Ayịzaya 36
36
Asiriya Ḅẹ Apụ Ma Jeruselemu Ẹrẹmarị
(2 Ama 18.13-27; 2 Pkị 32.1-19)
1Hẹzịkaya Juda ama-da tẹ ngei fa jei karama kụra mẹ ḅụ, Sẹnakeribu, Asiriya ḅẹ tomikiri mẹ daarị ḅọ ḅe nwẹnị ọmụ kẹ Juda ḅẹ ama ma tẹ ịn tẹlẹma ọmụ pịrị anga ma paka tẹ arị ọkị fama. 2Anịtẹso ọ̀ tọn ori ọmụ-alapụ ma sịḅịdaḅọ pịrịm ọ̀ Lakisi ḅụ opu ọmụ-ogbo na ọmụ-aị na kẹ Jeruselemu mu tẹ Ama-da Hẹzịkaya ḅẹẹ mịnẹ ọ̀ sịḅị-tuu ọ̀ pịrịị. Ọmụ-alaḅọ ḅe nwẹnị mu ḅọrọ mu ḅịtẹ-ḍoriapụ namakọrịarị anga laarị etela mẹ ḅụ sime, anie in kiri soku tẹ minji ọgọnọ-jụ ḅẹ otolo ḅio mẹnjị mu suku-jụ ḅẹ otolo ḅio sọarị anga mẹ akaka. 3Juda ḅẹ tẹra apụ ori na bịama ḅẹ tẹ paka-ḅom: ama-da warị mẹ ḍikiḍikiarị opu fịrịmẹnjịḅọ ḅe, Ẹlịyẹkịmụ, Hilikaya tụḅọ ḅe; ḅẹrẹ-siri mẹ ḍiri-kẹẹḅọ, Sẹbụna; pịkị pakaye-pakaye kẹ ḍiri ḅio kẹẹarị ḅọ, Joha, Asafụ tụḅọ ḅe na. 4Asiriya ḅẹ opu fịrịmẹnjịḅọ ḅe nwẹnị ḍuko ịn pịrị mịnẹ Asiriya ḅẹ tomikiri mẹ daarịḅọ ḅe nimi ḅẹ-ḅiiarị Ama-da Hẹzịkaya ḅiokpọmarị ye. 5Ọ̀ nwẹnị gbela kụrọma, “Ó kuromarị aro, mịnẹ ẹkwẹn inetẹ ọmụ aka na opu kụrọ na kiri ọkị ḅẹ? Ó kuromarị ḅarasụa ọ́ pịrịtẹ ọ́ kọngọ kụrọma Asiriya pịrị ḅẹ ḅọ tụḅọ? 6#Izi 29.6,7Ọmịnị ọkịarị Ijiputi ḅo ḅarasụa ọ́ pịrị ḅa, kụma aniemẹ kịka ḅarịye anie asịra okporo kẹ mkpara sọma — anị anyị tẹ ị́ ḅara temi ḅarị ya. Anie Ijiputi ḅẹ amadaḅọ kịkarị ḅara, gbọrụḅọ ọ̀ ḅụụ sịrẹrẹarị sakị.”
7Asiriya ḅẹ opu fịrịmẹnjịḅọ ḅe ẹkwẹn tọrọkọ mum, “Anịanịa ó ḍuko ị̀ pịrị ḅẹ mịnẹ ọ́ KỊNỊNYANAḄỌ, ọmịna Tamụnọ ḅe sịrẹrẹ wararị? Ori KỊNỊNYANAḄỌ ḅe tẹkẹ, tẹkẹ ayọ na agbamịẹ-anga ma na mie Hẹzịkaya kan-sara ye, ò ḍuko Juda na Jeruselemu ḅẹ apụ pịrị sakị mịnẹ ọ́ mị agbamịẹ-anga mẹ ngẹrị suku sunsin Tamụnọ pịrịị. 8À tomikiri mẹ daarịḅọ ḅe ẹrẹ ḅụ ọmịnị na ye ḅakụa ḅa. Arị asụ sọnọ ẹndẹ kẹ ọ́ pịrị ḅa, ọmịnị inetẹ arị kpọlị tẹ kẹ mẹnjị ḅẹ owiapụ kịẹn-ḅịḅị ḍọkị pakama-ḅo ḅarị ḅẹḅẹ. 9Ọmịnị ma Asiriya ḅẹ opu fịrịmẹnjịḅọ tẹ iderima tẹịnḅọ sọ ọmịnị mḅọ kuḅu sịẹ ḅịa, tẹ ọmịnị ọkịarị Ijiputi-ḅẹ-apụ ma kirimẹnjị-ọmụarụ ma na ọmụgbin asụ ogbo na kẹ ọ́ fịrịma ḅa. 10Ó kuromarị arị ọmịna sịẹ mẹ koro tẹ anị kan ye mẹ ḅụ KỊNỊNYANAḄỌ ḅe ḅarasụa ofori? KỊNỊNYANAḄỌ ḅe ḅioju ị̀ ḅẹẹm arị owu kẹ anị paka tẹ anị fama.”
