Egberima-Ẹkwẹn 1
1
Egberi Ma Ḅẹ Iḅi
1 #
1 Ama 4.32
Sọlọmọnị, Devidi Tụḅọ, pịkị Izirẹlị amadaḅọ ḅe egberima-ẹkwẹn.
2Mịanga ḅarasụa ị́ pịrịtẹ í nimi na, ḅeri nụnụ iḅi ẹkwẹn na lekiri, tẹ pịkị ḍuko aị tẹ pokolotẹ fie-aị nyana aị naa ḅarị egberima-ẹkwẹn emi. 3Egberima-ẹkwẹn í toluma tẹ í ye-nimi ḅara na, kịnị mingirima-a ḅara na, karakara mịẹ ḅara na, ọrụḅọ-ọrụḅọ la kiri kẹ mḅọ pịrị ḅara na kẹ ḍumo kọn ḅa. 4Egberima-ẹkwẹn inetẹ mịẹ tẹ ye-mịẹmịẹ-ḅara nimi-a tomḅọ ḍumo aka nimi ḅọ sọ ḅa, arị pịkị asambịrịma atomi toluma tẹ in mịẹ na-iḅi aị ḍọkị pakama-ḅoarị apụ sọ ḅa. 5Mịna egberima-ẹkwẹn ma inetẹ ye kẹ ye-nimi atomi ma nimi ḅụ sọ sụa ḅa, pịkị datụkụma kẹ ḍiri-ẹrịapụ ma pịrị ḅa, 6mịẹ tẹ ini egberi ma ḅụ simearị pokolotẹ afie-aị na, ye-nimi atomi gbelarị ḅụụ-fụkama aị na ye fiearị aị na naa ḅarị ḅara.
Kẹ Asambịrịma Atomi Ḅeri nụnụarị Aị
7 #
Job 28.28; Dev 111.10; Egb 9.10 Í nimi nyana ḅarị ḅẹḅẹ, tarị-tarị KỊNỊNYANAḄỌ ḅe mangịma tẹ ọ̀ ḅịḅị pokii. Yefieye-naa-a atomi nimi kẹ ye-sịn-a, ịn pịkị ye ḍawọ ḍụkụ-a.
8Ị̀ tụḅọ, ị́ ḍa na í iyingi na ḍuko ị́ pịrịarị ye pokii. 9Ịn kẹ í tolumarị ye mẹ í ye-mịẹ-ḅara iḅima ḅa, anie iḅi sun anịanịa pọkọsụaye tomḅọ mị tẹ mḅọ tọrụ-gbẹ ḅara sime-ḅara.
10Ị̀ tụḅọ, si-mịẹapụ í toluma irimarị ḅẹḅẹ, ḍụkụ ma. 11Ẹbịsịya ịn ḅẹẹ ḅa, “Ḅoo, yee wa mu tomḅọ ḍọkị ḅaa! Yee wa owu kẹ mịẹye-ofori apụ ma paka. 12Wa ịn ḍọkị ẹrị sakị in ḍumo tẹ ịna oju pịkị iḅi ḅa, kụma ịn fịtẹ-apụ sọ ḅa wa ini na mịẹ fama sakị! 13Wa ngọ ḅara-ḅara ḍọkị ẹrị ḅa, tẹ wa fọịn ḅo aị kẹ wamịna awarị ḅinma ḅa! 14Ḅo wamịna aḅụụ sọọ, tẹ wamịnị-mgba wa furu aị ma ḍiya ḅa.”
15Ị̀ tụḅọ, ọkọ sime apụ na mẹnjị ma. Ịna ḅụ ị́ ḅụụ wẹrị ḅelemaa. 16Siye mịẹ ḅụ ịn sakị fama fama-a. Sakị mamgba ịn kịnị ḅaa ḅẹ tẹ tẹlẹma wararị. 17Í kuun ḅẹ tẹ ḍiein tuuarị feni ḅe ị́ ẹrịarị ogbo, ị́ mịẹarị ye mịẹarị ye papaa ye, 18kụma anị ḅara sime atomi ma tuuarị ḍiein mẹ in tuu ịna aḅụụ pịrịarị, ini koro tẹ fịị ḅarị ḍiein. 19Kụrọ ḅara kẹ jụmọ ye furu ma; ọkọ mịẹarị ḅọ ḍumo mẹ famarị — miemẹ anie kụrọ-kụrọ ḅara kẹ kịnị na mịẹarị ḅọ ḅụ paka-paka ye.
