Egberima-Ẹkwẹn 11
11
1KỊNỊNYANAḄỌ ḅe kịnị mingirima ye-tọnye kẹ ye tọn-arị apụ ḍiki-ḅioḅuarị. Kịnị mingirima-a ye-tọn-aị mie ò ḅioḅẹlẹmarị.
2Ḅụụ-gelemarị apụ ma ala-a ịna atọrụ-tuu ḅa.
Kịsị ḅara kẹ ye mịẹarị ḅọ mẹ anie ye nimi ḅọ.
3Í iḅim ḅẹḅẹ, kịnị mingirima-a tẹmẹ mie etela kẹ í ḍiearị. Kịnị inetẹ ḅioḅẹngbọ kẹ ḅụụ ḅụ gbana ḅịa atomi ma ịna kịnị mingirima mẹ ịn ḅaa-gulugulumarị.
4Ị́ fịị ḅarị ene ḅụ ngọ gbọrụ iḅi sọ kẹ ị́ mịẹ ḅịa, kụma kịnị mingirima-mingirima-a ye-mịẹ-ḅara inetẹ í ḍumo ḅọrọma ḅa.
5Kịnị mingirima-mingirima-a ye-mịẹ-ḅara iḅi ḍumo sarasaramarị, kụma si-sịḅịḅio-sụa tomḅọ ḅe ḅarana amịna ḅụụ ḅịkịma ḅa.
6Karakara mịẹ kịnị-mingirima-mingirima-a tomḅọ ḅe pụkọ-pakamaḅoarị, kụma kịnị inetẹ ḅioḅẹngbọ kẹ ḅụụ ḅụ gbana ḅịa tomḅọ ḅe, ọ̀ kọn-arị nyana-ye nyana-ye ḅụụ na-iḅi-a ḍumo mẹ ḍiein sọ tẹ ò kun koroma ḅa.
7Si-sịḅịḅio-sụa tomḅọ ḅe fịịarị sakị, ò ḅiokpọmaye sọ ori na fịịarị. Ngọ ḅụ sịrẹrẹarị ḅiokpọ mẹ ḅo papaaye sọarị.
8Karakaraye-mịẹapụ ma ini in gbaịn ḅọrọmarị ḅụụ-fụka ḅụ anị nwẹnị ḅo si-sịḅịḅio-sụapụ ma laarị.
9Tamụnọ kẹ ye-sịn-a apụ ma ẹkwẹn inetẹ ị́ sima fama ḅa kụma karakaraye-mịẹapụ ma nimi mẹ inetẹ ị́ ḅọrọma ḅa.
10Kịnị mingirima-mingirima-a apụ ma lọkọlọkọ tẹ ḅẹḅẹ ama ḅioḅẹlẹ tẹ, anịsakị in ḍereku owu kọn-arị si-sịḅịḅio-sụa atomi ma fịị sakị.
11Karakaraye-mịẹapụ aḅụụ ḅoarị boma mie opu kẹ ḅo ama pịrịarị ye, kụma si-sịḅịḅio-sụapụ ma ẹkwẹn, ama fama-famam.
12Japụ ḍiki-iderima ḅara kẹ ẹkwẹn-arị ḅọ mẹ anie oḅori-ḅọ. Ị́ sịḅịḅio nyana ḅẹḅẹ, ị́ gbọsime ḅa.
13Kịnị kẹ ọḅụjụ fie ma-ḅọrọarị ḅọ tẹ ịn ḅọịye ḍuko pịrị-pịrị ḅọ ofori, kụma í inetẹ ḅioḅẹngbọ-kẹ-sịrẹrẹ-niḅi ḅọ kẹ ḅiokpọma ḅa.
14Daa-karakarama nyana-a sịẹ ḅịkị ḅa. Tọnwa ḅẹrẹ ḍuko-toluma fiearị paka ḅẹ ye ofori.
15Í tọrụ-nimi-a ḅọ fị saa gbẹẹ ḅẹ mininim ḅẹḅẹ, í tiye-ì-gbo ḅẹẹ ḅa. Ị́ ḅụụ kẹ anị gboloma-a iḅi ị́ pịrị ị́ mịẹ nẹngịm.
16Ḅụụ-ḅẹlẹma ḅara sime ẹrẹḅọ ma kịnị kụn kẹ á pịrịarị, kụma iḅi ḍumo nyana-a ẹrẹḅọ ma á kịnị tọrụ-tuuarị.
