Egberima-Ẹkwẹn 12
12
1Ḍawọye nimi ḅẹlẹmarịḅọ goḅọ-goḅọ, ḅiiarị mịnẹ mḅọ irimatẹ ḅẹḅẹ kịnị ḍuko mḅọ pịrị. Daa-karakarama ḍiki-ḅioḅuarị ḅọ anie oḅori-ḅọ.
2KỊNỊNYANAḄỌ ḅe iḅi atomi ḍiki-ḅioḅẹlẹarị, kụma ịn mịẹ ḅẹ si-aị si-aị kuroma-ḅoarị apụ kẹ ḅẹrẹ-ḅarasii-apụ kiri sịẹmarị.
3Si-sịḅịḅio-sụa ye kpaịn ḅara kẹ tomḅọ wẹrị-a, kụma karakara mịẹarị atomi mie jike-a ḅara kẹ sịẹ-kụrọarị.
4Iḅi taḅọ anie á di nyana kụn, pịkị ḅioḅẹlẹ; kụma ḅụụ-jịrị dogi-ḅo diḅọ pịrịarị ẹrẹḅọ ma, á ḅo gwọ-gwọ-a si obi tẹ ori mgbe ḅio mẹmgba sọ mu tẹ ḅọ kịkarị.
5Kịnị mingirima-mingirima-a apụ inoma ofori ḅara kẹ ị́ na mịẹ ḅa; si-sịḅịḅio-sụapụ oḅori kẹ ị́ sịn kịngẹ mie in ḅiiarị ye.
6Si-sịḅịḅio-sụa apụ kọn-arị ẹkwẹn ma kịnị ḅaa ḅara simearị; kụma karakaraye-mịẹapụ ma ẹkwẹn ma, tomi ẹrẹmarị apụ pụkọ-pakamaḅoarị.
7Si-sịḅịḅio-sụa atomi ḅịkị koro tẹ ịna ḅụụ ḅụ paka-ḅo apụ sọ ofori ḅara kẹ fịịarị, kụma karakaraye-mịẹapụ afuro ma ḍumo tọrọkọ-tọrọkọ muarị.
8Ị́ sịḅịḅio nyana-nyana, tomi í tokini ḅa; í oḅori-sọarị ḅẹḅẹ, tomi í ḍiki-iderima ḅa.
9Tomḅọ iderima kiri ḅụ sime tẹ kọrịnama kọrị-kọrị tẹ kẹ anga mẹ iḅi tomḅọ opu sọ tẹ fị-fị ye nyana-a nẹngịm.
10Iḅi tomḅọ amịna anama kokoarị, kụma si-sịḅịḅio-sụa atomi si ḅara kẹ ịna aị na mịẹarị.
11Kụrọma kọrịnama kọrịarị ḍụọ-kọrịḅọ tọnwa afịaị nyana tẹ fị ḅa, kụma sọye mịẹ ḅịa aị ḅụ ḅara kẹ suu mẹ anie oḅori mịẹ.
12Si-sịḅịḅio-sụa tomḅọ ḅiiarị ye anie si-aị ḍọkị tẹ mịẹ; kụma karakaraye-mịẹḅọ ḅe ọ̀ sịẹ anga sịẹ-kụrọ wararị.
13Si-sịḅịḅio-sụa tomḅọ ḅe kọn-arị ẹkwẹn ma mie ò kun sịẹmarị, kụma kịnị mingirima-mingirima-a ḅọ mẹ ḅụụ-fụka ḅio amịna ḅụụ pakama-ḅoarị.
14Ị́ gbẹẹ-ye sịrẹrẹ wararị anga anie ị́ ḅịḅị-ḅio paka-ḅo ẹkwẹn na, ị́ ḅara kẹ kọrị ḅo ye na ḅụ: ị́ la kiri mie ị́ ọkị ḅarịye.
15Oḅori-sọarị atomi ọkịarị sakị mamgba ịn karakara ḅụ emi. Ye-nimi atomi datụkụma ye pokiarị.
16Oḅori-ḅọ ịganịarị sakị ala-a ọ̀ mị tẹ kịnị nimiarị. Sịḅịḅio nyana apụ kịnị kẹ ịn mịẹ-simarị ye bala-a.
17Ị́ karakara mẹ ḍuko tẹ ḅẹḅẹ, gbala karakara ḅẹrẹ kọn tẹ, kụma iruo aị aḍụa kẹ kunomarị.
18Kuroma-a tẹ kọn-arị ẹkwẹn inetẹ ogie pẹlẹ sọ-mu lamatẹ ịnọ kịka ḅa, kụma nimi ḅara kẹ kọn ẹkwẹn ma inetẹ gwọ ḅa.
19Iruo nyana ye kpụlụ ḍumo, kụma karakara ḍumo mu ḅẹẹ-sakị ḅẹẹ-sakị laarị.
20Siye tọn-arị apụ ḅiotọn-a siye mie ịna ḅụ paka ḅarịye, kụma nama kọrị iḅiye pịrịarị apụ ḅioḅẹlẹ ḍọkị ẹrị ḅa.
21Gbọrụ siye sọ karakaraye-mịẹapụ ḅụ paka-paka-a, kụma si-sịḅịḅio-sụapụ ma ḅụụ-fụka sikima jen in la-laa.
22KỊNỊNYANAḄỌ ḅe iruo-apụ ḍiki-ḅioḅuarị, kụma amịna ḍuko ḅara mịẹarị apụ ò ḅioḅẹlẹmarị.
23Sịḅịḅio nyana apụ gbọsimearị in nimi ye gboloma ye ḅụ, kụma oḅori-sọarị apụ ịna nimi-a mẹ kẹ ama olokuarị.
24Kụrọ-kọrịnama kụrọ kẹ ị́ pịrị ḅa; ḅụụ-sarasara tẹ kọrịnama kọrị-a ị́ mịẹ tẹ í omoni-sọ ḅa.
25Ḅioḅẹngbọ gbọrụ anga sịẹ-a ị́ ḅụ ḅioḅẹlẹ pẹlẹ-siin ḅa, kụma iḅi ẹkwẹn mịẹ tẹ í siin ḅioḅẹlẹ ḅa.
26Karakaraye-mịẹḅọ mẹ etela kẹ mḅọ ikiaḅọ ḍiearị, kụma si-sịḅịḅio-sụaḅọ ḅe mẹnjị-ḅọrọ-anga mẹ ini maa apụ ma mịẹ tẹ ini etela-iriarị.
27Kọrịnama ḅụ ị́ ḅụụ-sarasara-a ḅẹḅẹ, gbala-gbala í ḅiiarị ye ị́ nyana ḅịa, kụma ị́ kụrọma nama kọrịarị kụma, í ye kọn ḅa.
28Karakara mịẹ anie ḅọrọ mu ḍumo laarị etela si-sịḅịḅio anie ḅọrọ mu fịị laarị etela.
Currently Selected:
Egberima-Ẹkwẹn 12: KBTP
Highlight
Copy
Compare
Share
Want to have your highlights saved across all your devices? Sign up or sign in
(C) The Bible Society of Nigeria