Egberima-Ẹkwẹn 13
13
1Ye-nimi tụḅọ mḅọ ḍaḅọ kẹ mḅọ daa-karakaramarị ye kẹ ye-sịn-arị, kụma gberie-sọ nimi-a ḅọ mẹ gbala-gbala minini-minini-a mịẹ mẹ mḅọ irimatẹ.
2Iḅi atomi ịn kọn-arị ẹkwẹn ḅụ ḅọrọ tẹ gbẹẹ-ye nyana ḅa, kụma oḅori-kẹ-kịnịsịn-arị apụ ma gbiri-gbiri-gbiri mịẹ ḅuru-pọkọtarị ḅara kẹ ịn tarịarị.
3Ị́ kọn-arị ẹkwẹn bala-a, tẹ í ḍumo wẹrị kpaịnmaa. Bala-a ḅara kẹ ẹkwẹn-arị ḅọ mẹ mḅọ ḅụụ ḅaa-gulugulumarị.
4Kọrịnama ḅụụ-lọkọ ḍumo kọn-arị ḅọ nyana ḅẹ ḍọkị ye ḍọkị ye sọ, gbala-gbala mḅọ anị nyana ḅịa. Kụrọma kọrịnama-kọrịarịḅọ mẹ mḅọ nyana ḅii-ye ḅii-ye nyana ḅa.
5Kịnị mingirima-mingirima-a apụ ma ini iruo aị ḍiki-ḅioḅuarị, kụma si-sịḅịḅio-sụapụ ma ẹkwẹn ma ḅụụ-jịrịmarị pịkị tomḅọ tọrụ-tuuarị.
6Karakara mịẹ-mịẹ ye ofori ḅọ mẹ gbaịn ḅọrọmarị; si-sịḅịḅio-sụa ḅụ si-mịẹapụ ḅọrọtẹ ḅịkịarị.
7Ja atomi amịna aḅụụ kẹ ngọ-kọnapụ ḅara wẹrịarị, kụma ịn nyana ye ofori. Osi apụ amịna aḅụụ kẹ igoin ḅara wẹrịarị, kụma ini ngọ kọn wararị.
8Ngọ-kọnḅọ ḅe ori igbigi kẹ ò ḍumo ḅọrọmarị, kụma gbọrụḅọ-sọ igoinḅọ ḅe ẹrẹma-a.
9Karakaraye-mịẹapụ ma ini iḅiọkụ ḅịya-pakarị bele kịkarị; si-sịḅịḅio-sụapụ ma kịkarị ye anie kẹlẹkẹlẹ biin soarị tọnjọ.
10Opu ẹkwẹn kọn jen dogi-ḅoa, ḅụụ-fụka kịngẹ. Daa-karakarama ḅii nimi nyana anị nẹngịm.
11Ị́ sarasarama kẹ ngọ-kọn ḅara kọn ḅara, mie ị́ pịkị ala-a anị fama-fama ḅarị ḅara. Ị́ ḅụụ-kọsị tẹ nyana ḅara, mie ị́ pịkị ọkọ nẹngị ḅara nyana ḅarị ḅara.
12Ḅiokpọ fịị sakị, mie ḅioḅẹngbọ mẹ sọ fịị sakị, kụma ị́ nyana ḅẹ tẹ kẹ ḅiotọn-arị ye ḅo mịẹ tẹ ye sọ kụma ḅioḅẹlẹ ị́ ḅụ ḅinm.
13Í iḅi ḍuko-toluma ye sịkị-sịkị, ị́ ḅụụ-fụka sịn ḅụụ pịrịarị; anị ḅẹẹ ḅara mịẹ tẹ ḅọrọmaa.
14Ye-nimiapụ toluma aị ma anie ḍumo iḅi ngụngụḅa arị ḅarasụa ị́ pịrị tẹ ị́ paka-ḅo ḅa í ḍumo fa ḅio sọ sakị.
15Sịḅịḅio nyana ḅọ mẹ tomi kụn kẹ mḅọ pịrịarị, kụma kịnị ḅioḅẹngbọ kẹ ḅụụ ḅụ gbana ḅịa apụ ma fa ḅio sọ-sọ etela mie ịn mẹnjịarị.
16Sịḅịḅio nyana apụ sakị mamgba in kuroma tẹrẹmẹ in ye mịẹarị, kụma apantu amẹẹ ma ịna nimi-a mẹ kẹ ama olokuarị.
17Ḅioḅẹngbọ kẹ ḅụụ ḅụ gbana na-iḅi-a oku-mẹnjịapụ ḅụụ-fụka dogi-ḅoḅom, kụma kịnị inetẹ ḅioḅẹngbọ kẹ gbana ḅarị apụ ma dein ọkị-ḅoarị.
18Minini tẹ ye ḍawọ ḅịa ḅọ mẹ mḅọ igoin tẹ tọrụ-tuu ḅa. Ḅẹḅọ-ḅẹḅọ tẹ daa-karakarama pokiarị ḅọ mẹ tomi mḅọ kẹ ye sịn ḅa.
19Í ḅiiarị ye nyana mẹ iḅi-kịnị-inea! Apantu amẹẹ ma ḍụkụ tẹ si ḅụ pịkị so-a.
20Ye-nimiapụ na mẹnjị gbolomaa, anịsakị í ḅo ye-nimiḅọ sọ ḅa. Ị́ apantu amẹẹ ma na ikia-sọ kụma í gulugulu-faa ḅa.
21Si-apụ mu anga mu anga, ḅụụ-fụka in ḍuka muarị; kụma karakaraye-mịẹapụ ma ini iḅi gbẹẹ-aị kẹ ịn pịrị ḅa.
22Iḅi tomḅọ ḅe ngọ-kọn tẹ ye kọnma ọ̀ taa-awọmẹ pịrị ḅa, kụma si-mịẹapụ ma ngọ ma sime karakaraye-mịẹapụ ma pịrị ḅa.
23Kịnị amụ kẹ mịẹ ḅụ suu-a ḍụọ ḍiḅi akiri inetẹ gburo-gburoma fịye kẹ igoin-apụ ma pịrị ḅa, kụma tomḅọ la kiri kẹ mḅọ pịrị-pịrị-a atomi ma ḍụkụ tẹ ini anị ḅụ ye ḍiḅi ḅịa.
24Ị́ tụḅọ siye mịẹ tẹ í ò fomu-a ḅẹḅẹ, ị́ ọ̀ ḅẹlẹma-a. Ị́ ọ̀ ḅẹlẹmarị ḅẹḅẹ, ị́ ọ̀ daa-karakarama ḅa.
25Karakaraye-mịẹapụ ma fị furo ḅinma ḅẹ ye nyana wararị, kụma si-sịḅịḅio-sụapụ ma sakị mamgba ḅuru ịn tarịarị.
Currently Selected:
Egberima-Ẹkwẹn 13: KBTP
Highlight
Copy
Compare
Share
Want to have your highlights saved across all your devices? Sign up or sign in
(C) The Bible Society of Nigeria