Kọrịnama ḅụ ḅụụ-sarasara nyana-a ḅọ mẹ, gbala-gbala igbigi nyana ḅịa; kụma ḅiokpọmatẹ ye mịẹarị ḅọ mẹ, ngọ-kọn ḅa.
17Ị́ iḅi kẹ jụmọ mịẹarị sakị goyegoye, ị́ ḅụụ mie ị́ kẹ mịẹarị. Ị́ kụrọ-kụrọ ḅara kẹ kịnị na mịẹarị ḅẹḅẹ, ị́ ḅụụ mie ị́ ye kẹ lamarị.
18Karakaramatẹ si-sịḅịḅio-sụapụ nyanarị gbọrụ sọye sọ ofori, kụma í kuraye mịẹ-mịẹ, nimi mịnẹ ị́ anị ḅẹ gbẹẹ-ye nyana ḅa.
19Ḅẹḅọ-ḅẹḅọ tẹ tẹmẹ-kụrọma tẹ kuraye mịẹarị ḅọ mẹ mḅọ ḍumo ḅa, kụma ḅẹḅọ-ḅẹḅọ tẹ mḅọ iri-ye mịẹ-a ḅẹḅẹ mḅọ ḍụkụ ḅịa ịgbanịarị ḅọ mẹ, mḅọ fịị ḅa.
20KỊNỊNYANAḄỌ ḅe siye-siye kuromarị apụ ma ḍiki-ḅioḅuarị, kụma ò kuraye mịẹarị apụ ma ḅẹlẹmarị.
21Í inetẹ kẹ karakaraye sọma ḅa mịnẹ si-mịẹapụ fomu-ḅara nyana ḅa, kụma karakaraye-mịẹapụ ma pụkọ-pakaḅo ḅa.
22Ḍiki-tọrụ ḅụ iḅi wararị tẹ ye-nimia ẹrẹḅọ ma kịkarị ye anie kẹ opuropo nini sụa gulu.
23Iḅi atomi ḅiiarị ye sakị mamgba ḅo iḅiye sọarị si-sịḅịḅio-sụapụ in ḅiiarị ye nyanatẹ ḅẹḅẹ, ọrụḅọ-ọrụḅọ ịganịma-ịganịmarị!
24Ja atomi ḅara-sarasara ḅara kẹ ini igbigi na mịẹarị, anịsọ ịn paa nyana ḅakarị osi apụ bala ḅara kẹ anị na mịẹarị, anịsọ ịn paa igoin tọrọkọ-tọrọkọ muarị.
25Ḅara-sarasara ḅara kẹ ye ḍie kịnị pịrịị, anịsakị ị́ lọkọlọkọ ḅa. Ḅarasụa jen-apụ pịrịị, anịsakị ịn ḅarasụa ị́ pịrị ḅa.
26Kịnị mgbọlụ afịaị kobiri kpolima wẹrị anị opu ḅịḅị la ḅẹ sakị koruarị ḅọ woriarị, kụma ini anị pakama-ḅo dẹrịarị ḅọ tokiniarị.
27Iḅi aị kẹ tọrụ-ḅaamarị ḅọ mẹ tomi mḅọ mangịma ḅa, kụma ị́ nwẹnị ḅụụ-fụka ḍọkịarị ḅẹḅẹ, anị mie ị́ pịkị nyana ḅarịye.
28Amịna kọn ngọ ḅụ sịrẹrẹarị apụ ma ḅịkị ḅa, ịrụa kụra aya-ḅịḅị siin-sararị ịnyịnya ọkụ kụma karakaraye-mịẹapụ ịwọ ịnyịnya iḅi ḅara iḅi ḅa.
29Ḅụụ-fụka dogi-ḅo amịna warị pịrịarị ḅọ mẹ, kunoma mḅọ papaa ḅara ọlọ ḅa.
Oḅori-sọarị atomi sakị mamgba ye-nimi atomi afịrịmẹnjịapụ sọ ḅa.
30Karakara mịẹ ḍumo pịrịarị, kụma kụrọ-kụrọ amịẹaị anị siin ọkịarị.
31 #
1 Pit 4.18
Iḅi atomi mịẹ ye tomikiri ḅụ, ini ịna gbẹẹ-ye nyanarị; mie ḅụ í inetẹ nimi ḅa mịnẹ si-sịḅịḅio-sụa si-mịẹapụ ma sọ amịna gbẹẹ-ye nyana ḅa.
Currently Selected:
Egberima-Ẹkwẹn 11: KBTP
Highlight
Copy
Compare
Share
Want to have your highlights saved across all your devices? Sign up or sign in
(C) The Bible Society of Nigeria