ; yefieye lekiri ịgbanịị. 4Kụrọma nimi ḍọkịị, gbala í seleḅa anịanịa ḅọị wararị ngọ ḍọkịarị ye ọkụ. 5Ị́ ọkọ mịẹ kụma, ị́ KỊNỊNYANAḄỌ ḅe mangịma tẹ ọ̀ ḅịḅị poki fiearị ye nimi tẹ Tamụnọ gboloma ye ḍawọ ḍịịn ḅa. 6KỊNỊNYANAḄỌ ḅe mie nimi kẹ tomi pịrịarị-ḅọ. Ọ̀ ḅara ḅụ mie nimi na yefieye-naa na sime tẹ paka-ḅoarị. 7Ori mie ḅarasụa na gbaịn ḅọrọma na kẹ karakara mịẹarị, pịkị mingirima mịẹ-mịẹ-a atomi ma pịrịarị. 8Ori anie jen-apụ la kiri kẹ ịn pịrịarị apụ gbaịn ḅọrọmarị, pịkị ò minini tẹ ọ̀ ḅụụ sịrẹrẹ wararị apụ ma koko gbaịn-arị. 9Ị́ ị̀ ḅịḅị poki kụma, í kuraye na, karakara na, jụmọ la kiri kẹ mḅọ pịrị na nimi ḅa. Ị́ ị́ mịẹ na-iḅi ye nimi ḅa. 10Í ḅo ye-nimi ḅa, tẹ ị́ ḍawọ ḍin ye mẹ nwẹnị tọrụ-ḅẹlẹ kẹ ị́ pịrị ḅa. 11Ye ḅio sime-ḅara nimi na yefieye naa na nwẹnị ị́ gbaịn ḅọrọma, 12tẹ í kiki tẹ ị́ ḅarị kura-aye mịẹ ḅịa. Arị ị́ wẹrị ḅelema ḅa, ẹkwẹn ye ḅụ ḅẹrẹ dogi-ḅoarị apụ ḅụ; 13tomi tẹ karakara mịẹ ḍumo ḍiki-tọrụsin tẹ si kanakana ḅio angarị apụ, 14tomi tẹ iri-aị mịẹ tọrụ-ḅẹlẹmarị apụ, tẹ ịn mịẹarị asi-aị ḅụ ḍerekuarị apụ, 15kịnị ḅụụ ḅụ sịrẹrẹ na-iḅi-a atomi, tẹ inetẹ ḅioḅẹngbọ kẹ ḅụụ ḅụ gbana ḅịa apụ.
16Ị́ inetẹ ḅẹẹ ama-mẹnjị-ẹrẹḅọ ẹrẹḅọ sịkị ḅa, anie arị ine-ḅara ine-ḅara mịẹ tẹ í toluma fama ḅẹ ḍọkịarị ḅọ ma ḅịḅị-ḅẹlẹ ẹkwẹn ḅụ, 17anie ḅioḅẹngbọ kẹ ḅụụ ḅụ gbana na-iḅi-a ḅara sime tẹ ḅọ ma, á di ḅụụ ḅụ, tẹ á karị fịafịa ye mẹ kẹ ḅioḅọrọma tẹ ḅọ ma. 18Ị́ á warị mu-mu, ị́ mẹnjị mu ị́ fịị ḅẹ etela sọ tẹẹ. Tọrụ kẹ anịanga da-mu anie mu Ḍuḅu ḅio kpeki. 19Á warị sọ tẹ pịkị so-so gbọrụḅọ-sọ ofori. Gbala-gbala ọ̀ pịkị mu ḍumo etela sọ-sọa. 20Mie ḅụ iḅi atomi elekima mẹ ḍiki mẹnjị kẹ ị́ mịẹ-mịẹye sọmaa, tẹ karakara mịẹ ḍumo kọn. 21Karakara mịẹarị atomi — tụkụ sịẹ wararị ḍumo nyana apụ — anie mịẹ wamịna ama mẹ ḅio anga ḅarịye. 22Kụma Tamụnọ ama mẹ ḅẹ si-sịḅịḅio-sụa atomi ma ḅaa ḅa, tẹ anị ḅụ si-mịẹapụ nụnụ-pakama ḅa, kịrị ḅio ḍiḅi wararị asịn pembe ḅara.
Currently Selected:
Egberima-Ẹkwẹn 2: KBTP
Highlight
Copy
Compare
Share
Want to have your highlights saved across all your devices? Sign up or sign in
(C) The Bible Society of Nigeria