Kịẹn-aḅịḅị 35
35
Ịn Tọn Livayị Furo-ḅẹ-apụ Ma Pịrị Opu Ama Ma
1 #
Jọs 21.1-42
Jeriko ḅụ, Jodanị mẹ akaka, Mohabụ ḅẹ ele mẹ ḅio, KỊNỊNYANAḄỌ ḅe nwẹnị Mozizi ḅẹẹ, 2“Tọn Izirẹlịapụ ma pịrịị, mịnẹ, ịna anga yọ, ịn nyana anga ma ḅụ, ini opu ama kẹ Livayị furo-ḅẹ-apụ ma pịrịị, ini arị ḅio anga. Anịsakị iḅi osuka kiri ikelema-koro wararị opu ama mie ọ́ kẹ Livayị furo-ḅẹ-apụ ma pịrị ḅarị anga. 3Opu ama ma ịna opu ama sọ tẹ ini arị ḅio anga ḅa, arịḅẹ iḅi osuka-akiri ma sime ịna opu anama na, ḍumotẹ ịn nyana tẹ ḍikiḍikiarị aị na, ịna anama mamgba na pịrịm. 4Iḅi osuka-akiri ma tẹ ọ́ kẹ Livayị furo-ḅẹ-apụ ma pịrị ḅarị akiri ma opu ama mẹ ḅẹ onu la, tẹ anị ḅụ kuḅu oyia asi, mesi oyi finji kẹ ḅele opu ama mẹ ikelema-koro ḅa. 5Opu ama mẹ kẹ ogboku wẹrị ḅara ḅụ, anị ḅio paka-ḅo ḅụ ó kuḅu ẹndẹ sọnọa si finji tọn ịrụa-saakịarị-anga da-mu ḅa, pịkị kuḅu ẹndẹ sọnọa si finji tọn suku-jụ-pakịrị da-mu ḅa, pịkị kuḅu ẹndẹ sọnọa si finji tọn ịrụa-ideriarị-anga da-mu ḅa, pịkị kuḅu ẹndẹ sọnọa si finji tọn ọgọnọ-jụ pakịrị da-mu ḅa; miemẹ iḅi osuka kiri ḅara ḅụ sime ịna opu ama ma pịrị ḅa. 6Opu ama ma tẹ ọ́ kẹ Livayị furo-ḅẹ-apụ ma pịrị aị ma ḅụụ ḅọị sonio opu ama ma sọ ḅa, ó minini bẹkẹma kịnị-ḅaapụ ma pịrị tẹ ịn ḍumo-mangị kọn mu ḅụụ ḅọị ḅẹ anga ma; kẹ arị ḅụ sụa ḅụ ọmịnị opu ama amesi maaịn finji pịrị ḅa. 7Opu ama mamgba tẹ ọ́ kẹ Livayị furo-ḅẹ-apụ ma pịrị ḅarị opu ama arịmgba maa ama fa opu ama amesi oyi finji na arịḅẹ iḅi osuka-akiri na. 8Opu ama ma tẹ Izirẹlịapụ ma nyana ye ḅụ ị́ pịrị ḅarị aị ma, opu afuro ma ḅụ ị́ tọnwa aị ọkị ḅa, kala afuro ḅụ í boowa aị ọkị ḅa, furo-furo ḅụ sime anga mẹ nyana furo mẹ nyana ye la ḅara ḅụ mie ị́ anị ḅẹ opu ama ma kẹ Livayị furo-ḅẹ-apụ ma pịrị ḅarịye.”
