Egberima-Ẹkwẹn 3
3
Kẹ Asambịrịma Atomi Ḅeri Nụnụ Ḅẹ Ẹkwẹn
1À kẹ í tolumarị ye kẹ ḅioḅọrọma ma, ị̀ tụḅọ. À ḍuko ị́ pịrịarị ị́ mịẹ ḅẹ ye mẹ kẹ sakị mamgba ḅiokoromaa. 2Ì tolumaye mẹ nangwọ tẹ lọkọlọkọ ḍumo kẹ ị́ pịrị ḅa. 3Ḅioḅẹngbọ-kẹ-sịrẹrẹ-niḅi ḍumo na karakaraye mịẹ na wẹrịso ma; arị kẹ mịẹ-mịẹye sọmaa, tẹ sakị mamgba arị mịẹ kẹ ḅiokoromaa. 4#Luk 2.52Í miemẹ mịẹ kụma, Tamụnọ na tomi na í ḍiki-ḅioḅẹlẹ ḅa. 5Í ḅioḅẹngbọ mẹmgba kẹ KỊNỊNYANAḄỌ ḅe sịrẹrẹẹ. Gbala-gbala í kuromarị í nimim ḅẹ ye ḅụ sịrẹrẹ ma. 6Ị́ mịẹarị ye goyegoye ḅụ KỊNỊNYANAḄỌ ḅe kẹ ḅiokoromaa, tẹ ọ̀ karakara etela mẹ kẹ í ḍie ḅa. 7#Rom 12.16Gbala-gbala ḍụkụ tẹ mịẹ kuroma mẹ ị́ ḅụ sọ ma mịnẹ í ye-nimi í nimi ḅara nẹngịm; paa KỊNỊNYANAḄỌ ḅe ḅịḅị pokii, tẹ ḍụkụ tẹ kura-aye mịẹ ma. 8Ị́ ọkọ mịẹ-mịẹ, anị iḅi obi-gwọ-ḍiri kịka tẹ ị́ ịnọ ma gwọ tẹ ị́ fụka-aị ma deinma ḅa. 9Kẹ KỊNỊNYANAḄỌ ḅe kụn ḅụ, í kiri pakama-ḅoarị aị ḅụ iḅitẹịn aị ma kẹ ḅo ọ̀ pịrịị. 10Ị́ ọkọ mịẹ kụma, ị́ fịaị koko awarị ma ḅio mgbọlị fịaị ḅin ḅa, ị́ pịkị iru nyana ḅụrama tẹ ị́ ḅarị inetẹ anịmgba koko ḅịa.
11 #
Job 5.17
#
Hib 12.5,6 Ị̀ tụḅọ, KỊNỊNYANAḄỌ ḅe ị́ datụkụmarị sakị, kpọma kẹ ye-sịn ḅara kẹ anị ọkịị, tẹ kẹ ḅeri nụnụ ye sọma ị́ ḅụụ pịrị. 12#Mịẹ 3.19KỊNỊNYANAḄỌ ḅe ọ̀ ḅẹlẹmarịapụ mie ọ̀ datụkụmarị, anie ḍaḅọ kẹ ọ̀ kẹ ḅụụ-tọn-arị tụḅọ datụkụma-tụkụma ḅara pembe ḅara. 13Ḅioḅẹlẹ sime ḅo ye-nimi tẹ ḅọ mẹ pịrịm — anie yefieye nimi nyana tẹ ḅọ mẹ 14Anị ḅe sọye seleḅa ḅụ sọye nẹngịm anị opu ḅara kẹ yela ị́ pịrị golu nẹngịm. 15Nimi iḅiọkụ yela juwẹlị nwẹn-sịn ḅụụ-ḅirima ngọ ma nẹngịm; ị́ inetẹ ḅii ḅẹ ye tẹ kẹ anị tọnma ḅẹ ye ofori. 16Nimi nangwọ ḍumo kẹ ị́ daarị, pịkị pẹrẹ na kụn na sọ. 17Nimi inetẹ mịẹ tẹ í ḍumo ḅụụ-ḅẹlẹma ḅa, tẹ ị́ kẹ mu ye ị́ la ḅịa yọ ḅụ suu wẹrị ḅa. 18Ḅo ye-nimi tẹ apụ ma in ḅioḅẹlẹ tẹ; nimi ḍumo kẹ ịn pịrị ḅa. 19KỊNỊNYANAḄỌ ḅe ò nimi ḅụ ḅọrọ tẹ kiri mẹ tẹmẹm; ò ye-nimi ḅụ mie ọ̀ ḅọrọ tẹ So-tọrụ mẹ kẹ amịna kiri ḅụ wẹrị yee. 20Ò nimi mịẹ tẹ tọrụkuḅu ḅẹ minji mẹnjịarị, tẹ kpiti-so mẹ eene kẹ kiri ọgọnọ sararị.