11Anịtẹso Ẹlịyakịmụ na, Sẹbụna na, Joha na nwẹnị opu fịrịmẹnjịḅọ ḅe ḅẹẹ, “Aramayịkị ḅịḅị kẹ ẹkwẹn wa pịrịị. Wa anị naarị. Hiburu ḅịḅị kẹ ẹkwẹn ma; onu mẹ ọgọnọ simearị apụ mamgba ḅofa naa.”
12Ọ̀ nwẹnị pakịrị, “Ó kuromarị ọmịnị na amadaḅọ ḅe na kịngẹ mie tomikiri mẹ daarị ḅọ ḅe ị̀ fịrịmam à ḅo ma mamgba ḍuko pịrị ḅẹ apụ? Ẹn-ẹn, arị ẹkwẹn onu mẹ ọgọnọ lẹgị wararị apụ ma pịrịarị, anie anị sime pịrị apụ ma, amịna bịyẹ fịnya fị, pịkị amịna san ye ḅuu ḅẹ apụ ma, ọmịnị ma mịẹ ḅarị gbọrụ ḅara mẹ.”
13Anịtẹso opu fịrịmẹnjịḅọ ḅe nwẹnị sịẹsime tẹ Hiburu ḅịḅị ḅụ oloku, “Ọmịnị Asiriya tomikiri mẹ daarịḅọ ḅe ḍuko ọ́ pịrịarị ye pokii. 14Ori ọmịna aḅeri nụnụarị mịnẹ ọ́ ḍụkụ tẹ Hẹzịkaya oḅori kẹ ọ́ sịn ma. Hẹzịkaya inetẹ ọ́ ḅọrọma ḅịa. 15Ọ́ pịkị ḍụkụ tẹ ori ọ̀ toluma tẹ ọ́ KỊNỊNYANAḄỌ ḅe ḅụ sịrẹrẹ ma. Pịkị kuroma ma mịnẹ KỊNỊNYANAḄỌ ḅe ọ́ ḅọrọma ḅa, ọmịna opu ama mẹ ọkị ḅụ Asiriya tomikiri mẹ daarị ḅọ ḅe ọmụ-ogbo mẹ kiki. 16Hẹzịkaya ḍukoarị ye ó poki ma! Asiriya tomikiri mẹ daarị ḅọ ḅe tọn ọ́ pịrịarị ọmịnị ama mẹ ḅio paka-ḅo tẹ ḅara saakị ọ́ pịrịị. Ọmịnị-mgba ori ọ́ wẹrịso tẹ ọmịnị ọmịna kụrọ aḍụọ ḅio paka-ḅo mgbọlụ fị ḅa, pịkị ọmịna ịla asịn ḅụ kaịn ḅo mgbọlụ na, pịkị ọmịna ḅara-kuḅu ḅẹ asuḅe ḅio ḍuu minji na ḅuu ḅa, 17nwenii tẹ Asiriya tomikiri mẹ daarị ḅọ ḅe ọ́ kẹ ọmịna amakiri mẹ kịka jen anga mu koroma ḅẹ sakị la, anị yọ kụrọ aḍụọ emi tẹ iru kẹ ọ́ pịrị ḅa, tẹ mbịaka pịkị emi tẹ ọ́ kẹ fịturu mịẹ ḅa. 18Ọ́ ḍụkụ tẹ Hẹzịkaya mịẹtẹ ọmịnị oḅori-sọ tẹ kuroma ma mịnẹ KỊNỊNYANAḄỌ ḅe ọ́ pọkọ pakama-ḅo ḅa. Osi asịẹ ma ḅẹ atamụnọ ma ḅẹ gberie tẹ ịna asịẹ ma ḅọrọma ye emi, Asiriya tomikiri mẹ daarị ḅọ ḅe ḅara-ḅio ḅụ? 19Mịọkụ ịn tọ-anga emi, Hamatị na Apadi na ḅẹ atamụnọ ma? Sẹfavemu ḅẹ atamụnọ ma ịn tọ-anga emi? Ịna ḅụ Sameriya ḅọrọma ḅọ emi? 20Tọ sakị ma asịẹ mamgba ḅẹ atamụnọ ma ḅẹ gberie amịna sịẹ ḅọrọma tẹ wamịna tomikiri mẹ daarị ḅọ ḅe ḅara-ḅio ḅụ? Ọkọ kụma tiye ọ́ mịẹ tẹ ó kuromarị mịnẹ KỊNỊNYANAḄỌ ḅe inetẹ Jeruselemu ḅọrọma ḅẹ?”
21Tomi ma nwẹnị gbọsime, Ama-da Hẹzịkaya ḍuko ịn pịrị gbọrụ ḅara mẹ; ẹkwẹn gbọrụmgbọ-sọ ịn kọn-a. 22Anịtẹso Ẹlịyakịmụ na, Sẹbụna na, Joha na nwẹnị ịna akapa kan, kururu ḅụ, tẹ so mu tẹ Asiriya ḅẹ tomikiri mẹ ḅẹ opu fịrịmẹnjịḅọ ḅe ḍuko ye mẹ ḍuko amadaḅọ ḅe pịrị.
Currently Selected:
Ayịzaya 36: KBTP
Highlight
Copy
Compare
Share
Want to have your highlights saved across all your devices? Sign up or sign in
(C) The Bible Society of Nigeria