Ḅụụ Ḅọị Opu Ama Ma
(Dit 19.1-13; Jọs 20.1-9)
9 #
Dit 19.2-4; Jọs 20.1-9 KỊNỊNYANAḄỌ ḅe nwẹnị Mozizi ḅẹẹ: 10Izirẹlịapụ ma ḅẹẹ, “Ó Jodanị mẹ saḅa-ḅọrọ mu Kenanị ama mẹ ḅio sọ sakị, 11anịtẹrẹmẹ mie ọmịnị opu ama ma ḅụ ḅụụ ḅọị opu ama ma sẹlẹ ọmịna aḅụụ pịrị ḅarịye, mịẹtẹ kịnị-ḅaḅọ ḅe tẹ ḅiotọn-a ḅara ḅụ ḅẹḅọ-ḅẹḅọ ḅaa ḅọ mẹ ḍumo-mangị kọn anịanga mu ḅarị ḅara. 12Opu ama ma gbẹẹfị ḅii ḅọ ḅe ḅụ ḅụụ ḅọị yọ sọ ọ́ pịrị ḅa, mịẹtẹ kịnị-ḅaḅọ ḅe fịị ḅịa nwenii ọ̀ ḅẹrẹkọn kẹ tomina-ogbo mẹ tọrọkọ sịẹsime ḅa. 13Anịsakị opu ama ma tẹ ọ́ pịrị aị ma ọmịna ḅụụ ḅọị sonio opu ama sọ ḅa. 14Ọ́ tẹra opu ama pịrị ḅa Jodanị mẹ ḅẹ ịrụa-saakịarị-anga ḅụ, tẹra opu ama pịkị Kenanị ama mẹ ḅio ḅụụ ḅọị opu ama sọ ḅarị aị. 15Mịna opu ama ma sime ḅụụ ḅọị yọ sọ Izirẹlịapụ ma na, igoniapụ ma na, ini ogbo-ḅio angarị bịan-apụ ma na pịrịm, mịẹtẹ ḅẹ ḅọ, ḅẹ ḅọ tẹ ḅiotọn-a ḅara kẹ kịnị-ḅaḅọ mẹ inetẹ ḍumo-mangị kọn anịanga mu ḅa.”
16“Kụma ori ikulele kẹ mḅọ fomu-gbin, tẹ anie ḅụ mḅọ fịị-fịị, ori anie kịnị-ḅaḅọ; kịnị-ḅaḅọ mẹ ini mḅọ ḅaa ḅa. 17Anịanịa ọ̀ nwẹnị ọ̀ ḅara-ḅio simearị ḍụḅarị tẹ inetẹ tomḅọ ḅaa ḅarịye kẹ mḅọ gbin ḅịkịma tẹ mḅọ fịị-fịị, ori anie kịnị-ḅaḅọ; kịnị-ḅaḅọ mẹ ini mḅọ ḅaa ḅa. 18Anịanịa ọ̀ nwẹnị ọ̀ ḅara ḅụ ori ọlọ tẹ kẹ owu sọarị sịn tẹ inetẹ tomḅọ ḅaa ḅarịye kẹ mḅọ fomu-gbin tẹ mḅọ fịị-fịị, ori anie kịnị-ḅaḅọ; kịnị-ḅaḅọ mẹ ini mḅọ ḅaa ḅa. 19Ọmbie gbẹẹfị ḅii ḅọ ḅe ḅioju sọ kịnị-ḅaḅọ mẹ ḅaa ḅa mḅọ mḅọ na donia sakị. 20Mḅọ nwẹnị ḍiki-ḅioḅu ḅụ ogie kẹ tomḅọ temi, anịanịa kịnị-ḅa ye, anịanịa ye kẹ tomḅọ lama ye kẹ tomḅọ gbin, tẹ sime koru, mịẹtẹ mḅọ fịị ḅarị ḅara ḅẹḅẹ; 21anịanịa fịya-a ḅụ tomḅọ ḅakụ ḅaa; anịrẹ oriḅe tẹ mgbụlụḅa mẹ ḅakụ ḅọ ḅe fịị ḅụ sọ ḅa; ori anie kịnị-ḅaḅọ; ọmbie gbẹẹfị ḅii ḅọ ḅe ori na donia sakị ḅụ ọ̀ ḅaa ḅa.”