21Ị̀ tụḅọ, í nimi na í ye suku ḅio simearị ye lekiriarị ye mẹ na ọlọ-sịẹmaa. Gbala-gbala ḍụkụ tẹ arị ị́ ḅara pẹlẹ so ma. 22Arị ḍumo ọkị-ḅo ị́ pịrị ḅa — ḅụụ gbẹẹtẹ ḅioḅẹlẹmarị ḍumo. 23Í inetẹ ye ị́ la-a ḅara kẹ í muarị anga mu ḅa, tẹ gbala-gbala pụmbụ kịngẹ sọ ị́ pụmbụ ḅịa. 24Í iḅila ọgọnọ mono ḅarị sakị ị́ ḅalafa ḅịa, ị́ pịkị mono ḅọrọ-so ḅa bebe ḍin mẹ ḅụ. 25Í ḅiotọn-a ḅara kẹ paka ḅarị siye gotẹ tẹmẹ-lokoloko nyana ḅịa, anie erise ḅara kẹ ḅo si-sịḅịḅio-sụapụ gbaịn-gbaịn ye mẹ. 26KỊNỊNYANAḄỌ ḅe í koko tẹ ye ị́ la ḅịa. Ọ̀ ḍụkụ tẹ ị́ ḍiein ḅio koro ḅịa.
27Í inetẹ ḅẹ sakị goyegoye ḅụ, iḅi kẹ ḅụụ-fụka ḅụ simearị apụ mịẹẹ. 28Gbala-gbala ị́ na kpeki tẹ angarị ḅọ ḅẹẹ ma: “koruu, ḅaa la sakị”, í inetẹ mịọkụ ḅarasụa ọ̀ pịrị ḅarị ḅẹḅẹ. 29Si kẹ ị́ na kpeki tẹ angarị ḅọ mịẹ ḅẹ gbọrụ siye sọ tọn ma; ori ị́ akaka angarị sakị goyegoye, ori í minini wararị. 30Ḅẹrẹ ofori ḅara kẹ gbọrụ tomḅọ sọ na ye-nụnụa ma, gbala-gbala amụ ò ye kẹ ị́ lama ḅẹ gberie-sọ kẹ ị́ mịẹ-a sakị goyegoye. 31Ḅẹrẹ ḅioḅẹngbọ sụa kụrọ-kụrọ amịẹaị mịẹarị atomi pịrị ma, anịanịa tọn-pẹlẹ mịnẹ ị́ ịn mịẹarị ḅara mịẹ ḅa, 32kẹ gotẹ ọkọ ḅẹẹarị, KỊNỊNYANAḄỌ ḅe siye mịẹarị atomi ḍiki-ḅioḅuarị, kụma karakaraye-mịẹapụ ḅụụ mie ọ̀ tẹmẹ kẹ gbana wararị. 33KỊNỊNYANAḄỌ ḅe wori-nume kẹ si-sịḅịḅio-sụa apụ ma sime ayọ ma ḅụ gbanarị, kụma ọ̀ karakaraye-mịẹapụ ma sime-ayọ ma bomarị. 34#Jem 4.6; 1 Pit 5.5Ọ̀ ḅụụ-gelemarị atomi na mịẹ nyana-a, kụma ori iḅi kẹ ḅụụ-lẹgịmarị apụ ma mịẹarị. 35Ye-nimi atomi kụn nyana ḅara kẹ ereso ḅa, kụma oḅori-sọarị atomi ma mịẹ ḅarịye anie ịwọ ye kẹ ịna tọrụ-tuu mẹ ḅụ sụa.
Currently Selected:
Egberima-Ẹkwẹn 3: KBTP
Highlight
Copy
Compare
Share
Want to have your highlights saved across all your devices? Sign up or sign in
(C) The Bible Society of Nigeria