Kịẹn-aḅịḅị 36
36
Owiapụ Sime Ereme Fị Ḍuu
1Anịtẹso Giliyadi, anie Maka owiḅọtụḅọ, pịkị Manasẹ taa-owiḅọtụḅọ, pịkị Josẹfụ ile-owiḅọtụḅọ ḅe furo mẹ ḅẹ ḍa awarị-warị asịḅịdapụ ma sọma ḅo Mozizi na, Izirẹlịapụ ma ḅẹ ḍa awarị-warị kẹ tọrọkọ-tarịapụ ma na tọrọkọ kpeki tẹ ẹkwẹnm. 2#Kịẹ 27.7Ini mẹẹ, “KỊNỊNYANAḄỌ ḅe tọn ị̀ nyanaḅọ ḅe pịrị ma apịan sụa ḅụ ò sime sime-anga pịrị kiri kẹ Izirẹlịapụ ma pịrịị tẹ KỊNỊNYANAḄỌ ḅe ḅẹrẹtọn ị̀ nyanaḅọ ḅe pịrịm ò Zelofehadi wamịna iyimbere ḅe ḍuu kẹ ori eremịna-awọmẹ pịrịị. 3Kụma Izirẹlịapụ ma ḅẹ osi afuro ma ḅụ, ḅẹ owiḅọtụḅọ, owiḅọtụḅọ ịn sime ọkị-ọkịị, anị sakị ḅụ, ịna ḍuu mẹ wamịna aḍapụ ma sime-anga ḅụ ye sin mu furo mẹ tẹ ịn sime piri furo mẹ ḅụ sọ tẹ, anie ḅụ wamịna aḍapụ ma sime anga ḅụ ye ọkị so tẹ. 4Anịsakị anị ḅo Izirẹlịapụ ye mịẹ sakị kẹ ḅiokoroma opu tii kọn sakị la sakị, anị sakị ḅụ, ịna ḍuu mẹ nwẹnị mu furo mẹ tẹ ịn sime pịrị furo mẹ ḅụ sọ ḅa, tẹ nwẹnị wamịna aḍapụ ma sime-anga ḅụ ịn fị ḍuu mẹ sịn ḅa.”
5Tẹ Mozizi nwẹnị KỊNỊNYANAḄỌ ḅe ẹkwẹn-ḅịḅị wẹrịtẹ ḅẹẹ ḅara ḅụ tọn Izirẹlịapụ ma pịrị tẹ ḅẹẹ, “Josẹfụ furo ḅẹ owiapụ-awọmẹ ma ḍuko ye mẹ kuram. 6Zelofehadi eremịna-awọmẹ ma gbolomaye ḅụ, miemẹ anie KỊNỊNYANAḄỌ ḅe tọn ye: ‘Yee ini inema tẹ ịn ḅiokoromam iḅitẹịn apụ na sime; kụma ịna ḍaḅọ ḅe furo mẹ ḅẹ furo ngẹrị ḅụ mie ini owiapụ sime ḅarị ye. 7Izirẹlịapụ ma nyana ye mẹ ịn gbọrụ anga saḅama jen anga pịrị ḅịa; kẹ gotẹ ọkọ ḅẹẹarị, Izirẹlịapụ ma ḅụ ọrụḅọ-ọrụḅọ amịna furo ḅụ mḅọ aḍapụ nyana ye fịnamaa. 8Anịsakị ẹrẹḅọtụḅọ goḅọ-goḅọ, tẹ Izirẹlịapụ ma afuro ḅụ ḅẹẹ-furo, ḅẹẹ-furo ḅụ ḍuu fị anga fị anga, árị á ḍa furo mẹ ḅẹ gbọrụ owiḅọ taḅọ sọ ḅa, mịẹtẹ Izirẹlịapụ ma ḅụ ọrụḅọ-ọrụḅọ mḅọ ḍaḅọ nyana ye nyana ḅarị ḅara. 9Mie ḅụ kịnị nyanatẹ gberie-sọ ḅarị gbọrụ furo ḅụ saḅa so jen anga mu ḅịa; kẹ gotẹ ọkọ ḅẹẹarị, Izirẹlị ḅẹ afuro ma, ọrụ furo-furo amịna soku-ḅẹ ye fịnama sịẹma ḅa.’ ”
10Zelofehadi eremịna-awọmẹ ma KỊNỊNYANAḄỌ ḅe tọn Mozizi pịrị ḅara mịẹm; 11kẹ gotẹ ọkọ ḅẹẹarị, Mala na, Tariza na, Hogila na, Milika na, Noha na, Zelofehadi eremịna-awọmẹ ma ịna ḍaḅọ iyimbere amịnapụ awọmẹ mie ini na sime ye. 12Josẹfụ owiḅọtụḅọ Manasẹ afuro ḅẹ owiapụ-awọmẹ mie ini na sime apụ, tẹ ịna ḍuu mẹ ịna ḍaḅọ ḅe furo mẹ ḅẹ furo ḅụ simem.
13Mịna aị ma anie oloko ma na, kụrọ ḅara-ḅio simearị ḅọ sụa oloko ma tẹ KỊNỊNYANAḄỌ ḅe Jeriko ḅụ, Jodanị mẹ akaka, Mohabụ ḅẹ ele mẹ ḅio Mozizi ḅụ tọn Izirẹlịapụ ma pịrị aị ma.
Currently Selected:
Kịẹn-aḅịḅị 36: KBTP
Highlight
Share
Compare
Copy
Want to have your highlights saved across all your devices? Sign up or sign in
(C) The Bible Society of Nigeria