22Kụma ọ̀ nwẹnị mḅọ na fịya wararị tẹ bẹkẹma ogie kẹ mḅọ temi anịanịa ye kẹ kịnị lama ye kẹ mḅọ gbin, tẹ sime koru-a, 23anịanịa ḍụḅarị tẹ inetẹ tomḅọ ḅaa ḅarị ḍụḅarị kẹ mḅọ ẹrị-a ḅara kẹ gbin tẹ anị mḅọ la tẹ mịẹtẹ mḅọ fịịm, ori mḅọ na fịya wararị, tẹ pịkị ye kẹ mḅọ lama ḅẹ ḅii-a ḅẹsọ, 24anịtẹso tomina-ogbo mẹ bẹkẹma kịnị-ḅaḅọ ḅe na, ọmbie gbẹẹfị ḅii ḅọ ḅe na ogboku ḅụ mịna kụrọ ḅara-ḅio simearị ḅọ sụa oloko ma wẹrịtẹ sime-ḅara ḍiki ḅẹrẹ mẹ kọn ḅa. 25Anịsakị tomina-ogbo mẹ ọmbie-gbẹẹfị-ḅiiḅọ ḅe ḅara ḅụ nimiatẹ-kịnịḅaḅọ ḅe ḍụa-ḅọrọma ḅa, tẹ tomina-ogbo mẹ siin ọ̀ pịkịma ọ̀ ḅụụ ḅọị opu ama mẹ tẹ ò ḍumo-mangị kọn mu opu ama mẹ mu tẹ ori anị ḅio anga nwenii Sịḅịda-Agbamịẹḅọ ḅe fịị sakị la ḅa. 26Kụma bẹkẹma kịnị-ḅaḅọ ḅe ḅẹ sakị, ḅẹ sakị ḅụ mẹnjị ḅụụ ḅọị opu ama mẹ tẹ ò ḍumo-mangị kọn mu sọ opu ama mẹ ḅẹ oke saḅa-ḅọrọ, 27tẹ ọmbie-gbẹẹfị-ḅiiḅọ ḅe etela-ogbo ọ̀ ḍọkị-ẹrị tẹ nimiatẹ-kịnịḅaḅọ ḅe ḅaam ḅẹḅẹ, ori ọmbie ḅẹrẹ-ḅarasii nyana-a. 28Kẹ gotẹ ọkọ ḅẹẹarị, tomḅọ ḅe ọ̀ ḅụụ ḅọị opu ama mẹ ḅio sime nyanam nwenii Sịḅịda-Agbamịẹḅọ ḅe fịị sakị la; kụma Sịḅịda-Agbamịẹḅọ ḅe fịị ḅọrọ tẹ nimiatẹ-kịnịḅaḅọ ḅe anị ọ̀ ḅụụ-ḅẹlẹ-ḅẹlẹ, ori inetẹ pịkịma-so ori nyana ama mẹ mu ḅa. 29Mịna aị ma kẹẹ-koro wararị oloko na, kụrọ ḅara ḅio sime ḅọ sụa oloko na sọ ọ́ pịrị mu ọmịna aḅụụ ḅụọ-fa-ḅụọ-paka la ḅa ọmịna anga yọ mamgba ḅụ.
30 #
Dit 17.6; 19.15 Ḅẹḅọ-ḅẹḅọ kịnị-ḅaaḅa, ḅẹrẹ kiri sime apụ ịn kẹ ye ẹrị ḅara ḍuko ye ḅụ mie kịnị-ḅaḅọ mẹ ini mḅọ ḅaa ḅarịye; kụma ịn gbọrụḅọ ngẹrị ẹrị tẹ ḍuko ye kẹ gbọrụḅọ-sọ ḅaa ḅịa. 31Anie mẹ sikima, kịnị-ḅaḅọ tẹ ịn ḅaa ḅẹ ḅẹrẹ-ḅarasii pẹlẹ pịrị tẹ ḅo ḅara gberie-sọ ọmịnị mḅọ ḍumo ḅọrọma gotẹ daa-ọkị ḅịa; kụma mḅọ fịị ḅụ sọ ḅa. 32Anịsakị tomḅọ tẹ ḍumo-mangị kọn mu ḅụụ-ḅọị ama sọ tẹ ḅọ, ọmịnị mḅọ ḅara pịkịma amịna ama mu igbigi daa-ọkị ma, Sịḅịda-Agbamịẹḅọ ḅe amụ fịị-a ogbo. 33Ọ́ mị-ḅara kẹ ama mẹ tẹ ọmịnị angarị ama mẹ pilema ḅịa; kẹ gotẹ ọkọ ḅẹẹarị, ọmbie ama mẹ pilemarị; anịsakị anị ḅio sara ọmbie mẹ gotẹ, kẹ inetẹ ama gotẹ agwa-agwa ḅẹẹ tẹ kẹ anị bẹkẹlẹma-bẹkẹlẹma ye ofori, tomḅọ mẹ tẹ ọmbie mẹ ọsụma ḅọ mẹ ọmbie mẹ ḅụ sikima. 34Ọmịnị ama mẹ tẹ ó ḅio ḅụ angarị ama mẹ wọlọma ḅịa, anị ḅẹ ogboku ḅụ mie àrị angarị ye, kẹ gotẹ ọkọ ḅẹẹarị, KỊNỊNYANAḄỌ ḅe Izirẹlịapụ ma ogbo-ḅio ḅụ angarị.
Currently Selected:
Kịẹn-aḅịḅị 35: KBTP
Highlight
Share
Compare
Copy
Want to have your highlights saved across all your devices? Sign up or sign in
(C) The Bible Society of Nigeria
