Ayịzaya 35
35
Fịafịa Si Ofori Etela Mẹ
1Ịkpa mẹ ḍereku ḅa,
tẹ ye so paka, paka-a yọ mẹ ḅụ fịlawa
panga-ḅaa sara ḅa.
2Ịkpa mẹ nume-su tẹ ḍereku ḅụ oloku ḅa;
anị Lẹbanọnị tụndụ ma iḅi ḅara iḅi tẹ Kamẹlị na
Sarọnị na ḅẹ ḍụọ ḍiḅi akiri ma iḅi ḅara
iḅi tẹ nwẹnị fịaị pakama.
Ḅẹḅọ-ḅẹḅọ KỊNỊNYANAḄỌ ḅe iḅi sime-ḅara mẹ ẹrị ḅa,
pịkị ori opu na kụrọ na ẹrị ḅa.
3 #
Hib 12.12
Ịnyọ kẹ lọkọtẹ aḅara ma pịrịị, pịkị ịnyọ-fa ḅụ
gbolokiarị aḅụọ-sịḅị ma sọ.
4Ḍuko ḅio ḅịkị tẹ ḅọ, ḅịkị tẹ ḅọ pịrịị,
“Sịẹ kụrọọ, tẹ ḅalafa ma!
Tamụnọ ị́ pụkọ-pakama ḅẹ ḅoarị,
Ò fomu-ḅara kẹ si kẹ ị́ tọn-arị apụ ma
pịrị ḅẹ ḅoarị.”
5 #
Mat 11.5; Luk 7.22 Tọrụngbọ-pụụntẹ-apụ inetẹ ye ẹrị ḅa,
ḅeri-iningiapụ pịkị ye naa ḅa.
6Ekeliapụ ḍosi-ḍosi sẹkị ḅa,
tẹ inetẹ ẹkwẹn-a apụ ma oloku ḅa ḍereku ḅụ.
Ịkpa mẹ ḅio kuroro puu, puu tẹ minji mẹnjị ḅọrọ ḅa;
7ḅụọ dọkịmarị onwi kiri mẹ ḍaḅa sọ ḅa,
tẹ samụnọ kiri mẹmgba ngụngụḅa, ngụngụḅa
opou osuka kiri mẹ ḅụ gele, geletẹ
asịra so-paka ḅa, piri obiri anga-anga yọ mẹ.
8Anị anga opu etela paka ḅa,
ini anị sịn ḅa, “Fịafịa Si Ofori Etela Mẹ.”
Gbọrụ si-mịẹḅọ sọ anị etela mẹnjị ḅọrọ ye mu ḅịa;
gbọrụ oḅori-ḅọ sọ anị mẹnjịarị apụ ma da-irima ḅịa.
9Ọkụkụ anịanga paka ḅịa
gbọrụ ḅalafama si anama sọ anị etela ḅọrọ ḅịa.
KỊNỊNYANAḄỌ ḅe pụkọ-pakamaḅo tẹ apụ ma anị etela
ḅọrọ so ama mu ḅa.
10In ḅioḅẹlẹ kẹ mu Jeruselemu la ḅa;
nume-suarị, oloku-oloku ḍerekuarị.
In ḅioḅẹlẹ mu ḅẹẹ-sakị ḅẹẹ-sakị la ḅa,
kururu na ḅioḅẹngbọ-si na ḅarị ịn la-a gbamasom.
Currently Selected:
Ayịzaya 35: KBTP
Highlight
Copy
Compare
Share
Want to have your highlights saved across all your devices? Sign up or sign in
(C) The Bible Society of Nigeria