Nimi Kịnị Sịn-arị
20 #
Egb 8.1-3
Pokii! Nimi kịnị sịn olokuarị etela-ogbo na ogumaḅiri na ḅụ, 21tẹ ama mẹ ḅẹ ogigo-aḅọkọ ma ḅụ gele pọkọ kẹ sịn-arị, pịkị tomi ḅo kobiri anga kobiri anga:
22Oḅori-sọarị atomi! Tọ sakị na gbasị ye ọ́ nwẹn kẹ oḅori-sọ ḅẹ? Tọ sakị na gbasị ye ọ́ nwẹn kẹ ḍawọye ḍiki-iderima ḅụ ḍereku ḅẹ? Gbala-gbala ó minini tẹ ye ḍawọ ḅịa? 23Àrị ó ḍiki-ịganịarị sakị, ó pokii. À tọnwa nimi kẹ ọ́ pịrị ḅa, à pịkị ị̀ ẹkwẹn-ḅịḅị mẹ kẹ ị́ tọrụ finji ḅa. 24Anịngẹ-kụraḅio àrị ọ́ sịn-arị, mịnẹ ó ḅoo, kụma ó poki ḍụkụ-a. Ọ́ tọrụ kẹ ị̀ da-a. 25À kẹ ị́ datụkụma ḅẹ ẹkwẹn mamgba ị́ sịkị tẹẹ, ị́ pịkị minini tẹ àrị ị́ mịẹ-irima aị ḅụ ị́ kẹ karakara ḅụ wẹrị-a. 26Mie ḅụ ḅụụ-fụka ị́ la sakị àrị ị́ ḍẹrị ḅa. Ḅalafama ye ḅo ị́ bịan sakị àrị ị́ kombo ḅa; 27anie anị erise kịka tẹ ḅo ị́ gbaịn sakị, ḅụụ-fụka kụrọ fẹrụ ḅo tẹ ị́ fụka-ye da tẹ sịḅị-jịrịma ḅara sime sakị. 28Anịtẹso ị́ ḅịḅị kẹ nimi sịn ḅa, kụma arị ị́ ḅịḅị ọkị ḅịa. Ị́ ị̀ ḍọkị ḅa anga mamgba ḅụ, kụma ị́ ị̀ ḍọkị ẹrị ḅịa. 29Jene-jene amụ ị́ ḍawọye kẹ gbọrụ mịẹ ye ḅụ sọ suu-a, tẹ sakị mamgba ḍụkụ tẹ KỊNỊNYANAḄỌ ḅe ḅịḅị poki-a. 30Gbala-gbala amụ í à ḍuko ị́ pịrịarị ye ọkị ḅẹ ḅii-a, anịanịa à kẹ ị́ daa-karakarama ye kẹ ye-sịn. 31Anị ẹrẹsị ị́ ị́ gbẹẹ-ye nyana ḅa, tẹ ḅarana mịẹ-aị mịẹ tẹ í obi ḅa. 32Ye-mịẹmịẹ-ḅara nimi-a apụ fịị ḅa ịn nimi sịkịarị ẹrẹsị. Oḅori-sọarị atomi ma ịna ye-kẹ-yesịn-a mẹ ịn ḅaa gulugulumarị. 33Kụma ḅẹḅọ-ḅẹḅọ tẹ ì pokiarị ḅọ mẹ, mḅọ la ḅarịye ofori. Ò ye-ḅụụ-la-a ḅara kẹ kpaịn sime ḅa, ò gotẹ ḅalafa-fa ye ofori ḅara ḅụ.
Currently Selected:
Egberima-Ẹkwẹn 1: KBTP
Highlight
Copy
Compare
Share
Want to have your highlights saved across all your devices? Sign up or sign in
(C) The Bible Society of Nigeria